మారుతున్న ఆహారపు అలవాట్లు, ఎక్కువసేపు కూర్చుని పని చేయడం వంటి కారణాల వల్ల చాలా మంది అధిక బరువుతో బాధపడుతున్నారు. ఈ క్రమంలో వెయిట్లాస్ కోసం ప్రయత్నించేవారు కఠినమైన డైట్ పాటిస్తుంటారు. ఇలాంటి వారు జొన్నదోసెలు తినడం వల్ల మంచి ఫలితం ఉంటుందట. ఈ స్టోరీలో చెప్పిన విధంగా దోసెలు చేస్తే కేవలం రెండు పదార్థాలు సరిపోతాయి. అలాగే ఈ జొన్న దోసెలు ఎంతో మృదువుగా వస్తాయి. షుగర్, బీపీ వంటి అనారోగ్య సమస్యలతో బాధపడేవారు కూడా వీటిని తింటే మంచి ఫలితం ఉండొచ్చు. మరి ఈజీగా ఈ జొన్న దోసెలు ఎలా చేయాలో ఇప్పుడు చూద్దాం.
కావాల్సిన పదార్థాలు :
అటుకులు – పావుకప్పు
జొన్నలు – కప్పు
ఉప్పు – రుచికి సరిపడా
నూనె – కొంచెం
తయారీ విధానం :
ముందుగా ఒక మిక్సింగ్ బౌల్లో జొన్నలు, అటుకులు తీసుకోండి. వీటిని రెండుసార్లు శుభ్రంగా కడిగి రాత్రంతా నీటిలో నానబెట్టుకోండి. మీరు ఈ జొన్న దోసెలు ఉదయం బ్రేక్ఫాస్ట్లోకి చేసుకోవాలనుకుంటే రాత్రంతా నానబెట్టుకోండి. ఒకవేళ నైట్ డిన్నర్లోకి దోసెలు వేసుకోవాలనుకుంటే పగలు జొన్నలను నానబెట్టుకోండి.
ఇలా నైట్ మొత్తం నానబెట్టుకున్న జొన్నలు, అటుకులను ఒక మిక్సీ గిన్నెలోకి తీసుకోండి. ఇందులో కొద్దికొద్దిగా నీళ్లు పోసుకుంటూ మెత్తగా మిక్సీ పట్టుకోవాలి.
దోసెల పిండి మెత్తగా రుబ్బుకున్న తర్వాత ఒక మిక్సింగ్ బౌల్లోకి తీసుకోండి. ఇందులో రుచికి సరిపడా ఉప్పు, వాటర్ వేసుకుని పిండిని చక్కగా కలుపుకోవాలి. పిండి మరీ గట్టిగా, పల్చగా కాకుండా దోసెల పిండిలా ఉండాలని గుర్తుంచుకోండి.
ఈ పిండిని ప్రిపేర్ చేసుకొని అరగంటపాటు పక్కన ఉంచుకోవాలి.
ఇప్పుడు స్టవ్పై దోసె పెనం పెట్టుకొని వేడి చేసుకోవాలి. అది హీట్ అయ్యాక కాస్త ఆయిల్ అప్లై చేసి గరిటెతో కొద్దిగా పిండిని తీసుకొని వీలైనంత పలుచగా దోసెలా వేసుకోవాలి.
స్టవ్ మీడియం ఫ్లేమ్లో అడ్జస్ట్ చేసి దోసెను కాసేపు కాల్చుకోండి. తర్వాత దోసె పైన అంచుల వెంబడి కొద్దిగా ఆయిల్ అప్లై చేసుకొని రెండు వైపులా కాల్చుకోండి.
అయితే, ఈ జొన్న దోసెలు ఎర్రగా క్రిస్పీగా రావు. కాబట్టి, దోసె కాస్త రంగు మారగానే ఒక ప్లేట్లోకి తీసుకోండి. వెయిట్ లాస్ కోసం ప్రయత్నించేవారు నూనె వేసుకోకుండా కూడా దోసెలు కాల్చుకోవచ్చు.
అంతే ఇలా సింపుల్గా చేసుకుంటే హెల్దీ జొన్న దోసెలు రెడీ!
బరువు తగ్గాలని ప్రయత్నించే వారు తరచూ జొన్న దోసెలు తినడం వల్ల మంచి ఫలితం ఉంటుందట. జొన్న దోసెలు టమోటా, అల్లం చట్నీతో తింటే రుచి చాలా బాగుంటాయి.
