పండ్లలో రారాజు మామిడి. ఎండలు ఎక్కువగా ఉన్నప్పుడు పండ్ల మార్కెట్లో అత్యధికంగా కనిపించే పండ్లు మామిడి. వేసవిలో వీటి రుచులు ఆస్వాధించకుండా దాదాపు ఎవరూ ఉండలేదు.
ఇవి రుచికే కాదు ఆరోగ్యానికి కూడా ఎంతో మేలు చేస్తాయి. మామిడి పండ్లలో విటమిన్ ఎ, సి పుష్కలంగా ఉంటాయి. ఫైబర్, యాంటీఆక్సిడెంట్లు, సహజ చక్కెరలు ఇందులో అధిక మొత్తంలో ఉంటాయి. అయితే, మామిడి పండ్లు తినడానికి ప్రత్యేక నియమాలు ఉన్నాయి. అవి పాటించకపోతే మంచి కంటే ఎక్కువ హాని చేస్తాయి.
సాధారణంగా మామిడి పండ్లు ఉదయం లేదా మధ్యాహ్నం తినడం ఆరోగ్యానికి మంచిది. అయితే, చాలా మంది రాత్రి భోజనంతో పాటు మామిడిపండును కూడా తింటారు. చాలా మంది జ్యూస్ చేసుకుని కూడా తాగుతారు. అయితే వైద్యుల అభిప్రాయం ప్రకారం, మీరు ఉదయం లేదా మధ్యాహ్నం మామిడి పండ్లు తిన్నప్పటికీ, సూర్యాస్తమయం తర్వాత అంటే సాయంత్రం లేదా రాత్రి సమయంలో మామిడి పండ్లు తినకపోవడమే మంచిది. ఇది తీవ్రమైన శారీరక సమస్యలను కలిగిస్తుందని హెచ్చరిస్తున్నారు.
రాత్రిపూట ఆహారం జీర్ణమయ్యే ప్రక్రియ నెమ్మదిగా జరుగుతుంది. అందుకే మామిడి వంటి పోషకాలు అధికంగా ఉండే పండ్లను తినకూడదు. దీనివల్ల అజీర్ణం, గ్యాస్, కడుపు నొప్పి వంటి సమస్యలు వస్తాయి. రాత్రిపూట మామిడి పండ్లు తినడం వల్ల బరువు పెరుగుతారు. ఎందుకంటే మామిడి పండ్లలో కేలరీలు, చక్కెర అధికంగా ఉంటాయి. రాత్రిపూట ఆహారం సరిగ్గా జీర్ణం కాకపోతే, బరువు పెరిగే అవకాశం ఉంది. మామిడి తినడం వల్ల శరీరంలో శక్తి స్థాయిలు పెరుగుతాయి. అందుకే శరీరం అలసిపోయినా నిద్రపోవాలనుకోదు. రాత్రిపూట మామిడిపండు తినడం వల్ల నిద్రలేమి సమస్యలు పెరుగుతాయి.
