పిల్లల నుంచి పెద్దల వరకు చాలా మంది బంకగా, చప్పగా ఉంటుందని బెండకాయను అంతగా తినడానికి ఇంట్రెస్ట్ చూపించరు. అదే, కొంతమంది పిల్లలు బెండకాయతో చేసే ఫ్రైని ఇష్టంగా తింటుంటారు. అయితే, ఈ వేపుడు కూడా ఎన్నిసార్లు ఎంత బాగా ప్రిపేర్ చేసినా టేస్ట్లో ఏదో మిస్ అయిన ఫీలింగ్ కలుగుతుంది. అలాగే, క్రిస్పీగా కూడా రావట్లేదని ఫీల్ అయ్యే మమ్మీలు చాలా మందే ఉంటారు. అలాంటి వారికోసమే పర్ఫెక్ట్ స్టైల్లో ప్రిపేర్ చేసుకునే “బెండకాయ మసాలా ఫ్రై” రెసిపీని తీసుకొచ్చాం. ఈ పద్ధతిలో చేశారంటే ఎన్నడూ బెండకాయ తినని వాళ్లూ దీన్ని ఇష్టంగా లాగిస్తారు. అంతేకాదు, లంచ్ బాక్స్లోకి క్విక్ అండ్ ఈజీగా ప్రిపేర్ చేసుకోవడానికి ఇది బెస్ట్ ఆప్షన్ అని చెప్పుకోవచ్చు. మరి, తక్కువ టైమ్లో మంచి రుచికరంగా బెండకాయ వేపుడుని ఎలా ప్రిపేర్ చేసుకోవాలో ఈ స్టోరీలో తెలుసుకుందాం.
అవసరమైన పదార్థాలు :
- బెండకాయలు – అరకిలో
- అల్లం – అరఇంచు ముక్క
- పచ్చిమిర్చి – ఆరేడు
- వెల్లుల్లి రెబ్బలు – ఐదారు
- కరివేపాకు – రెండు రెమ్మలు
- నూనె – తగినంత
- సన్నని ఉల్లిపాయ ముక్కలు – ఒకటిన్నర కప్పులు
- ఇంగువ – అరటీస్పూన్
- మీడియం సైజ్ టమాటాలు – రెండు
- పసుపు – అరటీస్పూన్
- కారం – టేస్ట్కి సరిపడా
- ధనియాల పొడి – ఒక టీస్పూన్
- పెరుగు – నాలుగు టేబుల్స్పూన్లు
- మ్యాగీ మసాలా పొడి – రెండు చెంచాలు
-
తయారీ విధానం :
- ఈ రుచికరమైన బెండకాయ మసాలా ఫ్రై కోసం ముందుగా తాజా బెండకాయలను తీసుకొని శుభ్రంగా కడగాలి.
- ఆపై వాటిని నీళ్ల తడి లేకుండా క్లాత్తో తుడవాలి. తర్వాత బెండకాయలను రెండు చివర్లు కట్ చేసి మీడియం సైజ్లో చిన్న చిన్న ముక్కలుగా కట్ చేసుకోవాలి.
- అనంతరం కట్ చేసుకున్న బెండకాయ ముక్కలను ఒక వెడల్పాటి ప్లేట్లోకి తీసుకొని కనీసం ఇరవై నుంచి ముప్పై నిమిషాల పాటు గాలికి ఆరబెట్టుకోవాలి.
- ‘బెండకాయ ముక్కలను కొద్దిసేపు గాలికి ఆరబెట్టుకునే’ ఈ చిన్న ట్రిక్ ఫాలో అవ్వడం ద్వారా ఫ్రై అనేది జిగురుగా రాకుండా ఉండడంతో పాటు క్రిస్పీగా, మంచి రుచికరంగానూ వస్తుంది.
- ఆలోపు రెసిపీలోకి అవసరమైన పచ్చిమిర్చి పేస్ట్ని సిద్ధం చేసుకోవాలి. ఇందుకోసం మిక్సీ జార్ తీసుకొని అందులో అల్లం ముక్క, పచ్చిమిర్చి ముక్కలు, కరివేపాకు, పొట్టు తీసిన వెల్లుల్లి రెబ్బలు వేసుకొని కచ్చాపచ్చాగా పేస్ట్ మాదిరిగా గ్రైండ్ చేసుకొని పక్కనుంచాలి.
- ఇప్పుడు స్టవ్ మీద పాన్ పెట్టుకొని రెండు టేబుల్స్పూన్ల నూనె వేసుకొని వేడి చేసుకోవాలి. ఆయిల్ లైట్గా వేడయ్యాక అరగంట పాటు ఆరబెట్టుకున్న బెండకాయ ముక్కలను వేసి లో ఫ్లేమ్లో పావు గంట నుంచి ఇరవై నిమిషాల పాటు కలుపుతూ వేయించుకోవాలి.
- అంటే, బెండకాయ ముక్కల్లోని జిగురు పోయి లోపలి వరకు చక్కగా వేగాలి. ఆవిధంగా వేయించుకున్నాక వాటిని ఒక ప్లేట్లోకి తీసుకొని పక్కన పెట్టుకోవాలి.
- అనంతరం స్టవ్ మీద మళ్లీ అదే పాన్ పెట్టుకొని మరో రెండు టేబుల్స్పూన్ల నూనె వేసుకొని హీట్ చేసుకోవాలి. ఆయిల్ వేడయ్యాక ఇంగువ, సన్నగా కట్ చేసుకున్న ఉల్లిపాయ ముక్కలు, కొద్దిగా ఉప్పు వేసుకొని ఆనియన్స్ గోల్డెన్ కలర్ వచ్చేంత వరకు వేయించుకోవాలి.
- ఆనియన్స్ వేగాక ముందుగా గ్రైండ్ చేసుకున్న పచ్చిమిర్చి పేస్ట్ని యాడ్ చేసుకొని అందులోని పచ్చివాసన పోయేంత వరకు రెండు మూడు నిమిషాల పాటు వేయించాలి.
- తర్వాత అందులో టమాటా ముక్కలు, పసుపు, రుచికి తగినంత కారం, ఉప్పు, ధనియాల పొడి వేసుకొని అవన్నీ ఒకసారి చక్కగా మిక్స్ అయ్యేలా కలుపుకోవాలి.
- ఆలెడ్రీ పచ్చిమిర్చి పేస్ట్ వేసుకున్నాం. కాబట్టి, అవి ఉండే కారాన్ని బట్టి ఈ స్టేజ్లో తగినంత ఎండుకారం, ఉప్పు అనేవి చూసి వేసుకోవాలి.
- మిశ్రమాన్ని చక్కగా కలిపాక మూతపెట్టి లో ఫ్లేమ్లో టమాటాలు మెత్తగా మగ్గే వరకు కుక్ చేసుకోవాలి.
- టమాటాలు సాఫ్ట్గా మగ్గాయనుకున్నాక మూత తీసి ఒకసారి కలిపి పెరుగుని యాడ్ చేసుకొని అది ఆ మిశ్రమంలో చక్కగా కలిసి నూనె సెపరేట్ అయ్యేంత వరకు వేయించుకోవాలి.
- ఆ తర్వాత అందులో వేయించి పక్కన పెట్టుకున్న బెండకాయ ముక్కలను వేసుకొని హై ఫ్లేమ్లో మూడ్నాలుగు నిమిషాల పాటు కలుపుతూ వేయించుకోవాలి.
- ఆవిధంగా వేయించుకున్నాక ఆఖర్లో మ్యాగీ మసాలా పౌడర్ యాడ్ చేసుకొని అది మొత్తం కలిసేలా ఒక నిమిషం పాటు కలుపుతూ ఫ్రై చేసుకొని స్టవ్ ఆఫ్ చేసుకోవాలి.
- ఇక చివర్లో కొత్తిమీర తరుగు వేసుకొని కలిపి దింపేసుకుంటే సరిపోతుంది. అంతే, యమ్మీ యమ్మీగా నోరూరించే “బెండకాయ మసాలా వేపుడు” రెడీ అయిపోతుంది!
