ఆంధ్రప్రదేశ్ ప్రభుత్వం డ్వాక్రా మహిళల కోసం ‘డిజిటల్ లక్ష్మి’ కార్యక్రమం ప్రారంభించింది. ఇది మహిళలకు ఉపాధి కల్పించి, ప్రజలకు ప్రభుత్వ పథకాలపై అవగాహన కల్పిస్తుంది.
ఆంధ్రప్రదేశ్ ప్రభుత్వం డ్వాక్రా మహిళల కోసం మరో కీలక నిర్ణయం తీసుకుంది. మహిళల ఆర్థిక స్వావలంబనను ప్రోత్సహిస్తూ, ప్రజలకు ప్రభుత్వ పథకాలపై సమాచారం అందించేలా ‘డిజిటల్ లక్ష్మి’ పేరుతో ఓ వినూత్న కార్యక్రమానికి శ్రీకారం చుట్టింది. ఈ కార్యక్రమం ద్వారా విద్యావంతమైన డ్వాక్రా మహిళలు తమ స్వస్థలాల్లోనే పనిచేసే అవకాశం పొందనున్నారు. ఇది ఒక వైపు మహిళలకు ఉపాధి కల్పించడమే కాదు, మరోవైపు మధ్యవర్తుల దోపిడీకి చెక్ పెట్టే దిశగా కూడా పనిచేస్తుంది.
ప్రభుత్వాలు ప్రజల సంక్షేమం కోసం ఎన్నో పథకాలను ప్రవేశపెడతాయి. పింఛన్, రేషన్, గృహాల నిర్మాణం, విద్యార్థుల స్కాలర్షిప్లు, వ్యవసాయ భద్రత వంటి అనేక పథకాలు నడుస్తున్నా, వాటి గురించి స్పష్టమైన సమాచారం చాలా మందికి ఉండదు. దరఖాస్తు పూర్తి చేయడం ఎలా? అవసరమైన డాక్యుమెంట్లు ఏవి? ఎవరిని కలవాలి? అనే ప్రశ్నలకు సమాధానం తెలియక, చాలా మంది దళారుల మీద ఆధారపడుతున్నారు. ఫలితంగా దారితప్పిన మార్గాల్లోకి వెళ్ళి, లబ్దిని కోల్పోయే పరిస్థితులు ఏర్పడుతున్నాయి.
ఈ నేపథ్యంలో మహిళల సహాయంతో ప్రజలకు నేరుగా సేవలు అందించేలా ‘డిజిటల్ లక్ష్మి’ విధానాన్ని ప్రభుత్వం ముందుకు తీసుకొచ్చింది. డిగ్రీ లేదా పీజీ చదివిన, డ్వాక్రా సంఘాలలో సభ్యత్వం ఉన్న మహిళలు ఇందులో అర్హులు. వీరిని డిజిటల్ లక్ష్మిలుగా నియమించి, ప్రభుత్వ పథకాలపై ప్రజలకు అవగాహన కల్పించే బాధ్యతలు అప్పగిస్తారు.
ఈ కార్యక్రమంలో భాగంగా మహిళలు తమ ఇంటి వద్దే చిన్న సేవా కేంద్రాన్ని ఏర్పాటుచేసుకోవచ్చు. దీనివల్ల వారు ఇంటిని విడిచి వెళ్లాల్సిన అవసరం లేకుండా, కుటుంబ బాధ్యతలు నిర్వహించుకుంటూనే ఉపాధి పొందే అవకాశం ఉంటుంది. సేవా కేంద్రం కోసం బ్యాంకుల ద్వారా రూ. 2 లక్షల వరకు రుణ సాయం కూడా అందించనున్నారు.
డిజిటల్ లక్ష్మిలుగా పనిచేసే మహిళలు స్థానికంగా ఉన్న ప్రజలకు అవసరమైన ప్రభుత్వ డిజిటల్ సేవలు అందిస్తారు. ఉదాహరణకు, పింఛన్ దరఖాస్తులు, రేషన్ కార్డ్ అప్డేట్లు, ఆరోగ్య పథకాల నమోదు, విద్యాసంబంధిత ఫారమ్లు మొదలైనవి. ఇలా వాళ్లు తమ పరిసరాల్లో ప్రజలకు ప్రభుత్వ సేవలను అందుబాటులోకి తీసుకురావడమే కాకుండా, అవగాహన పెంచే పాత్రను కూడా పోషిస్తారు. ఈ పోస్టులకు ఎంపిక కావాలంటే కనీసం డిగ్రీ పూర్తిచేసి ఉండాలి. కంప్యూటర్ అప్లికేషన్లపై అవగాహన ఉండాలి. మహిళలు దరఖాస్తు చేసుకునే ముందు, ట్రైనింగ్ లేదా ఓరియంటేషన్ కూడా ఇవ్వబోతున్నట్లు సమాచారం. ముప్పై సంవత్సరాల లోపు వయస్సు కలిగిన మహిళలకు ప్రాధాన్యత ఇవ్వనున్నారు.
ఈ కార్యక్రమంపై ఇప్పటికే డ్వాక్రా సంఘాల్లోని మహిళల నుంచి విశేష స్పందన వస్తోంది. “ఇలాంటివి మాకెప్పుడూ అవసరమయ్యే అవకాశాలు. ఇంటి వద్దే ఉద్యోగం, ఇతరులకు సహాయం చేసే అవకాశం, డిజిటల్ పరిజ్ఞానం పెరిగే అవకాశం ఇవన్నీ కలిపి ఇది చక్కటి అవకాశంగా కనిపిస్తోంది” అని పలువురు అభిప్రాయపడుతున్నారు.
అలాగే పూర్వపు దళారుల వ్యవస్థపై కూడా వారు విమర్శలు చేస్తున్నారు. “ఒక పని చేయించుకోవడానికి డబ్బులు ఇవ్వడం, తర్వాత అది పూర్తవకపోవడం.. ఇప్పుడు అలాంటి పరిస్థితులు ఉండవ్. మన ప్రాంతంలోనే మనమే సేవలు ఇస్తే ప్రజలకు మంచి జరుగుతుంది” అని వారు అంటున్నారు.
ప్రభుత్వం ప్రవేశపెట్టిన ‘డిజిటల్ లక్ష్మి’ కార్యక్రమం ఒక వైపు మహిళలకు ఆర్థిక స్వతంత్రతను అందించడమే కాదు, ప్రజలకు ప్రభుత్వ సేవలను వేగంగా, నమ్మకంగా అందించే మార్గంగా మారనుంది. ఇది గ్రామీణ ప్రాంతాల్లో డిజిటల్ పరిజ్ఞానం పెంచడంలో ఒక పెద్ద ముందడుగు అవుతుంది. ఇదే సమయంలో ప్రభుత్వ పథకాలను అసలైన అర్హులకు చేర్చడంలో కీలక పాత్ర పోషించనుంది.
