ఈసారి స్మార్ట్ అగ్రికల్చర్ బడ్జెట్.

అందుకు తగ్గట్లే భారీ మొత్తంలో కేటాయింపులను చేయనుంది. కేంద్ర బడ్జెట్ అంచనా ప్రకారం వ్యవసాయ రంగానికి మద్దతును పెంచడానికి దాదాపు రూ.1.50 లక్షల కోట్ల మేర కేటాయింపులు చేయనున్నట్లు తెలుస్తోంది. ప్రస్తుతం 2025-26 అంచనా బడ్జెట్‌లో కేంద్రం రూ.1.37 లక్షల కోట్ల కేటాయింపులను చేసింది.

ఈ కొత్త బడ్జెట్‌లో వ్యవసాయానికి సంబంధించి తాత్కాలిక సబ్సిడీలకు పరిమితం కాకుండా ఉత్పాదకత, మార్కెట్ ఆధారిత వృద్ధి, స్థిరత్వం దిశగా వ్యవసాయాన్ని తీసుకెళ్లే విధాన నిర్ణయాలను చేస్తోంది. ఈ మేరకు కేంద్ర వ్యవసాయ, రైతు సంక్షేమ మంత్రిత్వ శాఖలోని ఒక సీనియర్ అధికారి ఒకరు కొన్ని వివరాలను వెల్లడించారు. ఆయన తెలిపిన వివరాల ప్రకారం, ఈసారి బడ్జెట్‌లో సబ్సిడీ సంస్కరణలు, వాతావరణ రెసిలియంట్ పద్ధతులు, కోల్డ్ ఫుడ్ ప్రాసెసింగ్ మౌలిక సదుపాయాల కల్పన, డిజిటల్ వ్యవసాయం వంటివి ప్రధాన ప్రాధాన్యతలుగా ఉంటాయని అన్నారు.

రూ.6 వేల నుంచి రూ.8 వేలు పెంపు :

అలాగే పశుపోషణ, ఉద్యాన వనాలు, మత్స్య సంపద వంటి అనుబంధ రంగాలపై దృష్టి సారించడం ద్వారా రైతుల ఆదాయాలను గణనీయంగా పెంచేందుకు చర్యలు చేపట్టనుంది. కేంద్ర బడ్జెట్ కోసం ప్రాథమిక నివేదికలు, అంచనాల ఆధారంగా కేటాయింపుల పెంపుదల, డిజిటల్ స్వీకరణ, వాతావరణ స్థితి స్థాపక పద్ధతుల ద్వారా వ్యవసాయ రంగం బలోపేతంపై కేంద్రం దృష్టి సారిస్తోంది. ప్రధానమంత్రి కిసాన్ సమ్మాన్ నిధి కింద ప్రత్యక్ష నగదు ప్రయోజనాల కింద ప్రస్తుతం ఇస్తున్న రూ.6 వేల ఆర్థిక సాయాన్ని రూ.8 వేలకు పెంచనున్నారు. దీంతో చిన్న, సన్నకారు రైతులకు ఈ బడ్జెట్ మద్దతు ఇవ్వనుంది.