ప్రముఖ మొబైల్‌ తయారీ సంస్థ వన్ప్లస్ (OnePlus) నుంచి సరికొత్త ఫ్లాగ్‌షిప్‌ 5జీ స్మార్ట్‌ఫోన్‌లు వచ్చేశాయి. మంగళవారం నిర్వహించిన వింటర్‌ లాంచ్‌ ఈవెంట్‌లో వన్ప్లస్ 13 (OnePlus 13), వన్ప్లస్ 13ఆర్‌ (OnePlus 13R) స్మార్ట్‌ఫోన్‌లను లాంచ్‌ చేసింది. వీటితోపాటు రూ.11,999తో వన్ప్లస్ బడ్స్‌ ప్రో3 (OnePlus Buds Pro3) వైర్‌లెస్‌ ఇయర్‌ బడ్స్‌ను విడుదల చేసింది. ఫోన్లకు నాలుగేళ్ల ఓఎస్‌ అప్‌డేట్లు, ఆరేళ్ల సెక్యూరిటీ అప్‌డేట్లు ప్రకటించింది.
వన్ప్లస్ 13..
వన్ప్లస్ 13లో స్నాప్‌డ్రాగన్‌ 8 ఎలైట్‌ చిప్‌ అమర్చారు. ఏఐ పవర్డ్‌ ఆక్సిజన్‌ 15 ఆపరేటింగ్‌ సిస్టమ్‌తో తీసుకొచ్చారు. 6.82 అంగుళాల 2కే ఓఎల్‌ఈడీ, 120Hz రిఫ్రెష్‌ రేట్‌ డిస్‌ప్లే ఉంది. ఐపీ69/ఐపీ68 రేటింగ్‌, ఆక్వా టచ్‌ 2.0తో తీసుకొచ్చారు. 4500 నిట్స్‌ పీక్‌ బ్రైట్‌నెస్‌ ఉంది. 32 ఎంపీ సెల్ఫీ కెమెరా, వెనుకవైపు 50 ఎంపీ సోనీ ఎల్‌వైటీ 808 మెయిన్‌, 50 ఎంపీ అల్ట్రావైడ్‌, 50 ఎంపీ ట్రైప్రిజమ్‌ టెలిఫొటో కెమెరాలు, ఉన్నాయి. 6000 ఎంఏహెచ్‌ బ్యాటరీతో 100 వాట్‌ సూపర్‌వూక్‌ ఫాస్ట్‌ ఛార్జింగ్, 50 వాట్‌ వైర్‌లెస్‌ ఛార్జింగ్ సపోర్ట్‌ చేస్తుంది.
12 జీబీ ర్యామ్‌+ 256 జీబీ ఇంటర్నల్‌ స్టోరేజీ వేరియంట్‌ ధర రూ.69,999, 16 జీబీ+ 512 జీబీ ధర రూ.76,999, 24 జీబీ+ 1 టీబీ ధరను రూ.89,999గా నిర్ణయించారు. ఐసీఐసీఐ కార్డుపై రూ.5 వేల తగ్గింపు ఆఫర్‌ ఉంది. అదేవిధంగా రూ.7వేల వరకు అదనపు ఎక్స్ఛేంజీ ఆఫర్లు ఉన్నాయి. జనవరి 10 నుంచి ఈ ఫోన్లు మార్కెట్‌లో అందుబాటులోకి రానున్నాయి. మిడ్‌నైట్‌ ఓషన్‌, ఆర్కిటిక్‌ డాన్‌, బ్లాక్‌ ఎక్లిప్స్‌ రంగుల్లో లభ్యం కానున్నాయి.
వన్ప్లస్ 13 ఆర్‌..
స్నాప్‌డ్రాగన్‌ 8జెన్‌ 3 ప్రాసెసర్‌ ఇచ్చారు. 6.78 అంగుళాల 1.5కే ఓఎల్‌ఈడీ, 120Hz రిఫ్రెష్‌ రేట్‌ డిస్‌ప్లేతో వచ్చింది. ఏఐ పవర్డ్‌ ఆక్సిజన్‌ 15 ఆపరేటింగ్‌ సిస్టమ్‌ ఆధారంగా పనిచేస్తుంది. 6000 ఎంఏహెచ్‌ బ్యాటరీతో 80 వాట్‌ సూపర్‌వూక్‌ ఛార్జింగ్ సపోర్ట్‌ చేస్తుంది. 16 ఎంపీ సెల్ఫీ కెమెరా, వెనుకవైపు 50 ఎంపీ సోనీ ఎల్‌వైటీ 700 ప్రధాన కెమెరా, 8 ఎంపీ అల్ట్రావైడ్‌, 50 ఎంపీ టెలిఫొటో కెమెరాలు ఉన్నాయి. ఐపీ65 రేటింగ్‌, ఆక్వా టచ్‌ 2.0 కల్పించారు.
12 జీబీ+ 256 జీబీ వేరియంట్‌ ధర రూ.42,999, 16 జీబీ+ 512 జీబీ ధర రూ.49,999గా నిర్ణయించారు. ఐసీఐసీఐ కార్డుపై రూ.3 వేల తగ్గింపు ఉంది. రూ.4వేల వరకు అదనపు ఎక్స్ఛేంజీ ఆఫర్‌ ప్రకటించారు. జనవరి 13 నుంచి విక్రయాలు ప్రారంభం కానున్నాయి. ఆస్ట్రల్‌ ట్రయల్‌, నెబ్యులా నొయిర్‌ రంగుల్లో ఈ ఫోన్లు లభ్యం కానున్నాయి.
