సాధారణంగా ప్రైవేట్ కంపెనీలలో ఉద్యోగులకు మేనేజ్మెంట్ ద్వారా టార్గెట్లు నిర్దేశించడం ఒక సాధారణ విషయం. ఇచ్చిన సమయంలో టార్గెట్ సాధించిన ఉద్యోగులకు పగారు జీతం, బోనస్, ఇంక్రిమెంట్ లేదా ప్రమోషన్ వంటి ప్రోత్సాహాలు లభిస్తాయి. కానీ కొందరు ఉద్యోగులు టార్గెట్ సాధించలేకపోతే, వారి జీతంలో కట్ చేయడం, హెచ్చరికలు ఇవ్వడం లేదా ప్రోత్సాహాలు నిలిపివేయడం జరుగుతుంది. ఇలా పదేపదే టార్గెట్ మిస్ చేసే ఉద్యోగులను చివరికి ఉద్యోగం నుండి తొలగించవచ్చు. కానీ ఇలాంటి పరిస్థితులకు భిన్నంగా, కేరళలో ఒక ఘోరమైన ఘటన సోషల్ మీడియాలో వైరల్ అవుతోంది.
కొచ్చిలోని ఒక ప్రైవేట్ మార్కెటింగ్ కంపెనీలో పనితీరు తక్కువగా ఉన్న ఉద్యోగులపై అమానుషంగా ప్రవర్తించినట్లు ఒక వీడియో బయటపడింది. ఈ వీడియోలో, టార్గెట్ సాధించని ఉద్యోగుల మెడకు బెల్ట్ కట్టి, కుక్కల వలె మోకాళ్ల మీద నడిపించినట్లు చూపిస్తున్నారు. మరొక వీడియోలో, ఉద్యోగులను శిక్షగా బట్టలు తీసివేయమని బలవంతం చేస్తున్నట్లు కనిపిస్తుంది. అంతేకాకుండా, నేల మీద పడేసిన నాణేలను నాలుకతో తీయమని బలవంతపెట్టడం కూడా వీడియోలో కనిపిస్తోంది.
పోలీసుల ప్రకారం, ఈ వీడియో నాలుగు నెలల క్రితం చిత్రీకరించబడింది మరియు ఇప్పటికే ఆ మేనేజర్ కంపెనీని వదిలేసినట్లు తెలుస్తోంది. ఒక మాజీ మేనేజర్ కంపెనీ యజమానితో సమస్యలు ఉన్నాయని, ఈ వీడియోను శిక్షణా ప్రక్రియలో భాగంగా నటించి చిత్రీకరించారని, కంపెనీ యజమాని పై ప్రతీకారం తీర్చుకోవాలనే ఉద్దేశ్యంతో ఇలా చేసినట్లు పోలీసులకు తెలిసింది. అయితే, పోలీసులు ఈ వీడియోను మోసపూరితమైనదిగా పరిగణించారు.
ఈ వీడియోలు వైరల్ కావడంతో, కేరళ లేబర్ డిపార్ట్మెంట్ (Kerala Labour Department) దీనిపై దృష్టి పెట్టింది. కంపెనీలో జరిగిన అమానవీయమైన వేధింపులపై విచారణ జరపాలని పోలీసులకు ఆదేశించారు. వీడియోలో కనిపించిన ఉద్యోగులను పోలీసులు విచారించగా, వారు ఈ ఘటనకు మాజీ మేనేజర్‌నే బాధ్యులుగా చూపారు. కొంతమంది ఉద్యోగులు, టార్గెట్ సాధించని వారికి ఇలాంటి శిక్షలు విధించేవారని స్థానిక మీడియాతో మాట్లాడారు.
ఇంతలో, హైకోర్టు న్యాయవాది జైసింగ్ దాఖలు చేసిన ఫిర్యాదు ఆధారంగా, కేరళ స్టేట్ హ్యూమన్ రైట్స్ కమిషన్ (Kerala State Human Rights Commission) ఈ సంఘటనపై కేసు నమోదు చేసింది. జిల్లా పోలీసు అధికారికి ఈ విషయంలో నివేదిక సమర్పించాలని కమిషన్ ఆదేశించింది.
