మారుతీ సుజుకీ తొలి ఎలక్ట్రిక్​ కారు- ‘ఈ విటారా’ ప్రొడక్షన్​ని ప్రారంభించిన మోదీ

మారుతీ సుజుకీ ఈ విటారా ప్రొడక్షన్​ని ప్రధానమంత్రి నరేంద్ర మోదీ ప్రారంభించారు. సింగిల్​ ఛార్జ్​తో 426 కి.మీ వరకు రేంజ్​ని ఇచ్చే ఈ మారుతీ సుజుకీ తొలి ఎలక్ట్రిక్​ కారు వివరాలను ఇక్కడ తెలుసుకోండి.

ప్రముఖ ఆటోమొబైల్ సంస్థ మారుతీ సుజుకీ ఇండియా లిమిటెడ్ తన తొలి ఎలక్ట్రిక్​ కారు ‘ఈ విటారా’ ఉత్పత్తిని ప్రారంభించింది. దీనితో ఎలక్ట్రిక్ వాహనాల విభాగంలోకి మారుతీ సుజుకీ అడుగుపెట్టింది. గుజరాత్‌లోని హన్సల్‌పూర్ ప్లాంట్‌లో ఈ కారును ఉత్పత్తి చేయనున్నారు. ఈ-విటారా తొలి యూనిట్‌ను ప్రధానమంత్రి నరేంద్ర మోదీ మంగళవారం జెండా ఊపి ప్రారంభించారు. ఈ కొత్త ఎలక్ట్రిక్ కారు సెప్టెంబర్ 3 నాటికి భారత మార్కెట్‌లోకి విడుదలయ్యే అవకాశం ఉంది. అంతేకాదు, ఈ ఎలక్ట్రిక్​ కారు 100 దేశాలకు ఎగుమతి కానుంది.

మారుతీ సుజుకీ ఈ విటారా- విశేషాలు..

ఈ ప్రారంభోత్సవ కార్యక్రమంలో ప్రధాని మోదీతో పాటు గుజరాత్ ముఖ్యమంత్రి భూపేంద్ర పటేల్, భారతదేశంలో జపాన్ రాయబారి కీచి ఓనో కూడా పాల్గొన్నారు. ఈ విటారా అనేది మారుతీ సుజుకీకి మొదటి బ్యాటరీ ఎలక్ట్రిక్ వెహికల్ (బీఈవీ). ఇది ప్రపంచవ్యాప్తంగా విక్రయించే ఉత్పత్తిగా నిలవనుంది. ఇప్పటికే యూకేలో విడుదలైన ఈ ఎస్‌యూవీ, భారతదేశంలో హ్యుందాయ్ క్రెటా ఎలక్ట్రిక్, మహీంద్రా బీఈ 6, ఎంజీ జెడ్ఎస్ ఈవీ వంటి మోడళ్లతో గట్టి పోటీ ఇవ్వనుంది. ఈ కారులో 18-ఇంచ్​ ఏరో-ఆప్టిమైజ్డ్ అల్లాయ్ వీల్స్‌తో పాటు గుడ్‌ఇయర్ టైర్లు ఉంటాయి.

మారుతీ సుజుకీ ఈ విటారా- బ్యాటరీ, పనితీరు..

అంతర్జాతీయ మార్కెట్లో ఈ విటారా ఎలక్ట్రిక్​ ఎస్​యూవీ రెండు బ్యాటరీ ప్యాక్‌లతో అందుబాటులో ఉంది. అవి 49 kWh, 61.1 kWh యూనిట్లు.

49 kWh ప్యాక్: ఇది ఫ్రెంట్​ వీల్​ డ్రైవ్​ సెటప్‌తో 142 బీహెచ్‌పీ పవర్​ని, 193 ఎన్ఎమ్ టార్క్‌ని ఉత్పత్తి చేస్తుంది. ఇది ఒక్కసారి ఛార్జ్ చేస్తే డబ్ల్యూఎల్​టీపీ-టెస్ట్ ప్రకారం 344 కిలోమీటర్ల వరకు ప్రయాణించగలదు.