జీర్ణ సమస్యలతో పోరాడుతున్నారా? చియా సీడ్ స్మూతీలు దీనికి పరిష్కార మార్గం. ఈ చిన్న గింజలు జీర్ణక్రియకు అవసరమైన పోషకాలతో నిండి ఉంటాయి.
ఈ రోజుల్లో మనం తినే అస్తవ్యస్తమైన ఆహారం వల్ల అజీర్తి, మలబద్ధకం, గ్యాస్ వంటి జీర్ణ సమస్యలు సర్వసాధారణమైపోయాయి. ఈ సమస్యలకు ఆయుర్వేద, లేదా ఓవర్-ది-కౌంటర్ మందులు తాత్కాలిక ఉపశమనాన్ని ఇస్తాయి కానీ, మీరు ఎప్పుడైనా చియా విత్తనాలను ప్రయత్నించారా? ఈ చిన్న గింజలు చూడ్డానికి అంత ప్రభావవంతంగా అనిపించకపోవచ్చు, కానీ వాటిలో ఫైబర్, ఒమేగా-3 ఫ్యాటీ ఆమ్లాలు, యాంటీ-ఇన్ఫ్లమేటరీ గుణాలు పుష్కలంగా ఉన్నాయి. రోజూ ఒక చియా సీడ్ స్మూతీ తాగడం వల్ల మీ జీర్ణవ్యవస్థ సరైన ట్రాక్లో ఉంటుంది. ఇవి క్రమబద్ధమైన మల విసర్జనకు సహాయపడి, పేగు ఆరోగ్యాన్ని మెరుగుపరుస్తాయి. ఇది మీ జీర్ణక్రియకు కావలసిన శక్తిని అందించే ఒక సులభమైన, సహజమైన మార్గం.
చియా సీడ్స్ జీర్ణక్రియకు ఎలా సహాయపడతాయి?
బరువు తగ్గడానికి ఉపయోగపడే చియా సీడ్స్లో పేగు ఆరోగ్యాన్ని మెరుగుపరిచే గుణాలు కూడా ఉన్నాయని చెబుతున్నారు ప్రముఖ డైటీషియన్ సిమ్రత్ కథూరియా. ‘హెల్త్ షాట్స్’కి ఇచ్చిన ఇంటర్వ్యూలో ఆమె “చియా సీడ్స్లో ఫైబర్, ఒమేగా-3, ఇంకా ఇతర ముఖ్యమైన పోషకాలు పుష్కలంగా ఉన్నాయి. ఇవి అనేక విధాలుగా జీర్ణక్రియను మెరుగుపరుస్తాయి” అని తెలిపారు. అవేంటో తెలుసుకుందాం.
ఫైబర్తో నిండిన గింజలు:
చియా సీడ్స్లో కరిగే ఫైబర్ ఉంటుంది. ఇది నీటిని పీల్చుకుని, జీర్ణవ్యవస్థలో జెల్ లాంటి పదార్థంగా మారుతుంది. ఇది పేగు కదలికలను క్రమబద్ధం చేసి, ఆరోగ్యకరమైన పేగులకు తోడ్పడుతుంది.
ఒమేగా-3తో ఇన్ఫ్లమేషన్కి చెక్:
చియా గింజలలోని ఒమేగా-3 ఫ్యాటీ యాసిడ్స్ పేగుల్లోని ఇన్ఫ్లమేషన్ను తగ్గిస్తాయి. “ఇరిటబుల్ బవెల్ సిండ్రోమ్ (IBS) వంటి సమస్యలు ఉన్నవారికి చియా సీడ్స్ గొప్పగా సహాయపడతాయి. ఇన్ఫ్లమేషన్ తగ్గడం వల్ల జీర్ణక్రియ సజావుగా సాగుతుంది, పోషకాలు మెరుగ్గా శరీరానికి అందుతాయి” అని కథూరియా చెప్పారు.
హైడ్రేటింగ్ జెల్ లా పనిచేస్తాయి:
నీటిలో నానబెట్టినప్పుడు చియా విత్తనాలు జెల్ లా మారి, శరీరాన్ని హైడ్రేటెడ్గా ఉంచుతాయి. ‘జెల్స్’ అనే పత్రికలో ప్రచురితమైన ఒక అధ్యయనం ప్రకారం, ఇవి హైడ్రేషన్ను మెరుగుపరచడమే కాకుండా, మలాన్ని మృదువుగా చేసి, జీర్ణక్రియను సులభతరం చేస్తాయి.
ప్రీబయోటిక్ గుణాలు:
“చియా సీడ్స్ ప్రీబయోటిక్గా పనిచేసి, మన పేగుల్లోని మంచి బ్యాక్టీరియాకు ఆహారాన్ని అందిస్తాయి” అని కథూరియా వివరించారు. ఆరోగ్యకరమైన మైక్రోబయోమ్ మంచి జీర్ణక్రియకు, పోషకాల శోషణకు, బలమైన రోగనిరోధక వ్యవస్థకు తోడ్పడుతుంది.
మలబద్ధకం నుంచి ఉపశమనం:
మలాన్ని సులభంగా బయటకు పంపడానికి సహాయపడటం ద్వారా చియా విత్తనాలు మలబద్ధకాన్ని గణనీయంగా తగ్గిస్తాయి. ‘ఫుడ్ సైన్స్ అండ్ న్యూట్రిషన్’ పత్రికలో ప్రచురించిన ఒక అధ్యయనం ప్రకారం, చియా గింజలు మలం యొక్క స్థిరత్వాన్ని, ఫ్రీక్వెన్సీని మెరుగుపరుస్తాయి. దీనివల్ల ఇవి ఆరోగ్యకరమైన జీర్ణక్రియకు ఒక అద్భుతమైన, సహజమైన నివారణగా పనిచేస్తాయి.
చియా సీడ్ స్మూతీలు ఇంట్లో ఎలా తయారు చేసుకోవాలి?
జీర్ణక్రియను మెరుగుపరచుకోవడానికి, ఈ మూడు సులభమైన చియా సీడ్ స్మూతీ రెసిపీలను ప్రయత్నించండి.
1. అరటిపండు-అల్లం చియా స్మూతీ:
ఒక అరటిపండు, ఒక టీస్పూన్ తురిమిన అల్లం, ఒక టేబుల్స్పూన్ చియా సీడ్స్, అర కప్పు పెరుగు, అర కప్పు బాదం పాలు కలపండి. చియా గింజలు కొద్దిగా గట్టిపడటానికి 5-10 నిమిషాలు ఆగి, ఆ తర్వాత తాగండి.
2. బెర్రీ-కెఫిర్ చియా స్మూతీ:
అర కప్పు బెర్రీలు, ముప్పావు కప్పు కెఫిర్, ఒక టేబుల్స్పూన్ చియా సీడ్స్, కొద్దిగా తేనెను మిక్సీలో వేసి మెత్తగా బ్లెండ్ చేయండి. ఈ ప్రోబయోటిక్-రిచ్ చియా సీడ్ స్మూతీ పేగు ఆరోగ్యానికి, బరువు తగ్గడానికి చాలా ఉపయోగపడుతుంది
3. మామిడి-పెరుగు చియా స్మూతీ:
అర కప్పు మామిడి ముక్కలు, అర కప్పు గ్రీక్ యోగర్ట్, ఒక టేబుల్స్పూన్ చియా సీడ్స్, అర కప్పు కొబ్బరి నీళ్లు/పాలు కలిపి బ్లెండ్ చేయండి. ఈ క్రీమీ స్మూతీ జీర్ణక్రియకు చాలా మంచిది.
చియా సీడ్స్ను ఇతర మార్గాలలో ఎలా తీసుకోవాలి?
చియా సీడ్స్ కేవలం స్మూతీలలోనే కాకుండా, రోజువారీ భోజనంలో కూడా సులభంగా చేర్చుకోవచ్చు. అవేంటో చూద్దాం.
పెరుగులో కలిపి: పెరుగులో చియా సీడ్స్ చల్లుకోండి. రుచి కోసం కివి, అవిసె గింజలను కూడా కలుపుకోవచ్చు. ఇది జీర్ణక్రియకు సహాయపడటమే కాకుండా, ఎక్కువసేపు కడుపు నిండినట్లు అనిపిస్తుంది.
చియా నిమ్మరసం: మీ సాధారణ నిమ్మరసంలో ఒక స్పూన్ చియా సీడ్స్ కలిపి తాగండి. ఇది రోజు మొత్తం హైడ్రేటెడ్గా, జీర్ణవ్యవస్థను మెరుగుపరుస్తుంది.
ఓట్మీల్తో కలిపి: ఓట్మీల్లో చియా సీడ్స్ను కలపడం వల్ల క్రమబద్ధమైన మల విసర్జన సాధ్యమవుతుంది. ఇది చాలా సంతృప్తికరమైన బ్రేక్ఫాస్ట్గా ఉంటుంది.
