చికెన్ను ఫ్రిజ్లో 1–2 రోజులు, డీప్ ఫ్రీజర్లో 9–12 నెలలు నిల్వ చేయొచ్చు. వండక ముందు కడగకూడదు. సరైన నిల్వ లేకపోతే ఆరోగ్యానికి ముప్పు.
ఇప్పుడు ప్రతి ఇంట్లో ఫ్రిజ్ తప్పనిసరి అయిపోయింది. మిగిలిన కూరలు, పండ్లు, పాలు… అన్నింటికంటే ముఖ్యంగా పచ్చి చికెన్ను ఫ్రిజ్లో ఉంచడం చాలా సాధారణం. కానీ చికెన్ను ఎంతసేపు ఫ్రిజ్లో ఉంచితే సురక్షితం? ఎంతకాలం తర్వాత అది చెడిపోతుంది? చాలా మందికి దీనిపై సరైన అవగాహన ఉండదు. చికెన్ అనేది త్వరగా పాడైపోయే ఆహారం కాబట్టి, దానిని తప్పుగా నిల్వ చేస్తే ఆరోగ్యానికి తీవ్రమైన ముప్పు ఏర్పడుతుందని నిపుణులు స్పష్టంగా హెచ్చరిస్తున్నారు.
కొత్తగా కొన్న చికెన్ను సాధారణ ఫ్రిజ్ (రెఫ్రిజిరేటర్)లో ఉంచితే గరిష్టంగా 1 నుండి 2 రోజులు మాత్రమే సురక్షితంగా ఉంటుంది. 48 గంటలలోగా దాన్ని వండడం తప్పనిసరి. మార్కెట్లో ముందే కట్ చేసి ప్యాక్ చేసి ఇచ్చే చికెన్ అయితే ఇంకా తక్కువ సమయం మాత్రమే నిల్వ ఉంటుంది.
చికెన్ను దీర్ఘకాలం నిల్వ చేయాలనుకుంటే డీప్ ఫ్రీజర్లో ఉంచాలి. ఫ్రీజర్లో ప్యాక్ చేసిన చికెన్ 9 నుండి 12 నెలల వరకు తాజాగా ఉంటుంది. చిన్న ముక్కలు ఉంటే దాదాపు 6 నుండి 8 నెలలు నిల్వ చేయవచ్చు.
చికెన్ను ఫ్రీజర్లో ఉంచి తీసి వండకుండా మళ్లీ ఫ్రీజర్లో పెట్టడం చాలా హానికరం. ఇలా చేస్తే బ్యాక్టీరియా వేగంగా పెరిగి తీవ్రమైన ఫుడ్ ఇన్ఫెక్షన్లు వచ్చే అవకాశం ఉంటుంది. ఒకసారి బయటకు తీసి ఉంచిన చికెన్ను మళ్లీ ఫ్రీజ్ చేయరాదు.
చికెన్ను ఎప్పుడూ గాలి లోపలికి రానీయని కవర్ లేదా కంటైనర్లో పెట్టాలి. లూజ్ కవర్లో ఉంచితే ఇతర ఆహారాలకూ ఇన్ఫెక్షన్ వ్యాపించవచ్చు. చికెన్ను ఫ్రిజ్లో కూరగాయలు, పాలు, పెరుగు, పండ్ల దగ్గర ఉంచితే బ్యాక్టీరియా వాటికి కూడా చేరుతుంది. చికెన్కు ప్రత్యేక స్థానం ఉంటే చాలా మంచిది.
బహుళం మంది చికెన్ను వండేముందు కడగడం అలవాటు చేసుకుంటారు. కానీ ఇలా చేస్తే చికెన్లోని బ్యాక్టీరియా నీటి చినుకుల ద్వారా సింక్, కౌంటర్, స్టౌ మీద పాకిపోతుంది. కడగకుండా నేరుగా వండటం సురక్షితం అని నిపుణులు చెబుతున్నారు. వేసవి కాలంలో చికెన్ మరింత వేగంగా పాడవుతుంది. కొనుక్కొని 1–2 గంటలు బయట ఉంచినా చెడిపోయే అవకాశం ఉంది.
చికెన్ పాడైందో ఎలా తెలుసుకోవాలంటే.. దుర్వాసన వస్తే, బూడిద, పసుపు రంగులుగా మారితే, చేతికి అంటుకునేలా జిగటగా ఉంటే, ప్యాకెట్ ఉబ్బిపోయి ఉండటం లాంటి లక్షణాలు కనిపిస్తే అది పాడైపోయిందని అర్థం. అలాంటి చికెన్ను వండినా ప్రమాదం తప్పదు.
మొత్తానికి, పచ్చి చికెన్ నిల్వలో చిన్న తప్పిదమే పెద్ద ప్రమాదానికి దారితీస్తుంది. కాబట్టి ఫ్రిజ్లో ఉంచే విధానం, ఉంచే సమయం తప్పక జాగ్రత్తగా పాటించాలి ఆరోగ్య రక్షణ కోసం.
