స్టాక్ మార్కెట్లలో పెట్టుబడులు కాస్త రిస్క్ అన్న సంగతి తెలిసిందే. ఇక్కడ రిస్క్ తగ్గించుకునేందుకు.. దీనికి ప్రత్యామ్నాయంగా మ్యూచువల్ ఫండ్స్ పథకాల్లో పెట్టుబడులు పెట్టేందుకు మొగ్గు చూపుతుంటారు. ఇందులో చాలా స్కీమ్స్ మంచి రిటర్న్స్ ఇచ్చినవి ఉన్నాయి. పాస్ట్ రిటర్న్స్ ఆధారంగా ఏ స్కీమ్.. వార్షిక ప్రాతిపదికన ఎంత రాబడి ఇచ్చిందనేది చూసుకొని ఇన్వెస్ట్ చేస్తుండాలి. ఇక్కడ కూడా ఆర్థిక నిపుణుల సలహా తీసుకోవడం ద్వారా మంచి బెనిఫిట్స్ పొందొచ్చు. రిస్క్ లేకుండా రిటర్న్స్ అందుకోవచ్చు. వీటిల్లో కూడా లంప్ సమ్ లేదా సిప్ విధానంలో పెట్టుబడి పెట్టొచ్చు. సిప్ అంటే నెలనెలా నిర్దిష్ట మొత్తం పెట్టుబడి అన్న మాట. ఒకేసారి పెద్ద మొత్తంలో ఇన్వెస్ట్‌మెంట్ కాస్త కష్టంగానే ఉంటుంది. దీంతో సిప్‌పై ఆసక్తి చూపిస్తుంటారు.
ఇక్కడ మీ పెట్టుబడి, కాల వ్యవధి, వార్షిక రాబడి అంచనా .. ఇవన్నీ మీ రిటర్న్స్ ఎంత అనేది నిర్దేశిస్తాయి. ఇక్కడ ఎంత ఎక్కువ కాలం ఇన్వెస్ట్ చేస్తే.. అంత ఎక్కువ రిటర్న్స్ వస్తాయి. ముఖ్యంగా కాంపౌండింగ్ ఎఫెక్ట్ కారణంగానే సంపద ఏటా పెరుగుతూ పోతుంటుంది. సాధారణంగా ఈక్విటీ మ్యూచువల్ ఫండ్స్ చాలా వరకు సగటున ఏడాదికి 12-15 శాతం చొప్పున రాబడి అందిస్తున్నాయి. ఇప్పుడు మనం రూ. 5 వేలు, రూ. 10 వేల సిప్ ద్వారా రూ. కోటి నిధి సృష్టించేందుకు ఎన్ని సంవత్సరాలు పడుతుందో తెలుసుకుందాం.
వార్షిక ప్రాతిపదికన మనం సగటున 12 శాతం రిటర్న్స్ అంచనా వేస్తూ.. ప్రతి సంవత్సరం సిప్ మొత్తాన్ని 10 శాతం పెంచుకుంటూ పోతే ఎంత రాబడి వస్తుందో తెలుసుకుందాం. నెలకు రూ. 10 వేల సిప్ చేస్తూ.. 10 శాతం పెంచుకుంటూ పోతుంటే.. 16 సంవత్సరాల్లోనే రూ. కోటికిపైగా సంపాదించొచ్చు. ఇక్కడ పెట్టుబడి రూ. 43.13 లక్షలు కాగా.. వడ్డీ రూపంలో రూ. 60.06 లక్షలు వస్తుంది. మొత్తం కోటికిపైగా సంపాదించొచ్చు.
ఇంకా రూ. 5 వేల సిప్ చేస్తూ పోతే ఏటా 10 శాతం సిప్ మొత్తం పెంచితే.. 21 సంవత్సరాల్లో 12 శాతం వార్షిక రిటర్న్స్ లెక్కన కోటి సంపాదించొచ్చు. దీంట్లో పెట్టుబడి మొత్తం రూ. 38.40 లక్షలు అవుతుంది. వడ్డీ రూపంలోనే ఇక్కడ రూ. 77.96 లక్షలు అవుతుంది. ఇలా మొత్తంగా రూ. కోటికిపైగా అందుతుంది. నెలకు రూ. 1000, 2 వేలు, 3 వేలు ఇలా తోచినంత కూడా పెట్టుబడి పెడుతూ పోవొచ్చు. దీనిపైనా ఏటా సిప్ మొత్తం పెంచుకోవచ్చు.
