నీచు వాసన లేకుండా “చేపల కూర” – టమాటాలు వేసి వండితే అద్దిరిపోయే రుచి

వీకెండ్ వచ్చిందంటే చాలా మంది చికెన్, మటన్​తో పాటు చేపలు వండుకోవడానికి ఇంట్రెస్ట్ చూపిస్తుంటారు. ఈ క్రమంలోనే కొందరు చేపలు పులుసు చేసుకోవడానికి ఇష్టపడితే, మరికొందరు వేపుడు చేసుకోవడం చేస్తుంటారు. అయితే, కొన్నిసార్లు ఎంత బాగా వండినా చేపల కర్రీ నీచు వాసన రావడమో, మంచి రుచికరంగా కుదరకపోవడమో జరుగుతుంది. అలాంటి వారు ఓసారి ఈ పద్ధతిలో “టమాటా చేపల కూర” వండి చూడండి. నీచు వాసన లేకుండా చిక్కని గ్రేవీతో నోరూరించే ఈ కర్రీని ఇంటిల్లిపాదీ లొట్టలేసుకుంటూ తింటారు. అలాగే, ఈ కర్రీని ప్రిపేర్ చేసుకోవడం కూడా చాలా తేలిక! బిగినర్స్ కూడా ఈ చేపల కూరను సింపుల్​గా, రుచికరంగా రెడీ చేసుకోవచ్చు. మరి, నోరూరించే ఈ టమాటా ఫిష్ కర్రీని ఎలా చేసుకోవాలో ఇప్పుడు చూద్దాం.

కావాల్సిన పదార్థాలు :

• ఏదైనా ఓ రకం చేప – అరకేజీ
• ఉప్పు – రుచికి తగినంత
• పసుపు – ఒకటిన్నర చెంచా

• కర్రీ కోసం :

  • ఆవనూనె – అరకప్పు
  • జీలకర్ర – ఒక చెంచా
  • కలోంజీ గింజలు – అరచెంచా
  • ఉల్లిపాయ – ఒకటి
  • టమాటాలు – ఐదు
  • వెల్లుల్లి పేస్ట్ – అరచెంచా
  • అల్లం ముద్ద – అరచెంచా
  • పచ్చిమిర్చి – నాలుగైదు
  • ధనియాలపొడి – అరచెంచా
  • కారం – మూడు చెంచాలు(తగినంత)
  • చక్కెర – పావుచెంచా
  • పచ్చిమిర్చి (Getty Images)

    తయారీ విధానం :

    • నోరూరించే ఈ చేపల కర్రీ తయారీ కోసం ముందుగా అరకేజీ పరిమాణంలో ఏదైనా ఒక రకం చేప ముక్కలను తీసుకుని శుభ్రంగా కడగాలి.
    • ఆపై వాటిని ఒక గిన్నెలోకి తీసుకుని అందులో చెంచా పసుపు, చెంచా ఉప్పు వేసి ఆ రెండూ చేప ముక్కలకు పట్టేలా కలిపి కాసేపు పక్కనుంచాలి.
    • తర్వాత ఉల్లిపాయను ముక్కలుగా కట్ చేసి మిక్సీ జార్​లోకి తీసుకుని పేస్టులా మిక్సీ పట్టుకుని పక్కన పెట్టుకోవాలి.
    • అనంతరం కర్రీ తయారీ కోసం స్టవ్ మీద అందుకు అనుగుణంగా ఉండే కడాయిని పెట్టి పావుకప్పు ఆవనూనె వేసి వేడి చేసుకోవాలి.
    • ఇక్కడ ఆవనూనె లేని వారు రోజూ వాడే ఆయిల్​ను యూజ్ చేయవచ్చు. కానీ, ఆవనూనె వేసి చేసుకోవడం ద్వారా సరికొత్త ఫ్లేవర్​తో కర్రీ మంచి రుచికరంగా వస్తుంది.
    • ఆయిల్ వేడయ్యాక మ్యారినేట్ చేసి పక్కనుంచిన చేప ముక్కల్ని వేసి లో టూ మీడియం ఫ్లేమ్​లో దోరగా వేయించి ఒక ప్లేట్​లోకి తీసుకోవాలి.
    • తర్వాత అదే కడాయిలో మిగిలిన నూనె వేసి హీట్ చేసుకోవాలి. ఆయిల్ ​హీట్ అయ్యాక జీలకర్ర, కలోంజీ గింజలు వేసి వేయించాలి.
    • అవి వేగాక గ్రైండ్ చేసి పెట్టుకున్న ఉల్లిపాయ పేస్టు వేసి పచ్చివాసన పోయేలా ఒక నిమిషం పాటు ఫ్రై చేయాలి.
    • అనంతరం అందులో అల్లం ముద్ద, వెల్లుల్లి పేస్ట్, టమాటా ముక్కలు, నిలువుగా కట్ చేసిన పచ్చిమిర్చి చీలికలు వేసి బాగా కలపాలి.
    • ఆపై లో ఫ్లేమ్​లో టమాటా ముక్కలు మెత్తగా అయ్యే వరకు మగ్గనివ్వాలి. టమాటాలు సాఫ్ట్​గా మారాక ధనియాలపొడి, మిగిలిన పసుపు, కారం వేసి, అరకప్పు వాటర్ పోసి మిశ్రమం మొత్తం కలిసేలా మిక్స్ చేయాలి.
  • తర్వాత ఆ మిశ్రమంలో మరో అరచెంచా ఉప్పు, చక్కెర, వేయించి పక్కనుంచిన చేప ముక్కలు వేసి నెమ్మదిగా అంతా కలిసేలా బాగా కలపాలి.
  • నెక్ట్స్ స్టవ్​ను మీడియం ఫ్లేమ్​లో ఉంచి కూర దగ్గరపడి, లైట్​గా ఆయిల్ సెపరేట్ అయ్యేంత వరకు ఉడికించుకుని దింపేసుకుంటే చాలు. అంతే, సరికొత్త రుచిలో ఘుమఘుమలాడే “టమాటా చేపల కర్రీ” రెడీ అవుతుంది!
  • మరి, నచ్చితే మీరూ ఓసారి ఈ స్టైల్​లో ఫిష్ కర్రీ ట్రై చేయండి. నీచు వాసన లేకుండా కమ్మగా ఉండే ఈ కర్రీని ఇంటిల్లిపాదీ ఫుల్ ఎంజాయ్ చేస్తారు!