అమెరికా అధ్యక్షుడు డొనాల్డ్ ట్రంప్ విధించిన కొత్త సుంకాల కారణంగా భారతదేశ ఎగుమతులపై తీవ్ర ప్రభావం చూపనుంది. ఇది ప్రధానంగా మన దేశ వ్యాపారులకు, ఎగుమతిదారులకు చాలా దెబ్బ అని చెప్పవచ్చు.
ఈ సుంకాల వల్ల సుమారు $48.2 బిలియన్ విలువైన భారత వస్తువులు ప్రభావితం కాబోతున్నాయని కామర్స్ మంత్రిత్వ శాఖ తాజాగా అంచనా వేసింది.
అంటే దాదాపు రూ. 4.19 లక్షల కోట్ల విలువైన ఎగుమతులు (Trump tariffs US commerce department). ఇది చిన్న విషయం కాదు. చాలా పెద్ద మొత్తమని చెప్పవచ్చు. అయితే ప్రధానంగా ఏ రంగాలపై ప్రభావం ఉంటుంది, ఏంటనే విషయాలను ఇక్కడ తెలుసుకుందాం.
ఏమిటి సుంకాలు?
మీరు షాపింగ్కి వెళ్లినప్పుడు ఒక షర్టు కొనాలనుకుంటే, దానికి ట్యాక్స్ కట్టాలి. అలాగే, ఒక దేశం నుంచి మరో దేశానికి వస్తువులు ఎగుమతి చేస్తే, ఆ వస్తువులపై సుంకం (టారిఫ్) విధిస్తారు. అమెరికా ఇప్పుడు భారతదేశం నుంచి వచ్చే కొన్ని వస్తువులపై 25% సుంకాన్ని ఆగస్టు 7 నుంచి విధించింది. కానీ ఆగస్టు 27 నుంచి మరో 25% సుంకం కూడా యాడ్ చేయనుంది. అంటే, మొత్తం 50% సుంకం. ఇది భారత ఎగుమతులపై తీవ్ర ప్రభావం చూపిస్తుంది.
ఏ రంగాలు ప్రభావితమవుతాయి?
టెక్స్టైల్స్ & దుస్తులు: మన దేశం నుంచి అమెరికాకు వెళ్లే దుస్తులు, బట్టలు ఈ సుంకాల వల్ల ఖరీదైనవిగా మారతాయి. దీంతో అమెరికన్ కొనుగోలుదారులు వియత్నాం, బంగ్లాదేశ్ వంటి దేశాల నుంచి తక్కువ ధరలకు కొనుగోలు చేసే అవకాశం ఉంది.
రత్నాలు & ఆభరణాలు: భారతదేశ ఆభరణాల ఎగుమతుల్లో 30% అమెరికాకు వెళ్తాయి. ఈ సుంకాల వల్ల ఈ రంగం ఎక్కువగా దెబ్బ తినే అవకాశం ఉంది.
ఇంజనీరింగ్ వస్తువులు: ఇనుము, ఉక్కు, ఆటో కాంపోనెంట్స్ వంటివి కూడా ఈ జాబితాలో ఉన్నాయి. ఈ రంగానికి దాదాపు $4-5 బిలియన్ నష్టం వాటిల్లవచ్చని అంచనా.
మెరైన్ ఉత్పత్తులు & రసాయనాలు: రొయ్యలు, రసాయన ఉత్పత్తులు కూడా ఈ సుంకాల బారిన పడతాయి.
- ఫార్మాస్యూటికల్స్ (మందులు), సెమీకండక్టర్లు, ఎనర్జీ ఉత్పత్తులు వంటి కొన్ని రంగాలకు ఈ సుంకాల నుంచి మినహాయింపు ఇచ్చారు. అంటే, మన జనరిక్ మందులు, స్మార్ట్ఫోన్లు ఇప్పటివరకు సేఫ్ అని చెప్పవచ్చు.
ఎందుకు ఈ సుంకాలు?
ట్రంప్ ఈ సుంకాలను విధించడం వెనుక ప్రధాన కారణం. భారతదేశం రష్యా నుంచి చమురు కొనుగోలు చేయడం. అమెరికా దృష్టిలో ఈ కొనుగోళ్లు రష్యా యుద్ధ విధానానికి ఆర్థిక సహాయం చేస్తున్నాయని ఆరోపణ. అంతేకాదు, భారతదేశం అమెరికా వస్తువులపై అధిక సుంకాలు విధిస్తోందని, దీన్ని సమతూకం చేయడానికి ఈ రెసిప్రొకల్ టారిఫ్లను ప్రవేశపెట్టినట్లు ట్రంప్ చెబుతున్నారు. అమెరికాతో మన దేశ వాణిజ్య లోటు (ట్రేడ్ డెఫిసిట్) $45.7 బిలియన్ల వరకు ఉంది. దీన్ని తగ్గించాలని ట్రంప్ భావిస్తున్నారు.
భారత ఆర్థిక వ్యవస్థపై ప్రభావం ఎంత?
ఈ సుంకాల వల్ల మన ఎగుమతులు సుమారు 1.87% తగ్గవచ్చని, GDP పెరుగుదల 0.2-0.5% వరకు తగ్గవచ్చని నిపుణులు అంచనా వేస్తున్నారు. అంటే, మన GDP పెరుగుదల 6.5% నుంచి 6% కంటే తక్కువకు పడిపోవచ్చు. భారత ఆర్థిక వ్యవస్థ ఎక్కువగా దేశీయ మార్కెట్పై ఆధారపడుతుంది కాబట్టి, ఈ ప్రభావం పెద్దగా ఉండకపోవచ్చని కొందరు ఆశాభావం వ్యక్తం చేస్తున్నారు. అయినప్పటికీ చిన్న, మధ్య తరహా సంస్థల (MSMEs), టెక్స్టైల్స్, ఆభరణాల వంటి రంగాలకు కష్టమవుతుంది.
