నిబంధనలు పాటించకుండా అరెస్ట్‌లు చేస్తున్నారు.. కేసుల మీద కేసులు పెట్టి దారుణంగా వ్యవహరిస్తున్నారని వైఆర్సీపీ చీఫ్ వైఎస్ జగన్ ఆగ్రహం వ్యక్తంచేశారు. కుటుంబసభ్యులను కూడా స్టేషన్లకు తీసుకెళ్తున్నారని.. డీజీపీ మీద కావాలనే ఒత్తిడి తెస్తున్నారంటూ పేర్కొన్నారు. వ్యతిరేకంగా ఉన్న స్వరాలను తట్టుకోలేక కేసులు పెడుతున్నారని.. ఏపీలో అరాచక పరిస్థితి కొనసాగుతుందన్నారు. రాష్ట్రంలో ప్రజాస్వామ్యాన్ని ఖూనీచేస్తున్నారని.. ఆరోపించారు.రాష్ట్రంలో చీకటి రోజులు నడుస్తున్నాయని.. ప్రశ్నించే వాళ్లు లేకుండా చేయాలని చూస్తున్నారన్నారు.

హామీలు అమలు చేయకుండా అందరినీ మోసం చేస్తున్నారని.. అన్ని వ్యవస్థలను నీరుగార్చి.. నాశనం చేస్తున్నారంటూ వైఎస్ జగన్ ఆగ్రహం వ్యక్తంచేశారు. విద్యావ్యవస్థలో సంస్కరణలను నిర్వీర్యం చేశారని.. వైద్యరంగాన్ని పూర్తిగా నిర్లక్ష్యం చేస్తున్నారంటూ మండిపడ్డారు.. టీడీపీ కార్యకర్తలు చెప్పిన వాళ్లకే పథకాలు అందిస్తున్నారని.. ఇప్పటికే లక్షన్నర పెన్షన్లు తొలగించారంటూ జగన్ పేర్కొన్నారు. రాష్ట్రంలో లా అండ్ ఆర్డర్ దిగజారిపోయిందని.. 5 నెలల్లో 91మంది మహిళలపై అత్యాచారాలు జరిగాయంటూ జగన్ పేర్కొన్నారు.

జమిలి ఎన్నికలు అంటున్నారని.. త్వరలోనే ఈ ప్రభుత్వం పడిపోవచ్చు.. తర్వాత వచ్చేది తామేనని వైఎస్ జగన్ ధీమా వ్యక్తంచేశారు. రెడ్ బుక్ పెట్టుకునేది వాళ్లే కాదు.. ఇవాళ నష్టపోయిన ప్రతి కుటుంబం రెడ్ బుక్ పెట్టుకుంటుందని వైఎస్ జగన్ పేర్కొన్నారు. ఇలానే వ్యవహరిస్తే చూస్తూ ఊరుకోమంటూ చెప్పారు.

సరస్వతి భూములపై తప్పుడు ప్రచారం చేస్తున్నారని..ఆ భూముల్లో ఎలాంటి అక్రమాలు లేవని వైఎస్ జగన్ పేర్కొన్నారు. విచారణకు వెళ్లిన ఎమ్మార్వోనే పరిశీలించి నిజాలు చెప్పారని పేర్కొన్నారు.

హోమంత్రిపై పవన్ కల్యాణ్ చేసిన వ్యాఖ్యల అనంతరం ఏపీ రాజకీయాలు వేడెక్కిన విషయం తెలిసిందే.. ఈ విషయంలో హోం మంత్రి అనిత వివరణ ఇచ్చినప్పటికీ.. విమర్శలు మాత్రం ఆగలేదు.. ఈ క్రమంలో హోం మంత్రి అనిత ఆసక్తికర పోస్ట్ చేశారు. రాష్ట్ర సచివాలయంలో గురువారం డిప్యూటీ సీఎం కొణిదెల పవన్ కల్యాణ్ తో మార్యదపూర్వకంగా సమావేశమైనట్లు పేర్కొన్నారు. గత కొన్ని రోజులుగా రాష్ట్రంలో జరుగుతున్న పరిణామాలు, హోంశాఖ తీసుకుంటున్న చర్యలను ఉపముఖ్యమంత్రి పవన్ కళ్యాణ్ దృష్టికి తీసుకెళ్లినట్లు తెలిపారు. చిన్నారులు, మహిళలపై జరుగుతున్న నేరాల విషయంలో ప్రత్యేకంగా దృష్టి సారించాలని, ఆడబిడ్డలకు అన్యాయం చేసిన వారిని చట్టప్రకారం కఠినంగా శిక్షించేలా గట్టి చర్యలు తీసుకోవాలని పవన్ కల్యాణ్ సూచించారన్నారు. జన సంక్షేమం, శ్రేయస్సు కోసం ప్రతిక్షణం పరిశ్రమించే ప్రజా ప్రభుత్వం తమ కూటమి ప్రభుత్వం అంటూ అనిత పేర్కొన్నారు.

ఇటీవల పిఠాపురం పర్యటనలో రాష్ట్రంలో జరుగుతున్న హత్యలు, అత్యాచారాలపై ఆందోళన వ్యక్తం చేశారు ఏపీ డిప్యూటీ సీఎం పవన్ కల్యాణ్. ఈ క్రమంలో హోం మంత్రి బాధ్యత వహించాలని.. మరింత కఠినంగా వ్యవహరించాలంటూ పవన్ కల్యాణ్ సూచించారు. అయితే.. ఈ వ్యాఖ్యలపై స్పందిచిన హోంమంత్రి అనిత.. దీనిని తాను పాజిటివ్‌గా తీసుకుంటున్నానని చెప్పారు.. హోంమంత్రిగా తాను ఫెయిల్‌ అని పవన్ ఎక్కడా అనలేదని.. పవన్‌ వ్యాఖ్యలను వక్రీకరిస్తున్నారంటూ ఫైర్ అయ్యారు. ఈ క్రమంలోనే.. పవన్ కల్యాణ్ ఢిల్లీ పర్యటనకు వెళ్లడం.. ఆ తర్వాత కేంద్ర హోంమంత్రి అమిత్ షాతో భేటీ అవ్వడం.. వెనువెంటనే.. ఏపీ సీఎం చంద్రబాబు నాయుడు, హోమంత్రి అనిత సమావేశం అవ్వడం ఏపీ రాజకీయాల్లో హాట్ టాపిక్ గా మారింది..

సోషల్ మీడియా వేదికగా అసభ్యకర పోస్టులు పెడుతున్న వారిపై ప్రభుత్వం కఠిన చర్యలు తీసుకుంటోంది. తప్పుడు పోస్టులు పెట్టేవాళ్లను వెతికిమరీ పట్టుకుని అధికారులు కటకటాల్లోకి పంపిస్తున్నారు.

ఈ పరిణామాలతో పొలిటికల్ హీట్ మరింత పెరిగింది.

సోషల్ మీడియా కార్యకర్తల అరెస్టులను వైసీపీ తప్పుబడుతోంది. ప్రభుత్వాన్ని ప్రశ్నించే వారిని అరెస్ట్ చేసి గొంతు నొక్కే ప్రయత్నం చేస్తున్నారని వైసీపీ ఆరోపిస్తోంది. ఈ విషయంలో ప్రభుత్వ తీరును జగన్ తప్పుబట్టారు. రాష్ట్రంలో ప్రజాస్వామ్యం ఉందా అని నిలదీశారు.

అయితే మహిళల పట్ల అసభ్యకర పోస్టులు పెట్టేవాళ్లు, వ్యక్తిత్వ హననానికి పాల్పడే వాళ్లను వదిలిపెట్టాలా అని నిలదీశారు సీఎం చంద్రబాబు. మదమెక్కి ఆంబోతుల్లాగా సోషల్ మీడియాలో మాట్లాడుతున్నారు. మదమెక్కి, కొవ్వుపట్టి పోస్టులు పెట్టేవాళ్లను వదిలెయ్యాలా? అని ప్రశ్నించారు.

తప్పుడు కేసులు పెట్టి అరెస్టులు చేస్తున్నారని పేర్నినాని ఆరోపించారు. వైసీపీ కార్యకర్తలను అరెస్టు చేసి టీడీపీ నేతల కాళ్లు పట్టిస్తున్నారన్నారని ఆరోపించారు. సైకో పార్టీలతో కొంత మంది సైకోలు కలిసి సోషల్ మీడియాలో నీచంగా ప్రవర్తిస్తున్నారంటూ ఏపీసీసీ చీఫ్ షర్మిల ఆగ్రహం వ్యక్తంచేశారు. మానవ సంబంధాలు, రక్త సంబంధాలు మరిచి మృగాల్లా ప్రవర్తిస్తున్నారని మండిపడ్డారు. మహిళలు అనే జ్ఞానం లేకుండా, ఇంట్లో తల్లి, అక్కా, చెల్లి కూడా సాటి మహిళా అనే ఇంగితం లేకుండా.. వికృత చేష్టలతో రాక్షస ఆనందం పొందుతున్నారని మండిపడ్డారు. అసభ్యకర పోస్టులు, వ్యక్తిత్వ హననానికి పాల్పడేవాళ్లను కఠినంగా శిక్షించాలని షర్మిల డిమాండ్ చేశారు.

రాష్ట్ర వ్యాప్తంగా ఉన్న కాలేజీల్లో చదువుతున్న విద్యార్థులకు అమలవుతున్న ఫీజు రీయింబర్స్‌మెంటు పథకం కింద అందే నగదును నేరుగా తల్లుల ఖాతాల్లో జమ అయ్యేలా గత ప్రభుత్వం ఏర్పాట్లు చేసింది.

అయితే ఈ ఏడాది నుంచి తల్లుల ఖాతాల్లో కాకుండా కళాశాలల యాజమాన్య ఖాతాల్లోకే వేయాలని తాజాగా కూటమి సర్కార్‌ నిర్ణయించింది. దీనికి సంబంధించిన విధివిధానలను త్వరలోనే ప్రకటించనుంది. 2014-19 మధ్య హయాంలో ఉన్న చంద్రబాబు ప్రభుత్వం ఫీజు రీయింబర్స్‌మెంటును కళాశాలల యాజమాన్య ఖాతాల్లోకే జమ చేసేవారు.

అయితే జగన్‌ ప్రభుత్వం అధికారంలోకి వచ్చిన తర్వాత తల్లుల ఖాతాల్లోకి వేసే విధానం అమలులోకి తెచ్చారు. నేరుగా తల్లుల ఖాతాల్లోకే జమ అవుతుందనే కారణంగా కళాశాలల యాజమాన్యాలు నిర్దేశిత గడువుకు ఫీజుల్ని చెల్లించాల్సిందేనని విద్యార్థులపై ఒత్తిడి తీసుకువచ్చారు. కొంతమంది ఫీజులు కట్టలేక పరీక్షలకు దూరం అవ్వవల్సిన పరిస్థితి నెలకొంది. విద్యా దీవెన, వసతి దీవెన బకాయిలు కలిపి మొత్తం రూ.3,840 కోట్లు బకాయిలు ఉన్నాయి. దీంతో ఇందులో ఉన్న ఇబ్బందులను గ్రహించిన కూటమి ప్రభుత్వం విద్యార్ధుల తల్లుల ఖాతాల్లో కాకుండా కళాశాలల యాజమాన్య ఖాతాల్లోనే ఫీజు రీయింబర్స్‌మెంటు ఫీజు వేయాలని భావిస్తోంది.

తెలంగాణలో మెడికల్‌ పోస్ట్‌ గ్రాడ్యుయేట్‌ (పీజీ) ప్రవేశాల్లో స్థానికతకు సంబంధించిన వివాదం సంబంధించి వివరణ ఇవ్వాలంటూ ప్రభుత్వం, కాళోజీ నారాయణరావు యూనివర్సిటీకి హైకోర్టు నోటీసులు జారీ చేసింది. దీనిపై పూర్తి వివరాలతో కౌంటర్లు దాఖలు చేయాలని ఆదేశించింది. పీజీ మెడికల్‌ ప్రవేశాల నిబంధనలను సవరిస్తూ ప్రభుత్వం అక్టోబరు 28న జారీ చేసిన జీవో నం.148ను సవాలు చేస్తూ మంచిర్యాలకు చెందిన డాక్టర్‌ ఎస్‌ సత్యనారాయణతోపాటు మరొక విద్యార్ధి హైకోర్టులో పిటిషన్‌ వేశారు. దీనిపై విచారణ చేపట్టిన ప్రధాన న్యాయమూర్తి జస్టిస్‌ ఆలోక్‌ అరాధే, జస్టిస్‌ జె శ్రీనివాసరావుల ధర్మాసనం ఇరు పక్షాల వాదనలు విన్నారు. పిటిషనర్ల తరఫు సీనియర్‌ న్యాయవాది ఎం సురేందర్‌రావు వాదనలు వినిపిస్తూ.. తెలంగాణకు చెందిన పిటిషనర్లు మరోచోట ఎంబీబీఎస్‌ చేశారన్న కారణంగా స్థానిక కోటాను తిరస్కరించినట్లు తెలిపారు. తెలంగాణ బయట ఉన్న సిద్ధార్థ మెడికల్‌ కాలేజీ విద్యార్థులను స్థానికులుగా పరిగణించడం చెల్లదని తెలిపారు. వాదనలను విన్న ధర్మాసనం ప్రతివాదులైన రాష్ట్ర ప్రభుత్వం, యూనివర్సిటీకి నోటీసులు జారీ చేసింది. తదుపరి విచారణను ఈ నెల11వ తేదీకి వాయిదా వేసింది.

డిప్యూటీ సీఎం పవన్ కల్యాణ్, ఆర్డ్ డైరెక్టర్ ఆనంద్ సాయి క్లోజ్ ఫ్రెండ్స్. . తొలి ప్రేమ సినిమ కంటే వీరి మధ్య మంచి స్నేహం ఉంది. ఇక జనసేన ప్రయాణంలో, గెలిచాక కూడా పవన్ వెంట ఉంటున్నాడు ఆనంద్ సాయి.

కొన్ని రోజుల క్రితం పవన్ వెంట ఆనంద్ సాయి కూడా వచ్చి తిరుమల శ్రీవారి దర్శనం చేసుకున్నారు. ఈ నేపథ్యంలోనే టీటీడీ బోర్డు మెంబర్ గా ఆనంద్ సాయికి ప్రాధాన్యం దక్కింది. తాజాగా ఆయన ప్రమాణ స్వీకారం కూడా చేశారు. భార్య వాసుకీ, తదితర కుటుంబ సభ్యులతో కలిసి తిరుమల శ్రీవారిని దర్శించుకున్నారు ఆనంద్ సాయి. అనంతరం టీటీడీ అర్చకుల వేదాశీర్వచనం అందుకున్నారు. ప్రస్తుతం ఇందుకు సంబంధించిన ఫొటోలు, వీడియోలు సామాజిక మాధ్యమాల్లో బాగా వైరలవుతున్నాయి. కాగా టీటీడీ బోర్డు మెంబర్ గా సెలెక్ట్ చేసినందుకు ఎమోషనల్ అయ్యారు ఆనంద్ సాయి. ఈ మేరకు డిప్యూటీ సీఎం పవన్ కళ్యాణ్ కు స్పెషల్ థ్యాంక్స్ చెప్తూ ఒక ఆసక్తికర పోస్ట షేర్ చేశాడు.

‘ నాపై నమ్మకముంచి ఈ అపురూపమైన గౌరవాన్ని నాకు కల్పించిన నా ప్రియ మిత్రుడు పవన్ కల్యాణ్ కు హృదయ పూర్వక ధన్యవాదాలు. భారతీయ సంస్కృతి, సంప్రదాయాలు, వారసత్వాన్ని కాపాడడంలో ఆయన అంకితభావం నిజంగా స్ఫూర్తి దాయకం. పవన్ దార్శనికత, నాయకత్వం ఎంతో మందికి ఆదర్శం. ఆయన మార్గదర్శకత్వంలో పనిచేసినందుకు నేనెంతో కృతజ్ఞుడిని. టీటీడీ బోర్డు మెంబర్ గా అవకాశం రావడం నా పూర్వజన్మ సుకృతం. నాకున్న నైపుణ్యం, అనుభవంతో తిరుమల శ్రీవారికి సేవ చేసుకుంటాను’ అని రాసుకొచ్చారు ఆనంద్ సాయి.

విద్యుత్‌ చార్జీల పెంపు వైసీపీ పాపమే.. ఈసారికి తప్పదు. భారమైనా భరించాల్సిందే. వాళ్ల అప్పుల పాపాలు.. మనకు శిక్షలు అంటూ సీఎం చంద్రబాబు నాయుడు పేర్కొన్నారు.

ఏపీలో విద్యుత్ ట్రూఅప్‌ చార్జీలపై పొలిటికల్ దుమారం మొదలైన నేపథ్యంలో సీఎం చంద్రబాబు గురువారం కీలక వ్యాఖ్యలు చేశారు. విద్యుత్ ఛార్జీల భారమైతే తప్పదంటూ స్పష్టమైన సంకేతాలిచ్చారు. గత ప్రభుత్వ పాపాలకు పర్యవసానం అని.. డిస్కమ్‌లకు ఇచ్చిన అనుమతిని రద్దుచెయ్యలేమన్నారు. విద్యుత్‌ చార్జీల పెంపు వైసీపీ పాపమే అంటూ చంద్రబాబు పేర్కొన్నారు. అంతేకాకుండా టీడీపీ ప్రభుత్వం మాత్రం ఐదేళ్లు ఏ భారం మోపదని భరోసా ఇచ్చారు.

ట్రూఅప్ చార్జీలంటే ఏంటి..?

అయితే.. ట్రూఅప్ చార్జీల రూపంలో ఏపీ ప్రజలు జనవరి నుంచి 15 నెలలపాటు అదనపు బిల్లులు చెల్లించాల్సి ఉంటుంది. అసలు ట్రూ అప్‌ అంటే ఏంటంటే.. ఈఆర్‌సీ ఆమోదించిన రెవెన్యూ వ్యయం కన్నా అధికంగా చేసిన ఖర్చులను డిస్కమ్‌లు ట్రూ అప్‌ చార్జీల పేరుతో వినియోగ దారులు నుంచి వసూలు చేసుకుంటాయి.

ఇంతకీ.. ట్రూ అప్‌ చార్జీల భారం ఎంతో తెలుసా! అక్షరాలా.. 17వేల 898 కోట్ల రూపాయలు. ఇందులో 6 వేల 72 కోట్ల రూపాయల మేర ట్రూ అప్ ఛార్జీలను వినియోగదారుల నుంచి వసూలు చేసుకోడానికి ప్రభుత్వం అనుమతించింది. తాజాగా మరో 11 వేల కోట్ల రూపాయల భారం వేయడానికి విద్యుత్ నియంత్రణ మండలి మరో నోటిఫికేషన్ జారీ చేసింది. ఈ భారమంతా యూనిట్ల రూపంలో డివైడ్ చేసి.. రాబోయే 15నెలలపాటు ట్రూఅప్ చార్జెస్ వసూలు చేస్తారన్నమాట..

ఏపీ సర్కార్ పై విపక్ష పార్టీల ఫైర్..

ఓవైపు వైసీపీ తప్పులతోనే ఈ భారమని చంద్రబాబు అంటుంటే.. మరోవైపు పెంపునకు నిరసనగా ఆందోళన చేస్తామంటోంది వైసీపీ. కేంద్రంతో కుదుర్చుకున్న ఒప్పందాలను రద్దు చేసి చార్జీలను తగ్గించాలంటోంది.

ఛార్జీల పెంపును నిరసిస్తూ కాంగ్రెస్, వామ పక్ష పార్టీలు ఇప్పటికే ఆందోళన బాటపట్టాయి. అటు ఫ్రీ సిలిండర్లు ఇటు బాదుడా అంటూ ప్రశ్నిస్తున్నాయి.

అయితే చంద్రబాబు నుంచి మాత్రం ఒక హామీ వచ్చింది. గత ప్రభుత్వం మోపిన భారాన్ని తగ్గించలేం గానీ.. రాబోయే 5ఏళ్లు మాత్రం తమ వైపు నుంచి ఎలాంటి వడ్డన ఉండదని భరోసా ఇచ్చారు.

కుప్పం నియోజకవర్గం టీడీపీ అధినేత చంద్రబాబు ఇలాకా అన్న సంగతి తెలిసిందే.. 1989 నుంచి కుప్పంలో ఇప్పటి దాకా ఓటమి ఎరగని నేతగా చంద్రబాబు కొనసాగుతున్నారు.

అయితే 2019 సార్వత్రిక ఎన్నికల తర్వాత కుప్పంలో టీడీపీ పని అయిపోయిందన్న ప్రచారాన్ని పెద్ద ఎత్తున జనంలోకి తీసుకొచ్చే ప్రయత్నం చేసిన వైసీపీ ఇప్పుడు గడ్డు పరిస్థితిని ఎదుర్కొంటోంది. 2024 ఎన్నికలు జరిగిన నాలుగు నెలల లోపే వైసీపీ ప్రాబల్యం తగ్గపోతుంది. గత స్థానిక సంస్థల ఎన్నికల్లో దూకుడును ప్రదర్శించి 2024 సార్వత్రిక ఎన్నికలకు ముందు వై నాట్ 175 అనే నినాదం వైసీపీ ఎత్తుకుంది.

కుప్పం నియోజకవర్గంలోని నాలుగు మండలాల్లో ఎంపీపీలను, కుప్పం మున్సిపాలిటీని సొంతం చేసుకున్న వైసీపీకి రాష్ట్రంలో జరిగిన అధికార మార్పు నాలుగు నెలల్లోనే కుప్పంలో సీన్ రివర్స్ అయ్యేందుకు కారణమైంది. 2024 సార్వత్రిక ఎన్నికల్లో కూటమి తిరుగులేని మెజారిటీని సాధించడం సీఎంగా చంద్రబాబు బాధ్యతలు చేపట్టడంతో కుప్పంలో వైసీపీ అని చెప్పుకునేందుకు లీడర్లు ముందుకు రావడం లేదు. కొందరు అజ్ఞాతంలోకి వెళితే మరికొందరు పార్టీ కండువా మార్చాల్సి వచ్చింది. మరికొందరిపై కేసులు నమోదు కావడంతో జైలుకు వెళ్లక తప్పని పరిస్థితి ఏర్పడింది.

ఇలా కుప్పంలో వైసీపీ ఖాళీ కాగా మిగిలిన మరికొందరు కూడా టీడీపీ తీర్థం పుచ్చుకోవడంతో కుప్పం ఇలాకాలో చంద్రబాబుకు మరోసారి తిరుగు లేదని తేలిపోయింది. కుప్పం మున్సిపల్ ఛైర్మన్ డాక్టర్ సుధీర్ సీఎం చంద్రబాబును కలిసి టీడీపీ తీర్థం పుచ్చుకున్నారు. మున్సిపల్ ఛైర్మన్ పదవికి కూడా రాజీనామా చేసిన సుధీర్ భవిష్యత్తుకు చంద్రబాబు భరోసా కూడా ఇచ్చారని తెలిసింది. దీంతో మరికొందరు ఎంపీటీసీలు, సర్పంచులు, వైసీపీలోని మరికొందరు నేతలు టీడీపీలో చేరుతున్నారు. చిత్తూరు జిల్లా వైసీపీ అధ్యక్షుడిగా ఉన్న కుప్పం వైసీపీ ఇంఛార్జ్ ఎమ్మెల్సీ భరత్ నియోజకవర్గానికి రాకపోవడంతో పార్టీ కేడర్ ఆందోళనలో ఉంది.