విజయ్ దేవరకొండ, రష్మిక మండన్న వివాహం.. ఇప్పుడు చర్చించుకుంటున్న కొడవ సంప్రదాయం ఏంటి?
తెలుగు చిత్రసీమలోని స్టార్ జంట విజయ్ దేవరకొండ, రష్మిక మండన్న వివాహ బంధంలోకి అడుగుపెట్టారు. గురువారం ఉదయం తెలుగు సంప్రదాయం ప్రకారం వీరి వివాహం జరగగా, సాయంత్రం కర్ణాటకలోని కొడవ సంప్రదాయంలో మరో వివాహం చేసుకోనున్నారు. రష్మిక స్వస్థలం కర్ణాటకలోని కొడగు (కూర్గ్) జిల్లా కావడంతో, ఆ ప్రాంతంలోని యోధుల కమ్యూనిటీ అయిన కొడవల సంప్రదాయం గురించి ఇప్పుడు ఆసక్తికర చర్చ జరుగుతోంది.
కొడవ వివాహం విశిష్టత ఇదీ..
కొడవ ప్రజల జీవన విధానం, దుస్తులు, పెళ్లి పద్ధతులు అన్నీ చాలా ప్రత్యేకంగా ఉంటాయి. ఇతర హిందూ వివాహాల మాదిరిగా కాకుండా, కొడవ వివాహంలో కొన్ని విభిన్నమైన ఆచారాలు కనిపిస్తాయి. ఈ వివాహంలో అగ్ని సాక్షిగా ఏడడుగులు వేయడం, పెద్దగా మంత్రాలు చదవడం వంటివి ఉండవు. కుటుంబ పెద్దల సమక్షంలో, అతి కొద్ది మంది సన్నిహితుల మధ్య ఈ వివాహం జరుగుతుంది. ఈ తంతు అంతటా ఆ ప్రాంతీయత ప్రతిబింబిస్తుంది.
వధువు మంగళ స్నానంతో ఈ వివాహ ప్రక్రియ ప్రారంభమవుతుంది. ఆ తర్వాత, కుటుంబంలోని పెద్దల నుంచి వధువు ఆశీర్వాదం తీసుకుంటుంది. ఇది ఆమె జీవితంలో కొత్త అధ్యాయానికి సిద్ధపడే సందర్భంగా, కృతజ్ఞతలు తెలుపుకునే భావోద్వేగ ఘట్టం. కొడవ మహిళలు ధరించే చీరకు ప్రత్యేకత ఉంది. వారు పైట కొంగును వెనక నుంచి ముందు వైపునకు తెచ్చి కట్టుకుంటారు. ఈ వేడుకలో వారియర్ సంప్రదాయాన్ని తలపించే ‘వలగ’ డ్రమ్స్, పాటలు, నృత్యాలు ప్రధాన ఆకర్షణగా ఉంటాయి. ఇక, గతంలో ఈ వేడుకలో భాగంగా తుపాకీతో సెల్యూట్లు కూడా ఉండేవి. అయితే, ప్రస్తుతం ఈ ఆచారం క్రమంగా తగ్గుతూ వస్తోంది. ఇప్పుడు, విజయ్ మరియు రష్మిక ఇరువురి సంప్రదాయాలను గౌరవించే ఈ వివాహ వేడుకల నేపథ్యంలో కొడవ సంప్రదాయం ప్రాధాన్యత గురించి చర్చ జరుగుతోంది.
