విద్య, వైద్య, విహార యాత్రల వంటి వాటి కోసం భారతీయులు విదేశాలకు డబ్బులు పంపిస్తుంటారు. ప్రతి ఏడాది 10 బిలియన్ డాలర్లకుపైగా భారత్ నుంచి ఇతర దేశాలకు వెళ్తున్నట్లు అంచనా. ఇది ప్రతి ఏటా 20 శాతం మేర పెరుగుతోందటా. డాలర్‌తో పోలిస్తే రూపాయి మారకం విలువ జీవన కాల కనిష్ఠ స్థాయి రూ.84ను తాకింది. ఇది విదేశాలకు డబ్బులు పంపించే వారిపై ఒత్తిడి పెంచుతోంది. దీంతో ఎక్కువ మొత్తంలో డబ్బులు పంపించాల్సి వస్తోంది. అయితే, పెద్ద మొత్తంలో డబ్బులు పంపే వారికి కేంద్ర ప్రత్యక్ష పన్నుల బోర్డు ప్రత్యేక నిఘా పెట్టింది. రూ.6 లక్షలు దాటిన ఫారెన్ రెమిటెన్స్‌లపై సమగ్ర సమీక్ష చేపట్టాలని నిర్ణయించింది.
ఒక వ్యక్తి లేదా కంపెనీ ఒక దేశం నుంచి మరో దేశానికి నగదు బదిలీ చేయడం, పేమెంట్లు చేసే ప్రక్రియను ఫారెన్ రెమిటెన్స్ అంటారు. అయితే, విదేశీ చెల్లింపుల్లో అవకతవకలు జరుగుతున్నట్లు గుర్తించిన క్రమంలో వాటిని అరికట్టేందుకు ఐటీ శాఖ కీలక నిర్ణయం తీసుకుంది. రెమిటెన్స్ డేలా వ్యత్యాసాలు, ట్యాక్స్ ఎగవేతలు గుర్తించేందుకు ఆయా ట్రాన్సాక్షన్లను సమగ్రంగా పరిశీలించాలని సీబీడీటీ కొద్ది రోజుల క్రితమే నిర్ణయించింది. కొంత మంది ఐటీ శాఖ వద్ద సమర్పించిన ఆదాయ లెక్కలు, విదేశీ చెల్లింపులకు పొంతన ఉండడం లేదని గుర్తించినట్లు తెలిపింది. ట్యాక్స్ కలెక్టెడ్ ఎట్ సోర్స్‌లో లోపాలు ఉన్నాయని తెలిపింది. ఈ కారణంగానే ఫారం 15సీసీ వెరిఫికేషన్ ప్రారంభించాలని నిర్ణయించింది. 2020-21 నుంచి డేటా పరిశీలన ఆధారంగా హైరిస్క్ కేసుల లిస్ట్‌ సిద్ధం చేయనున్నట్లు తెలిపింది. దీని ద్వారా రూ.6 లక్షలకు మించి విదేశీ చెల్లింపులు చేసిన వారికి డిసెంబర్ 31వ తేదీ వరకు ఐటీ నోటీసులు పంపించనుంది.
లిబరలైజ్డ్ రెమిటెన్స్ స్కీమ్ ద్వారా ఒక ఆర్థిక ఏడాదిలో 2.50 లక్షల డాలర్ల వరకు విదేశాలకు పంపించవచ్చు. కరెంట్ లేదా క్యాపిటల్ ఖాతాల్లో డబ్బు పంపవచ్చు. విదేశీ విద్య, వైద్యం వంటి వాటి కోసం పంపిస్తారు. 2.50 లక్షల డాలర్లకు మించి సైతం పంపించవచ్చు. అయితే, అందుకు తగిన ఆధారాలు చూపించాల్సి ఉంటుంది. అయితే తక్కువ ఖర్చులో విదేశాలకు డబ్బులు పంపేందుకు కొన్ని జాగ్రత్తలు తీసుకోవడం మంచిదని నిపుణులు చెబుతున్నారు. బ్యాంకులు వైర్ ట్రాన్స్‌ఫర్, నెట్ బ్యాంకింగ్, ఫారెన్ కరెన్సీ చెక్స్, డీడీల ద్వారా డబ్బు పంపిస్తాయి. విదేశాల్లోని అనుబంధ బ్యాంకుల ద్వారా బదిలీ చేస్తుంటాయి. దీంతో విశ్వసనీయత, భద్రత ఉంటుంది. పెద్ద మొత్తంలో డబ్బు పంపాల్సి వచ్చినప్పుడు బ్యాంకులే ఉత్తమమని చెబుతున్నారు.
విదేశాలకు డబ్బు పంపడం ఖర్చుతో కూడుకున్న పని. ఇందులో మూడు రకాల ఖర్చులు ఉంటాయి. బదిలీ రుసుము, ఎక్స్చేంజ్ రేటు, ఫారెక్స్ రేటుపై మార్క్ ఆప్. బ్యాంకుల్లో ఈ ఖర్చులు ఎక్కువగానే ఉంటాయని చెప్పాలి. అందులోనూ ప్రైవేట్ బ్యాంకుల్లో మరింత ఎక్కువే ఉంటుంది. సాధారణంగా బ్యాంకులు ఎక్స్చేంజ్ రేటునపై 1-2 శాతం మార్క్ అప్ వసూలు చేస్తాయి. నాన్ బ్యాంకింగ్ ఫైనాన్షియల్ సంస్థల్లో దేశాన్ని బట్టి ఈ ఖర్చులు మారతాయి. కొన్ని నామమాత్రపు ప్రాసెసింగ్ ఫీజులు వసూలు చేస్తుంటాయి. తరుచూ విదేశాలకు డబ్బు పంపాల్సిన వారు ఎక్స్చేంజ్ రేటును ఎప్పటికప్పుడు తనిఖీ చేస్తూ ఉండాలి. తక్కువగా ఉన్నప్పుడు డబ్బు పంపితే చాలా ఆదా అవుతుంది. పెద్ద మొత్తంలో పంపాల్సి వచ్చినప్పుడు చాలా ఆదా చేసుకోవచ్చు. రెమిటెన్స్ పత్రాలను నింపేటప్పుడు జాగ్రత్తగా వ్యవహరించాలి. లేదంటే ఫెమా చట్టం కింద చిక్కులు ఎదుర్కోవలసి వస్తుంది.
