రాత్రి సమయంలో గుంటూరు ఆర్టీసీ బస్టాండ్ వద్ద కోలాహలంగా ఉంది. ఇతర ప్రాంతాలకు వెళ్లే బస్సులు, వస్తున్న బస్సులతో ఆ ప్రాంతమంతా రద్దీగా ఉంది. ప్రయాణీకులు కూడా పెద్ద సంఖ్యలోనే ఉన్నారు.

అయితే అదే సమయంలో కొత్తపేట పోలీసులు ఆర్టిసి బస్టాండ్ వద్దకు వచ్చారు. అటుగా వెలుతున్న ప్రైవేటు ట్రావెల్స్ బస్సును ఆపారు. బస్సులో క్షుణ్ణంగా తనిఖీలు చేశారు. వారికొచ్చిన ముందుస్తు సమాచారం మేరకు ఆ బస్సులో వారందరిని చెక్ చేశారు. వారికొచ్చిన సమాచారం నిజమే అయింది.

డ్రగ్స్ సరఫరా చేస్తున్న ఇద్దరు అనుమానితుల్ని పోలీసులు గుర్తించారు. బెంగళూరు నుండి గుంటూరు వస్తున్న ట్రావెల్ బస్సులో డ్రగ్స్ తరలిస్తున్న ఇద్దరిని అదుపులోకి తీసుకొని వారి లగేజ్ చెక్ చేయగా 68 గ్రాముల డ్రగ్స్ దొరికింది. వారిద్దిరిని అదుపులోకి తీసుకున్న పోలీసులు డ్రగ్స్ ఎక్కడి నుండి తీసుకొస్తున్నారో అన్నదానిపై విచారణ ప్రారంభించారు. పెడ్లర్ బెంగళూరులో ఉన్నట్లు అనుమానితులు చెప్పడంతో ప్రత్యేక పోలీస్ బృందం బెంగళూరికి బయలు దేరింది. రవాణా చేస్తున్న వారితో పాటు వారికి విక్రయించిన వారిని అదే విధంగా కొనుగోలు చేసే వారిని గుర్తించే పనిలో పోలీసులు పడ్డారు.

అయితే గతంలోనూ కొంతమంది గుంటూరుకు చెందిన డ్రగ్స్ రవాణా చేసే వారిని పోలీసులు హైదరాబాద్లో పట్టుకున్నారు. దీంతో ఈ డ్రగ్స్ రవాణా చేసిన వారికి గత నేరస్తులతో సంబంధం ఉందా లేదా అన్న కోణంలో పోలీసులు దర్యాప్తు చేస్తున్నారు. పెద్ద ఎత్తున ఇంజనీరింగ్ కాలేజ్ ఉండడంతో విద్యార్ధులనే టార్గెట్ చేసి కొంతమంది డ్రగ్స్ రవాణా చేస్తున్నట్లు పోలీసులు అనుమానిస్తున్నారు. అయితే గుంటూరు పోలీసులు ఎప్పటికప్పుడు కాలేజ్ హాస్టల్స్‌పై తనిఖీలు చేస్తూ విద్యార్ధులకు అవగాహన కల్పిస్తున్నారు. పోలీసులు పకడ్బందిగా చర్యలు చేపట్టినా అడపాదడపా గుంటూరు కేంద్రంగా డ్రగ్స్ పట్టుబడటం కలకలం రేపుతోంది.

ఒంగోలులో బైక్‌ రేసర్ల ఆగడాలకు జనం బెంబేలెత్తుతున్నారు. రోడ్డు పక్కనుంచి రయ్యి రయ్యిమంటూ పెద్ద శబ్దంతో దూసుకుపోతున్న బైకర్ల ధాటికి వృద్దులు, మహిళలు హడలిపోతున్నారు.

బైక్‌ సైలెన్సలర్లను మాడిఫైడ్ చేసి ఎక్కువ శబ్దం వచ్చేలా తయారు చేసిన సైలెన్సర్లను అమర్చి రోడ్లపై దూసుకుపోతున్న బైకర్ల ఆగడాలు శృతి మించడంతో పోలీసులకు ఫిర్యాదులు అందాయి. దీంతో రంగంలోకి దిగిన పోలీసులు పెద్ద శబ్దంతో రోడ్లపై దూసుకుపోతున్న బైక్‌లను అడ్డుకుని వాటిని సైలెన్సర్లను స్వాధీనం చేసుకున్నారు. ఒంగోలులో 500పైగా స్వాధీనం చేసుకున్న మాడిఫైడ్ సైలెన్సర్లను అదే నడిరోడ్డుపై అందరూ చూస్తుండగా వాటిని బుల్‌డోజర్లతో తొక్కించి నలిపేశారు. వారికి జరిమానా కూడా విధించారు.

వాహనదారుల ట్రాఫిక్ ఉల్లంఘనలు జరగకుండా రోడ్డు భద్రతా నియమాలను పాటించేలా చూడటమే లక్ష్యంగా ఒంగోలు నగర పరిధిలో విపరీతమైన ధ్వని పుట్టించే బైక్‌ సైలెన్సర్లను స్వాధీనం చేసుకుని ధ్వంసం చేస్తున్నట్టు ప్రకాశం జిల్లా ఎస్పీ ఏఆర్‌ దామోదర్‌ తెలిపారు. నెల రోజులుగా ఒంగోలు టౌన్ పరిధిలో ట్రాఫిక్ పోలీస్లు స్పెషల్ డ్రైవ్ తనిఖీలు చేపట్టి ద్విచక్ర వాహనాలకు మాడిఫైడ్ సైలెన్సర్ల ద్వారా అధిక శబ్దం చేసే 515 సైలెన్సర్లను స్వాధీనం చేసుకోగా వాటిని ఎస్‌పీ ఆధ్వర్యంలో పోలీసులు రోడ్డురోలర్‌తో తొక్కించి ధ్వంసం చేశారు. ఒంగోలులోని అద్దంకి సెంటర్ దగ్గర స్వాధీనం చేసుకున్న అధిక శబ్దాలు చేసే సైలెన్సర్లను జనం అంతా చూస్తుండగా ధ్వంసం చేశారు. నంబర్‌ ప్లేట్లు లేని, ఇర్రెగ్యులర్ నంబర్‌ ప్లేట్లు ఉన్న వాటిని గుర్తించి వారిపై చట్టపరమైన చర్యలు తీసుకుంటున్నట్లు ఎస్పీ తెలిపారు. మోటార్ వాహనాల చట్టం నిబంధనలు ఉల్లంఘించి మాడిఫైడ్ సైలెన్సర్లతో ప్రయాణించే వాహనాలను ఉపేక్షించమని హెచ్చరించారు.బైకులకు విపరీత శబ్దాన్నిచ్చే సైలెన్సర్ అమర్చుకుని శబ్ద కాలుష్యం సృష్టిస్తే చట్టపరమైన చర్యలు తీసుకోవడమే కాకుండా జరిమానా విధిస్తామని, వాహనాలకు మాడిఫైడ్ సైలెన్సర్లను విక్రయించే షాపుల యజమానులు, వాటిని బిగించే మెకానిక్ లపై కూడా చర్యలు తీసుకుంటామని ఎస్పీ దామోదర్‌ హెచ్చరించారు.

అన్నమయ్య జిల్లా నందలూరు మండల కేంద్రంలో సౌమ్యనాథస్వామి దేవాలయం ఉంది. 11వ శతాబ్దానికి చెందిన ఈ పురాతన దేవాలయం 10 ఎకరాల విస్తీర్ణం కలిగి 108 స్తంభాలతో నిర్మించబడింది.

ఈ దేవాలయంలో 108 ప్రదక్షిణలు చేసి స్వామి వారిని మొక్కుకుంటే కోరిన కోర్కెలు తీరుస్తాడని భక్తుల విశ్వాసం. సౌమ్యనాథ స్వామి ఆలయానికి విశేష చరిత్ర ఉంది. ఈ ఆలయం స్థానిక ఇతిహాసాలు మరియు ఈ ప్రాంతంలోని ఆధ్యాత్మిక సంప్రదాయాలతో ముడిపడి ఉంది. ఆలయ వాస్తుకళకు ఆదరణ పొందిన చోళ రాజవంశ పాలనలో ఈ ఆలయం నిర్మించబడిందని నమ్ముతారు. శతాబ్దాలుగా ఈ ఆలయం విష్ణు భక్తులకు అతి ముఖ్యమైన ప్రదేశం. స్వౌమ్యనాధస్వామి ఆలయ నిర్మాణమే ఒక అద్భుతం సౌమ్యనాథుని గర్భగుడిలో ఎలాంటి దీపం లేకపోయినా మూలవిరాట్టు ఉదయం నుండి సాయంత్రం వరకు దేదీప్యమానంగా వెలుగొందే విధంగా ఆలయ నిర్మాణం జరగడం ఇక్కడ ప్రత్యేకత. ఆలయంలో కొన్ని శాసనాలపై సూర్య చంద్ర చిహ్నాలు ఉన్నాయి. ఆలయ కుడ్యాలపై మత్య్స, సింహ తదితర చిహ్నాలు ఉన్నాయి. ఆలయంలోని శిల్ప కలలకు ఎంతో పురాతన చరిత్ర దాగి ఉంది. అంతే కాదు కలియుగం అంతానికి చేపకు సంబంధం కూడా ఉందంటారు.

యుగాంతం గురించి బ్రహ్మంగారు కాలజ్ఞానంలో తెలుపుతూ వచ్చారు. మరి కొన్ని పురాణాలూ యుగాంతం గురించి చెబుతూనే వచ్చాయి. ఐతే యుగంతాం గురించి సౌమ్యనాథ స్వామి ఆలయంలోని చేప కూడా చెబుతుంది. స్వామివారి ఆలయంలో అంతర్ భాగంలో పైన ఒక రాతిపై చేప ఆకారాన్ని శిల్పంగా చెక్కారు. అక్కడ మత్స్య ఆకారాన్ని చెక్కడానికి పెద్ద చరిత్ర ఉంది. అక్కడి వేద పండితులు చెప్పే విషయాల ప్రకారం భవిష్యత్తులో భారీ వరదలతో ఈ ఆలయంలో లోపలికి నీరు చేరుకుంటుందని, ఆ నీరు ఈ చేపని తాకిన వెంటనే ఆ చేపకి ప్రాణం వచ్చి నీటిలో ఈదుతుందని పురాణాలు చెబుతున్నాయని వేదపండితులు అంటున్నారు. అప్పుడు ఈ కలియుగం అంతం అవుతుందని స్థల పురాణం చెప్తోందని అంటున్నారు. ఇంతకీ చేపకు జీవం వస్తుందా కలియుగం అంతం అవుతుందా అనేది శాస్త్రీయం. ఇది ఏమైనా కలియుగ అంతంపై అనేక పురాణాలు ఉన్నాయి అందులో ఇది ఒకటి.

ఏపీ కాంగ్రెస్ అధ్యక్షురాలు వైఎస్ షర్మిల రెడ్డి.. ఆర్టీసీ బస్సులో ప్రయాణించి కూటమి ప్రభుత్వం ఇచ్చిన హామీపై నిలదీశారు. విజయవాడ నుంచి తెనాలికి ఆమె ఆర్టీసీ బస్సులో ప్రయాణించారు. మహిళా ప్రయాణికుల పక్కనే కూర్చుని వారితో ఆమె మాట్లాడారు. ఉచిత బస్సు ప్రయాణం హామీ అమలు కాకపోవడంపై మహిళల ఉద్దేశం ఏంటో ఆమె తెలుసుకునే ప్రయత్నం చేశారు. ఫ్రీ బస్సు కోసం తామంతా ఎదురుచూస్తున్నట్లు ఈ సందర్భంగా ఆమెకు వారు చెప్పారు. దీంతో ఉచిత బస్సు ప్రయాణం హామీ కోసం గట్టిగా కూటమి ప్రభుత్వాన్ని నిలదీయాలని షర్మిల మహిళా ప్రయాణికులకు సూచించారు. అలాగే ప్రభుత్వాన్ని కూడా వెంటనే ఈ హామీ అమలు చేయాలని ఆమె డిమాండ్ చేశారు. ఇప్పటికే ఎన్నికల్లో ఇచ్చిన సూపర్ సిక్స్ హామీలు అమలు చేయకుండా చంద్రబాబు నాయుడు పాలసీల పేరుతో టైంపాస్ చేస్తున్నారంటూ మీడియా ముందు షర్మిల విమర్శలు గుప్పించిన విషయం తెలిసిందే.

ఆంధ్రప్రదేశ్‌కి ప్రత్యేక హోదా ఇస్తామని తిరుపతిలో నిలబడి ప్రధాని మోదీ చెప్పారని.. ఆయన ఇచ్చిన మాట ఎక్కడ పోయిందని ఏపీసీసీ అధ్యక్షురాలు వైఎస్ షర్మిల ప్రశ్నించారు. రాష్ట్రానికి హోదా వచ్చి ఉంటే.. పరిశ్రమల కోసం ఎక్కడికి పోవాల్సిన అవసరం ఉండేది కాదని అన్నారు. పోటీ పడి మరీ ఏపీకి పరిశ్రమలు వస్తాయని చెప్పారు. ప్రత్యేక హోదా ఉన్న ఉత్తరాఖండ్‌లో 2 వేల పరిశ్రమలు వచ్చాయని.. హిమాచల్ ప్రదేశ్‌లో దాదాపు 10 వేల పరిశ్రమలు వచ్చినట్లు గుర్తు చేశారు. మరి హోదా మీద మోదీ ఇచ్చిన మాట ఎక్కడ పోయిందని షర్మిల మోదీని ప్రశ్నించింది.

రాష్ట్రంలో నిత్యావసర వస్తువుల ధరల భారం నుంచి ప్రజలకు ఉపశమనం కలిగించేందుకు ప్రభుత్వం చేపట్టిన చర్యలు ఎక్కడా ఫలితాన్ని ఇవ్వడం లేదు. సబ్సిడీ ధరలకు ఉల్లిపాయలు, టామాటాలు, వంట నూనెల్ని అందించాలని నిర్ణయించినా క్షేత్ర స్థాయిలో ఆ ధరలతో ఎక్కడా అమ్మకాలు జరగక పోవడం మంత్రి తనిఖీల్లో బయటపడింది.

ఆంధ్రప్రదేశ్‌ ప్రభుత్వ ప్రకటనలకు, ఆచరణలో జరుగుతున్న దానికి పొంతన లేదని మంత్రి తనిఖీల్లోనే స్పష్టమైంది. ఏపీలో నిత్యావసర వస్తువుల ధరల భారం నుంచిప్రజలకు ఉపశమనం కలిగించడానికి సబ్సిడీ ధరలతో విక్రయించాలని నిర్ణయించినా పెద్దగా ప్రయోజనం ఉండట్లేదు. రైతు బజార్లు మొదలుకుని సూపర్ బజార్ల వరకు ఎక్కడా సబ్సిడీ ఉత్పత్తుల జాడ కనిపించడం లేదు.

ప్రజలకు విక్రయించే సరుకులు నాణ్యత, ధరలపై విజయవాడలో పడమట రైతుబజార్ , గురునానక్ కాలనీలో ఉన్న ఉషోదయ సూపర్ మార్కెట్‌లో రాష్ట్ర పౌరసరఫరాల శాఖ మంత్రి నాదెండ్ల మనోహర్ ఆకస్మిక తనిఖీ చేశారు.

ధరల స్థిరీకరణ విషయంలో భాగంగా కూటమి ప్రభుత్వం ఆదేశాల మేరకు అన్ని రైతు బజార్లు, రిటైల్ మార్ట్‌లు, దుకాణాలలో ప్రభుత్వం నిర్ణయించిన ధరకే నాణ్యమైన సరకులను వినియోగదారులకు అందించాలని ప్రభుత్వం నిర్ణయించింది.

బహిరంగ మార్కెట్‌లలో నిత్యావసర సరుకుల ధరలను నియంత్రించడంలో భాగంగా అన్ని రైతు బజార్లలో వంట నూనెలు, కందిపప్పు, ఉల్లి, టమాటాలను అందుబాటులో ఉంచినట్టు ప్రభుత్వం గత వారం పదిరోజులుగా ప్రకటనలు ఇస్తోంది. క్షేత్ర స్థాయిలో సబ్సిడీ ధరలకు విక్రయాలు పెద్దగా జరగడం లేదు. మార్కెటింగ్‌ శాఖ నుంచి అరకొరగా వచ్చే ఉత్పత్తులు రోజూ కొంతమందికి మాత్రం విక్రయిస్తున్నారు. దీనిపై ప్రజల నుంచి ఫిర్యాదులు రావడంతో మంత్రి చర్యలు చేపట్టారు.

విజయవాడ పడమట రైతు బజార్‌, గురు నానక్ కాలనీలోని ఉషోదయ సూపర్ మార్కెట్ ను గురువారం మంత్రి నాదెండ్ల ఆకస్మికంగా తనిఖీ చేసి స్పెషల్‌ కౌంటర్‌ ద్వారా వినియోగదారులకు తక్కువ ధరకే అందుబాటులో ఉంచిన నిత్యావసర సరుకులను పరిశీలించారు. ప్రజలకు బియ్యం, కందిపప్పు, వంటనూనె చౌక ధరలకు అందించేందుకు ప్రభుత్వం చర్యలు తీసుకుందని చెప్పారు.

రైతు బజార్లో సరుకులలో వ్యత్యాసంపై ఎస్టేట్‌ ఆఫీసర్‌ను నిలదీశారు. రైతు బజారులో బియ్యం, కందిపప్పు పంపిణీకి ఏర్పాటు చేసిన కౌంటర్ల నిర్వహణకు సమయపాలన పాటించకపోవడాన్ని గుర్తించి షాపుల నిర్వాహకులపై తీవ్ర అసహనం వ్యక్తం చేశారు. అధికారులు నిర్లక్ష్యం వహిస్తే సహించేది లేదన్నారు.

వంటనూనెలు, ఉల్లి, టమాటా విక్రయాలపై వినియోగదారులను అడిగి సమాచారం తెలుసుకున్నారు. గురు నానక్ కాలనీ ఉషోదయ సూపర్ మార్కెట్ సరుకుల ధరలు పరిశీలించినప్పుడు.. కందిపప్పు ధర ప్రభుత్వం నిర్ణయించిన విధంగా అమ్మకాలు లేకపోవడానికి మంత్రి సూపర్ మార్కెట్ నిర్వాహకులను నిలదీశారు.అధిక ధరకు అమ్మకాలు జరిపితే కఠిన చర్యలు తప్పవని హెచ్చరించారు.

వినియోగదారులకు తక్కువ ధరకే నిత్యావసర సరుకులు, వంటనూనె రైతు బజార్లు, హోల్‌ సేల్‌, రిటైల్‌ దుకాణాలలో అందుబాటులో ఉంచినట్లు మంత్రి నాదెండ్ల తెలిపారు. మార్కెట్‌ ధరల కంటే తక్కువ ధరలకే నిత్యావసర సరుకులను వినియోగదారులకు అందజేయడం జరుగుతుందన్నారు.

పామాయిల్ లీటర్ 110 రూపాయలకు , సన్‌ ఫ్లవర్‌ ఆయిల్‌ను లీటర్124 రూపాయలకు , కిలో 67 రూపాయలకే కందిపప్పు, వినియోగదారులకు అందుబాటులో ఉంచామన్నారు.ప్రభుత్వం కల్పించిన ఈ సదుపాయాన్ని ప్రతి వినియోగదారుడు సద్వినియోగం చేసుకోవాలన్నారు.
ప్రభుత్వ ఆదేశాలు ఖాతరు చేయని వ్యాపారులు..

ధరలు నియంత్రణలో భాగంగా, ప్రభుత్వం నిర్ణయించిన ధరలకు విక్రయాలు జరపాలని మంత్రులు, అధికారులు పదేపదే చెబుతున్నా వ్యాపారులు మాత్రం ఆ ఆదేశాలను ఖాతరు చేయడం లేదు. ప్రభుత్వ ధరలకు విక్రయాలు గిట్టుబాటు కావడం లేదంటూ రైతు బజార్లలో సైతం అదనపు ధరలు వసూలు చేస్తున్నారు.

కూటమి ప్రభుత్వం ఇంకా బడ్జెడ్ ప్రవేశపెట్టడం లేదని.. జగన్ పదే పదే విమర్శలు చేస్తున్నారు. చాలామంది ఏపీ బడ్జెట్ కోసం ఎదురు చూస్తున్నారు. ఈ నేపథ్యంలో.. బడ్జెట్‌ను ప్రవేశపెట్టేందుకు కూటమి ప్రభుత్వం సిద్ధమైంది. నవంబర్ రెండో వారంలో ఏపీ బడ్జెట్‌ను ప్రవేశపెట్టే అవకాశం ఉంది.

నవంబర్ నెలలో పూర్తిస్థాయి బడ్జెట్‌ను ప్రవేశపెట్టేందుకు కూటమి ప్రభుత్వం కసరత్తు చేస్తోంది. ఆర్థికశాఖ అధికారులు బడ్జెట్‌ రూపకల్పనలో బిజీగా ఉన్నారు. ఆర్థిక మంత్రి పయ్యావుల కేశవ్‌.. బడ్జెట్‌ సమావేశాల తేదీలు ఖరారు చేసే పనిలో నిమగ్నమయ్యారు. అయితే.. నవంబర్ రెండో వారంలో సమావేశాలు నిర్వహించి.. పూర్తిస్థాయి బడ్జెట్ ప్రవేశపెట్టే అవకాశం ఉందని తెలుస్తోంది. ముఖ్యంగా మూడు ప్రాజెక్టులకు బడ్జెట్‌లో పెద్దపీట వేసే అవకాశం ఉంది. ఏపీ బడ్జెట్ 2024కు సంబంధించి 6 ముఖ్యాంశాలు ఇవీ..

1.అసెంబ్లీ ఎన్నికల దృష్ట్యా.. వైసీపీ ప్రభుత్వం ఫిబ్రవరి నెలలో ఓటాన్‌ అకౌంట్‌ బడ్జెట్‌ను సమర్పించింది. మొత్తం రూ.2,86,389 కోట్లకు బడ్జెట్‌ సమర్పించారు. 2024 ఏప్రిల్‌ నుంచి జులై 31 వరకు నాలుగు నెలల కాలానికి మొత్తం 40 గ్రాంట్ల కింద రూ.1,09,052.34 కోట్లకు గత ప్రభుత్వం శాసనసభ ఆమోదం తీసుకుంది.

2.జూన్‌లో కూటమి ప్రభుత్వం ఏర్పడింది. జులైలో పూర్తి స్థాయి బడ్జెట్‌ సమర్పించాల్సి ఉంది. కానీ.. ఆర్థిక పరిస్థితి సరిగా లేకపోవడంతో బడ్జెట్ ప్రవేశపెట్టలేదు. దీంతో మరోసారి ఓటాన్‌ అకౌంట్‌కు ఆర్డినెన్సు రూపంలో ఆమోదం తీసుకున్నారు.

3.ఆగస్టు నుంచి నవంబరు వరకు రాష్ట్ర ప్రభుత్వ ఖర్చులు, ఇతర కార్యకలాపాల కోసం రూ.1,29,972.97 కోట్లతో 40 గ్రాంట్ల కింద రెండో తాత్కాలిక బడ్జెట్‌కు గవర్నర్‌ నుంచి ఆమోదం తీసుకున్నారు. మొత్తం 8 నెలల కాలం ఓట్‌ ఆన్‌ అకౌంట్‌ పద్దుతోనే గడిచిపోయింది.

4. అసెంబ్లీ ఎన్నికల్లో కూటమి సూపర్‌ సిక్స్‌ పేరుతో ప్రజలకు హామీలు ఇచ్చింది. ప్రభుత్వం ఏర్పడిన కొత్తలోనే వృద్ధాప్య, ఇతర పెన్షన్ల మొత్తాన్ని పెంచి అమలు చేస్తున్నారు. కానీ.. మిగిలిన సంక్షేమ పథకాల అమలు సరిగా జరగడం లేదు. దీంతో ఈ బడ్జెట్‌లో ఆయా పథకాల కోసం నిధులు కేటాయించేందుకు ఆర్థికశాఖ ప్లాన్ చేస్తోంది.

5.గతంలో జగన్ అనేక సంక్షేమ కార్యక్రమాలు అమలు చేశారు. ఇప్పుడు కూటమి ఇచ్చిన హామీలు అమలు చేయాలంటే.. గతంలో కంటే ఎక్కువ నిధులు అవసరం. దాదాపు రూ.20 వేల కోట్ల వరకు అదనంగా ఖర్చవుతుందని అధికారులు అంచనా వేస్తున్నారు. నిధుల సమీకరణ, కేటాయింపుల విషయంలో ఆర్థిక శాఖ అధికారులు జాగ్రత్తగా వ్యవహరిస్తున్నారు. ఒక్కో పథకానికి ఎంత ఖర్చు అవుతుందనే లెక్కలు వేస్తున్నారు.

6.ఈ ఏడాది పూర్తిస్థాయి బడ్జెట్‌ దాదాపు రూ.2.90 లక్షల కోట్లు ఉండొచ్చని ఆర్థిక శాఖ అధికారులు అంటున్నారు. ఈ బడ్జెట్‌లో ముఖ్యంగా రోడ్ల నిర్మాణం, మరమ్మతులు, అమరావతి రాజధాని, పోలవరం ప్రాజెక్టుకు పెద్దపీట వేయనున్నారు. అటు కేంద్రం నుంచి వచ్చే నిధులు, సాయంపైనా ఈ బడ్జెట్‌లో క్లారిటీ ఇచ్చే అవకాశం కనిపిస్తోంది.

టీడీపీ నాయకుల నుంచి కార్యకర్తల వరకు క్రమశిక్షణతో ఉండాలని ప్రజలు అన్నీ గుర్తు పెట్టుకుంటారని, ఎన్డీఏతోనే భవిష్యత్తు ఉంటుందనే భరోసా ప్రజలకు ఇవ్వాలని సీఎం చంద్రబాబు సూచించారు.టీడీపీ పార్టీ ఎమ్మెల్యేలు, ఎంపీలతో సమావేశమైన బాబు వైసీపీకి వచ్చిన ఫలితాలు టీడీపీ కూటమికి రాకుండా జాగ్రత్త పడాలన్నారు.
ఎన్డీఏకు వైసీపీ గతి పట్టకూడదని హెచ్చరించిన టీడీపీ అధ్యక్షుడు చంద్రబాబు

ప్రజలు మౌనంగా ఉన్నంత మాత్రాన అన్ని భరిస్తున్నారని, అన్నీ గమనిస్తారనే అప్రమత్తతో నాయకులు వ్యవహరించాలని, మద్యం వ్యాపారంలో టీడీపీ నేతలు జోక్యం చేసుకుంటే సహించనని చంద్రబాబు హెచ్చరించారు. రాష్ట్రంలో గత ఐదేళ్ల వైసీపీ పాలనతో ప్రజలు విసిగిపోయి ఎన్నికల్లో భారీ మెజార్టీని కట్టబెట్టారని ముఖ్యమంత్రి చంద్రబాబు నాయుడు అన్నారు. పార్టీ ఎమ్మెల్యేలు, ఎంపీలతో నిర్వహించిన సమీక్షలో పార్టీ నాయకుల ఏ స్థాయి వారైనా క్రమశిక్షణతో ఉండాలని హెచ్చరించారు. అందరి పనితీరును సమీక్షిస్తున్నామని వైసీపీకి వచ్చిన పరిస్థితి రానివ్వకూడదన్నారు.

ఐదేళ్లలో వైసీపీ చేయని తప్పు లేదు, బెదిరించని విషయం లేదని ఎన్నికల్లో ఆ పార్టీకి 11 స్థానాలకు ఎందుకు పడిపోయిందో ఆలోచించుకోవాలన్నారు. వైసీపీ ఎన్ని సర్వేలు చేసినా, 175చోట్ల వస్తామని చెప్పినా ఎందుకు గెలవలేదని, ఆ రోజు వారు చేసిన పనులన్నీ ప్రజల మనసులో ఉన్నాయని చంద్రబాబు అన్నారు.
మద్యం వ్యాపారంలో వేలు పెట్టొద్దు…

ఏపీలో మాగుంట వంటి కుటుంబాలు ఎప్పటి నుంచో లిక్కర్ వ్యాపారంలో ఉన్నారని, రాజకీయాల్లోకి వచ్చాక కొత్తగా మద్యం వ్యాపారంలోకి రావాలనుకుంటే మాత్రం ఊరుకునేది లేదని, మద్యం వ్యాపారంలో జోక్యాన్ని ఊరుకోనని, అంతా క్రమశిక్షణతో ఉండాల్సిందేనని, అలాంటి వాటిని తాను ఊరుకోనని, అవతల వారి వద్ద వేల కోట్ల డబ్బులున్నాయని, డబ్బులు ఖర్చు పెట్టారని, ఫీల్ గుడ్ ఫ్యాక్టర్ లేకపోతే, ప్రజల్లో నమ్మకం లేకపోతే విజయం దక్కదన్నారు. మద్యం వ్యాపారంలో జోక్యం చేసుకుంటున్న వారిని ఉపేక్షించనని చంద్రబాబు హెచ్చరించారు.
వైసీపీ పరిస్థితి వద్దు…

వైసీపీ హయంలో ప్రజలు విధిలేక మాట్లాడలేదని, టీడీపీ కూడా నిలబడకపోతే ఎన్నికల్లో ఏమయ్యేదో తెలీదని.. టీడీపీ నిలబడి పోరాడింది. చరిత్రలో ఎప్పుడు లేని విధంగా 93శాతం విజయం సాధించామని చెప్పారు. ఎన్నికల్లో ప్రతి ఒక్కరు పనిచేయడం, కష్టపడటం, ఓట్లేయడం వాస్తవమేనని, అమెరికా నుంచి కూడా సొంత డబ్బు ఖర్చు పెట్టుకుని వచ్చి ఎన్నికల పనిచేసి గెలిపించుకున్నామనే తృప్తితో వెళ్లారన్నారు. అయితే ప్రజలు తమను ఇబ్బంది పెడుతున్నారనే భావనకు గురైతే పార్టీకి ఇబ్బందులు తప్పవన్నారు.

వారిలా ప్రవర్తించొద్దు..రావణ కాష్టం చేయోద్దు

ఒక నాయకుడు జైలుకు వెళ్లారు, మరో నాయకుడు టార్చర్‌ అనుభవించారని కానీ అలాంటివి రిపీట్‌ చేస్తే రాష్ట్రం రావణ కాష్టం అవుతుందని చంద్రబాబు హెచ్చరించారు. తప్పు చేసిన వారిని వదిలిపెట్టమని, తప్పు చేశారని కక్ష సాధింపులకు పాల్పడితే ప్రజలు క్షమించరన్నారు. ప్రస్తుతం సమిష్టిగా పనిచేస్తే తప్ప ప్రజల అకాంక్షలు నేరవేర్చలేమన్నారు.
ఎవరు తప్పు చేసినా నాదే బాధ్యత..

ప్రతిఒక్కరు క్రమశిక్షణతో వ్యవహరించాలని, చిట్టచివర ఉండే ఉద్యోగి తప్పు చేసినా సిఎం మీదకు వస్తుందని, ఎన్డీఏలో ఉండే ఏ పార్టీ కార్యకర్త తప్పు చేసినా దానికి సీఎం బాధ్యత వహించాల్సి వస్తుందన్నారు. ఎవరు ఏమి చేసినా దానికి ముఖ్యమంత్రిదే బాధ్యత అవుతుందని, 95లో సీఎం అయినపుడు చాలా వేగంగా వెళ్లామని, అదే సమయంలో ప్రజలు అదే విధంగా ఆశీర్వదించారని, ప్రజలతో ప్రభుత్వం ప్రవర్తించే తీరు వల్లే ఎన్నికల్లో తిరిగి వచ్చే ఫలితాలు ఉంటాయని, అది అంతా గుర్తు పెట్టుకోవాలన్నారు.
వేవ్‌ను వాడుకోలేకపోయి ఓడారు..

తాను అనేక సర్వేలు చేసి, ఫలితాలను సమీక్షించుకుని ముందుకు వెళ్లామన్నారు. తాము తీసుకున్న నిర్ణయాలు కలిసొచ్చాయని, వేవ్‌ కూడా వచ్చిందన్నారు. కొన్ని నియోజక వర్గాల్లో కొందరు ఉపయోగించుకోలేకపోయారని, 25 పార్లమెంటు స్థానాలు గెలిచి ఉండేవారిమని, అసెంబ్లీల్లో రెండు మూడు తప్ప అన్ని స్థానాలు గెలిచి ఉండేవారిమన్నారు.

ప్రజలంతా ప్రభుత్వంపై ఆసక్తిగా చూస్తున్నారు.జాతీయ స్థాయిలో ఎన్డీఏ ప్రభుత్వంపై, రాష్ట్రంలో కూటమి ప్రభుత్వంపై ఆసక్తికరంగా గమనిస్తున్నారని చంద్రబాబు చెప్పారు.2014లో టీడీపీ-బీజేపీ కలిసి పోటీ చేసి కేంద్ర, రాష్ట్రాల్లో ప్రభుత్వాలను ఏర్పాటు చేశామని, ఈసారి రాష్ట్రంలో ఉన్న రాజకీయ పరిస్థితుల నేపథ్యంలో జనసేన, బీజేపీ, టీడీపీ కలిసి పోటీ చేసి అధికారంలోకి వచ్చామని, పార్టీల మధ్య సమన్వయం, ప్రభుత్వం మీద అంచనాలు పెట్టుకున్న ప్రజల అకాంక్షలు నెరవేర్చాలన్నారు. ఐదేళ్లు అన్ని విధాలుగా నష్టపోయి, త్యాగాలు చేసి, బాధలకు గురైన కార్యకర్తలకు న్యాయం చేయాల్సిన అవసరం ఉందన్నారు.
వ్యవస్థలు ధ్వంసం…

నాలుగోసారి ప్రమాణస్వీకారం చేసిన తర్వాత ఆలోచిస్తే ఎప్పుడూ ఇన్ని అవరోధాలు చవి చూడలేదన్నారు. ఐదేళ్లలో రాష్ట్రం సర్వ నాశనం చేశారని, అధికారులకు పోస్టింగులు ఇస్తే తీవ్ర వ్యతిరేకత వచ్చిందని, పరిమిత సంఖ్యలో ఆలిండియా సర్వీస్ అధికారులు ఉంటారని, వారికి పరిమితులు ఉంటాయని, అప్పట్లో పనిచేసిన వారిలో చాలామంది ప్రభుత్వానికి లొంగిపోయి, వ్యవస్థల్ని భ్రష్టుపట్టించారని చెప్పారు. ఏ వ్యవస్థ తన పని తాను చేసే స్థితిలో లేదన్నారు. ఏదో ఒక వ్యవస్థ బాగోకపోతే సరిచేయొచ్చని, వ్యవస్థలు ఏవి సక్రమంగా లేవన్నారు.

కేంద్రం ఇచ్చే డబ్బుల్ని ఎక్కడికక్కడ మళ్ళించేశారని, మనకు రావాల్సిన డబ్బులు కూడా ఇచ్చే పరిస్థితులు లేవని, దేనికి వాడారో కూడా లెక్కలు లేకుండా వాడేశారని, ఫైనాన్స్‌ కమిషన్‌ నిధుల వినియోగంపై లెక్కలు లేవని, కేంద్రం పంపిన డబ్బులు, ఏ శాఖ, ఎందుకు ఖర్చు చేసిందో లెక్కలు లేవని చెప్పారు.

పంచాయితీరాజ్‌లో రూ990కోట్ల రుపాయలు మళ్ళించారని, దాని వల్ల రూ. 1200కోట్లు రావాల్సిన నిధులు ఆగిపోయాయని, నిధులు వచ్చే పరిస్థితి లేకుండా చేశారని చంద్రబాబు చెప్పారు. ప్రాంతీయ పార్టీల్లో దేశ రాజకీయాల్లో టీడీపీ క్రియాశీల పాత్ర పోషించిందని గుర్తు చేశారు. యునైటెడ్‌ ఫ్రంట్‌, ఎన్డీఏలలో కీలక పాత్ర పోషించింది. ఆరేళ్లు వాజ్‌పేయ్ ప్రభుత్వంలో మంత్రి పదవులు తీసుకోకుండా పనిచేశామని చెప్పారు.
వచ్చే ఎన్నికలకు బీజేపీ సిద్ధం అవుతోంది…

వచ్చే ఎన్నికల కోసం అప్పుడే బీజేపీ సన్నద్ధం అవుతోంది. హర్యానా ముఖ్యమంత్రి ప్రమాణ స్వీకారం అయిన వెంటనే ఎన్డీఏ పక్షాల సమావేశాన్ని నిర్వహించారని చంద్రబాబు చెప్పారు.
అవకాశం దక్కని వారికి న్యాయం చేస్తాం…

ఐదేళ్లలో అందరూ అనేక బాధలకు గురయ్యారని, రాజకీయ నాయకులే కాకుండా సాధారణ ప్రజలు కూడా బాధలకు గురయ్యారని, తనను అరెస్ట్‌ చేసినపుడు పవన్ కళ్యాణ్ వచ్చినపుడు ప్రభుత్వ వ్యతిరేక ఓటు చీలనివ్వమని ప్రకటించారని చెప్పారు. చివర్లో బీజేపీ కూడా తమతో కలిసిందన్నారు.

ఎన్నికల పొత్తులో 31సీట్లను ఆ పార్టీలకు ఇచ్చామని చెప్పారు. పొలిటికల్ రీ ఇంజనీరింగ్‌‌కు వెళ్లి, టీడీపీకి అండగా ఉన్న బీసీ వర్గాలకు అగ్ర స్థానం ఇచ్చామని, ఇప్పటి వరకు ప్రాతినిథ్యం ఇవ్వని వర్గాలకు అవకాశం ఇచ్చామన్నారు. గెలుపే ధ్యేయంగా పనిచేయాలనే లక్ష్యంతో ప్రజలు గెలవాలి, రాష్ట్రం నిలవాలి అని నినాదం ఇచ్చినట్టు చెప్పారు.

ఎన్నికల పొత్తుల వల్ల పార్టీని నమ్ముకున్న వారికి కూడా సీట్లు ఇవ్వలేకపోయామని, వారిని ఆదుకుంటామని హామీ ఇచ్చామని, ఒకరిద్దరు తప్ప అంతా సహకరించారని, వారిలో 65మంది కొత్త ఎమ్మెల్యేలు వచ్చారని, యువతరం, చదువుకున్న వాళ్లు పార్టీలోకి వచ్చారని చెప్పారు. 18మంది కొత్త మంత్రులు వచ్చారని, ఎమ్మెల్యేలు, ఎంపీలు 80మంది కొత్తవారు వచ్చారన్నారు.
సంక్రాంతికి రాష్ట్రమంతటా రోడ్ల మరమ్మతులు…

సంక్రాంతి పండుగ నాటికి రాష్ట్రమంతటా రోడ్ల మరమ్మతులు పూర్తి చేస్తామని ముఖ్యమంత్రి చంద్రబాబు ప్రకటించారు. రూ.700కోట్లతో రోడ్ల నిర్మాణం, మరమ్మతులు పూర్తి చేస్తామని చంద్రబాబు ప్రకటించారు.
అన్ని హామీలు నెరవేర్చాం…

ఎన్నికల్లో ఇచ్చిన హామీలన్నింటిని నెరవేరుస్తున్నామని చంద్రబాబు చెప్పారు. చెత్తపన్ను రద్దు, మత్స్యాకారుల కోసం 217జీవో రద్దు, స్వర్ణకారుల కార్పొరేషన్, గీత కార్మికులకు మద్యం దుకాణాల్లో 10శాతం రిజర్వేషన్, అర్చకుల జీతాలు పెంపు, దేవాలయాల్లో నాయి బ్రాహ్మణులకు కనీస వేతనాలు, దీపదూప నైవేద్యాలకు 15వేలు, వేద విద్య అభ్యసించే వారికి రూ.6వేలు, చేనేత పరిశ్రమకు జిఎస్టీ రద్దు, రియింబర్స్‌మెంట్‌ వంటి నిర్ణయాలు అమలు చేస్తున్నామని చెప్పారు.

చేనేత కార్మికులకు రాయితీలు ఇస్తామని, ప్రభుత్వ జీవోలు ఆన్‌లైన్‌లో పెట్టామని, ఒకే రాజధానికి కట్టుబడి ఉందని చెప్పాము. మన రాజధాని అమరావతి అని చంద్రబాబు స్పష్టం చేశారు. కేంద్రం కూడా అమోదం తెలిపిందన్నారు. విశాఖ ఆర్ధిక రాజధాని, విశాఖలో ఎక్కువ ఉపాధికల్పిస్తున్నామన్నారు. కర్నూలులో ఓర్వకల్లు ఇండస్ట్రియల్ టౌన్‌ షిప్‌, హైకోర్టు బెంచ్ ఏర్పాటు చేస్తామన్నారు. పోలవరం ఫేజ్‌ 1 రెండే‌ళలలో పూర్తి చేస్తామని, ఫేజ్‌ 2కు ఇప్పటి నుంచి ప్రయత్నాలు చేస్తున్నామన్నారు. భారీ వర్షాలతో 95శాతం చెరువులు నీటితో కళకళలాడుతున్నాయి. విజయవాడ వరదల్లో మునిగినా మిగిలిన చోట్ల ఇబ్బంది లేదన్నారు.

ఏపీ కేబినెట్ అక్టోబర్ 23వ తేదీన భేటీ కానుంది. పలు కీలక అంశాలపై చర్చించి నిర్ణయాలు తీసుకోనుంది. సూపర్ సిక్స్ పథకంలోని ఉచిత గ్యాస్ స్కీమ్ తో పాటు దేవదాయ శాఖకి సంబంధించి కీలక నిర్ణయాలు తీసుకునే అవకాశం ఉంది.

రాష్ట్ర మంత్రివర్గ సమావేశం ఈ నెల 23వ తేదీన భేటీ కానుంది. ఉదయం 11 గంటలకు సచివాలయంలో సీఎం చంద్రబాబు అధ్యక్షతన జరగనుంది. అక్టోబర్ 16వ తేదీన జరిగిన సమావేశంలో… పలు అంశాలపై నిర్ణయాలు తీసుకున్నారు. ఆరు కొత్త ఇండస్ట్రియల్ పాలసీలకు మంత్రివర్గం ఆమోదముద్ర వేసింది.

ఇదిలా ఉంటే… తాజాగా మరోసారి మంత్రివర్గం భేటీ కానుంది. అక్టోబర్ 23వ తేదీన జరిగే సమావేశంలో… మరికొన్ని కీలక నిర్ణయాలు తీసుకునే అవకాశం ఉంది. సూపర్ సిక్స్ పథకంలో భాగంగా ఉచిత గ్యాస్ సిలిండర్ల పథకంపై ప్రధానంగా చర్చిస్తారని తెలిసింది. అంతేకాకుండా… దేవదాయ శాఖకి సంబంధించి కీలక నిర్ణయాలు తీసుకునే అవకాశం ఉంది. ఈ భేటీ నేపథ్యంలో అన్ని శాఖలు ప్రతిపాదనలు పంపాలని ప్రభుత్వ ప్రధాన కార్యదర్శి ఆదేశాలు జారీ చేశారు.

దీపావ‌ళికి సూప‌ర్ సిక్స్‌లో భాగ‌మైన మ‌హిళ‌ల‌కు ఉచిత గ్యాస్ సిలిండ‌ర్లు అమ‌లు చేస్తామ‌ని ఇప్ప‌టికే క‌ర్నూలు స‌భ‌లో ముఖ్య‌మంత్రి చంద్ర‌బాబు ప్ర‌క‌టించారు. క‌నుక రాష్ట్ర మంత్రి వ‌ర్గ స‌మావేశంలో మ‌హిళ‌ల‌కు ఉచిత గ్యాస్ అంశంపై ఒక నిర్ణ‌యం తీసుకోనే అవకాశం ఉందని తెలుస్తోంది. పోల‌వ‌రం ప్రాజెక్టు నిర్మాణం, రాజ‌ధాని అమ‌రావ‌తి పునఃనిర్మాణం వంటి అంశాల‌పై రాష్ట్ర మంత్రి వ‌ర్గంలో చ‌ర్చ జ‌ర‌గే అవకాశం ఉంది.
కీలక అంశాలపై చర్చ…!

రాష్ట్రంలోని 13 కొత్త మున్సిపాలిటీల్లో 190 కొత్త పోస్టుల భర్తీ ప్రతిపాదనపై కేబినెట్ చర్చించవచ్చని తెలుస్తోంది. రాష్ట్రంలోని వివిధ దేవాలయాలకు పాలక మండళ్ల నియామకంలో చట్ట సవరణకు కేబినెట్ ముందుకు ప్రతిపాదన రానుంది. దేవాలయాల పాలక మండలిని 15 మంది నుంచి 17 మందికి పెంచే ప్రతిపాదనపైనా ఏపీ మంత్రివర్గం చర్చించే అవకాశం ఉంది. మరికొన్ని కీలక నిర్ణయాలు ఉండొచ్చని సమాచారం.

రాష్ట్ర శాసనసభ సమావేశాల నిర్వహణపై కూడా కేబినెట్ లో చర్చకు వచ్చే అవకాశం ఉంది. ఈ ఆర్థిక సంవత్సరంలో మిగిలిన ఆరు నెలల కాలానికి బడ్జెట్ ప్రవేశ పెట్టే అంశంపై చర్చిస్తారని తెలుస్తోంది.

మరోవైపు రాష్ట్రంలో త్వరలో కొత్త రేషన్‌ కార్డులు ఇచ్చేందుకు ఏపీ ప్రభుత్వం సిద్ధమవుతోంది. ఇప్పటికే ఉన్న కార్డుల్లో కుటుంబసభ్యుల మార్పులు, చేర్పులకు రాష్ట్ర ప్రభుత్వం కసరత్తు చేస్తోంది. 23న జరిగే కేబినెట్ భేటీలో దీనిపై నిర్ణయం తీసుకునే అవకాశం ఉంది. 6 వేల రేషన్‌ డీలర్ల ఖాళీలను భర్తీ చేయడంతో పాటు కొత్తగా 4 వేలకు పైగా దుకాణాలు ఏర్పాటు చేయాలని సర్కార్ భావిస్తోంది. దీనిపై ఏపీ మంత్రివర్గం నిర్ణయం తీసుకునే అవకాశం ఉంది.
నవంబర్ లో ఏపీ బడ్జెట్:

మరోవైపు నవంబర్ నెలలో పూర్తిస్థాయి బడ్జెట్‌ను ప్రవేశపెట్టేందుకు కూటమి ప్రభుత్వం కసరత్తు చేస్తోంది. ఆర్థికశాఖ అధికారులు బడ్జెట్‌ రూపకల్పనలో బిజీగా ఉన్నారు. ఆర్థిక మంత్రి పయ్యావుల కేశవ్‌.. బడ్జెట్‌ సమావేశాల తేదీలు ఖరారు చేసే పనిలో నిమగ్నమయ్యారు.

నవంబర్ రెండో వారంలో సమావేశాలు నిర్వహించి.. పూర్తిస్థాయి బడ్జెట్ ప్రవేశపెట్టే అవకాశం ఉందని తెలుస్తోంది. ముఖ్యంగా మూడు ప్రాజెక్టులకు బడ్జెట్‌లో పెద్దపీట వేసే అవకాశం ఉంది.