తిరువూరు: బాధితులకు సత్వర న్యాయం పేరుతో ఎన్టీఆర్‌ జిల్లా తిరువూరు ఎమ్మెల్యే కొలికపూడి శ్రీనివాసరావు ప్రదర్శించిన అత్యుత్సాహం ఉద్రిక్తతకు దారి తీసిన విషయం తెలిసిందే. కంభంపాడులో వైకాపా నేత కాలసాని చెన్నారావు చేపట్టిన అక్రమ భవన నిర్మాణాన్ని ఎమ్మెల్యే దగ్గరుండి కొంత మేర కూల్చివేయించారు. ఈ ఘటన రాష్ట్ర వ్యాప్తంగా చర్చనీయాంశం కావడంతో కొలికపూడి శ్రీనివాసరావు సోషల్‌ మీడియా వేదికగా సంచలన ప్రకటన చేశారు. పదవి శాశ్వతం కాదని.. బాధితులకు న్యాయం చేయలేనపుడు తన లాంటి వారు రాజకీయాల్లో కూడా అవసరం లేదన్నారు.

‘‘కంభంపాడులో చెన్నారావు అరాచకాలతో ఎంతో మంది గ్రామం విడిచి వెళ్లిపోయారు. చంద్రబాబు, కేశినేని చిన్ని కాన్వాయ్‌ల మీద రాళ్ల దాడి చేశాడు. తెలుగుదేశం పార్టీ అధికారంలో ఉన్న సమయంలోనే అప్పటి మంత్రి దేవినేని ఉమా.. చెన్నారావుకు భయపడి ఆ గ్రామంలో పర్యటన రద్దు చేసుకున్నారు. తెలుగుదేశం పార్టీ జెండా కడితే ఐదు నిమిషాల్లో కాళ్లు, చేతులు విరగ్గొడతారు. గ్రామంలో ప్రజలు ఓటేసేందుకు వెళ్లకుండా రోడ్డుపై ముళ్ల కంప వేస్తారు. దుకాణాల్లో సరకులు తీసుకుంటారు.. డబ్బులు అడిగితే కొడతారు. ఇళ్లలోకి చొరబడి మహిళలను వేధిస్తారు. దారినపోయేవారిని ఆపి బైక్‌లు లాక్కుంటారు. భయపెట్టి, దాడులు చేసి భూములు రాయించుకుంటారు. కోడిపందేలు, పేకాట, మట్టి, ఇసుక అక్రమ వ్యాపారం.. ఇలా చిన్న గ్రామంలో రోజుకి రూ.లక్ష అక్రమ సంపాదన. చెన్నారావు అరాచకాల వల్ల గతంలో టీడీపీలో ఉన్న ప్రస్తుత వైకాపా నేత ఇతనిపై రౌడీషీట్‌ పెట్టించారు. వైకాపా ఎమ్మెల్యేగా పనిచేసిన రక్షణ నిధి.. నిబంధనలకు విరుద్ధంగా రౌడీషీట్‌ రద్దు చేయించారు. అధికారులందరూ అతనికి దాసోహం. గత ఐదేళ్ల వైకాపా పాలనలో రూ.50 కోట్ల అక్రమ సంపాదన.

ఇవన్నీ విన్న తర్వాత కూడా ఆ గ్రామంలో ప్రచారానికి వెళ్లా.. తెదేపా జెండా ఎగరేశా. ప్రజలు పోలింగ్‌ కేంద్రానికి వచ్చి ఓటేసే ధైర్యం కల్పించా. ఆ గ్రామంలో నాకు భారీ మెజార్టీ వచ్చింది. నాకు భయపడి.. ఇసుక, మట్టి దందాలు ఆపేశారు. కేశినేని చిన్నిపై రాళ్ల దాడి చేసిన చెన్నారావుపై కేసు పెడితే పోలీసులు వారం రోజులు పట్టించుకోలేదు. నిన్నటి ఘటన నేపథ్యంలో ఈరోజు అరెస్టు చూపిస్తున్నారు. నలుగురిని కొట్టి వాళ్ల స్థలాలు లాక్కుని, పక్కనున్న ప్రభుత్వ భూమిని ఆక్రమించి కమర్షియల్‌ కాంప్లెక్స్‌ నిర్మిస్తున్నాడు. అక్రమ నిర్మాణం ఆపాలని రెవెన్యూ అధికారులకు చెబితే.. అతన్ని కాపాడేందుకు వంద కథలు చెప్పారు. ఘటనకు 240 గంటల ముందు సోషల్‌ మీడియా ద్వారా ప్రకటించినా అధికారులు స్పందించలేదు. చివరికి నేను స్వయంగా రంగంలోకి దిగి, గత్యంతరం లేక వేలాది మంది బాధితులతో నిరసన చేపడితే .. చివరికి నోటీసులిచ్చి నిర్మాణం ఆపారు. బాధితులకు న్యాయం చేయలేనప్పుడు ఈ పదవి శాశ్వతం కాదు. నాలాంటి వాడు రాజకీయాల్లో కూడా అవసరం లేదు’’ అని ఎమ్మెల్యే కొలికపూడి సోషల్‌ మీడియాలో పోస్టు చేశారు.

ఎమ్మెల్యే కొలికపూడి వివరణ కోరిన సీఎం చంద్రబాబు
ఎన్టీఆర్‌ జిల్లా ఎ.కొండూరు మండలం కంభంపాడులో మంగళవారం జరిగి ఘర్షణపై ముఖ్యమంత్రి చంద్రబాబు ఎమ్మెల్యే కొలికపూడి శ్రీనివాసరావుని పిలిపించి వివరణ కోరారు. కొందరు అధికారుల తీరులో ఇంకా మార్పు రాలేదని, నిబంధనల ప్రకారం వ్యవహరించాలని తాను కోరినా వారి నుంచి స్పందన లేనందుకే వెళ్లాల్సి వచ్చిందని కొలికపూడి వివరించారు. 2013లో చంద్రబాబు కాన్వాయ్‌పై రాళ్లదాడి, ఇటీవల ఎన్నికల సందర్భంగా కేశినేని చిన్నిపై రాళ్ల దాడి ఘటనను వివరించారు. చట్ట పరిధిలో దోషుల్ని శిక్షిద్దాం.. క్షేత్ర స్థాయికి వ్యక్తిగతంగా వెళ్లొద్దని చంద్రబాబు కొలికపూడికి సూచించినట్టు సమాచారం.

ఏపీ మాజీ సీఎం జగన్‌ అక్రమాస్తుల కేసులో కీలక పరిణామం చోటు చేసుకుంది.

హైదరాబాద్‌: ఏపీ మాజీ సీఎం జగన్‌ అక్రమాస్తుల కేసులో కీలక పరిణామం చోటు చేసుకుంది. జగన్‌ కేసులపై దాఖలైన పిటిషన్‌పై హైకోర్టు విచారణ చేపట్టింది. సీబీఐ కోర్టులో ఉన్న జగన్‌ కేసులను రోజువారీ విచారణ చేపట్టాలని హైకోర్టు ఆదేశించింది. జగన్‌ కేసులపై గతంలో హరిరామ జోగయ్య హైకోర్టులో పిటిషన్‌ వేశారు. దీనిపై వాదనలు వినిపించిన ప్రభుత్వ న్యాయవాది కోర్టులో దర్యాప్తు కొనసాగుతోందని తెలిపారు. తదుపరి విచారణను హైకోర్టు 3 వారాలకు వాయిదా వేసింది.

అమరావతి: ప్రపంచంలోనే అతిపెద్ద భూ సేకరణ ప్రాజెక్టు అమరావతి అని ఏపీ ముఖ్యమంత్రి చంద్రబాబు నాయుడు తెలిపారు. సచివాలయంలో ఏర్పాటు చేసిన మీడియా సమావేశంలో ఆయన రాజధాని అమరావతిపై శ్వేతపత్రం విడుదల చేశారు. ఇది ఏ ఒక్కరి రాజధాని కాదు.. యావత్‌ రాష్ట్ర ప్రజలదని తెలిపారు. ప్రతి తెలుగు బిడ్డ అమరావతి నాది అని గర్వంగా గుర్తించాలి.. చెప్పుకోవాలన్నారు. కొత్తగా ప్రణాళికలు ఏమీ లేవని, పాత వాటినే కొనసాగిస్తూ నిర్మాణం చేస్తామని తెలిపారు.

‘‘అమరావతి అనేది ఆ కాలంలో ప్రముఖ నగరం. రాష్ట్ర విభజన జరుగుతుందని, అమరావతి రాజధాని అవుతుందని ఎవరూ ఊహించలేదు. రాజధానికి అమరావతి పేరు పెట్టాలని రామోజీగ్రూప్‌ సంస్థల ఛైర్మన్‌ రామోజీరావు సూచించారు. అమరావతి పేరును క్యాబినెట్‌లో వందశాతం అంగీకరించారు. ప్రతి గ్రామం నుంచి మట్టి నీరు తెచ్చి అమరావతిలో ఉంచాం. యమునా నది నీరు, పార్లమెంట్‌ మట్టిని ప్రధాని మోదీ తెచ్చారు. దేశంలోని ప్రముఖ దేవాలయాల పవిత్ర జలం, మట్టి తెచ్చాం. ఆ పవిత్ర జలం, మట్టి మహిమ అమరావతిలో ఉంది. అందుకే అమరావతిని ఎవరూ కదిలించలేకపోయారు. రాష్ట్రంలో ఎటుచూసినా సమదూరంలో ఉన్న ప్రాంతం ఇది. రాష్ట్ర భవిష్యత్తును ఆకాక్షించే ఎవరైనా అమరావతిని ఒప్పుకోవాలి. విజయవాడ, గుంటూరు మధ్యే రాజధాని ఉండాలని శివరామకృష్ణ కమిటీ కూడా చెప్పింది. హైదరాబాద్‌ను అభివృద్ధి చేసిన అనుభవం నాకు ఉంది. తొమ్మిదేళ్లలో సైబరాబాద్‌ ప్రాంతాన్ని అభివృద్ధి చేశాం. కృష్ణానది నుంచి నీళ్లు తెచ్చి సైబరాబాద్‌కు ఇచ్చాం.

29 వేల మంది రైతులు 34,400 ఎకరాలు రాజధాని కోసం ఇచ్చారు. రైతులు ఇచ్చిన భూమికి ఏటా పరిహారం ఇచ్చాం. పదేళ్ల వరకు పరిహారం ఇస్తామని రైతులకు చెప్పాం. రైతు కూలీలకు కూడా పరిహారం ఇచ్చాం. రైతులు ఇచ్చింది, ప్రభుత్వ భూమి కలిపి 53,745 ఎకరాలు సమకూరింది. రాజధాని రాష్ట్రానికి నడి మధ్యనే ఉండాలని ఆనాడు ప్రతిపక్షనేతగా జగన్‌ చెప్పారు. కానీ, అధికారంలోకి వచ్చాక జగన్‌ ఏం చేశారో ప్రజలే చూశారు. దేశంలో ఏ నగరానికి లేని సౌలభ్యత అమరావతికి ఉంది. ఇన్ని కిలోమీటర్ల రివర్‌ ఫ్రంట్‌ ఎక్కడా లేదు. ఒక వైపు గోదావరి, మరో వైపు కృష్ణా రెండు నదుల అనుసంధానంతో ఎప్పుడూ ఫ్రెష్ వాటర్‌ అందుబాటులో ఉంటుంది.

అమరావతి రైతుల త్యాగం చరిత్ర గుర్తు పెట్టుకుంటుంది..
విభజన సమయంలో మనకు లోటు బడ్జెట్‌ఉంది. ప్రాజెక్టు ఏదైనా విన్‌ విన్‌ పరిస్థితిలోనే ముందుకు తీసుకెళ్లా. అమరావతిలో పెట్టుబడులు పెట్టేందుకు అనేక మంది ముందుకొచ్చారు. సింగపూర్‌.. మనకు మాస్టర్‌ప్లాన్‌ ఇచ్చింది. తొమ్మిది విభాగాల్లో అమరావతి హబ్‌గా మారాలని ఆకాంక్షించాం. ఫైనాన్షియల్‌, నాలెడ్జ్‌, టూరిజం, ఎలక్ట్రానిక్‌, హెల్త్‌ సిటీ ప్రతిపాదించాం. పచ్చదనానికి ఎక్కువ ప్రాధాన్యత ఇచ్చాం. దేశంలోని ఏ నగరానికీ అమరావతిలా సౌలభ్యం లేదు. జగన్‌ వచ్చాక అమరావతిలో జరుగుతున్న పనులను ఆపేశారు. అధికారంలోకి వచ్చిన వెంటనే ప్రజావేదిక కూల్చేశారు. ఏ కట్టడం కట్టాలన్నా పదిసార్లు ఆలోచిస్తాం. అమరాతి రైతులను అనేక రకాలుగా అవమానించారు. రాజధాని కోసం భూమి ఇచ్చిన రైతులు రోడ్డున పడ్డారు. శ్రీకాకుళం యాత్రకు వెళ్తే మధ్యలోనే అడ్డుకున్నారు. అమరావతి రైతుల త్యాగం చరిత్ర గుర్తు పెట్టుకుంటుంది.

శిథిలాల నుంచే బంగారు భవిష్యత్తుకు నాంది పలుకుతాం
అమరావతి విధ్వంసం చేసి తెలుగు జాతికి ద్రోహం చేశారు. రాజధానిని మార్చిన వ్యక్తి గతంలో ఎవరూ లేరు. క్యాపిటల్‌ మార్పు జరిగితే ఏం జరుగుతుందో దేశానికిది కేస్‌ స్టడీ. ఇంతగా విధ్వంసం చేసిన వ్యక్తి రాజకీయాలకు అర్హుడేనా? కేసులు ఎదుర్కొంటున్న అమరావతి రైతులకు న్యాయం చేస్తాం. ఏం జరిగినా వెనక్కి చూడను.. ముందుకే వెళ్తా. న్యాయపరమైన చిక్కులు తొలగించి పనులు శరవేగంగా పూర్తి చేస్తాం. ఒకసారి నమ్మకం కోల్పోతే పెట్టుబడిదారులు మళ్లీ రారు. ఇప్పుడు పెట్టుబడి దారులను రప్పించాలంటే చాలా కష్టపడాలి. మళ్లీ ఇబ్బందులు రావని భరోసా ఏమిటని అడుగుతున్నారు? మన రాష్ట్రంలో అవకాశాలు లేవా.. ప్రజలకు తెలివితేటలు లేవా? మన రాష్ట్రం రైస్‌ బౌల్‌ అని దేశ వ్యాప్తంగా పేరుంది. మనకు మంచి భూములు ఉన్నాయి.. పండించే రైతులు ఉన్నారు. అమరావతికి బ్రాండ్‌ ఇమేజ్‌ ఎలా తేవాలనే ఆలోచిస్తున్నాం. ఈ శిథిలాల నుంచే బంగారు భవిష్యత్తుకు నాంది పలుకుతాం. ఇక్కడ సంపద సృష్టి, ఉపాధి కల్పన, పేదరిక నిర్మూలన జరగాలి. అమరావతిలో పనులు మళ్లీ ప్రారంభమయ్యాయి. అంచెలంచెలుగా పూర్తి చేస్తాం’’ అని చంద్రబాబు తెలిపారు.

Village and Ward Secretariats : గ్రామ, వార్డు సచివాలయాల ఉద్యోగులతో జులై నెలకు సంబంధించిన పెన్షన్లు లబ్ధిదారులకు ప్రభుత్వం పంపిణీ చేయించింది. గత వైసీపీ ప్రభుత్వం హయాంలో ప్రతీనెలా 1వ తేదీన గ్రామ వాలంటీర్లు ఇంటింటికి వెళ్లి పెన్షన్లు పంపిణీ చేశారు.

అయితే, నూతనంగా ఏర్పడిన ఎన్డీయే ప్రభుత్వం వాలంటీర్లతో సంబంధం లేకుండా గ్రామ, వార్డు సచివాలయాల ఉద్యోగులతో ఇంటింటికి పెన్షన్లు అందించే కార్యక్రమాన్ని చేపట్టింది. జూలై 1వ తేదీ ఉదయం 6గంటల నుంచి రాత్రి వరకు గ్రామాల్లో పెన్షన్ల పంపిణీ కార్యక్రమం కొనసాగింది. దీంతో వాలంటీర్ల ప్రమేయం లేకుండా ఒక్కరోజులోనే రాష్ట్రంలోని 90శాతం మంది లబ్ధిదారులకు పెన్షన్లను ప్రభుత్వం అందించింది. ప్రభుత్వం అప్పగించిన బాధ్యతను గ్రామ, వార్డు సచివాలయ ఉద్యోగులు విజయవంతంగా నిర్వహించడంతో ప్రభుత్వం వీరికి మరో కీలక బాధ్యతను అప్పగించేందుకు సిద్ధమైనట్లు తెలుస్తోంది.

రాష్ట్రంలో విద్యార్థులు, నిరుద్యోగులకు ఆయా రంగాల్లో శిక్షణ ఇచ్చి వారికి ఉద్యోగ అవకాశాలు కల్పించేందుకు కూటమి ప్రభుత్వం స్కిల్ సెన్సెస్ కార్యక్రమాన్ని అమలు చేసేందుకు సిద్ధమైంది. ఇటీవల సీఎం చంద్రబాబు నాయుడు ఆధ్వర్యంలో జరిగిన తొలి కేబినెట్ సమావేశంలో స్కిల్ సెన్సెస్ కార్యక్రమం అమలుకు మంత్రివర్గం ఆమోదముద్ర వేసిన విషయం తెలిసిందే. ఈ స్కిల్ సెన్సెస్ లో వివిధ శాఖలను భాగస్వామ్యం చేసే విధివిధానాలపై మంత్రి నారా లోకేశ్ అధికారులతో మంగళవారం చర్చించారు. గ్రామ, వార్డు సచివాలయ ఉద్యోగుల ద్వారా ఇంటింటి సర్వే చేపట్టాలని ఈ సందర్భంగా నిర్ణయించినట్లు తెలుస్తోంది.

రాష్ట్ర ప్రభుత్వం చేపట్టిన స్కిల్ సెన్సెస్ ప్రోగ్రాం ద్వారా స్వదేశం, విదేశాల్లో డిమాండ్ ఉన్న కోర్సులలో యువతకు శిక్షణ ఇవ్వనున్నారు. తద్వారా నైపుణ్యాభివృద్ధిలో యువతకు ఉపాధి కల్పనకు పెద్దపీట వేయనున్నారు. ఈ క్రమంలో గ్రామాల్లో చదువుకున్న యువత ఎంత మంది ఉన్నారు. వారు ఏఏ రంగాల్లో శిక్షణ పొందేందుకు సిద్ధంగా ఉన్నారనే విషయాలతోపాటు పలు విషయాలపై ప్రభుత్వ ఉద్యోగులు ఇంటింటికి వెళ్లి వివరాలు సేకరించాల్సి ఉంటుంది. ఆ వివరాల సేకరణ బాధ్యతను గ్రామ, సచివాలయ వాలంటీర్లకు అప్పగించాలని ప్రభుత్వం భావిస్తుంది.

CM Chandrababu: పాలనాపరమైన అంశాల్లో సీఎం చంద్రబాబు కీలక నిర్ణయాలు తీసుకుంటున్నారు. ఒకవైపు సంక్షేమ పథకాలు, మరోవైపు అభివృద్ధి పనులు, ఇంకోవైపు పోలవరం, అమరావతి విషయాల్లో నిరంతర సమీక్షలు, సమావేశాలు కొనసాగిస్తున్నారు.

మరోవైపు సాధారణ పరిపాలనపై సైతం దృష్టిసారించారు. ప్రభుత్వం చేపట్టి నెల రోజులు కాకమునుపే చాలా రకాల నిర్ణయాలు తీసుకుంటూ ముందుకు సాగుతున్నారు.ఈ నేపథ్యంలో గత అనుభవాల దృష్ట్యా అధికారులు, ఉద్యోగుల నుంచి వ్యతిరేకత రాకుండా చూసుకోవాలని భావిస్తున్నారు. సాయంత్రం 6 గంటల తరువాత వారు విధుల నుంచి ఇంటికి చేరేలా చర్యలు చేపడుతున్నారు. ఎట్టి పరిస్థితుల్లో ఆరు తరువాత సమావేశాలు పెట్టకూడదని ఇప్పటికే మంత్రులకు స్పష్టమైన ఆదేశాలు జారీ చేశారు.

అధికార యంత్రాంగాన్ని చంద్రబాబు పరుగులు పెట్టిస్తారన్నది ఒక ఆరోపణ. 2019 ఎన్నికల్లో ఓటమికి అదో కారణం కూడా. రాత్రి వరకు సమీక్షలు, సమావేశాలతో అధికారులు, ఉద్యోగులు ఇబ్బంది పడేవారు. వేళా పాలా లేకుండా వారితో పనులు చేయించుకోవడంతో ఆ వర్గాల్లో వ్యతిరేకత వ్యక్తం అయింది. 2014 నుంచి 2019 మధ్య ఉద్యోగ వర్గాలకు చంద్రబాబు సర్కార్ అన్ని రకాల రాయితీలు, సౌకర్యాలు కల్పించింది. కానీ కేవలం పనితీరు కారణంగానే చంద్రబాబు సర్కార్ పై వ్యతిరేకత పెంచుకున్నారు ఉద్యోగ వర్గాలు.అందుకే ఈసారి చంద్రబాబు ఉద్యోగుల విషయంలో జాగ్రత్తలు తీసుకుంటున్నారు. గతం మాదిరిగా తప్పిదాలు జరగకుండా చూస్తున్నారు.

సాయంత్రం 6:00 దాటిన తర్వాత సమీక్షలు నిర్వహించవద్దని అటువంటి మంత్రులతో పాటు ఉన్నతాధికారులకు ఆదేశాలు జారీ చేశారు. టెలి కాన్ఫరెన్స్, వీడియో కాన్ఫరెన్స్ వంటి వాటి విషయంలో కూడా సమయపాలన పాటించాలని సూచిస్తున్నారు. తాజాగా మరో ఆదేశం ఇచ్చారు. ఎటువంటి సమీక్ష అయిన 30 నిమిషాల్లో ముగించాలని… సుదీర్ఘ సమయం సమీక్షించవద్దని కూడా ఆదేశాలు ఇచ్చారు. రాష్ట్రంలో రహదారుల సమస్యపై నిన్ననే సమీక్షించారు చంద్రబాబు. కేవలం 30 నిమిషాల పాటు సమీక్షకు కేటాయించారు. అధికారులు కూడా ఏం చెప్పాలనుకున్న 20 నిమిషాల్లో సమీక్షలు ముగించాలని సీఎం ఆదేశించారని తెలుస్తోంది. మొత్తానికైతే గత అనుభవాల దృష్ట్యా గుణపాఠాలు నేర్చుకున్న చంద్రబాబు.. ఉద్యోగుల నుంచి వ్యతిరేకత రాకుండా చూసుకోవాలని భావిస్తుండడం విశేషం.

ఆంధ్రప్రదేశ్ రాష్ట్రంలో 2014-2019 మధ్య కాలంలో అధికారంలో ఉన్న తెలుగుదేశం ప్రభుత్వం నిరుపేదలకు ఐదు రూపాయలకే భోజనం అందించే అన్న క్యాంటీన్లను నిర్వహించింది.

దేశంలోనే ఎక్కడా లేని విధంగా ఐదు రూపాయలకే నిరుపేదలకు భోజనం పెట్టింది. రాష్ట్రవ్యాప్తంగా లక్షల మంది ఆకలి తీర్చిన అన్న క్యాంటీన్లను జగన్ ప్రభుత్వం రాగానే మూసివేసింది.

అన్నా క్యాంటీన్ లతో పాటు డొక్కా సీతమ్మ క్యాంటీన్ లు

దీంతో కూటమి ప్రభుత్వం అధికారంలోకి వస్తే మళ్లీ అన్న క్యాంటీన్లు నిర్వహిస్తామని టిడిపి కూటమి నేతలు, టిడిపి అధినేత చంద్రబాబు ఎన్నికలకు ముందు ప్రజలకు హామీ ఇచ్చారు. ఇచ్చిన హామీ మేరకు రాష్ట్రంలో అన్న క్యాంటీన్లను ప్రారంభిస్తున్నారు.ఇదిలా ఉంటే రాష్ట్రవ్యాప్తంగా అన్న క్యాంటీన్లు మాత్రమే కాకుండా డొక్కా సీతమ్మ క్యాంటీన్లు కూడా రాబోతున్నాయని ఉప ముఖ్యమంత్రి పవన్ కళ్యాణ్ కీలక ప్రకటన చేశారు.

పవన్ డొక్కా సీతమ్మ క్యాంటీన్ ల కారణం ఏంటి?

పిఠాపురంలో జనసైనికుల సమావేశంలో మాట్లాడిన ఆయన డొక్కా సీతమ్మ పేరుతో క్యాంటీన్లు ఏర్పాటు చేయనున్నట్టు వెల్లడించారు. అయితే ఉభయ గోదావరి జిల్లాలలోని వారికి డొక్కా సీతమ్మ అంటే ఎవరో తెలుసు కానీ, పవన్ కళ్యాణ్ చేసిన ప్రకటనతో ఇప్పుడు డొక్కా సీతమ్మ ఎవరు అన్నది రాష్ట్ర వ్యాప్తంగా చర్చ జరుగుతుంది. డొక్కా సీతమ్మ పేరుతోనే ఎందుకు క్యాంటీన్లు ఏర్పాటు చేయాలని పవన్ కళ్యాణ్ భావిస్తున్నారు అన్నది ఆసక్తిని కలిగిస్తుంది.

నిత్యన్నదాత .. అపర అన్నపూర్ణ డొక్కా సీతమ్మ

డొక్కా సీతమ్మ ఉభయగోదావరి జిల్లాలలో నిత్యాన్నదాతగా, అన్నపూర్ణగా ప్రసిద్ధి చెందారు. డొక్కా సీతమ్మ గోదావరి ప్రాంతాలలో ఆకలిగొన్నవారికి అన్నం పెట్టిన అన్నపూర్ణగా గుర్తింపు పొందారు. గోదావరి జిల్లాలలో లంక గ్రామాలకు తరచుగా వరదలు వస్తూ ఉండటం వల్ల చాలామంది వరదల దెబ్బకు వసతి, భోజన సదుపాయాలు లేక ఇబ్బందులు పడేవారు. అటువంటి వారందరినీ ఆదుకుని వారికి వసతి, భోజన సదుపాయాలను కల్పించిన ఉదాత్త మహిళ డొక్కా సీతమ్మ.

డొక్కా సీతమ్మ చరిత్ర తెలియటం కోసం పవన్ నిర్ణయం

అన్నదానం చేసి మానవత్వానికి అర్థం చెప్పిన డొక్కా సీతమ్మ పేరు భారత దేశ వ్యాప్తంగా అప్పట్లో మారుమోగింది. ఈ క్రమంలోనే అపర అన్నపూర్ణగా గుర్తింపు పొందిన డొక్కా సీతమ్మ గారి పేరుతో క్యాంటీన్లు ఏర్పాటు చేయడం ద్వారా మరుగున పడిపోతున్న అటువంటి వారి చరిత్రను జనాలకు తెలియజేసినట్లు అవుతుందని భావించారు పవన్ కళ్యాణ్.

డొక్కా సీతమ్మ క్యాంటీన్ లకు చంద్రబాబుకు పవన్ విజ్ఞప్తి

అందుకే డొక్కా సీతమ్మ పేరుతో కూడా క్యాంటీన్లు ఏర్పాటు చేయాలని చంద్రబాబుకు విజ్ఞప్తి చేసినట్టుగా దానికి చంద్రబాబు కూడా సానుకూలంగా స్పందించినట్టుగా పేర్కొన్నారు. మొత్తానికి పవన్ కళ్యాణ్ ప్రకటన కారణంగా ప్రస్తుతం డొక్కా సీతమ్మ పేరు ప్రతి ఒక్కరికి తెలిసినట్లయింది.