ఏపీ ప్రభుత్వం మరో కీలక నిర్ణయం.. ఇక ప్రతీ శుక్రవారం.. వచ్చేస్తారు

వాలంటీర్ల వ్యవస్థ ఎప్పుడో రద్దైపోయిందనీ, వైసీపీయే దాన్ని రద్దు చేసింది అని చెప్పి.. దాన్ని వదిలేసింది. దాని స్థానంలో గ్రామ, వార్డు సచివాలయ ఉద్యోగులతోనే పెన్షన్ల పంపిణీ సహా అన్ని ప్రభుత్వ కార్యక్రమాల్నీ అమలు చేయిస్తోంది. ఇప్పుడు వాలంటీర్ల అవసరం లేకుండా కూడా పనులు అయిపోతున్నాయి. అందువల్ల ప్రజల నుంచి పెద్దగా వ్యతిరేకత రాలేదు. దీనికి తోడు ప్రభుత్వం వాట్సాప్ మన మిత్ర ఛానల్ ద్వారా చాలా రకాల సేవల్ని ప్రజలకు అందుబాటులోకి తెచ్చింది. దాంతో ప్రజలు టెక్నాలజీని వాడేసుకుంటూ.. పనులను పూర్తి చేయించుకుంటున్నారు. ఇప్పుడు ప్రభుత్వం మరో అడుగు ముందుకు వేసింది.

ప్రతీ శుక్రవారం.. మన మిత్ర క్యాంపెయిన్:
ఏపీ ప్రభుత్వం ప్రతీ శుక్రవారం.. మన మిత్ర క్యాంపెయిన్ నిర్వహిస్తుంది. దీని ద్వారా.. ఇంటింటికీ వెళ్లి.. వాట్సాప్ మన మిత్ర యాప్ ఎలా వాడాలో, అందులో ఏయే సర్వీసులు అందుబాటులో ఉన్నాయో గ్రామ, వార్డు సచివాలయ ఉద్యోగులు వివరిస్తారు. కొన్ని సందర్భాల్లో ఇళ్లకు రాలేకపోతే.. గ్రామ, వార్డు సచివాలయాలకు ప్రజలే వెళ్లి పూర్తి వివరాలు తెలుసుకోవచ్చు. ప్రతీ శుక్రవారం ఇది జరుగుతుంది.

ఇంటింటికీ వెళ్లి ప్రచారం:
సచివాలయ ఉద్యోగులు ప్రతీ శుక్రవారం ఇళ్లకు వెళ్లి.. డోర్ కొట్టి.. ఇంట్లో వాళ్లకు తాము ఎందుకు వచ్చిందీ చెబుతారు. ఆ తర్వాత వాట్సాప్‌లో మన మిత్ర యాప్ ఎలా వాడాలో చూపిస్తారు. అందులో ఏయే ప్రభుత్వ సర్వీసులు అందుబాటులో ఉన్నాయో, వాటిని ఎలా పొందాలో చూపిస్తారు. ఆ తర్వాత పాంప్లెట్లు ఇచ్చి.. QR కోడ్ చూపిస్తారు. ప్రజలు ఆ కోడ్ ని స్కాన్ చేసి.. వాట్సాప్ మనమిత్ర వివరాలు పొందుతారు.

ఎక్కడైనా శుక్రవారం నాడు సచివాలయ ఉద్యోగులు రాకపోతే.. ప్రజలే వారికి కాల్ చేసి.. ఎప్పుడొస్తారు అని అడగవచ్చు. వారు టైమ్ చెప్పి వచ్చేస్తారు. ఒకవేళ ఉద్యోగులు రాలేకపోతే.. పంచాయతీ సెక్రెటరీ లేదా వార్డ్ అడ్మినిస్ట్రేటివ్ సెక్రెటరీ కలిసి ఏయే ఇళ్లను కవర్ చెయ్యాలో, ఏవి మిగిలిపోయాయో ఆ వివరాలు రాసుకుంటారు. ఆ ఇళ్లను నెక్ట్స్ శుక్రవారం కవర్ చేస్తారు.