బిహార్లోని పూర్ణియాలో సోషల్ మీడియా వేదికగా మొదలైన వివాదం ఒక ఘోర హత్యకు దారితీసింది. మంగళవారం ప్రముఖ వ్యాపారవేత్త, ఫేమస్ బ్లాగర్ సూరజ్ బిహారీని దుండగులు కాల్చి చంపారు.
వెనుక నుండి వచ్చిన నిందితులు ఆయనపై విచక్షణారహితంగా కాల్పులు జరిపారు.
మూడు బుల్లెట్లు తగలడంతో సూరజ్ అక్కడికక్కడే మరణించారు. ఈ దారుణం జరిగి 48 గంటలు గడిచినప్పటికీ, పోలీసులు ఇంకా నిందితులను పట్టుకోలేకపోయారు.
లగ్జరీ లైఫ్ స్టైల్: 28 ఏళ్ల సూరజ్ బిహారీ వ్యాపారవేత్తగా ఉంటూనే సోషల్ మీడియాలో చాలా యాక్టివ్గా ఉండేవారు. ఆయనకు విలాసవంతమైన జీవితం గడపడం అంటే ఇష్టం. సుమారు ₹2.5 కోట్ల విలువైన ‘ల్యాండ్ రోవర్ డిఫెండర్’ కారులో ప్రయాణించేవారు. తన రక్షణ కోసం ₹22 లక్షల విలువైన పిస్టల్ ఉంచుకోవడమే కాకుండా, నెలకు లక్ష రూపాయల జీతంతో ముగ్గురు ప్రైవేట్ సెక్యూరిటీ గార్డులను నియమించుకున్నారు.
వ్యాపార రంగంలో రాణింపు: చిన్నతనం నుండే వ్యాపారంపై ఆసక్తి ఉన్న సూరజ్, 20 ఏళ్ల వయసులోనే తన తండ్రి వ్యాపార బాధ్యతలు చేపట్టారు. ప్రస్తుతం ఆయనకు పూర్ణియాలో 18 మొక్కజొన్న గోదాములు ఉన్నాయి. రియల్ ఎస్టేట్ మరియు బిల్డింగ్ మెటీరియల్ వ్యాపారంలో ఆయన ఏడాదికి ₹15 కోట్ల టర్నోవర్ సాధించే స్థాయికి ఎదిగారు.
హత్యకు అసలు కారణం: ఈ హత్యకు మూలం ఒక ఇన్స్టాగ్రామ్ పోస్ట్ అని తెలుస్తోంది. సూరజ్ తమ్ముడు ఉదయ్ యాదవ్ స్నేహితుడు ఒక అమ్మాయి ఫోటోను సోషల్ మీడియాలో షేర్ చేశాడు. ఆ అమ్మాయి ప్రియుడు స్నేహిల్ ఝా దీనిపై గొడవకు దిగాడు. ఈ గొడవను సర్దిచెప్పడానికి సూరజ్ బిహారీ జనవరి 27 ఉదయం పార్క్ దగ్గరకు వెళ్లారు. అక్కడ స్నేహిల్ ఝా వర్గానికి చెందిన బ్రజేష్ సింగ్ తన వద్ద ఉన్న పిస్టల్తో సూరజ్పై ఐదు రౌండ్ల కాల్పులు జరిపాడు. ఛాతి, కడుపు, ఎడమ చేతికి గాయాలవ్వడంతో సూరజ్ అక్కడికక్కడే కుప్పకూలిపోయారు.
ప్రస్తుతం ఈ కేసులో స్నేహిల్ ఝా, బ్రజేష్ సింగ్, నందు సింగ్లను ప్రధాన నిందితులుగా చేర్చారు. ఆర్జేడీ నేత తేజస్వి యాదవ్ మృతుడి తండ్రికి ఫోన్ చేసి పరామర్శించారు.
