మోకాళ్ల నొప్పి, కీచు లేదా కటకట శబ్దం రావడం చాలా మందిని ఇబ్బంది పెట్టే సమస్య. ఇది వృద్ధులకే కాదు, ఇప్పుడు యువతలో కూడా ఎక్కువగా కనిపిస్తోంది. సరిగ్గా నడవలేకపోవడం, మెట్లు ఎక్కేటప్పుడు నొప్పి, కూర్చుని లేవడంలో ఇబ్బంది వంటి సమస్యలు రోజువారీ జీవితాన్ని కష్టంగా మారుస్తాయి.
చాలాసార్లు ఈ సమస్యకు ప్రధాన కారణం శరీరానికి అవసరమైన పోషకాలు సరిపడా అందకపోవడం. అలాగే ఎక్కువసేపు ఒకే భంగిమలో కూర్చోవడం, తప్పు విధంగా నడవడం, పాత గాయాలు, అధిక బరువు కూడా మోకాళ్లపై ఒత్తిడి పెంచుతాయి.
కొన్ని సందర్భాల్లో నొప్పి లేకపోయినా మోకాళ్ల నుంచి కటకట అనే శబ్దం వినిపిస్తుంది. ఇది మోకాళ్లలో ఉండే సహజమైన నూనె పదార్థం తగ్గడం వల్ల కావచ్చు. ఆయుర్వేదంలో దీన్ని “కూర్చా” అని అంటారు. ఇది ఎముకలు ఒకదానితో ఒకటి సాఫీగా కదలడానికి సహాయపడుతుంది. కూర్చా సరిపడా ఉంటే మోకాళ్లలో ఘర్షణ తగ్గి నొప్పి తక్కువగా ఉంటుంది. ఇది తగ్గిపోతే నడిచేటప్పుడు శబ్దాలు రావడం, నొప్పి పెరగడం జరుగుతుంది. కొన్ని సందర్భాల్లో డాక్టర్లు శస్త్రచికిత్స సూచించినా, ప్రారంభ దశలో ఇంటి చిట్కాలతోనే ఉపశమనం పొందవచ్చు.
మోకాళ్లలో శబ్దం తగ్గాలంటే ముందుగా ఆహారంపై దృష్టి పెట్టాలి. కాల్షియం లోపం ఉంటే నువ్వులు, రాగి, పాలు, పెరుగు వంటి ఆహారం తీసుకోవడం మంచిది. నువ్వుల లడ్డు లేదా రాగి రొట్టె మోకాళ్ల బలానికి ఉపయోగపడుతుంది. వాపు కారణంగా సమస్య ఉంటే అల్లం లేదా వెల్లుల్లిని ఆహారంలో చేర్చుకోవచ్చు. ఇవి శరీరంలో వాపును తగ్గించడంలో సహాయపడతాయి. కాళ్లలో బలం తగ్గినట్లు అనిపిస్తే పచ్చి పెసలు, ఆక్రోట్లు, వేరుశనగలు తినడం మంచిది. ఇవి మసిల్స్ను బలంగా ఉంచుతాయి.
కూర్చా సమస్యను తగ్గించడానికి సోయాబీన్, ఓట్స్, పప్పులు కూడా ఉపయోగపడతాయి. ఇవి ఎముకలు, జాయింట్స్కు అవసరమైన పోషకాలు ఇస్తాయి. రోజూ కొంత సమయం వెనక్కి నడవడం కూడా చాలా మంచిది. రోజుకు 15-20 నిమిషాలు వెనక్కి నడిస్తే మోకాళ్లపై ఒత్తిడి తగ్గి కదలిక మెరుగుపడుతుంది.
మోకాళ్ల నొప్పి తగ్గాలంటే పసుపు పాలు తాగడం ఒక మంచి అలవాటు. పసుపులో ఉండే సహజ గుణాలు లోపల నుంచి వాపును తగ్గిస్తాయి. అలాగే పసుపును కొద్దిగా నీటితో కలిపి పేస్ట్ చేసి మోకాళ్లకు రాస్తే కూడా ఉపశమనం లభిస్తుంది. మసాజ్ కోసం వెల్లుల్లిని ఆవ నూనెలో మరిగించి ఆ నూనెతో మోకాళ్లకు మసాజ్ చేయవచ్చు. మహువా నూనెను స్వల్పంగా వేడి చేసి రాసినా రిలీఫ్ వస్తుంది.
సరైన ఆహారం, తేలికపాటి వ్యాయామం, ఇంటి చిట్కాలు పాటిస్తే చాలా సందర్భాల్లో మోకాళ్ల నొప్పి, శబ్దం తగ్గుతాయి. అయితే నొప్పి ఎక్కువగా ఉంటే లేదా సమస్య పెరుగుతున్నట్లు అనిపిస్తే తప్పకుండా నిపుణుల సలహా తీసుకోవడం అవసరం.
