ప్రస్తుతం మారిన ఆహారపు అలవాట్లు, మారిన జీవన శైలి కారణంగా అనేక అనారోగ్య సమస్యలు ఎదుర్కొనాల్సి వస్తుంది. ఇప్పుడు అందరూ ఎదుర్కొంటున్న సమస్యల్లో బీపీ కూడా ఒకటి.
బీపీల్లో రెండు రకాలు ఉంటాయి. ఒకటి హైబీపీ అయితే.. మరొకటి లోబీపీ. హైబీపీ కంటే లోబీపీ మరీ డేంజర్ అని అంటున్నారు ఆరోగ్య నిపుణులు. హైబీపీని తగ్గించే విషయంలో గురించి ఇప్పటికే ఎన్నో విషయాలు తెలుసుకున్నాం. కానీ ఇప్పుడు లోబీపీ గురించి తెలుసుకుందాం. బీపీ అనేది చాప కింద నీరులా శరీరంలో పెరుగుతుంది. ఈ సమస్య ఒక్కసారి వచ్చిందంటే.. అదుపు చేసుకోవడం చాలా కష్టం. ఇందుకు సంబంధించి డైట్‌ని ఖచ్చితంగా ఫాలో అవ్వాలి.
మనిషి ఆరోగ్యం అనేది రక్త పోటు బట్టి ఉంటుంది. శరీరంలో రక్త పోటు సాధారణంగా ఉన్నంతవరకూ ఆరోగ్యంగా ఉంటారు. ఒక్కసారి అదుపు తప్పితే.. ప్రాణాంతకంగా మారుతుంది. సాధారణంగా బీపీ అనేది 120-80 ఉంటుంది. అదే 90-60 ఉంటే దాన్ని లోబీపీగా లెక్కిస్తారు. లోబీపీ కారణంగా.. మెదడు, గుండె, కిడ్నీ, ఊపిరి తిత్తులపై ప్రభావం పడుతుంది. అంతే కాకుండా లోబీపీ ఉన్నవారు ఖచ్చితంగా సమయానికి ఆహారం తీసుకోవాలి. అప్పుడు రక్త పోటు స్థాయిలు అనేవి సమానంగా ఉంటాయి. మరి లోబీపీ ఉన్నవారు ఎలాంటి ఫుడ్స్ తీసుకోవాలో ఇప్పుడు చూద్దాం.
కాఫీ:
లోబీపీతో బాధ పడేవారు.. ఖచ్చితంగా ఆహార నియమాలు పాటించాలి. రక్త పోటును పెంచడంలో కాఫీ బాగా సహాయ పడుతుంది. మీ శరీరంలో బీపీ స్థాయిలు తగ్గినప్పుడు తక్షణమే కాఫీ తాగాలి. కెఫీన్ తీసుకోవడం వల్ల రక్త పోటు స్థాయిలు అనేవి పెరిగి.. రక్త పోటు అనేది సాధారణ స్థాయికి చేరుకుంటుంది.
నీటిని తాగుతూ ఉండాలి:
లోబీపీతో బాధ పడేవారు ఖచ్చితంగా నీటిని తాగుతూ ఉండాలి. శరీరంలో నీటి శాతం తగ్గితే.. బ్లడ్ ప్రెషర్ కూడా తగ్గి పోతుంది. దీంతో కళ్లు తిరగడం, వాంతులు అవడం, నీరసంగా అనిపిస్తుంది. కాబట్టి తగినన్ని నీళ్లు తాగుతూ ఉండండి. నీరు తాగడం వల్ల శరీరం కూడా హైడ్రేట్‌గా ఉంటుంది. అలాగే అప్పుడప్పుడు కొబ్బరి నీళ్లు లేదా నిమ్మ రసం తాగుతూ ఉండండి.
ఉప్పు:
లోబీపీ ఉన్నవారు ఉప్పు ఎక్కువగా ఉండే ఆహార పదార్థాలు తీసుకోవాలి. దీంతో తక్షణమే బీపీ సాధారణ స్థాయికి చేరుకుంటుంది. బీపీ తక్కువగా ఉన్నప్పుడు నిమ్మ రసంలో ఉప్పు కలుపుకుని తాగడం లేదా మజ్జిగ తాగితే మంచి ఫలితం ఉంటుంది. అలాగే లోబీపీ ఉండేవారు బాదం పప్పు తినడం వల్ల బ్లడ్ ప్రెషర్ తిరిగి సాధారణ స్థాయికి చేరుకుంటుంది.
(NOTE: ఇంటర్నెట్‌లో సేకరించిన సమాచారం ఆధారంగా ఈ వివరాలు మీకు అందించటం జరిగింది. ఇందులోని అంశాలు కేవలం అవగాహన కోసం మాత్రమే. తదుపరి జరిగే ఎలాంటి పరిణామాలకు Mannam Web బాధ్యత వహించదు.)
