కొత్తిమీరను ఇంట్లో చిన్న కుండిలో గుప్పెడు ధన్యాలతో సులభంగా పెంచుకోవచ్చు. ఫ్రెష్ ఆకులు, ఆరోగ్యకరమైన వంటకాలు, ఖర్చు తగ్గింపు, పచ్చదనం వంటింటికి లభిస్తుంది.
సాధారణంగా మనం వంటల్లో తరచుగా వాడే కొత్తిమీర ఎప్పుడూ ఫ్రెష్గా దొరకడం కష్టం. మార్కెట్కి వెళ్లి తెచ్చుకునే కొత్తిమీర ఎక్కువ రోజులు నిలవదు, కొన్ని సార్లు వాడకముందే వాడిపోతుంది. అయితే, ఇంట్లోనే కొత్తిమీరను పెంచుకుంటే ఎప్పుడైనా తాజా ఆకులు మన వంటింట్లో లభిస్తాయి. ఆశ్చర్యం ఏమిటంటే, గుప్పెడు ధన్యాలు ఉంటే సరిపోతుంది, వీటితో నెలరోజులు సరిపడా కొత్తిమీర పెంచుకోవచ్చు.
ఇంట్లో కొత్తిమీర పెంచడం చాలా సులభం. మొదట మీరు ఒక చిన్న కుండి లేదా టబ్ సిద్ధం చేసుకోవాలి. నేలతో పాటు కొద్దిగా కంపోస్ట్ కలిపి మిశ్రమం తయారు చేసుకోవాలి. నేల చాలా గట్టిగా ఉండకూడదు, కొంచెం పలుచగా, తేమ ఉండేలా ఉంచితే మొలకలు బాగా వస్తాయి. తరువాత మార్కెట్లో దొరికే ధన్యాలను తీసుకుని స్వల్పంగా నలిపి గింజలు రెండుగా చీలేలా చేయాలి. ఇలా చేస్తే అవి త్వరగా మొలకలు వేస్తాయి.
ఈ ధన్యాలను సిద్ధం చేసిన మట్టి మీద చల్లి, కొద్దిగా మట్టితో కప్పాలి. రోజూ తగినంత నీరు పోస్తే ఒక వారం లోపలే చిన్న మొలకలు కనిపిస్తాయి. సూర్యకాంతి తగినంత వచ్చే ప్రదేశంలో కుండిని ఉంచితే మొక్కలు వేగంగా పెరుగుతాయి. చాలా ఎక్కువ ఎండ పడే ప్రదేశంలో ఉంచితే ఆకులు ఎండిపోతాయి, కాబట్టి సూర్యకాంతి ఉన్నా, చల్లగా ఉండే చోట ఉంచడం మంచిది.
మొక్కలు పెరుగుతున్నప్పుడు మట్టి ఎండిపోకుండా ఎప్పుడూ తడి ఉంచాలి. కానీ నీరు మితిమీరినంతగా పోయకూడదు, లేకపోతే వేర్లు కుళ్లిపోతాయి. మొక్కలు సుమారు మూడు వారాల తరువాత చక్కగా ఎదిగి, ఆకులు పుష్కలంగా వస్తాయి. ఆ సమయానికి మీరు వంటకు కావాల్సినంత కొత్తిమీర తీయవచ్చు. ఆకులను ఒక్కసారి ఎక్కువగా కత్తిరించకుండా, అవసరమైనంత మాత్రమే కోస్తే కొత్త మొగ్గలు వస్తూ మొక్క ఎక్కువ రోజులు పచ్చగా ఉంటుంది.
ఇలా ఒకసారి నాటితే సుమారు నెలరోజులపాటు మీకు ఇంట్లోనే ఫ్రెష్ కొత్తిమీర అందుతుంది. బయట దొరికే ఆకులు కెమికల్స్తో పిచికారీ చేసి ఉండే అవకాశం ఉంటుంది, కానీ ఇంట్లో పెంచుకున్నవి పూర్తిగా సహజమైనవి, ఆరోగ్యకరమైనవి. అదీ కాకుండా ఇంట్లో కొత్తిమీర కుండి ఉంచితే వంటింటికి పచ్చదనం, తాజా వాతావరణం కూడా వస్తుంది.
గుప్పెడు ధన్యాలతో మొదలైన ఈ సులభ ప్రయోగం, మీ వంటింటి ఖర్చు తగ్గించడమే కాకుండా ఆరోగ్యానికి కూడా మేలు చేస్తుంది. ప్రతిరోజూ ఫ్రెష్ కొత్తిమీర తీసుకుని వంటకాల్లో వేస్తే రుచి, వాసన మరింత మెరుగుపడతాయి. కాబట్టి ఇకపై మార్కెట్కి వెళ్లాల్సిన అవసరం లేకుండా, ఇంట్లోనే కొద్దిగా శ్రద్ధ పెట్టి కొత్తిమీర పెంచుకోండి.
(Disclaimer: ఈ ఆర్టికల్ లో అందించిన సమాచారం సాధారణ అంచనాల ఆధారంగా రూపొందించబడింది దయచేసి వాటిని అమలు చేయడానికి ముందు సంబంధిత నిపుణులను సంప్రదించండి)
