ఆ మహీంద్రా కారుపై బంపర్ ఆఫర్.. ఏకంగా రూ.2.2 లక్షల వరకూ తగ్గింపు

Wed, 17 Jul, 2024

భారతదేశంలో మహీంద్రా కార్లకు ప్రత్యేక ఫ్యాన్ బేస్ ఉంది. అందువల్ల మహీంద్రా కార్లు అమ్మకాల్లో ఎప్పకప్పుడు రికార్డులను సెట్ చేస్తూ ఉంటాయి. కొన్ని ప్రత్యేక సందర్భాల్లో కొన్ని మోడల్స్ కార్లపై ఇటీవల మహీంద్రా కంపెనీ ఆఫర్లను ఇస్తుంది. మహీంద్రా ఎక్స్‌యూవీ 700 కారు రిలీజ్ చేసి మూడు సంవత్సరాలు అయిన సందర్భంగా మహీంద్రా & మహీంద్రా ఆ కారుపై రూ. 2.2 లక్షల వరకు భారీ తగ్గింపులను ప్రకటించింది. అయితే ఈ తగ్గింపు పరిమిత కాలానికి మాత్రమే అందుబాటులో ఉంటుంది. రేంజ్ టాపింగ్ ఏఎక్స్-7 వేరియంట్లకు మాత్రమే ఈ తగ్గింపు వర్తిస్తుంది. మహీంద్రా ఏఎక్స్-7 శ్రేణి రూ. 21.44 లక్షల ఎక్స్-షోరూమ్ ధరతో ప్రారంభమైంది. ఇప్పుడు తగ్గింపుతో ఈ కారు ధర రూ. 19.69 లక్షలకు లభిస్తుంది. టాప్- స్పెక్స్‌తో వచ్చే ఏఎక్స్-7 లగ్జరీ ఏడబ్ల్యూడీ వేరియంట్ తగ్గింపు ధరతో రూ. 24.99 లక్షలు లభిస్తుంది. ఈ నేపథ్యంలో మహీంద్రా ఎక్స్‌యూవీ 700 గురించి మరిన్ని వివరాలను తెలుసుకుందాం.

తాజాగా తగ్గింపులతో బెంగళూరులో మహీంద్రా ఎక్స్‌యూవీ 700 టాప్-ఆఫ్-ది-లైన్ ఏఎక్స్-7 ఏడబ్ల్యూడీ డీజిల్ వేరియంట్ ఆన్-రోడ్ ధర రూ. 31.5 లక్షలుగా ఉంటే ఢిల్లీలో మైక్రో ఎస్‌యూవీ ధర 29.62గా ఉంది. ముంబైలో రూ.30.2 లక్షలు, చెన్నైలో రూ.31.5 లక్షలు, హైదరాబాద్‌లో ఈ ఎస్‌యూవీ తగ్గింపుల అనంతరం రూ.31 లక్షలకు అందుబాటులో ఉంది. అలాగే కోల్‌కత్తాలో రూ.27.87 లక్షలు, లక్నోలో 28.97 లక్షలు, జైపూర్లో రూ.29.92 లక్షలు, అహ్మదాబాద్‌లో రూ.28 లక్షలు, ఇండోర్‌లో రూ.30.87 లక్షలుగా ఉంది. ఇక ఫీచర్ల విషయానికొస్తే టాప్-ఆఫ్-లైన్ ఏఎక్స్7 మోడల్ లెవెల్-1 ఏడీఏఎస్, ఇన్స్ట్రుమెంట్ క్లస్టర్, ఇన్ఫోటైన్మెంట్ సిస్టమ్ కోసం ట్విన్ డిజిటల్ స్క్రీన్లు, పనోరమిక్ సన్రూఫ్, 360-డిగ్రీ కెమెరా, డ్యూయల్-జోన్ క్లైమేట్ కంట్రోల్, ఎలక్ట్రికల్‌గా సర్దుబాటు చేసేలా డ్రైవర్ సీటు వంటి ఫీచర్లు యువతను ఎంతగానో ఆకట్టుకుంటున్నాయి.

వెంటిలేటెడ్ సీట్లు, ఏడు ఎయిర్‌బ్యాగ్లు, లెథెరెట్ సీట్ అష్టోల్బరీ, 12 స్పీకర్లతో 3డీ సౌండ్ సిస్టమ్ వంటివి ఈ కారు ప్రత్యేకతలుగా ఉన్నాయి. మహీంద్రా ఎక్స్‌యూవీ 700 రెండు ఇంజిన్ ఎంపికలతో వస్తుంది. 2.0-లీటర్, 4-సిలిండర్, టర్బోచార్జ్ పెట్రోల్ ఇంజన్ 200 హెచ్‌పీ శక్తిని, 380ఎన్ఎం టార్క్‌ను విడుదల చేస్తుంది. గేర్బాక్స్ ఎంపికల విషయానికి వస్తే 6 స్పీడ్ మాన్యువల్, 6-స్పీడ్ టార్క్ కన్వర్టర్ ఆటోమేటిక్ ఫీచర్లు ఆకట్టుకుంటాయి. మరో ఇంజిన్ విషయానికి వస్తే 2.2-లీటర్, 4-సిలిండర్, టర్బోచార్జ్డ్ డీజిల్ ఇంజన్. ఇది రెండు స్టేట్స్ ఆఫ్ ట్యూన్‌తో వస్తుంది. పెట్రోల్ మాదిరిగానే, డీజిల్ ఇంజన్ కూడా 6 స్పీడ్ మాన్యువల్, 6-స్పీడ్ టార్క్ కన్వర్టర్‌తో వస్తుంది.

నెలకు రూ. 500 పెట్టుబడితో మెచ్యూరిటీ తర్వాత రూ. 4.12 లక్షలు.. ఎలాగంటే

Dayakar

Wed, 17 Jul, 2024

మీరు డబ్బు సంపాదించాలంటే పెట్టుబడి అవసరం. ఏయే రంగాల్లో ఇన్వెస్ట్‌మెంట్‌ చేస్తే మంచి లాభాలు ఉంటాయన్నది తెలుసుకోవడం చాలా ముఖ్యం. మీ ఆదాయానికి అనుగుణంగా మీరు ఏ పెట్టుబడిని ప్రారంభించవచ్చు..? ఎందుకంటే పెట్టుబడి మాత్రమే మీ డబ్బును పెంచుతుంది. మీరు డబ్బును ఆదా చేసి, దానిని సురక్షితంగా ఉంచినట్లయితే, వచ్చే ఆదాయం మరింతగా పెరుగుతుంది.

ఇండియన్ పోస్ట్ ఆఫీస్‌లో ఇటువంటి అనేక పథకాలు ఎన్నో ఉన్నాయి. వీటిలో మీరు రూ. 500 కంటే తక్కువ పెట్టుబడిని ప్రారంభించి మంచి ప్రయోజనాలను పొందవచ్చు. చిన్న మొత్తంతో ప్రారంభించండి, ఆపై మీ ఆదాయం పెరిగే కొద్దీ పెట్టుబడిని పెంచుకోండి. డబ్బు సంపాదించడానికి ఇదే మార్గం. మీరు రూ. 500 లోపు పెట్టుబడిని ప్రారంభించగల పోస్టాఫీసులో ఉన్న కొన్ని పథకాల గురించి తెలుసుకుందాం.

పీపీఎఫ్‌:

పబ్లిక్ ప్రావిడెంట్ ఫండ్ (పీపీఎఫ్‌) అనేది దీర్ఘకాలిక పథకం. ఈ పథకంలో సంవత్సరానికి కనిష్టంగా రూ. 500, గరిష్టంగా రూ. 1.5 లక్షలు డిపాజిట్ చేయవచ్చు. అలాగే 15 సంవత్సరాల పాటు పెట్టుబడి పెట్టాలి. మీకు కావాలంటే, మెచ్యూరిటీ తర్వాత మరో 5 సంవత్సరాల మెచ్యూరిటీని పొడిగించవచ్చు. మీరు ఈ పథకంలో ప్రతి నెలా రూ. 500 ఇన్వెస్ట్ చేస్తే, మీరు ఏటా రూ. 6,000 ఇన్వెస్ట్ చేస్తారు. ప్రస్తుతం పీపీఎఫ్‌పై 7.1 శాతం వడ్డీ ఇస్తోంది. అటువంటి పరిస్థితిలో ఈ పథకంలో ప్రతి నెలా రూ. 500 డిపాజిట్ చేయడం ద్వారా మీరు 7.1 శాతం వడ్డీతో 15 సంవత్సరాలలో రూ. 1,62,728 జోడించవచ్చు. 5-5 ఏళ్లు పొడిగిస్తే 20 ఏళ్లలో రూ.2,66,332, అదే 25 ఏళ్లలో రూ.4,12,321 జోడించవచ్చు.

సుకన్య సమృద్ది యోజన:

మీరు మీ కుమార్తె పేరు మీద సుకన్య సమృద్ధి యోజనలో పెట్టుబడి పెట్టడం ప్రారంభించవచ్చు. ఈ ప్రభుత్వ పథకంలో ఏటా కనిష్టంగా రూ.250, గరిష్టంగా రూ.1.5 లక్షలు డిపాజిట్ చేయవచ్చు. ప్రస్తుతం దానిపై 8.2 శాతం వడ్డీ ఇస్తోంది. మీరు ఈ పథకంలో 15 సంవత్సరాల పాటు పెట్టుబడి పెట్టాలి. 21 సంవత్సరాల తర్వాత పథకం మెచ్యూర్ అవుతుంది. ఇందులో నెలకు రూ.500 ఇన్వెస్ట్ చేస్తే 15 ఏళ్లలో మొత్తం రూ.90,000 ఇన్వెస్ట్ చేస్తే 8.2 శాతం వడ్డీతో 21 ఏళ్ల తర్వాత రూ.2,77,103 పొందుతారు.

రికరింగ్‌ డిపాజిట్‌:

పోస్ట్ ఆఫీస్ రికరింగ్ డిపాజిట్ (RD) పథకం. అనేది పిగ్గీ బ్యాంక్ లాంటిది. దీనిలో ప్రతి నెలా నిర్ణీత మొత్తం పెట్టుబడి పెట్టాలి. ఈ పథకం చిన్న పెట్టుబడిదారులకు వారి భవిష్యత్ అవసరాలను తీర్చడానికి కార్పస్‌ను రూపొందించడంలో సహాయపడుతుంది. ఇందులో ఇన్వెస్ట్‌మెంట్‌ను రూ. 100తో కూడా ప్రారంభించవచ్చు. ఒకసారి మీరు ఇన్వెస్ట్ చేయడం ప్రారంభించిన తర్వాత 5 ఏళ్లపాటు నిరంతరంగా ఇన్వెస్ట్ చేయాలి. ప్రస్తుతం ఈ పథకంలో వడ్డీ రేటు 6.7%. మీరు ఈ పథకంలో ప్రతి నెలా రూ. 500 ఇన్వెస్ట్ చేస్తే, మీరు 5 సంవత్సరాలలో రూ. 30,000, ఐదు సంవత్సరాల తర్వాత మీకు 6.7 శాతం చొప్పున రూ. 35,681 అంటే వడ్డీగా రూ. 5,681 పొందుతారు.

సన్‌రూఫ్‌ కారులో తల బయట పెట్టడం నేరం.. మరెందకు ఇచ్చారనేగా.?

Dayakar

Wed, 17 Jul, 2024

సన్‌రూఫ్‌ కారులో నుంచి తల బయటపెట్టడం, ఆ ఫొటోలను.. వీడియోలను సోషల్‌ మీడియాలో పోస్ట్ చేయడం. ఇప్పుడు ఇది ఒక ట్రెండ్‌. సన్‌రూఫ్‌ కార్లు అందుబాటులోకి వచ్చిన తర్వాత ఇలాంటివి చాలా కనిపిస్తున్నాయి. చాలా మంది కేవలం ఇలాంటి వీడియోలు, ఫొటోల కోసమే సన్‌రూఫ్‌ కార్లను కొనుగోలు చేస్తున్నారు. అయితే ఇలా తల బయటపెట్టడం నేరమని మీలో ఎంత మందికి తెలుసు. సన్‌రూఫ్‌ పై నుంచి బయటకు వస్తే ట్రాఫిన్‌ పోలీసులు చలానా విధిస్తారని మీకు తెలుసా.? అలాంటప్పుడు అసలు కారుకు సన్‌రూఫ్‌ ఎందుకు ఇస్తారనేగా మీ సందేహం. అయితే దీని వెనకాల ఉన్న అసలు కారణం వేరే ఉంది.

ప్రస్తుతం మార్కెట్లో సన్‌రూఫ్‌ కార్ల హవా నడుస్తోంది. దాదాపు అన్ని టాప్‌ వేరియంట్స్‌లో ఈ ఫీచర్‌ కామన్‌గా మారింది. కొన్ని లగ్జరీ కార్లలో అయితే వాయిస్‌ కమాండ్‌ ఆధారంగా సన్‌రూఫ్‌ను ఓపెన్‌, క్లోజ్‌ చేసుకునే అవకాశం సైతం కల్పించారు. కొంతమంది కారుతో రాకపోయినా ప్రత్యేకంగా మాడిఫికేషన్‌ చేయించుకొని మరీ వీటిని ఏర్పాటు చేస్తుకుంటున్నారు. అయితే సన్‌రూఫ్‌ చట్ట విరుద్దమైనప్పటికీ కార్ల తయారీ సంస్థలు వీటిని ఎందుకు ఇస్తాయనే సందేహం రావడం కామన్‌.

అయితే సన్‌రూఫ్‌ అనేది కేవలం కస్టమర్లను ఆకర్షించేందుకు కంపెనీలు అనుసరిస్తోన్న ఒక స్ట్రాటజీ మాత్రమే. దీనికి ప్రత్యేకమైన ఉపయోగం అంటూ ఏం లేదు. అయితే కారు ఆగు ఉన్న సమయంలో తల బయటకు పెడితే ఎలాంటి నేరం ఉండదు కానీ, ప్రయాణిస్తున్న సమయంలో తల బయటికి పెడితే మాత్రం జరిమానా చెల్లించాల్సిందే. అయితే కారులోకి నేరుగా సూర్యరశ్మిని అందించడానికి సన్‌రూఫ్‌ ఉపయోగపడుతుంది. అలాగే సహజంగా గాలి రావాలనుకుంటే ఉపయోగించడానికి మాత్రమే సన్‌రూఫ్‌ను ఇచ్చారు. కాబట్టి కార్లకు సన్‌రూఫ్‌ ఇవ్వడం వెనకాల ఉన్న అసలు కారణం తల బయట పెట్టడం కాదు. ఇలా చేయడాన్ని పోలీసులు ప్రమాదకరమైన స్టంట్‌గా పరిగణించి, ఫైన్‌ వేస్తారు.

ఏపీ ప్రయాణీకులకు ముఖ్య అలెర్ట్.. ఇకపై ఆ మూడు స్టేషన్లలో ఈ రైళ్లు ఆగవు.!

Dayakar

Wed, 17 Jul, 2024

ఏపీ ప్రజలకు నిజంగా ఇది బ్యాడ్‌న్యూస్. మూడు ఎక్స్‌ప్రెస్ రైళ్లకు ఇప్పటిదాకా ఉన్న స్టాప్‌లను ఎత్తివేస్తున్నట్టు దక్షిణ మధ్య రైల్వే శాఖ కీలక ప్రకటన చేసింది. ఇంతకీ ఆ రైళ్లు ఏంటి.? ఎప్పటి నుంచి ఈ ఆదేశాలకు అమలులోకి వస్తాయో ఇప్పుడు తెలుసుకుందామా..

వివరాల్లోకెళ్తే.. సికింద్రాబాద్ నుంచి వయా మిర్యాలగూడ, నడికుడి, గుంటూరు మీదుగా నడిచే నారాయణాద్రి, విశాఖ, చెన్నై ఎక్స్‌ప్రెస్ రైళ్లకు జూలై 19 నుంచి మిర్యాలగూడ, నడికుడి, పిడుగురాళ్ల రైల్వే స్టేషన్లలో స్టాప్‌లను ఎత్తివేస్తున్నట్టు రైల్వే శాఖ అధికారులు ప్రకటించారు. కరోనా సమయంలో ఆయా స్టేషన్లలో నారాయణాద్రి, విశాఖ, చెన్నై రైళ్లను నిలపకూడదని రైల్వేశాఖ ఆదేశాలు జారీ చేసిన సంగతి తెలిసిందే. దీంతో ఉమ్మడి నల్గొండ, గుంటూరు జిల్లాల ప్రయాణీకులు ఒక్కసారిగా ఆందోళనలు చేపట్టారు.

ఇక అప్పటి ఎంపీ ఉత్తమ్ కుమార్ రెడ్డి స్వయంగా రైల్వే బోర్డు అధికారులతో చర్చలు జరిపి.. ఏడాది క్రితం ఈ ఎక్స్‌ప్రెస్ రైళ్లకు ఆయా స్టేషన్లను స్టాప్‌లుగా ఏర్పాటు చేశారు. అప్పట్లో ఏడాది పాటు ఈ రైళ్లను ఆపేందుకు రైల్వే అధికారులు ఆదేశాలు ఇవ్వగా.. ఆ సమయం ఈ నెల 19న ముగియనుంది. అలాగే జూలై 19 నుంచి విశాఖ, నారాయణాద్రి, చెన్నై ఎక్స్‌ప్రెస్‌లకు ఐఆర్‌టీసీ మిర్యాలగూడ, నడికుడి, పిడుగురాళ్ల స్టేషన్లకు రిజర్వేషన్లు నిలిపివేసింది. అటు విశాఖ ఎక్స్‌ప్రెస్‌కు నల్గొండలో కూడా స్టాప్ ఎత్తివేశారు.

కియా మోడల్ కార్లలో సాంకేతిక లోపం.. రీకాల్ ప్రకటించిన కంపెనీ..

Dayakar

Wed, 17 Jul, 2024

ప్రముఖ కార్ల తయారీ కంపెనీ కియా మోటార్స్ 1138 ఎలక్ట్రిక్ కార్లను రీకాల్ చేస్తున్నట్లు ప్రకటించింది. కియా ఇండియా ఆటోమొబైల్ కంపెనీ స్వచ్చందంగా రీకాల్ చేస్తున్నట్లు వెల్లడించింది. కియా ఈవీ6 మోడల్ కార్లలోని ఇంటిగ్రేటెడ్ ఛార్జింగ్ కంట్రోల్ యూనిట్ (ఐసీసీయూ)లో సంభావ్య లోపం ఉన్నట్లు కంపెనీ గుర్తించింది. దీని వల్ల 12 వోల్ట్స్ ఆగ్జిలరీ బ్యాటరీ పనితీరుపై ప్రభావం పడుతుందని అందుకే రీకాల్ చేస్తున్నట్లు కంపెనీ ప్రకటించింది. ఈ రీకాల్ కి సంబంధించి రోడ్డు రవాణా మరియు రహదారుల మంత్రిత్వ శాఖకు సమాచారం అందించామని.. త్వరలోనే లోపం ఉన్న వాహనాల యజమానులను సంప్రదిస్తామని కియా కంపెనీ తెలిపింది. సంప్రదించిన తర్వాత అపాయింట్మెంట్ షెడ్యూల్ కోసం వాహన యజమానులు కియా డీలర్స్ ని సంప్రదించాల్సి వస్తుందని కంపెనీ వెల్లడించింది.

గత నెలలో హ్యుందాయ్ మోటార్ కంపెనీ కూడా ఐయోనిక్ 5 మోడల్స్ పై రీకాల్ ప్రకటించింది. అందులో కూడా కియా మోటార్స్ లానే ఐసీసీయూలో లోపం ఉంది. తాజాగా కియా కంపెనీ కూడా ఈవీ6 ఎలక్ట్రిక్ వాహనాలపై రీకాల్ ప్రకటించింది. 1138 కార్లను మాత్రమే రీకాల్ చేస్తున్నట్లు తెలిపింది. 2022 మార్చి 3 నుంచి 2023 ఏప్రిల్ 14 మధ్య తయారైన ఈవీ6 మోడల్ కార్లలో మాత్రమే ఈ లోపం తలెత్తే అవకాశం ఉందని.. అందుకే వాటిని మాత్రమే రీకాల్ చేస్తున్నట్లు కియా మోటార్స్ తెలిపింది. ఆ లోపాన్ని సరిచేయడానికి రీకాల్ చేస్తున్నామని.. అందుకోసం సాఫ్ట్ వేర్ ని అప్డేట్ చేస్తామని కంపెనీ తెలిపింది. అయితే దీని కోసం కస్టమర్లు ఎవరూ డబ్బులు చెల్లించాల్సిన అవసరం లేదని తెలిపింది. ఉచితంగానే లోపాన్ని సరిచేసి ఇస్తామని.. చేసే ముందు కష్టమర్ కి సందేశాన్ని పంపిస్తామని పేర్కొంది.

ఇక కియా ఈవీ6 విషయానికొస్తే.. 77.4 కిలోవాట్ బ్యాటరీ ప్యాక్ తో వస్తుంది. సింగిల్ మోటార్ రేర్ వీల్ డ్రైవ్, డ్యూయల్ మోటార్ ఆల్ వీల్ డ్రైవ్ రెండు వెర్షన్స్ తో వస్తుంది. సింగిల్ మోటార్ వెర్షన్ 229 హార్స్ పవర్, 350 ఎన్ఎం టార్క్ తో రాగా.. డ్యూయల్ మోటార్ వెర్షన్ 325 హార్స్ పవర్, 605 ఎన్ఎం టార్క్ ని ప్రొడ్యూస్ చేస్తుంది. ఆటోమోటివ్ రీసెర్చ్ అసోసియేషన్ ఆఫ్ ఇండియా (ఏఆర్ఏఐ) సర్టిఫై చేసిన దాని ప్రకారం ఈ కియా ఈవీ6 కారు 708 కి.మీ. రేంజ్ ని ఇస్తుంది. ఇది బీఎండబ్ల్యూ ఐఎక్స్1, వోల్వో ఎక్స్సీ 40 రీఛార్జ్, వోల్వో సీ40 రీఛార్జ్, కొత్తగా లాంఛ్ అయిన మెర్సిడిస్ ఈక్యూఏ వంటి ఎంట్రీ లెవల్ లగ్జరీ ఎస్యూవీలతో పోటీ పడుతుంది.అంతేకాదు సొంత దేశమైన సౌత్ కొరియాకి చెందిన హ్యుందాయ్ అయోనిక్ 5తో కూడా పోటీ పడుతుంది. ఇక దీని ఎక్స్ షోరూం ధర రూ. 64.11 లక్షల నుంచి రూ. 69.35 లక్షల మధ్యలో ఉంది.

పెద్ద పెద్ద సినిమాలు ఎడిట్ చేసే సాఫ్ట్‌వేర్.. మీ వీడియోస్ కోసం ఫ్రీగా వాడుకోవచ్చు!

Dayakar

Wed, 17 Jul, 2024

ఈ మధ్య కాలంలో వీడియోలు చేసేవాళ్ళు చాలా మంది ఉన్నారు. స్మార్ట్ ఫోన్ లో వీడియోలు ఎడిట్ చేయడం అనేది చాలా కష్టంతో కూడుకున్న పని. పోనీ సిస్టంలో ఎడిటింగ్ చేద్దామంటే ఫ్రీగా వీడియో ఎడిటింగ్ సాఫ్ట్ వేర్ లు ఉండవు. డబ్బులిచ్చి కొనుక్కోవాల్సిందే. అడోబ్ ప్రీమియర్ ప్రో, ఫైనల్ కట్ ప్రో వంటి ప్రొఫెషనల్ వీడియో ఎడిటింగ్ సాఫ్ట్ వేర్ లు కొనాలంటే ముప్పై వేలు పెట్టుబడి పెట్టాల్సి ఉంటుంది. ప్రీమియర్ ప్రో సాఫ్ట్ వేర్ కైతే నెల నెలా కనీసం రెండు మూడు వేలైనా పెట్టాల్సిందే. అయితే ఈ సాఫ్ట్ వేర్స్ ని మించిన తోపు సాఫ్ట్ వేర్ ని మీరు ఉచితంగా వాడుకోవచ్చు. ఈ సాఫ్ట్ వేర్ ని పెద్ద పెద్ద సినిమాలను ఎడిటింగ్ చేసేందుకు వాడతారు. హాలీవుడ్ లో చాలా సినిమాలను ఈ సాఫ్ట్ వేర్ తోనే ఎడిటింగ్ చేస్తారు. కలర్ కరెక్షన్ కూడా చేసుకోవచ్చు. మీ వీడియోలు ప్రొఫెషనల్ గా రావాలంటే కనుక ఈ సాఫ్ట్ వేర్ ని ట్రై చేయాల్సిందే.

డావిన్సీ రిజాల్వ్:

దాని పేరు డావిన్సీ రిజాల్వ్. ప్రస్తుతం మార్కెట్లో డావిన్సీ రిజాల్వ్ 19 వెర్షన్ నడుస్తోంది. ఇందులో డ్రాగ్ అండ్ డ్రాప్ వీడియో ట్రాన్సిషన్స్, ఆడియో ట్రాన్సిషన్స్ ఉన్నాయి. చాలా ఈజీగా వాడుకోవచ్చు. ఫిల్మ్ ఎఫెక్ట్స్, గ్రీన్ స్క్రీన్ కీయింగ్ వంటివి చాలా ఫీచర్స్ ఉన్నాయి. దీన్ని వాడడం చాలా సులువు. వీడియో ఎక్స్ పోర్ట్ అవ్వడం కూడా ఫాస్ట్ గా అవుతుంది. మీ కంప్యూటర్ మంచి కాన్ఫిగరేషన్ ఉంటే కనుక మీకు ఇది బాగా సూట్ అవుతుంది. మీరు యాపిల్ మ్యాక్ సిస్టం లేదా మ్యాక్ ల్యాప్ టాప్ వాడుతున్నట్లైతే కనుక ఈ డావిన్సీ సాఫ్ట్ వేర్ పర్ఫెక్ట్ గా సూట్ అవుతుంది.

సిస్టం రిక్వైర్మెంట్స్:

విండోస్:

విండోస్ సిస్టం వాడుతున్నట్లైతే కనుక కనీసం 2 జీబీ గ్రాఫిక్ కార్డు, 16 జీబీ ర్యామ్ ఉండాలి. ఇంటెల్ కోర్ ఐ7 లేదా ఏఎండీ రైజన్ 7 ప్రాసెసర్ ఉండాలి. అలానే ఎస్ఎస్డీ హార్డ్ డ్రైవ్ ఉండాలి. స్టోరేజ్ స్పేస్ 250 జీబీ నుంచి ఎంత ఎక్కువ ఉంటే అంత మంచిది.

మ్యాక్:

పిక్సెల్ లేదా ఆ తరువాత వచ్చిన ఆపరేటింగ్ సిస్టం ఉండాలి. 8 జీబీ ర్యామ్ ఉండాలి. ఇంటెల్ కోర్ ఐ7 లేదా ఎం1 చిప్ లేదా అంతకంటే ఎక్కువ ప్రాసెసర్ ఉండాలి. కనీసం 2 జీబీ గ్రాఫిక్ కార్డు ఉండాలి.

లైనక్స్:

సెంట్ ఓఎస్ 7.3 ఆపరేటింగ్ సిస్టం ఉండాలి. 32 జీబీ ర్యామ్ ఉండాలి. ఇంటెల్ కోర్ ఐ7 లేదా ఏఎండీ రైజన్ 7 ప్రాసెసర్ ఉండాలి.

హెచ్డీ వీడియోలు ఎడిటింగ్ చేసేందుకు అయితే 16 జీబీ ర్యామ్ సరిపోతుంది. ఒకవేళ మీరు కనుక 4కే, 8కే రిజల్యూషన్ వీడియోలు ఎడిటింగ్ చేస్తే కనుక మీ కంప్యూటర్ లేదా మ్యాక్ సిస్టంకి 32 జీబీ నుంచి 64 జీబీ ర్యామ్ అయితే ఖచ్చితంగా ఉండాలి.

ఎలా డౌన్ లోడ్ చేసుకోవాలి?:

వెబ్ బ్రౌజర్ లో బ్లాక్ మ్యాజిక్ డిజైన్ డాట్ కామ్ (blackmagicdesign.com)అని టైప్ చేయాలి. లేదా డావిన్సీ రిజాల్వ్ (DaVinci Resolve) అని టైప్ చేస్తే స్టార్టింగ్ లోనే మీకు ఒక వెబ్ సైట్ కనబడుతుంది. దాని మీద క్లిక్ చేసి లోపలకు వెళ్ళాలి. లోపలకు వెళ్ళగానే ఒక వీడియో ప్లే అవుతుంది. దాని కింద ఫ్రీ డౌన్ లోడ్ ఆప్షన్ ఉంటుంది. దాని మీద క్లిక్ చేస్తే నాలుగు రకాల సాఫ్ట్ వేర్లు కనిపిస్తాయి. మీకు కావాల్సిన రిక్వైర్మెంట్స్ ని బట్టి.. మీ కంప్యూటర్ ఆపరేటింగ్ సిస్టంని బట్టి ఎంచుకోవాలి. ఒక అప్లికేషన్ ఫార్మ్ ఓపెన్ అవుతుంది. అందులో మీ పేరు, ఈమెయిల్, ఫోన్ నంబర్, అడ్రస్ వంటి వివరాలు ఇస్తే సరిపోతుంది. రిజిస్టర్ అండ్ డౌన్ లోడ్ మీద క్లిక్ చేస్తే సాఫ్ట్ వేర్ డౌన్ లోడ్ అవుతుంది. ఇన్స్టాల్ చేసుకుని ఫ్రీగా వీడియోలు ఎడిట్ చేసుకోవచ్చు.

JIO, AIRTEL రేట్లు పెంచినా.. ప్రజలు BSNLకి మారకపోవడానికి కారణం? ఇదే సమస్య!

Dayakar

Wed, 17 Jul, 2024

స్మార్ట్‌ఫోన్ల వాడకం పెరిగిన తర్వాత.. ఇంటర్నెట్‌ డేటా వినియోగం విపరీతంగా పెరిగింది. ఒకప్పుడు డేటా కోసం రీఛార్జ్‌ చేసుకోవాలంటే.. భారీ ఎత్తున చెల్లించాలి. అయితే ఎప్పుడైతే జియో రంగంలోకి దిగిందో.. అప్పటి వరకు టెలికాం రంగంలో నంబర్‌ వన్‌ స్థానంలో ఉన్న ఎయిర్‌టెల్‌.. జియో దెబ్బకు దిగి వచ్చింది. అంబానీ టెలికాం రంగంలోకి అడుగుపెడుతూనే.. చాలా తక్కువ ధరకే.. ఇంకా చెప్పాలంటే.. ఉచితంగా అపరిమిత డేటా, కాలింగ్‌ ప్యాక్‌లను తీసుకువచ్చింది. దాంతో అప్పటి వరకు ఎయిర్‌టెల్‌, వోడాఫోన్‌ వాడిన వారు.. జియోకు మారారు. భారీ ఎత్తున కస్టమర్లకు జియోకు వలస వెళ్లారు. ఈ దెబ్బతో ఎయిర్‌టెల్‌, మిగతా కంపెనీలు దిగి రాక తప్పలేదు. అవి కూడా రీఛార్జ్‌ ప్లాన్‌ ధరలను తగ్గిస్తూ.. నిర్ణయం తీసుకున్నాయి.

ఇక జియో ఎంట్రీ ఇచ్చిన దగ్గర నుంచి ఈ నెల వరకు అనగా జూలై 3, 2024 వరకు కూడా అన్ని టెలికాం కంపెనీలు ఒకే ధరకు రీఛార్జ్‌ ప్లాన్స్‌ను అమలు చేశాయి. కానీ జూలై 4 నుంచి రీఛార్జ్‌ ప్లాన్స్‌ ధరలను భారీగా పెంచుతూ.. జియో నిర్ణయం తీసుకుంది. ఇదే బాటలో ఎయిర్‌టెల్‌, వోడాఫోన్‌ పయనించాయి. ఒక్కో ప్లాన్‌ మీద 12-25 శాతం వరకు పెంచాయి. ఈ నిర్ణయం వల్ల ప్రతి కంపెనీ కోట్ల రూపాయల్లో లాభం పొందబోతున్నాయి అంటున్నారు మార్కెట్‌ విశ్లేషకులు. టెలికాం రంగంలో భారీ ఎత్తున పోటీ నెలకొని ఉన్న నేపథ్యంలో.. అందరి చూపు బీఎస్‌ఎన్‌ఎల్‌ మీదకు మళ్లింది. ఎందుకంటే.. జియో, ఎయిర్‌టెల్‌ వంటి కంపెనీలు తమ రీఛార్జ్‌ ప్లాన్స్‌ ధరలను పెంచినా.. బీఎస్‌ఎన్‌ఎల్‌ మాత్రం రేట్లను పెంచలేదు. పైగా మిగతా కంపెనీల కన్నా.. చాలా తక్కువ ధరకు.. ఎక్కువ రోజుల వ్యాలిడిటీ ఉన్న ప్లాన్స్‌ను అందిస్తుంది బీఎస్‌ఎన్‌ఎల్‌.

అతి తక్కువ ధరకే ప్లాన్స్‌..

వంద రూపాయల లోపు.. 30 రోజుల వ్యాలిడిటీ ఉన్న రీఛార్జ్‌ ప్లాన్‌ ఇతర ఏ టెలికాం కంపెనీలో అందుబాటులో లేవు ఒక్క బీఎస్‌ఎన్‌ఎల్‌లో తప్ప. దీనిలో ఉన్న 94 రూపాయల రీఛార్జ్‌ ప్లాన్‌తో 30 రోజుల వ్యాలిడిటీతో వస్తుంది. పైగా ఉచిత కాలింగ్‌, డేటా అందిస్తుంది. అలానే ఏడాది పాటు వ్యాలిడిటీ కలిగి ఉన్న ప్లాన్‌ బీఎస్‌ఎన్‌ఎల్‌ నుంచి 1999లకే అందుబాటులో ఉంది. దీని ద్వారా 600 జీబీ డేటాను, అన్‌లిమిటెడ్‌ కాలింగ్‌ సదుపాయాలు కల్పిస్తోంది. ఇక బీఎస్‌ఎన్‌ఎల్‌లో రోజుకు 2 జీబీ డేటా ఇచ్చే ప్లాన్‌.. అది కూడా ఏడాది వ్యాలిడిటీ ఉండే ప్యాక్‌ ధర 2395 రూపాయలు ఉండగా.. ఇదే ప్లాన్‌ ఎయిర్‌టెల్‌లో 3599 రూపాయలు తీసుకుంటుంది. మిగతా వాటితో పోలిస్తే.. బీఎస్‌ఎన్‌ఎల్‌లో చాలా తక్కువ ధరకే మంచి ప్లాన్స్‌ అందుబాటులో ఉన్నాయి.

బీఎస్‌ఎన్‌ఎల్‌లో ప్రధాన లోపం ఇదే..

అయితే జియో, ఎయిర్‌టెల్‌, వోడాఫోన్‌లు తమ రీఛార్జ్‌ ప్లాన్స్‌ ధరలను ఎంత భారీగా పెంచిన.. జనాలు ఎందుకు వాటికే అతుక్కుపోతున్నారు.. తక్కువ ధరకే ప్లాన్స్‌ అందుబాటులో ఉన్న బీఎస్‌ఎన్‌ఎల్‌కు ఎందుకు మారడం లేదు అంటే.. ముఖ్య కారణం.. బీఎస్‌ఎన్‌ఎల్‌లో డేటా సర్వీసులు చాలా స్లోగా ఉంటాయి. జియో రావడం రావడమే ఉచితంగా 4జీ డేటాను ఇవ్వగా.. అదే సమయంలో బీఎస్‌ఎన్‌ఎల్‌ 2జీ దగ్గర తచ్చాడుతుంది. ప్రస్తుతం మిగతా కంపెనీలు అన్ని.. 5జీ సర్వీసులు దిశగా పరుగులు తీస్తుండగా.. బీఎస్‌ఎన్‌ఎల్‌ మాత్రం ఇంకా 3జీ డేటా దగ్గరే ఉంది. అయితే 2025 నాటికి 5జీకి అప్‌గ్రేడ్‌ అవుతుందని చెప్పుకొస్తుంది.

బీఎస్‌ఎన్‌ఎల్‌ తీసుకుంటే.. కనెక్టీవిటీకి ఢోకా ఉండదు కానీ.. డేటా విషయంలో మాత్రం చాలా ఇబ్బందులు ఎదుర్కొవాల్సి వస్తుంది. జియో, ఎయిర్‌టెల్‌ 5జీ సేవలు అందుబాటులోకి తేవడమే కాక.. 6జీ దిశగా పరుగులు తీస్తున్నాయి. ఇక బీఎస్‌ఎన్‌ఎల్‌ విషయానికి వస్తే.. దీనిలో 5జీ అనేది ఇప్పట్లో సాకారం కాదు.. ఇప్పుడిప్పుడే 4జీకి అప్‌గ్రేడ్‌ అవుతుంది. అయితే 2025 నాటికి బీఎస్‌ఎన్‌ఎల్‌ 5జీ అప్‌గ్రేడ్‌ అవుతామని చెబుతుంది. అందుకు ప్రధాన కారణం.. ప్రస్తుతం బీఎస్‌ఎన్‌ఎల్‌.. టీసీఎస్‌తో జత కట్టింది. దేశమంతటా 1000 గ్రామాలకు 4జీ ఇంటర్నెట్ సేవలను అందుబాటులోకి తీసుకురావాలని చూస్తున్నారు. ఈ ప్రాజెక్ట్‌ సక్సెస్‌ అయితే.. బీఎస్‌ఎన్‌ఎల్‌ మళ్లీ పుంజుకుంటుందని.. అది జియో, ఎయిర్‌టెల్‌కు భారీ షాకే అని అంటున్నారు.

నెలకు లక్షన్నర జీతంతో Bank జాబ్స్.. ఇంకొన్ని రోజులే ఛాన్స్.. మిస్ చేసుకోకండి

Dayakar

Wed, 17 Jul, 2024

బ్యాంక్ జాబ్స్ కోసం యువత ఏళ్ల తరబడి ప్రిపేర్ అవుతుంటారు. బ్యాంక్ ఉద్యోగం సాధించడమే లక్ష్యంగా పెట్టుకుంటారు. బ్యాంక్ ఉద్యోగాలకు కాంపిటీషన్ హెవీగానే ఉంటుంది. ఇటీవల వేల సంఖ్యలో బ్యాంక్ ఉద్యోగాల భర్తీ కోసం నోటిఫికేషన్స్ రిలీజ్ అవుతున్న విషయం తెలిసిందే. మరి మీరు కూడా బ్యాంక్ జాబ్ కోసం సన్నద్ధమవుతున్నారా? అయితే ఇటీవల ప్రముఖ బ్యాంక్ పలు ఉద్యోగాల భర్తీ కోసం నోటిఫికేషన్ రిలీజ్ చేసింది. మీరు డిగ్రీ అర్హతతోనే ఈ ఉద్యోగాలను అందుకోవచ్చు. ఈ జాబ్స్ కు అప్లై చేసుకునేందుకు ఇంకా కొన్ని రోజులే ఛాన్స్ ఉంది. వెంటనే అప్లై చేసుకోండి.

బ్యాంక్ ఆఫ్ మహారాష్ట్ర ఆఫీసర్ స్కేల్ ఉద్యోగాల భర్తీకి నోటిఫికేషన్ రిలీజ్ చేసింది. ఈ రిక్రూట్ మెంట్ ద్వారా మొత్తం 195 ఉద్యోగాలను భర్తీ చేయనున్నారు. డిప్యూటీ జనరల్ మేనేజర్, అసిస్టెంట్ జనరల్ మేనేజర్, ఛీఫ్ మేనేజర్, సీనియర్ మేనేజర్, మేనేజర్, బిజినెస్ డెవలప్ మెంట్ ఆఫీసర్ జాబ్స్ ను నియమించుకోనున్నది. ఈ ఉద్యోగాలకు ఎంపికైతే నెలకు లక్షన్నర వరకు జీతం పొందొచ్చు. అభ్యర్థులు డిగ్రీ, పీజీ, పీజీ డిప్లొమా, సీఏ ఉత్తీర్ణతతో పాటు సంబంధిత విభాగంలో పని అనుభవం ఉండాలి. గరిష్టంగా 50 ఏళ్లు కలిగి ఉండాలి. ఆఫ్ లైన్ లో దరఖాస్తు చేసుకోవాల్సి ఉంటుంది. అభ్యర్థులు జులై 26 వరకు అప్లై చేసుకోవచ్చు.

ముఖ్యమైన సమాచారం:

మొత్తం పోస్టులు:

పోస్టులు వివరాలు:

డిప్యూటీ జనరల్ మేనేజర్, అసిస్టెంట్ జనరల్ మేనేజర్, ఛీఫ్ మేనేజర్, సీనియర్ మేనేజర్, మేనేజర్, బిజినెస్ డెవలప్ మెంట్ ఆఫీసర్.

విభాగాలు:

ఇంటిగ్రేటెడ్ రిస్క్ మేనేజ్ మెంట్
ఫారెక్స్ అండ్ ట్రెజరీ
ఐటీ/డిజిటల్ బ్యాంకింగ్/ సీఐఎస్ఓ/ సీడీఓ
క్రెడిట్, ఎకనామిస్ట్ తదితర విభాగాలు

అర్హత:

అభ్యర్థులు డిగ్రీ, పీజీ, పీజీ డిప్లొమా, సీఏ ఉత్తీర్ణతతో పాటు సంబంధిత విభాగంలో పని అనుభవం ఉండాలి.

వయోపరిమితి:

గరిష్టంగా 50 ఏళ్లు కలిగి ఉండాలి.

ఎంపిక విధానం:

రాత పరీక్ష, ఇంటర్వ్యూ, గ్రూప్ డిస్కషన్, తదితరాల ఆధారంగా ఎంపిక చేస్తారు.

జీతం:

పోస్టులను అనుసరించి 64 వేల నుంచి లక్షన్నర వరకు అందిస్తారు.

దరఖాస్తు ఫీజు:

ఎస్సీ, ఎస్టీ, దివ్యాంగ అభ్యర్థులకు రూ. 118గా నిర్ణయించారు. ఇతరులకు రూ. 1180 చెల్లించాలి.

దరఖాస్తు విధానం:

ఆఫ్ లైన్ లో అప్లికేషన్లను జనరల్ మేనేజర్, బ్యాంక్ ఆఫ్ మహారాష్ట్ర, హెచ్.ఆర్.ఎం డిపార్ట్ మెంట్, హెడ్ ఆఫీస్, లోక్ మంగల్, శివాజీనగర్, పుణె చిరునామాకు పోస్టు ద్వారా పంపించాలి.

దరఖాస్తులు ప్రారంభం:

11-07-2024

దరఖాస్తులకు చివరి తేదీ:

26-07-2024

చంద్రునిపై గుహ కనుగొన్న శాస్త్రవేత్తలు.. మనుషులు కూడా ఉండవచ్చట!

Dayakar

Wed, 17 Jul, 2024

దశాబ్ద కాలం నుంచి చంద్రుడిపై ఎన్నో పరిశోధనలు, ప్రయోగాలు అనేవి ప్రారంభమైయ్యాయి. అయితే ఈ ప్రయోగాల్లో భాగంగానే ప్రపంచ దేశాలు ఒకదానితో ఒకటి పోటత పొడుతున్నాయి. ఇకపోతే వాటిలో అమెరికా, చైనా, రష్యా, భారత్ వంటి దేశాలు చంద్రుడిపై ఇప్పటికి ఎన్నో ప్రయోగాలు చేస్తునే ఉన్నాయి. ఈ క్రమంలోనే చంద్రుడిపై అనేక శాటిలైట్లను పంపిస్తున్నారు. అలాగే జాబిల్లిపై మానవులు జీవిస్తారా.. అందుకు అనువైన వాతావరణం ఉందా. అక్కడి పరిస్థితులు ఏంటి ఇళ్లు, రోడ్లు, కరెంట్ లాంటి మౌలిక సదుపాయాలు ఏర్పాటు చేసుకోవచ్చా అనే విషయాలను పరిశోధిస్తున్నారు. ఇందులో భాగంగానే అక్కడ మట్టి, వాయువులు, ఖనిజాలు సేకరించి ప్రయోగాలు చేస్తున్నారు. ఈ నేపథ్యంలోనే తాజాగా కొంతమంది శాస్త్రవేత్తలు చంద్రునిపై భూగర్భ గుహను కనుగొన్నారు. పైగా ఇది మానవులకు నివాసయోగ్యంగా ఉంటుందని సైంటిస్టులు భావిస్తున్నారు. మరి, ఆ వివరాళ్లేంటో చూద్దాం.

ఇప్పటి వరకు భారత్ తో పాటు ప్రపంచ దేశాలైనా అమెరికా, చైనా రష్యా వంటి దేశాలు చంద్రుడిపై ఎన్న పరిశోధనలు చేస్తున్నాయి. ఎందుకంటే.. భవిష్యత్తులో జాబిల్లి పై మానవులు నివాసానికి అనుకూలమైన వాతవరణం ఉంటుదా అనే విషయాలను తెలుసుకోనేందుకు ఎన్నో ప్రయోగాలు చేస్తున్నారు. ఇందులో భాగంగానే జాబిల్లి ఎన్నో శాటిలైట్స్ ను పంపిస్తూ.. అక్కడ మట్టి, వాయువులు, ఖనిజాలు సేకరించి ప్రయోగాలు చేస్తున్నారు. ఈ క్రమంలోనే తాజాగా శాస్త్రవేత్తలు చంద్రునిపై భూగర్భ గుహను కనుగొన్నారు. కాగా, ఇది మానవులకు నివాసయోగ్యంగా ఉంటుందని శాస్త్రవేత్తలు భావిస్తున్నారు.

ఇక ఈ గుహ చంద్రునిపై సీ ఆఫ్ ట్రాంక్విలిటీ అనే ప్రాంతంలో ఉన్న ఒక భారీ గొయ్యి లోపల ఉందని, పైగా ఈ గొయ్యి చంద్రునిపై తెలిసిన లోతైన ప్రాంతమని పేర్కొన్నారు. అలాగే ఇది నీల్ ఆర్మ్‌స్ట్రాంగ్‌ను చంద్రునిపైకి తీసుకువచ్చిన అంతరిక్ష నౌక అపోలో 11 ల్యాండింగ్ అయిన సైట్ నుంచి 400 కిలోమీటర్ల దూరంలో ఉంది. అయితే చంద్రునిపై ఈ గుహను ఇటలీలోని ట్రెంటో యూనివర్సిటీకి చెందిన లోరెంజో బ్రూజోన్, లియోనార్డో క్యారెర్ నేతృత్వంలోని శాస్త్రవేత్తల బృందం కనుగొన్నారు. ఇక వారు తమ పరిశీలనలను సైంటిఫిక్ జర్నల్ నేచర్ ఆస్ట్రానమీలో ప్రచురించారు. ఇందులో శాస్త్రవేత్తలు రాడార్‌ను ఉపయోగించి గొయ్యి తెరవడం ద్వారా లోపలికి వెళ్లేలా చేశారు. కాగా, అందులో మిలియన్ల సంవత్సరాల క్రితం చంద్రుని ఉపరితలం క్రింద ప్రవహించిన లావా కారణంగా.. ఈ గొయ్యి లోపల గుహ ఏర్పడిందని సైంటిస్టులు చెప్తున్నారు. అయితే ఈ గొయ్యి మానవ స్థావరాలను ఏర్పాటు చేసుకోవడానికి అనుకూలంగా ఉంటుందని శాస్త్రవేత్తలు వెల్లడించారు.

ఆ విద్యార్థులకు గుడ్ న్యూస్.. స్కాలర్ షిప్స్ ఆఫర్ చేస్తున్న ఎయిర్ టెల్!

Dayakar

Wed, 17 Jul, 2024

చదువుకునే వారికి అనేక అవకాశాలు లభిస్తుంటాయి. ఆర్థికంగా వెనుబడిన వారికి వివిధ రకాల స్కాలర్ షిప్ లు అందుబాటులో ఉంటాయి. కొన్ని స్వచ్ఛంద సంస్థలు విద్యార్థులకు స్కాలర్ షిప్ ను అందిస్తాయి. కొందరు పరీక్షలు నిర్వహించి.. విద్యార్థులకు స్కాలర్ షిప్ ను అందిస్తుంటారు. ఇది ఇలా ఉంటే..తాజాగా ఇంజనీరింగ్ చదువుతున్న విద్యార్థులకు ఓ శుభవార్త వచ్చింది. ప్రముఖ టెలీకాం సంస్థ భారతీ ఎయిర్ టెల్ ఇంజినీరింగ్ విద్యార్థులకు ఆర్థిక సాయం చేసే దిశగా అడుగులు వేస్తుంది. మరి.. ఎయిర్ టెల్ చెప్పిన గుడ్ న్యూస్ ఏమిటో ఇప్పుడు చూద్దాం..

ప్రముఖ టెలికాం సంస్థ ఎయిర్ టెల్ గురించి ప్రత్యేకంగా చెప్పనక్కర్లేదు. ఇటీవలే రీఛార్జ్ ధరలు పెంచిన సంగతి తెలిసింది. అంతేకాక తన కస్టమర్లను ఆకట్టుకునేందుకు వివిధ రకాల ఆఫర్లు ఇస్తుంది. ఇది ఇలా ఉంటే.. తాజాగా ఇంజనీరింగ్ విద్యార్థులకు గుడ్ న్యూస్ చెప్పింది. భారతి ఎయిర్టెల్ కు చెందిన భారతి ఎయిర్టెల్ ఫౌండేషన్ ఏర్పాటు చేసిన సంగతి తెలిసింది. ఈ ఫౌండేషన్ బిటెక్ విద్యార్థుల కోసం ఈ మెరిట్ కమ్ మీన్స్ స్కాలర్ షిప్ అనే కార్యక్రమాన్ని ప్రారంభించింది. ఈ స్కాలర్ షిప్ ప్రొగ్రామ్ కి ఎంపికైన వారికి…పలు రకాల బెనిఫిట్స్ అందుతున్నాయి. ఈ స్కాలర్ షిప్ కార్యక్రమం ద్వారా విద్యార్థులకు ల్యాప్ టాప్, మెస్ ఫీ వంటి ఇతర అందించనున్నాయి.

భారతీ ఎంటర్ ప్రైజెస్ ఛారిటీ విభాగమైన ఎయిర్ టెల్ ఫౌండేషన్ తన 25 ఏళ్ల వార్షికోత్సవాన్ని పురష్కరించుకుంది. ఈ నేపథ్యంలోనే ‘భారతీ ఎయిర్టెల్ స్కాలర్ షిప్ ప్రోగ్రామ్’ను ప్రారంభించింది. ఈ స్కాలర్ షిప్ అనేది విభిన్న సామాజిక, ఆర్థిక నేపథ్యాలకు చెందిన విద్యార్థులకు అందించాలని లక్ష్యంగా పెట్టుకుంది. విద్యార్థులకు ఆర్థిక మద్దతు ఇవ్వడమే లక్ష్యంగా పెట్టుకుందని ఫౌండేషన్ ఒక పత్రికా ప్రకటనలో పేర్కొంది. ఇందులో ముఖ్యంగా చదువుకనే ప్రాధాన్యత ఇస్తామని సంస్థ ప్రతినిధులు తెలిపారు. అంతేకాక ఈ స్కాలర్ షిప్ పొందేందుకు అర్హతలను కూడా తెలిపింది.

సాంకేతికత ఆధారిత బిటెక్ చదువుతున్న యూజీ విద్యార్థులు, టాప్-50 ఎన్ ఐఆర్ఎఫ్ కాలేజీల్లో ఐదేళ్లు ఇంటిగ్రేటెడ్ కోర్సులు చదువుతున్న స్టూడెంట్స్ ఈ స్కాలర్ పిష్ ను పొందేందుకు అర్హులు. అదే విధంగా కుటుంబ వార్షిక ఆదాయం రూ. 8.5 లక్షలు కంటే తక్కువ ఉన్నవారికి మాత్రమే ఈ స్కాలర్ షిప్ కి అర్హులు. ఇక ఈ స్కాలర్ షిప్ పొందిన విద్యార్థులు తమ చదువు పూర్తయ్యేంత వరకు కాలేజీ ఫీజులో 100 శాతం పొందుతారు. అలానే వారికి ల్యాప్ టాప్, హాస్టల్, మెస్ ఫీజులు కూడా ఈ ఫౌండేషన్ అందిస్తుంది. ఈ సంవత్సరం 250 మంది అర్హులైన విద్యార్థులకు ఈ స్కాలర్ షిప్ అందజేస్తామని భారతి ఎయిర్టెల్ ఫౌండేషన్ వెల్లడించింది. ప్రతిఏటా ఈ స్కాలర్ షిప్ పొందే విద్యార్థుల సంఖ్యను పెంచుకుంటూ వెళ్తామని తెలిపింది. స్కాలర్ షిప్ గురించి పూర్తి వివరాలు తెలుసుకోవడానికి, భారతి ఎయిర్టెల్ ఫౌండేషన్ అధికారిక వెబ్ సైట్ bhartifoundation.org/bharti-airtel-scholarship ను సందర్శించండి.

సామాన్యులకు షాక్..మళ్లీ పెరిగిన టమోటా ధర.. ఎంతంటే..!

Dayakar

Wed, 17 Jul, 2024

ప్రస్తుతం పెరిగిన నిత్యవసర వస్తువుల ధరలతో సామాన్యుడు అల్లాడిపోతున్నాడు. ఎలా జీవనం సాగించాలో తెలియక ఆందోళన చెందుతున్నాడు. ఇప్పటికే వివిధ నిత్యవసర వస్తువుల ధరలు భారీగా పెరిగాయి. వీటికి పోటీగా తామున్నామంటూ..కూరయాగాయలు కూడా వచ్చి చేరాయి. ఇటీవల కాలంలో కూరగాయల ధరలను పరిశీలిస్తే..పై పైకి వెళ్తున్నాయే తప్ప నేల వైపు చూడటం లేదు. ముఖ్యంగా టమాట ధర మరోసారి పేద, మధ్యతరగతి వారికి షాక్ ఇచ్చింది. కొన్ని రోజులుగా కాస్తా తగ్గుముఖం పట్టిన టమాట ధర..మళ్లీ పెరిగింది. మరి.. ఆ వివరాలు ఏమిటో ఇప్పుడు చూద్దాం…

ఈమధ్యకాలంలో కూరగాయల ధరలు విపరీతంగా పెరుగుతున్నాయి. ధర విషయంలో చికెన్‌, మటన్‌తో పోటీ పడుతున్నాయి. ముఖ్యంగా టమాటా ధరలు మళ్లీ పెరుగుతున్నాయి. కొన్ని రోజుల క్రితం భారీగా టామాటా ధరలు పెరిగిన సంగతి తెలిసిందే. కిలో రూ.80 నుంచి రూ.100 వరకు పలికాయి. అయితే ఇటీవల కాస్తా తగ్గు ముఖం పట్టింది. హైదరాబాద్ మార్కెట్ లో రూ.50 నుంచి రూ.60 కి లభిస్తున్నాయి. ఇక కాస్తా ధర తగ్గిందని సామాన్యులు సంతోష పడుతున్న వేళ మరోసారి టామాట షాకిచ్చింది. ఇప్పుడు మరోసారి రూ.80లకి చేరింది. కొన్ని ప్రాంతాల్లో అయితే గ్రేడ్-ఏ రకం టమాటాలు అయితే రూ.100కు కూడా చేరాయి. వర్షాలకు దెబ్బతినడం, సరిపడినంత లేకపోవడంతోనే టమాటా ధరలు పెరుగుతున్నాయని వ్యాపార వర్గాలు చెబుతున్నాయి.

ప్రస్తుతం రెండు తెలుగు రాష్ట్రాల్లోని వివిధ మార్కెట్లలో కిలో టమాట రూ.80 నుంచి రూ.100 పలుకుతోంది. మరోవైపు ఇతర కూరగాయలు, ఆకుకూరల ధరలు కూడా భారీగానే ఉన్నాయి. టమాటా ధరలు ఒక్కసారిగా దూసుకుపోతుండటంతో.. దాన్ని సాగు చేసిన రైతులు సంతోషం వ్యక్తం చేస్తున్నారు. కానీ సామాన్యులు, పేద, మధ్య తరగతి జనాలు టమాటా కొనాలంటేనే అమ్మో అంటున్నారు. మళ్లీ గతేడాది పరిస్థితులే వస్తాయని ఆందోళన వ్యక్తం చేస్తున్నారు. గతంలోలానే ఈ ఏడాది కూడా టమాటా సాగు, దిగుబడి తగ్గడంతో.. ధరలు పెరిగాయి అంటున్నారు మార్కెట్‌ విశ్లేషకులు. రానున్న రోజుల్లో టమాటా ధరలు మరింత పెరుగుతాయని అంచనా వేస్తున్నారు. అలానే ప్రస్తుతం మార్కెట్‌లో టమాటా రేటుతో పాటు ఇతర కూరగాయాల ధరలు కూడా మండిపోతున్నాయి.

మొత్తంగా పెరిగిన నిత్యవసర వస్తువలకు తోడు కూరగాయల ధరలు పెరగడంతో సామాన్యులు దిక్కుతోచని స్థితిలో ఉన్నారు. కొందరైతే టామాటలను కొనేందుకు కూడా వెనుకడుకు వేస్తున్నారు. కొన్ని రోజులు టమాటాలను కొనకుండా ఉంటే మేలు అనే భావనలో ఉన్నారు. మొత్తంగా పెరిగిన టామాటా ధరలతో సామాన్యులకు మరోసారి షాక్ తగిలినట్లు అయింది. మరి..టమాటా ధరలు పెరగడంపై మీ అభిప్రాయాలను కామెంట్స్ రూపంలో తెలియజేయండి.

ప్రభుత్వం సంచలన నిర్ణయం.. ఇక ఉద్యోగాలన్ని స్థానికులకే..

Dayakar

Wed, 17 Jul, 2024

ప్రైవేటు ఉద్యోగాల కల్పనలో స్థానికులకు అత్యధిక ప్రాధాన్యతనివ్వాలన్న వాదన ఎప్పటి నుండో వినిపిస్తుంది. ఇప్పటి పలు రాష్ట్రాల్లో దీనిపై చర్చ నడుస్తుంది. ఇదిలా ఉంటే.. ఇప్పుడు ఆ రాష్ట్ర ప్రభుత్వం సంచలన నిర్ణయం తీసకుంది. ప్రవేయిట్ ఉద్యోగాల్లో స్థానికులకు 75 శాతం రిజర్వేషన్లు కల్పించేలా రూపొందించిన బిల్లుకు మంత్రి వర్గం ఆమోదం తెలిపింది. మేనేజ్ మెంట్ ఉద్యోగాలలో 50 శాతం, నాన్ మేనేజ్ మెంట్ కేటగిరిలో 75 శాతం రిజర్వేషన్‌లను తప్పనిసరి చేసింది. ఈ బిల్లు ఐటీ సెక్టార్‌తో సహా మొత్తం ప్రైవేట్ రంగాలకు వర్తిస్తుంది. ఇంతకు ఏ రాష్ట్ర ప్రభుత్వం ఈ మేరకు కీలక నిర్ణయం తీసుకుందంటే.. ముఖ్యమంత్రి సిద్ద రామయ్య నేతృత్వంలోని కర్ణాటక కాంగ్రెస్ సర్కార్. ఈ నిర్ణయం తెలుగు రాష్ట్రాలపై ప్రభావితం చూపే అవకాశాలున్నాయి.

కన్నడిగులకు ప్రాధ్యాన్యతనిచ్చే విధంగా పరిశ్రమలు, కర్మాగాలతో పాటు ఇతర సంస్థల్లో స్థానికులకు 75 శాతం కోటా బిల్లుకు కర్ణాటక క్యాబినేట్ మంగళవారం ఆమోదం తెలిపింది. ఈ విషయాన్ని కర్ణాటక కార్మిక శాఖ మంత్రి సంతోష్ లాడ్ తన ఎక్స్ ఖాతా ద్వారా వెల్లడించారు. ఈ బిల్లు అమలుతో రాష్ట్రంలోని ప్రైవేట్ ఉద్యోగాల్లో కన్నడిగులకు 50శాతం నుంచి 75 శాతం వరకు రిజర్వేషన్లు లభిస్తాయని పేర్కొన్నారు. అలాగే సీఎం సిద్దరామయ్య కూడా సోషల్ మీడియా వేదికగా వెల్లడించారు. రాష్ట్ర ప్రజలు సౌకర్యవంతమైన జీవితాన్ని గడపాలని, తమది కన్నడ అనుకూల ప్రభుత్వమని, కన్నడిగుల సంక్షేమమే మా ప్రాధాన్యత అని పేర్కొన్నారను. అదేవిధంగా రాష్ట్ర వాసులకు ప్రాధాన్యత ఇవ్వని కంపెనీలకు జరిమానాలు కూడా విధించనుంది. బిల్లులో పొందుపరిచిన నిబంధనలను పాటించని కంపెనీలకు రూ. 10 వేల నుండి రూ. 25 వేల వరకు జరిమానా విధించబడుతుంది.

ఇక ఈ బిల్లును గురువారం శాసన సభలో ప్రవేశపెట్టనున్నారు. ఈ బిల్లు ఆమోదం పొందితే.. ఆంధ్రప్రదేశ్, తెలంగాణ వాసులకు చుక్కెదురైనట్లే. ఎందుకంటే.. ఇక్కడ ఐటీ కంపెనీల్లో వర్క్ చేసే వారంతా ఎక్కువగా తెలంగాణ, ఏపీ వాసులే కావడం గమనార్హం. ఇదిలా ఉంటే.. ఇందులో మరో ట్విస్ట్ ఉంది. ఇక్కడ ప్రైవేట్ సంస్థల్లో ఉద్యోగాలు పొందాలంటే..కొన్నిప్రమాణాలను కూడా బిల్లులో పొందుపరిచారు. కేవలం కన్నడ మాట్లాడితే కన్నడిగ అయిపోరు. ఓ వ్యక్తి రాష్ట్రంలో 15 సంవత్సరాలుగా రాష్ట్రంలో నివాసం ఉండి.. రాష్టర్ నోడల్ ఏజెన్సీ పరీక్షలో ఉత్తీర్ణులై ఉండాలి. వారినే స్థానికులుగా గుర్తిస్తారు. అయితే ఆయా సంస్థలకు కూడా మినహాయింపులు కోసం ప్రభుత్వానికి దరఖాస్తు చేసుకుంటే.. కొన్ని సడలింపులకు అనుమతినిస్తుంది. అన్ని ప్రైవేట్ సంస్థలు గ్రూప్ సి,డి బ్లూ కాలర్ ఉద్యోగాల కోసం 100 శాతం కన్నడిగులను మాత్రమే నియమించుకోవాల్సి ఉంటుంది.

రూ. 500లకే కిలో మటన్.. ఎగబడ్డ జనాలు.. ఎక్కడంటే..?

Dayakar

Wed, 17 Jul, 2024

ముక్కలేనిదే ముద్ద నోట్లోకి దిగదు మాంసాహారులకు. నిత్యం వండాలే కానీ తిని పెడుతుంటారు. రోజూ తింటున్నా మొహం మొత్తదు నాన్ వెజ్ ప్రియులకు. చికెన్, మటన్ ఎట్ లీస్ట్ ఎగ్ అయినా ఉండాల్సిందే. సోమవారం, శుక్రవారం, శనివారాలు వంటి వారాలు, వర్జ్యాలతో పని లేదు. ఎప్పుడు తినాలనుకుంటే.. అప్పుడు షాపుకు వెళ్లిన తెచ్చుకుని వండుకుని తినడమో, వండించుకోవడమో చేస్తుంటారు. కానీ ఈ మధ్య కాలంలో చికెన్, మటన్ వంటి ధరలు పెరిగిపోవడంతో కొని కొనలేక, తిని తినలేకపోతున్నారు నాన్ వెజ్ లవర్స్. కిలో చికెన్ రూ. 300లు పలుకుతుంటే.. మటన్ వెయ్యి రూపాయలకు చేరువైంది. అలాంటిది సగం రేటుకు మటన్ ఇస్తున్నామని ప్రకటన చేస్తే ఊరుకుంటారా.. లగెత్తరూ. అదే జరిగింది ఇక్కడ కూడా.

కడప జిల్లాలోని మైదుకూరులో ఇద్దరు వ్యాపారుల మధ్య జరిగిన కాంపిటీషన్.. మాంసాహార ప్రియులకు కలిసొచ్చింది. ఒకరి మీద ఒకరు పంతంతో సుమారు వెయ్యి రూపాయలు పలుకుతున్న వేట మాంసాన్ని రూ. 497కు ఇస్తామని ప్రకటించారు. అంతేనా మటన్ కొన్న వారికి ఫ్రీ గిప్ట్ కూడా ప్రకటించారు. మంచి తరుణం మించిపోతే రాదు అనుకున్న ప్రజలు సైతం భారీ ఎత్తున చేరుకుని కొనుగోలు చేశారు. దీంతో ఆ రెండు షాపులు కస్టమర్లతో కిటకిటలాడాయి. పంతానికి పోయి ఇద్దరు వ్యాపారులు చేసిన పనికి.. మటన్ ప్రియులు లాభపడ్డారు. మైదకూరులో మటన్ షాపులు నిర్వహిస్తున్న ఇద్దరు వ్యాపారులకు మాటామాటా పెరిగింది. నువ్వెంత అంటే నువ్వెంత అనుకునే స్థాయికి చేరింది. ఇద్దరి మధ్య ఏర్పడిన అభిప్రాయ బేధాలు వారి కొంపకే ఎసరు తెచ్చాయి.

ఒకరిపై ఒకరు పై చేయి సాధించేందుకు తమ వ్యాపారాన్ని కూల్చుకున్నారు. పందానికి పోయి తమ కంటిని తామే పొడుచుకున్నారు. ఓ షాపు యజమాని రూ. 498 కిలో మటన్ అని ప్రకటించడంతో పాటు గిఫ్ట్ ఫ్రీ అని తెలిపాడు. కిలో మటన్‌తో పాటు రెండు చాక్లెట్లు అందించాడు. నువ్వు రూ. 498 పెడితే.. నేను అంతకన్నా తక్కువకే అమ్ముతానంటూ మరో మటన్ షాపు యజమాని రూ. 497కే కిలో మటన్ ఇవ్వడంతో పాటు మాసాల ప్యాకెట్ ఫ్రీగా ఇచ్చాడు. ఈ విషయం తెలిసిన మైదుకూరే కాదు.. చుట్టు పక్కల ఉన్న ప్రజలు సైతం షాపుకు క్యూ కట్టారు. రూ. 500 లోపే కిలో మటన్ రావడంతో కొంత మంది ఎగబడి మరీ.. కిలోల కొద్దీ మటన్ కొనుగోలు చేశారు. ఇక సాయంత్రానికి ఇద్దరి దగ్గర.. మటన్ అయిపోయింది. ఇద్దరి మటన్ షాపు యజమానుల మధ్య గొడవ.. మాంసాహార ప్రియులకు లాభం చేకూర్చినట్లు అయ్యింది.

ఈ అర్హతలుంటే చాలు.. CRPFలో ఉద్యోగాలు రెడీ.. నెలకు 75 వేల జీతం

Dayakar

Wed, 17 Jul, 2024

ఇటీవల కేంద్ర ప్రభుత్వ సంస్థల నుంచి భారీ స్థాయిలో జాబ్ నోటిఫికేషన్స్ రిలీజ్ అవుతున్న విషయం తెలిసిందే. త్రివిధ దళాలు, బ్యాంక్ జాబ్స్, ఇతర ఉద్యోగాలు వేల సంఖ్యలో భర్తీకానున్నాయి. ఇటీవల పోస్టల్ డిపార్ట్ మెంట్ నుంచి కూడా 40 వేలకు పైగా జాబ్స్ భర్తీ కోసం నోటిఫికేషన్ రిలీజ్ అయిన విషయం తెలిసిందే. మరి మీరు ప్రభుత్వ ఉద్యోగాల కోసం సన్నద్ధమవుతున్నారా? అయితే మీకు గుడ్ న్యూస్. సెంట్రల్ రిజర్వ్ పోలీస్ ఫోర్స్ పలు ఉద్యోగాల భర్తీకి నోటిఫికేషన్ రిలీజ్ చేసింది. ఈ ఉద్యోగాలకు ఎంపికైతే నెలకు 75 వేల జీతం పొందొచ్చు. కాంపిటీషన్ కూడా తక్కువగా ఉంటుంది.

ఈ ఉద్యోగాలకు ఎలాంటి రాత పరీక్ష లేదు. ఇంటర్వ్యూ, సర్టిఫికేట్ వెరిఫికేషన్ తదితరాల ఆధారంగా ఎంపిక చేస్తారు. మీరు ఎంబీబీఎస్ ఉత్తీర్ణులై ఖాళీగా ఉన్నట్లైతే ఈ ఉద్యోగాలకు పోటీపడొచ్చు. సెంట్రల్ రిజర్వ్ పోలీస్ ఫోర్స్ కాంట్రాక్ట్ ప్రతిపదికన సీఆర్పీఎఫ్ హాస్పిటల్స్ లో జనరల్ డ్యూటీ మెడికల్ ఆఫీసర్ పోస్టుల భర్తీకి నోటిఫికేషన్ రిలీజ్ చేసింది. అర్హత, ఆసక్తి ఉన్న అభ్యర్థులు జులై 31న ఇంటర్వ్యూలకు హాజరుకావాల్సి ఉంటుంది. ఈ రిక్రూట్ మెంట్ ద్వారా మొత్తం 22 జనరల్ డ్యూటీ మెడికల్ ఆఫీసర్ పోస్టులను భర్తీ చేయనున్నారు. అభ్యర్థుల వయసు 70 ఏళ్లకు మించకూడదు. ఆసక్తి ఉన్న మహిళా, పురుష అభ్యర్థులు పోటీపడొచ్చు.