ఘోరపరాజయంతో డీలాపడ్డ పార్టీశ్రేణులను యాక్టివ్ చేసేందుకు వరుసగా సమావేశాలు నిర్వహిస్తున్నారు వై.యస్‌ జగన్. ఇప్పటికే పార్టీ జిల్లా అధ్యక్షులను, పార్టీ అనుబంధ విభాగాలకు కొత్త అధ్యక్షులను నియమించిన జగన్మోహన్‌రెడ్డి..

నియోజకవర్గాలకు కూడా సమన్వయకర్తల నియామకాన్ని మొదలుపెట్టారు. ఎలా పని చేయాలి, ప్రజలకి ఎలా అందుబాటులో ఉండాలనేదానిపై తాడేపల్లి పార్టీ సెంట్రల్ ఆఫీస్‌లో జరిగిన వర్క్‌ షాప్‌లో పార్టీ నేతలకు దిశానిర్దేశం చేశారు.

ఈ వర్క్‌షాప్‌కి పార్టీ జిల్లా అధ్యక్షులు, అనుబంధ సంఘాల నేతలు హాజరయ్యారు. పూర్తి స్థాయి కార్యవర్గాల ఏర్పాటుతో పాటు కీలక అంశాలపై నేతలతో జగన్ చర్చించారు. పార్టీపరంగా చేపట్టబోయే కార్యక్రమాలను నేతలతో షేర్ చేసుకున్నారు. ఇంట్లో కూర్చుంటే ఏమీ జరగదని.. ప్రజాసమస్యలపై రోడ్లపైకి వచ్చి పోరాడాలని నేతలకు పిలుపు ఇచ్చారు. నాలుగు నెలల్లోనే ప్రజల్లో ప్రభుత్వంపై తీవ్ర వ్యతిరేకత మొదలైందని.. ప్రభుత్వ వైఫల్యాలను బలంగా ప్రజల్లోకి తీసుకెళ్లాలని.. ముఖ్యంగా సోషల్ మీడియాను బలంగా మార్చుకోవాలని.. నాయకులకు పనితీరు ఆధారంగానే ప్రమోషన్లు ఉంటాయని జగన్ స్పష్టం చేశారు. జమిలి ఎన్నికలపైన పార్టీ శ్రేణులతో మాట్లాడిన జగన్ జమిలి ఎన్నికలు ఎప్పుడు వచ్చినా రెడీ ఉండాలని తాజాగా నేతలకు పిలుపునిచ్చారు.

రాష్ట్ర వ్యాప్తంగా టీడీపీ శ్రేణుల చేతిలో దాడికి గురైన వైసీపీ నాయకులు, కార్యకర్తలను త్వరలో ఇళ్లకు వెళ్లి పరామర్శించబోతున్నారు వైఎస్‌ జగన్‌. దీంతో పాటు ప్రజలకు అనేక హామీలిచ్చి అధికారంలోకొచ్చిన కూటమి ప్రభుత్వంపై పోరాటాలకు పార్టీశ్రేణులను సమాయత్తం చేస్తున్నారు. మొత్తానికి అధినేత వరుస మీటింగ్‌లతో ఫ్యాన్‌ స్పీడ్‌ పెరుగుతోందన్న ఉత్సాహంతో ఉన్నారు వైసీపీ నేతలు.

ఒంగోలు నగరంలో చెడ్డీ గ్యాంగ్ దిగిందా… తాళం వేసిన ఇళ్శు, ఒంటరి మహిళలే టార్గెట్‌గా దోపిడీలకు పాల్పడేందుకు స్కెచ్ వేసిందా..? అనుమానంతో ప్రకాశం జిల్లా పోలీసులు అప్రమత్తమయ్యారు.

ఒంగోలులో దోపిడీ దొంగల కదలికలపై అనుమానంతో పోలీసులు అర్ధరాత్రి నగరాన్ని జల్లెడ పట్టారు. 400 మంది పోలీసులతో జిల్లా వ్యాప్తంగా నాకాబందీ నిర్వహించారు. శాంతి భద్రతలు, నేరాల నియంత్రణ దృష్ట్యా అర్ధరాత్రి స్వయంగా ప్రకాశం జిల్లా ఎస్పీ ఏ. ఆర్. దామోదర్ స్వయంగా తనిఖీల్లో పాల్గొన్నారు.

ప్రకాశం జిల్లా వ్యాప్తంగా కొత్త వ్యక్తులను, అనుమానితులను గుర్తించేందుకు పోలీసులు స్పెషల్ డ్రైవ్ నిర్వహించారు. ఒంగోలులోని రామ్ నగర్, భాగ్యనగర్, మంగమూరు రోడ్డు, NSP కెనాల్, త్రోవగుంట, ఇతర ముఖ్యమైన ప్రదేశాలలోను ఎస్పీ అర్ధరాత్రి పర్యటించి సిబ్బందికి, అధికారులకు సూచనలు చేశారు. వాహనాల తనిఖీలు నిర్వహించాలని, అనుమానితులు, గుర్తు తెలియని వ్యక్తుల వివరాలు తెలుసుకోవాలని, ఆధార్ కార్డులు పరిశీలించాలని ఆదేశించారు. అనుమానితులను పోలీసుస్టేషన్‌కు తరలించి విచారణ చేయాలన్నారు. ఎలాంటి అవాంఛనీయ సంఘటనలు జరగకుండా అన్ని జాగ్రత్తలు తీసుకోవాలని అధికారులకు సూచించారు.

ఒంగోలు నగరంలో 35 టీములు, జిల్లా వ్యాప్తంగా 400 మంది పోలీసులు ప్రత్యేక డ్రైవ్‌లో పాల్గొన్నారు. ఇందులో భాగంగా హైవేలు, రైల్వే స్టేషన్లు, బస్టాండ్లు, గ్రామ శివారులు, ఫ్లైఓవర్ల పక్కన నివసించే అనుమానితుల వ్యక్తులను విచారించారు. వాహనాల తనిఖీలు చేశారు. బీట్ సమయంలో ఫింగర్ ప్రింట్స్ ఐడెంటిఫికేషన్ డివైస్ ద్వారా అనుమానాస్పద వ్యక్తులను తనిఖీ చేశారు.

ఇళ్లల్లో జరిగే దొంగతనాల నియంత్రణ కోసం పోలీసు పరంగా అన్ని రకాల ముందస్తు చర్యలు చేపట్టడుతున్నామని ఎస్పీ దామోదర్ తెలిపారు. వివాహాలు, పండుగలకు ఊరికి వెళుతున్న ప్రజలు విలువైన వస్తువులు, ఆభరణాలు ఇంట్లో పెట్టుకోకూడదని, బ్యాంకుల్లో సురక్షితం చేసుకోవాలని విజ్ఞప్తి చేసారు. ఎవరైనా అనుమానుస్పద వ్యక్తులు ఉంటే వెంటనే డయల్ 100 లేదా స్ధానిక పోలీస్ స్టేషన్‌కు తెలియచేయాలని ఎస్పీ ప్రజలను కోరారు.

వాల్మీకి జయంతి సందర్భంగా ఏపీ డిప్యూటీ సీఎం పవన్ కల్యాణ్ ఘనంగా నివాళులర్పించారు. రామాయణాన్ని సంస్కృతంలో రచించి భారతావనికి అందించిన మహనీయుడు వాల్మీకి అని కొనియాడారు. త్రేతాయుగంలో శ్రీరామచంద్రుడి జీవితాన్ని, పరిపాలనను కళ్ళకు కట్టే రామాయణం ప్రజలకు నైతిక వర్తనను వెల్లడిస్తుందని, ధర్మాన్ని అనుసరించి ఎలా జీవించాలో దిశానిర్దేశం చేస్తుందన్నారు.

వాల్మీకి (Valmiki) జీవితాన్ని ప్రతి ఒక్కరూ తెలుసుకోవాలని, హైందవ ధర్మాన్ని విశ్వసించే ప్రతి ఒక్కరూ చదివి అర్థం చేసుకోవలసిన ఇతిహాసం రామాయణం అని, మన వాఙ్మయంలో ఆదికావ్యంగా నిలిచిన రామాయణాన్ని (Ramayanam) సంస్కృతంలో రచించి భారతావనికి అందించిన మహనీయుడు వాల్మీకి అని డిప్యూటీ సీఎం పవన్ కల్యాణ్ (Deputy CM Pawan Kalyan) అన్నారు. గురువారం వాల్మీకి జయంతి (Valmiki Jayanti) సందర్భంగా ఆయన నివాళులర్పించారు. ఈ సందర్భంగా పవన్ అమరావతిలో మీడియాతో మాట్లాడుతూ.. త్రేతాయుగంలో శ్రీరామచంద్రుడి జీవితాన్ని, పరిపాలనను కళ్ళకు కట్టే రామాయణం ప్రజలకు నైతిక వర్తనను వెల్లడిస్తుందని, ధర్మాన్ని అనుసరించి ఎలా జీవించాలో దిశానిర్దేశం చేస్తుందన్నారు. ఆంధ్ర ప్రదేశ్ ప్రభుత్వం వాల్మీకి ఋషి జయంతిని రాష్ట్ర పండుగగా నిర్వహిస్తోందన్నారు.

రామాయణ మహా కావ్యాన్ని మానవాళికి అందించిన వాల్మీకి జీవితాన్ని ప్రతి ఒక్కరూ తెలుసుకోవాలని, వేటగాడైన రత్నాకరుడు తారక మంత్రోపదేశం పొంది వాల్మీకిగా మారి రామాయణ కావ్యాన్ని రచించిన క్రమాన్ని తెలుసుకొంటే ఆధ్యాత్మిక జ్ఞానం విలువ తెలుస్తుందని డిప్యూటీ సీఎం పవన్ కల్యాణ్ అన్నారు. వాల్మీకి జయంతి సందర్భంగా దైవ చింతన కలిగే ప్రతి ఒక్కరికీ, వాల్మీకిని ఆరాధించేవారందరికీ ఆయన శుభాకాంక్షలు తెలిపారు.

రాష్ట్ర పండుగగా వాల్మీకి జయంతి..

కాగా యువగళం పాదయాత్రలో టీడీపీ యువనేత, మంత్రి లోకేశ్‌ ఇచ్చిన హామీని రాష్ట్ర ప్రభుత్వం నెరవేర్చింది. బీసీల ఆత్మగౌరవానికి పెద్దపీట వేస్తూ వాల్మీకి జయంతిని రాష్ట్ర పండుగగా నిర్వహించాలని నిర్ణయించింది. ఈ మేరకు బీసీ సంక్షేమశాఖ ఉత్తర్వులు జారీచేసింది. ఈ నెల 17న వాల్మీకి జయంతి సందర్భంగా అన్ని జిల్లాల్లోనూ జయంతి వేడుకలు అధికారికంగా నిర్వహించాలని పేర్కొంది. వాల్మీకి జయంతిని రాష్ట్ర పండుగగా నిర్వహించాలని యువగళం పాదయాత్రలో లోకేశ్‌కు అప్పట్లో భారీ సంఖ్యలో వినతులు అందాయి. ఈ నేపథ్యంలో బీసీల ఆత్మగౌరవానికి ప్రాముఖ్యతనిస్తూ అప్పట్లో ఇచ్చిన హామీని నెరవేరుస్తూ రాష్ట్ర ప్రభుత్వం తాజాగా నిర్ణయించింది.

యువగళం పాదయాత్రలో తాను ఇచ్చిన మరో హామీని ముఖ్యమంత్రి చంద్రబాబు నాయుడు నేతృత్వంలోని ప్రజా ప్రభుత్వం నెరవేర్చిందని రాష్ట్ర విద్య, ఐటి, ఎలక్ట్రానిక్స్ శాఖల మంత్రి నారా లోకేష్ అన్నారు. వాల్మీకి జయంతిని రాష్ట్ర పండుగగా నిర్వహించాలని బోయ, వాల్మీకి సోదరులు యువగళం పాదయాత్రలో తనను కలిసి విన్నవించారన్నారు. వారి సెంటిమెంటును గౌరవిస్తూ వాల్మీకి జయంతిని ఈనెల 17వ తేదీన అన్ని జిల్లా కేంద్రాల్లో అధికారికంగా నిర్వహించాలని ప్రభుత్వం ఉత్తర్వులు జారీ చేసిందన్నారు.

ఆంధ్రప్రదేశ్‌ పునర్విభజన చట్టం ప్రకారం ఉమ్మడి రాజధాని గడువు ముగిసి ఐదు నెలలు గడుస్తున్నా రాజధాని నగరంగా అమరావతిని ఖరారు చేస్తూ ఎలాంటి ప్రకటన వెలువడకపోవడం చర్చనీయాంశంగా మారింది. సిఆర్‌డిఏ సమావేశం తర్వాత కూడా ప్రభుత్వం ఈ విషయంలో ఎలాంటి ప్రకటన చేయలేదు.
అమరావతి రాజధాని నిర్మాణ పనుల్లో కదలిక, డిసెంబర్ నాటికి టెండర్లు ఖరారు

ఆంధ్రప్రదేశ్‌ రాజధాని నిర్మాణ పనుల్ని ప్రారంభించేందుకు అన్ని ఏర్పాట్లు చేస్తున్నట్టు మంత్రి నారాయణ ప్రకటించారు. అమరావతి నిర్మాణానికి ఈ ఏడాది రూ.15వేల కోట్లు ఇస్తామని ప్రకటించడంతో టెండర్లను ఖరారు చేసే పనిలో పడ్డారు. ముఖ్యమంత్రి అధ్యక్షతన జరిగిన సిఆర్‌డిఏ 38వ సమావేశంలో పలు కీలక నిర్ణయాలు తీసుకున్నారు.

అమరావతిలో పలు అభివృద్ది పనులకు సంబందించిన అసెంబ్లీ, హైకోర్టు నిర్మాణాలు మినహా మిగిలిన అన్ని పనులకు టెండర్లను డిశంబరు చివరికల్లా పిలువనున్నామని రాష్ట్ర పురపాలక మరియు పట్టణాభివృద్ది శాఖ మంత్రి పొంగూరు నారాయణ తెలిపారు. ఈ పనులు అన్నీ ఏడాది నుండి రెండున్నర్రేళ్లలోపు పూర్తి అవుతాయన్నారు.

2014-19 మధ్య కాలంలో అమరావతి రాజదాని ప్రాంతంలో దాదాపు 3,600 అపార్టుమెంట్లను కట్టారు. వాటిలో శాసన సభ్యులు, శాసన మండలి సభ్యులు మరియు ఐ.ఏ.ఎస్. అధికారులు నివాసానికి సంబందించి 432 ప్లాట్లతో కూడిన 18 టవర్ల నిర్మాణాలను గతంలోనే పూర్తి చేశారు. ఈ భవనాలకు సివరేజ్ ప్లాంట్, త్రాగునీటి సరఫరా, క్లబ్ హౌస్ నిర్మాణ పనులు పెండింగ్ లో ఉన్నాయని, వాటిని రూ.524 కోట్ల అంచనా వ్యయంతో చేపట్టేందుకు తాజా సమావేశంలో క్లియరెన్సు ఇచ్చారు.
సిఆర్‌డిఏ భవనానికి అమోదం..

రెండు మూడు రోజుల్లో వాటికి సంబందించిన టెండర్లను పిలిచి 20 రోజుల్లో ఈ పనులను ప్రారంభించనున్నట్టు మంత్రి తెలిపారు. సీఆర్డిఏ కార్యాలయం కోసం గతంలో తమ ప్రభుత్వం జి+7 భవన నిర్మాణాన్ని చేపట్టి స్ట్రక్చర్ పూర్తి చేయడం జరిగిందని, అయితే గత ప్రభుత్వం దాని నిర్మాణాన్ని పూర్తిగా నిర్లక్ష్యం చేయడం తో రూ.160 కోట్లతో దాన్ని పూర్తి చేసేందుకు నేటి సమావేశంలో ఆమోదం తెలిపారు. ఈ పనులకు సంబందించిన టెండర్లు ఖరారు అయిన నేపధ్యంలో పనులను నాలుగైదు రోజుల్లో ప్రారంభించనున్నారు.

సీఆర్‌డీఏ, ఏడీసీ, మెప్మా, స్వచ్ఛాంధ్ర కార్పొరేషన్, మునిసిపల్ ఆఫీసు తదితర కార్యాలయాలను ఈ భవనంలో ఏర్పాటు చేయనున్నారు. 2014-19 మధ్య కాలంలో అమరావతి డవలెప్మెంట్ కార్పొరేషన్ దాదాపు 360 కి.మి. మేర ట్రంక్ రోడ్ల నిర్మాణ పనులను చేపట్టిందని అవి వివిద దశల్లో ఉన్నాయని నారాయణ వివరించారు. వాటి కాలపరిధి పూర్తి అయిన నేపథ్యంలో డిశంబరు కల్లా తిరిగి టెండర్లను పిలువనున్నామన్నారు.

వరద ముంపు నివారణ చర్యలు..

రాజధాని ప్రాంతం ఎటు వంటి వరదలకు, ముంపుకు గురి అయ్యే అవకాశం లేకుండా ఉండేందుకై కొండవీటి వాగు, పాలవాగు, గ్రామిటీ కెనాల్ డిజైన్లను రూపొందించే పనిని నెథర్లాండ్ వారికి అప్పగించారు. ఇటీవల బుడమేరు వల్ల విజయవాడ నగరానికి సంభవించిన ముంపును దృష్టిలో ఉంచుకుని మరింత పటిష్టవంతంగా డిజైన్లు రూపొందించాలని ఆర్.వి. కన్సల్టెన్సీకి అప్పగించినట్టు చెప్పారు. ఆ డిజైన్ పనులు కూడా త్వరలో పూర్తి కానున్నాయని, వాటికి సంబందించిన టెండర్లను నవంబరులో పిలువనున్నారు.

సెక్రటేరియట్‌ అడ్మినిస్ట్రేటివ్ ఐకానిక్ టవర్లకు సంబందించిన టెండర్లను కూడా డిశంబరుకల్లా పిలవనున్నారు. 2009 లో వచ్చిన వరదలను దృష్టిలో ఉంచుకుని కరకట్ట రోడ్డు డిజైన్ చేసినా బుడమేరు వరద దృష్ట్యా రిడిజైన్ చేసేందుకు కన్సల్టెన్సీకి అప్పగించారు. ఈ పనులనకు సంబందించి 15 రోజుల్లో టెండర్లను పిలవనున్నారు.
హైవేతో అనుసంధానం..

జాతీయ రహదారికి అనుసంధానంగా నిర్మించేందుకు ప్రతిపాదించిన E-7/9/11/13 రోడ్ల నిర్మాణ పనులకు సంబందించి టెండర్లను రెండు నెలల్లో ఖరారు చేయనున్నారు. ప్రపంచ బ్యాంకు నిధులు రూ.15 వేల కోట్ల మంజూరుకు సంబందించి పర్యావరణం మరియు సోషల్ మేనేజ్మంట్ తదితర అంశాలపై చర్చలు జరుగుచున్నాయని, ఈ ప్రక్రియ దాదాపు పూర్తికావచ్చిందని, నవంబరు లేదా డిశంబరులో ఈ నిధులు కూడా మంజూరు అయ్యే అకాశం ఉందన్నారు.

ఇకపై ఎప్పటికప్పుడు సీఆర్‌డీఏ అకౌంట్స్ సబ్మిట్ చేయడం జరుగుతుందన్నారు. రాజధాని రైతులకు త్వరలోనే ప్లాట్ల కేటాయింపు జరుగుతుందన్నారు. పరిహారం విషయంలో కూడా రైతులకు ఎట్టిపరిస్థితుల్లో అన్యాయం జరగదని స్పష్టం చేశారు. రాజధాని నిర్మాణం విషయంలో దాదాపు జంగిల్ క్లియరెన్స్ కూడా పూర్తి కానున్నట్టు వివరించారు.
ప్రస్తావనే లేని రాజధాని నోటిఫికేషన్‌…

ఉమ్మడి రాజధాని గడవు ముగిసిన తర్వాత ఆంధ్రప్రదేశ్‌ రాజధాని ఏమిటనే దానిపై ఇంకా సందిగ్ధత కొనసాగుతోంది. ఉమ్మడి రాజధానికి జూన్‌ 2వ తేదీతో కాలం చెల్లడంతో ఆంధ్రప్రదేశ్‌ రాజధాని నగరాన్ని నోటిఫై చేస్తూ ఇప్పటి వరకు ఎలాంటి అధికారిక ప్రకటన కేంద్ర, రాష్ట్ర ప్రభుత్వాల నుంచి వెలువడలేదు. గతంలో మూడు రాజధానులంటూ జరిగిన పరిణామాలతో పెట్టుబడిదారుల్లో అమరావతిపై అపోహలు నెలకొన్నాయి. ప్రభుత్వాలు మారితే ప్రాధాన్యతలు మారిపోతాయనే అపప్రద మూటగట్టుకోవాల్సి వచ్చింది. మరోవైపు షెడ్యూల్ 9,10 ఆస్తుల విభజన అంశం ఇంకా కొలిక్కి రాలేదు. ఈ పరిస్థితుల్లో ఏపీ రాజధాని నిర్మాణంలో భాగంగా వేల కోట్లను వెచ్చిస్తున్నా అమరావతి నగరానికి సాధికారత కల్పించే విషయంలో తాత్సారం జరుగుతూనే ఉంది.

A అంటే అమరావతి.. P అంటే పోలవరం అంటున్న ఏపీ ప్రభుత్వం.. ఐదేళ్లలో ఎట్టి పరిస్థితుల్లోనూ వాటి నిర్మాణం పూర్తిచేయాలని లక్ష్యంగా పెట్టుకుంది. ఇందులో భాగంగా అమరావతి పనులపై తాజాగా క్లారిటీ ఇచ్చారు మంత్రి నారాయణ.

కలల రాజధానికి ఇంకెంత దూరం అని ఎదురుచూస్తున్న వారికి ఇప్పుడిప్పుడే క్లారిటీ వస్తోంది. డిసెంబర్ నుంచి అన్ని రకాల పనులు మొదలయ్యేలా యాక్షన్ ప్లాన్ కనిపిస్తోంది. నిధుల విషయంలో కేంద్ర ప్రభుత్వం నుంచి పూర్తి సహకారం అందుతుండడంతో వేగంగా నిర్మాణాలు పూర్తి చేసేలా కార్యాచరణ రూపొందిస్తున్నారు. అందులో భాగంగానే అమరావతిలో నిర్మాణాలకు కొత్త టెండర్లు పిలవనున్నారు. అంతేకాదు… రాజధానిపై పలు కీలక నిర్ణయాలు తీసుకున్నారు.

అమరావతికి కొత్త కళ వస్తోంది. దాదాపుగా జంగిల్ క్లియరెన్స్ పనులు పూర్తి కావడంతో.. అమరావతి రాజధాని యథాస్థానానికి చేరుకోనుంది. డిసెంబర్ నుంచి అమరావతి రాజధాని నిర్మాణ పనులు ప్రారంభించాలని సీఎం చంద్రబాబు డిసైడ్‌ అయ్యారు. ఇప్పటికే అమరావతి రాజధాని నిర్మాణానికి కేంద్ర ప్రభుత్వం 15 వేల కోట్ల రూపాయల సాయాన్ని బడ్జెట్‌లో ప్రకటించింది. ప్రపంచ బ్యాంకు నిధుల నుంచి సర్దుబాటు చేయించింది. ఈ నిధులు సైతం త్వరలోనే విడుదల కానున్నాయి. దీంతో అమరావతిలో నిర్మాణాలకు టెండర్లు పిలవనున్నాయి. డిసెంబర్‌ నాటికి టెండర్ల ప్రక్రియ పూర్తి చేసేలా ప్రణాళిక సిద్ధం చేశారు.

ఆంధ్రప్రదేశ్ అసెంబ్లీ, హైకోర్టు నిర్మాణాల కోసం జనవరి నెలాఖరులోపు టెండర్లు పిలుస్తామని మున్సిపల్ శాఖ మంత్రి నారాయణ తెలిపారు. సీడ్ క్యాపిటల్ నిర్మాణానికి సింగపూర్‌ను సంప్రదించాలా..?, వద్దా అని ఆలోచిస్తున్నామని చెప్పారు. 360 కిలో మీటర్ల మేర రోడ్లకు టెండర్లు పూర్తి చేస్తామన్న ఆయన.. అమరావతిలో 18 టవర్లలో 432 అపార్ట్ మెంట్ల పూర్తికి రూ.524 కోట్లు విడుదల చేశామని తెలిపారు. అమరావతిపై వర్షాలు, వరదల ప్రభావం ఉంటుందన్న ప్రచారం జరుగుతున్న వేళ.. వాటన్నింటిని కొట్టిపడేశారు మంత్రి నారాయణ. ఎంత ఫ్లడ్ వచ్చినా అమరావతిపై ఎలాంటి ప్రభావం ఉండదని స్పష్టం చేశారు. వరదలు రాకుండా ప్రత్యేక చర్యలు తీసుకుంటున్నట్లు తెలిపారు. ప్రతిపక్షాల ఆరోపణలు అవాస్తవమన్నారు. మొత్తంగా… ప్రపంచస్థాయి నగరంగా అమరావతిని తీర్చిదిద్దాలన్న లక్ష్యంతో ముందుకెళ్తున్న ఏపీ సర్కార్‌.. పనులను మరింత స్పీడప్‌ చేస్తోంది.