బజ్జీ మిర్చితో రుచికరమైన క్రిస్పీ “పకోడా”

తయారీ విధానం :

• ఈ సింపుల్ స్నాక్ రెసిపీ ప్రిపేర్ కోసం ముందుగా బజ్జీ మిర్చిని శుభ్రంగా కడిగి తీసుకోవాలి. ఆపై ఒక్కో మిర్చిని మధ్యలోకి రెండుగా చీల్చి చిన్న చిన్న ముక్కలుగా(ఫొటోలో చూపిస్తున్న విధంగా) కట్ చేసుకోవాలి.
• ఆవిధంగా అన్నింటిని కట్ చేసుకొని ఒక ప్లేట్​లోకి తీసుకొని పక్కన పెట్టుకోవాలి. ఒకవేళ మీరు గింజలు వద్దనుకుంటే అవి తీసేసి కట్ చేసుకోవచ్చు.
• అలాగే, రెసిపీలోకి కావాల్సిన పరిమాణంలో ఉల్లిపాయను సన్నగా కట్ చేసుకొని పక్కనుంచాలి.
• ఇప్పుడు ఒక మిక్సింగ్ బౌల్​లో శనగపిండిని తీసుకొని ఆపై అందులో బియ్యప్పిండి, వాముని చేతితో నలిపి వేసుకోవాలి.
• అలాగే, కారం, రుచికి తగినంత ఉప్పు, సన్నని ఉల్లిపాయ తరుగు, ముందుగా కట్ చేసి పెట్టుకున్న బజ్జీ మిర్చి తరుగు వేసుకొని ఇంగ్రీడియంట్స్ అన్నీ పిండిలో కలిసేలా ఒకసారి బాగా కలపాలి.
• ఆ తర్వాత అందులో తగినన్ని నీళ్లను కొద్దికొద్దిగా వేసుకుంటూ బజ్జీ పిండి మాదిరిగా కలుపుకోవాలి. అయితే, పిండి అనేది మరీ లూజుగా, గట్టిగా ఉండకుండా చూసుకోవాలి.
• ఆవిధంగా సిద్ధం చేసుకున్నాక పిండిని చేతితో వన్​సైడ్​ డైరెక్షన్​లో తిప్పుతూ రెండు నిమిషాల పాటు బాగా బీట్ చేసుకోవాలి.
• ఇలా చేయడం ద్వారా పకోడీ గట్టిగా రాకుండా లోపల గుల్లగా, సాఫ్ట్​గా చాలా బాగా వస్తుందని గుర్తుంచుకోవాలి.

• అనంతరం ఆ పిండి మిశ్రమంలో కొత్తిమీర, కరివేపాకు తరుగు, వంటసోడా వేసుకొని మరోసారి పిండిని చక్కగా కలుపుకొని పక్కన పెట్టుకోవాలి.
• ఇప్పుడు స్టవ్ మీద కడాయిలో డీప్​ ఫ్రైకి తగినంత నూనె పోసి వేడి చేసుకోవాలి. ఆయిల్ కాగిన తర్వాత ముందుగా ప్రిపేర్ చేసుకున్న పిండిని చేతిలోకి కొద్దికొద్దిగా తీసుకుంటూ బోండా మాదిరిగా వేసుకోవాలి.
• పాన్​లో సరిపడా వేసుకున్నాక స్టవ్​ను మీడియం ఫ్లేమ్​లో ఉంచి రెండు వైపులా మంచి కలర్ వచ్చేంత వరకు వేయించుకొని తీసుకోవాలి. ఇదే ప్రాసెస్​లో పిండి మొత్తాన్ని ప్రిపేర్ చేసుకోవాలి. అంతే, నోరూరించే కమ్మని “బజ్జీ మిర్చి పకోడీ” రెడీ!
• తర్వాత వీటిని వేడివేడిగా నేరుగా తినేయొచ్చు. లేదంటే టమాటా కెచప్​లో డిప్ చేసుకొని తిన్నా ఎంతో రుచికరంగా ఉంటాయి.

టిప్స్ :

• ఈ రెసిపీలో కాస్త బియ్యప్పిండిని వేసుకోవడం ద్వారా పకోడీ పైన కొంచం క్రిస్పీగా వచ్చి మంచి రుచికరంగా ఉంటుంది.
• ఒకవేళ మీరు తీసుకున్న బజ్జీ మిరపకాయలు కాస్త కారం ఉన్నట్లయితే ఇందులో ఎండుకారాన్ని చూసి వేసుకోవాలి.