వెల్లుల్లికి ఆయుర్వేదంలో ఎంతో ప్రాముఖ్యత ఉందని ప్రత్యేకంగా చెప్పాల్సిన పనిలేదు. పురాతన కాలం నుంచి వెల్లుల్లిని ఔషధ గుణాలకు పెట్టింది పేరు. ఇందులోని యాంటీ ఆక్సిడెంట్స్‌, పోషకాలు శరీరానికి ఎంతో మేలు చేస్తాయి.
మరీ ముఖ్యంగా ఉదయాన్నే పడగడుపున పచ్చి వెల్లుల్లిని తీసుకోవడం వల్ల శరీరానికి ఎంతో మేలు జరుగుతుందని నిపుణులు అంటున్నారు. ప్రతీరోజూ ఉదయాన్నే ఒక పచ్చి వెల్లుల్లిని తీసుకోవడం వల్ల శరీరంలో జరిగే మార్పు ఏంటో ఇప్పుడు తెలుసుకుందాం..
* చర్మ ఆరోగ్యాన్ని కాపాడడంలో వెల్లుల్లి ఎంతో ఉపయోగపడుతుంది. ఇందులోని యాంటీఆక్సిడెంట్స్‌, యాంటీ బ్యాక్టీరియల్ గుణాలు చర్మాన్ని మెరిసేలా చేస్తాయి. చర్మం నిగనిగలాడే లా చేస్తుంది.
* గుండె ఆరోగ్యాన్ని మెరుగుపరచడంలో కూడా వెల్లుల్లి ఉపయోగపడుతుంది. రోజూ పచ్చి వెల్లుల్లిని తీసుకోవడం వల్ల శరీరంలో చెడు కొలెస్ట్రాల్‌ను తగ్గిస్తుంది. మంచి కొలెస్ట్రాల్‌ను పెంచడంలో ఉపయోగపడుతుంది. రక్తపోటును కంట్రోల్‌ చేయడంలో ఉపయోగపడుతుంది.
* రోగనిరోధక వ్యవస్థను బలోపేతం చేయడంలో వెల్లుల్లి ఉపయోగపడుతుంది. ఇందులోని అల్లిసిన్ అనే సమ్మేళనం జలుబు, దగ్గు మరియు ఇన్ఫెక్షన్లతో పోరాడటానికి సహాయపడుతుంది.
* బరువు తగ్గాలనుకునే వారు వెల్లుల్లిని ఆహారంలో భాగం చేసుకోవాలని నిపుణులు చెబుతున్నారు ఇది జీవక్రియను వేగవంతం చేస్తుంది. ఇది శరీరంలో కొవ్వును వేగంగా కరిగించేలా చేస్తుంది. పచ్చి వెల్లుల్లిని రోజూ ఉదయాన్నే తినడం వల్ల బరువు తగ్గుతారు.
* గ్యాస్, అజీర్ణం, మలబద్ధకం వంటి సమస్యలను దూరం చేయడంలో వెల్లుల్లి ఉయోగపడుతుంది. ఉదయాన్నే ఖాళీ కడుపుతో వెల్లుల్లిని తీసుకుంటే.. గ్యాస్, అజీర్ణం, మలబద్ధకం వంటి కడుపు సమస్యల నుంచి ఉపశమనం కలిగిస్తుంది.
* డయాబెటిస్‌ బాధితులకు కూడా వెల్లుల్లి బాగా పని చేస్తుంది. ప్రతీరోజూ ఉదయాన్నే వెల్లుల్లి రెబ్బను తీసుకుంటే రక్తంలో చక్కెర స్థాయిలను నియంత్రించడంలో ఉపయోగపడుతుంది.
ఇలా తీసుకోండి..
ఉదయం లేచిన తర్వాత వెల్లుల్లి రెబ్బను తీసుకోవాలి. తేనెలో కలుపుకొని తీసుకోవడం వల్ల మరింత ప్రయోజనం ఉంటుంది. అయితే వెల్లుల్లి అలర్జీ ఉన్న వారు దూరంగా ఉండాలని నిపుణులు అంటున్నారు. వెల్లుల్లిని ఎక్కువగా తీసుకోవడం వల్ల కడుపులో చికాకు లేదా ఎసిడిటీ వస్తుంది. గర్భిణీ స్త్రీలతో పాటు ఇతర వ్యాధులకు మందులు వాడే వారు వైద్యులను సంప్రదించిన తర్వాతే వెల్లుల్లి తీసుకోవాలి.
నోట్‌: పైన తెలిపిన విషయాలు కేవలం ప్రాథమిక సమాచారం మేరకు మాత్రమే. ఆరోగ్యానికి సంబంధించి వైద్యుల సూచనలు పాటించడమే ఉత్తమం.
