వైసీపీ అధినేత జగన్‌పై ఏపీ కాంగ్రెస్ అధ్యక్షురాలు షర్మిల నిప్పులు చెరిగారు. బడ్జెట్ సమావేశానికి కూడా జగన్ ఎందుకు వెళ్లలేదని ప్రశ్నించారు. ప్రభుత్వం వైఫల్యాలను ఎత్తి చూపే బాధ్యత జగన్‌కు లేదా అని నిలదీశారు. అసెంబ్లీకి వెళ్లకుంటే రాజీనామా చేయాలని షర్మిల కోరారు.

ఏపీ మాజీ సీఎం, వైసీపీ అధినేత జగన్ మోహన్‌రెడ్డిపై రాష్ట్ర కాంగ్రెస్ అధ్యక్షురాలు వైఎస్ షర్మిల సెటైర్లు గుప్పించారు. ప్రతిపక్ష హోదా ఇవ్వకపోయినా జగన్ అదే పాట పాడుతున్నారని విమర్శించారు. జగన్‌ను ప్రజలు ఎమ్మెల్యేగా గెలిపించారని విషయం గుర్తుకు రావడం లేదా అని ప్రశ్నించారు. ప్రజా సమస్యలపై మాట్లాడేందుకు అసెంబ్లీకి వెళ్లాలి కదా అని ప్రశ్నించారు. తనకు ప్రతిపక్ష హోదా ఇవ్వడం‌ లేదని, మైకు ఇవ్వరని జగన్ చెప్పడం విడ్డూరంగా ఉందని ఎద్దేవా చేశారు. జగన్ పార్టీకి గతంలో 151 సీట్లు ఇస్తే ప్రజలను అన్ని విధాలా మోసం చేశారని వైఎస్ షర్మిల ధ్వజమెత్తారు.

జగన్ మాట తప్పాడు..

‘‘మద్యపాన నిషేధం, పోలవరం, అమరావతి, ఫీజు రీయింబర్స్‌మెంట్ విషయంలో ‌జగన్ మాట తప్పాడు. అందుకే ప్రజలు 11 సీట్లే జగన్‌కు ఇచ్చారు. మీరు అసెంబ్లీకి వెళ్లి ఎమ్మెల్యేగా మాట్లాడాలి కదా. మేము అధికారంలోకి రాకుంటే అసెంబ్లీకి వెళ్లమని అప్పుడు చెప్పలేదే. మీకు ప్రజలు ఓట్లు వేసింది అసెంబ్లీకి వెళ్లమనే కదా. ప్రజల తరపున గెలిచిన వారు అసెంబ్లీకి వెళ్లాలి. ఇది సరైన విధానమా… మీరు సభను అవమానిస్తున్నారా. నిన్న బడ్జెట్ సమావేశానికి కూడా వెళ్లలేదు. ప్రభుత్వం వైఫల్యాలను ఎత్తి చూపే బాధ్యత జగన్‌కు లేదా. అసెంబ్లీకి వెళ్లకుంటే మీరు రాజీనామా చేయాలి. మళ్లీ అసెంబ్లీకి‌ వెళ్లమని చెప్పి ఎన్నికలకు వెళ్లండి. అప్పుడు‌ ప్రజలే మీకు తగిన బుద్ధి చెబుతారు. వైసీపీ ఎమ్మెల్యేలు అందరూ అసెంబ్లీకి వెళ్లాలని కాంగ్రెస్ పక్షాన లేఖ రాశాను’’ అని వైఎస్ షర్మిల గుర్తుచేశారు.

సోషల్ మీడియా పోస్ట్‌లపై షర్మిల ఫైర్..

‘‘సోషల్ మీడియా పోస్ట్‌లపై షర్మిల స్పందించారు. నేను కూడా సోషల్ మీడియా బాధితురాలినే. నామీద, అమ్మ విజయమ్మ, సునీతల మీద నీచంగా పోస్ట్‌లు పెట్టించింది జగనే. ఆయన ప్రోద్బలంతో నాపై నీచంగా పోస్ట్‌లు పెట్టారు. సోషల్ మీడియాలో ఇలాంటి పోస్ట్‌లు ఆగాలి. కొన్ని సంవత్సరాలుగా సైతాన్ సైన్యాన్ని వైసీపీ ఏర్పాటు చేసుకుంది. ఇది సహించరాని‌ విషయం.. నా క్యారెక్టర్‌‌పై విమర్శలు చేస్తారా. ధైర్యం ఉంటే నేరుగా వచ్చి మాట్లాడాలి.. నీచమైన‌ పోస్ట్‌లు ఏంటి. పోలీసులు కఠిన చర్యలు తీసుకోవాలి. సోషల్ మీడియా పరిధిలో పోస్ట్‌లు ఉండాలి. పరిధి దాటితే తప్పకుండా చర్యలు ఉండాలి. పోస్ట్‌లు పెట్టిన వారితో‌పాటు వెనుక ఉన్నవారిని పట్టుకోవాలి. జగన్, అవినాష్ ఎవరు ఉన్నా విచారించి శిక్షించాలి. పోలీసులు విచారణ చేసి అందరినీ అరెస్టు చేయాలి. పోలీసు వ్యవస్థను సొంతానికి వాడుకుంది జగనే. ఇప్పుడు పోలీసులను హెచ్చరించడం హాస్యాస్పదంగా ఉంది. మళ్లీ అధికారంలోకి వస్తామని జగన్ కలలు గంటున్నాడు. పోలీసులను బెదిరిస్తున్నారంటే వీరికి అహంకారం తగ్గలేదు. పోలీసులు నిష్పక్షపాతంగా విచారణ చేసి అరెస్టు చేయాలి’’ అని షర్మిల పేర్కొన్నారు.

ఇది ప్రజా వంచన బడ్జెట్‌…

‘‘ఏపీ‌ ప్రభుత్వం నిన్న బడ్జెట్ ప్రవేశ పెట్టింది. చంద్రబాబు అపార అనుభవం, మేధస్సు గురించి గొప్పగా చెప్పారు. కానీ ఇది బడ్జెట్టా, మ్యానిఫెస్టోనా అనేది ప్రజలకు అర్ధం‌ కాలేదు. ఈ బడ్జెట్‌లో కేటాయింపులు లేవు, స్పష్టత లేదు. చంద్రబాబు గొప్పగా సూపర్ సిక్స్‌ను చెప్పుకున్నారు. వీటి అమలుకు లక్షా ఇరవై వేల‌కోట్ల రూపాయలు అవసరమని అంచనా వేశారు. కోటి మంది మహిళలకు మహిళా శక్తి కింద నెలకు రూ. 1500 అన్నారు. తల్లికి వందనం పేరుతో 80 లక్షల మంది బిడ్డలకు రూ.12 వేల‌ కోట్లు ఖర్చు అయ్యే పథకం. దీనికి రూ.2400 కోట్ల రూపాయలే కేటాయించారు. మహిళలకు ఉచిత బస్సుకు బడ్జెట్‌లో‌ కేటాయింపులు చేయలేదు. 30 లక్షల మందికి నెలకు రూ 400 కోట్లు ఖర్చు అయ్యే పథకం ఇది. 52‌లక్షల మంది రైతులకు రాష్ట్రం తరపున రూ, 8 వేల కోట్లకు గానూ రూ. 4 వేల‌కోట్లే కేటాయించారు. నిరుద్యోగ భృతి కింద రూ.3000 నెలకు ఇస్తాం అన్నారు .. కేటాయించలేదు. ఏడాదికి 8 లక్షల ఇళ్లు అన్నారు.. కేవలం 4000 కోట్లే కేటాయించారు. ఉచిత గ్యాస్ సిలిండర్‌లకు రూ. 4వేల‌ కోట్లు ఖర్చు అవుతుంటే రూ.900 కోట్లే కేటాయించారు. సున్నా వడ్డీకే రుణాలు అన్నారు.. అదీ అమలు చేయడం లేదు. ఎన్నికల్లో గెలవడానికి మాత్రమే చంద్రబాబు వాగ్దానం చేశారా. వాటిని అమలు చేసి, ప్రజల కష్టం తీర్చే బాధ్యత లేదా. విద్యుత్ బిల్లులకు కూడా 40 శాతం పెంచి వసూల్ చేస్తున్నారు. ప్రధాని మోదీకి కొమ్ము కాస్తున్న చంద్రబాబు విద్యుత్ భారం రద్దు చేయించ లేకపోయారు. ఇది ప్రజల బడ్జెట్ కాదు… ఓట్ల కోసమే వాగ్దానాలు. ఇక వైసీపీ ప్రభుత్వానికి, మీకూ తేడా ఏమిటి. జగన్ అన్ని అప్పులు చేశారని, కట్టాలని చంద్రబాబుకు తెలియదా. ఇది ప్రజా వంచన బడ్జెట్‌గా పరిగణిస్తున్నాం’’ అని షర్మిల విమర్శలు చేశారు.

ఆంధ్రప్రభుత్వం అసెంబ్లీ బడ్జెట్ ప్రవేశ పెట్టింది. రాష్ట్ర ప్రభుత్వం బడ్జెట్‌లో డ్వాక్రా మహిళలకు చేయూత అందించేలా సున్నావడ్డీ పథకం అమలు కోసం నిధులు కేటాయించింది. 2014-19 మధ్య అప్పటి టీడీపీ ప్రభుత్వం డ్వాక్రా మహిళలకు సున్నా వడ్డీ పథకం రూ.5 లక్షల వరకు వర్తింపచేయగా.. గత‌ ప్రభుత్వం దాన్ని రూ.3 లక్షలకు పరిమితం చేసిందనే విమర్శలు ఉన్నాయి. కూటమి ప్రభుత్వం ఎన్నికల సమయంలో కీలక హామీ ఇచ్చింది. తమ ప్రభుత్వం అధికారంలోకి రాగానే సున్నా వడ్డీ పథకాన్ని రూ.10 లక్షల వరకు అమలు చేస్తామని ఎన్నికల్లో ప్రకటించిన సంగతి తెలిసిందే.

ఈ మేరకు ఎన్నికల సమయంలో ఇచ్చి హామీ మేరకు.. 2024-25 బడ్జెట్‌లో ప్రభుత్వం నిధులు కేటాయించింది. ఈ మేరకు డ్వాక్రా మహిళల సున్నా వడ్డీ పథకం కోసం రూ.1,250 కోట్లు కేటాయించింది. ఈ నిధుల్లో పట్టణ ప్రాంతాల్లో అమలుకు రూ.300 కోట్లు కేటాయించగా.. గ్రామీణ ప్రాంతాల్లో అమలుకు రూ.950 కోట్లు ప్రతిపాదించింది ప్రభుత్వం. డ్వాక్రా మహిళలకు ఈ మేరకు సున్నా వడ్డీ పథకానికి రూ.10 లక్షలు వరకు రుణం అమలు చేయనుంది ప్రభుత్వం.

ఏపీ అసెంబ్లీలో 2024-25 ఆర్థిక సంవత్సరానికి ఆర్థిక శాఖ మంత్రి పయ్యావుల కేశవ్ బడ్జెట్ ప్రవేశపెట్టారు. రూ.2 లక్షల 94 వేల 427.25 కోట్లతో వార్షిక బడ్జెట్‌ను సభ ముందు ఉంచారు. ఈ మేరకు వివిధ శాఖలకు బడ్జెట్ కేటాయింపులు చేశారు. ఇందులో మహిళా, శిశు సంక్షేమ శాఖకు రూ.4,285 కోట్లను కేటాయించారు. డ్వాక్రా మహిళలకు రుణాలు, ఇతర పథకాలకు సంబంధించి కేటాయింపులు ఉన్నాయి.

మరోవైపు ఏపీలో ఒకే ఆర్థిక సంవత్సరంలో మూడుసార్లు బడ్జెట్‌ ప్రవేశ పెట్టారు. 2024-25కి సంబంధించి గత ప్రభుత్వం మొదటి నాలుగు నెలల కాలానికి ఓటాన్‌ ఎకౌంట్‌ బడ్జెట్‌ ప్రవేశపెట్టింది. ఆ తర్వాత అధికారంలోకి వచ్చిన ఎన్డీయే కూటమి ప్రభుత్వం మరో నాలుగు నెలల కాలానికి ఓటాన్‌ ఎకౌంట్‌ బడ్జెట్‌కు ఆర్డినెన్స్‌ జారీ చేసిన సంగతి తెలిసిందే. ఇప్పుడు తాజాగా పూర్తి స్థాయిలో బడ్జెట్‌‌ను ప్రవేశపెట్టింది. ఇటీవల కాలంలో ఒకే ఆర్థిక సంవత్సరంలో మూడుసార్లు బడ్జెట్‌ పెట్టడం ఇదే మొదటిసారి అంటున్నారు. శాసనసభలో ఆర్థిక మంత్రి పయ్యావుల కేశవ్ బడ్జెట్‌ను ప్రవేశ పెట్టగా.. మంత్రి అచ్చెన్నాయుడు వ్యవసాయ బడ్జెట్‌ను ప్రవేశపెట్టారు. అలగే శాసన మండలిలో 2024-25 బడ్జెట్‌ను మంత్రి కొల్లు రవీంద్ర, వ్యవసాయ బడ్జెట్‌ను మంత్రి నారాయణ ప్రవేశపెట్టారు. మొత్తానికి కూటమి ప్రభుత్వం వచ్చిన తర్వాత తొలి బడ్జెట్ ఇది. ఎన్నికల సమయంలో ఇచ్చిన హామీల వేరకు వివిధ పథకాలకు ప్రభుత్వం నిధుల్ని కేటాయించింది.

ఆంధ్రప్రదేశ్ ప్రభుత్వం బడ్జెట్‌లో పథకాలకు నిధులు కేటాయించింది. ఈ మేరకు విద్యాశాఖకు సంబంధించి పథకాలకు నిధులు ఇచ్చారు. సూపర్‌ సిక్స్‌లో భాగంగా ఎన్నికల సమయంలో ఇచ్చిన హామీల్లో కీలకమైనది తల్లికి వందనం.. ప్రభుత్వ, ఎయిడెడ్, ప్రైవేట్‌ పాఠశాలల్లో చదువుతున్న పేద విద్యార్థులకు రూ. 15 వేల చొప్పున అందిస్తామని కూటమి తెలిపింది. ఆ హామీ అమలు దిశగా.. ప్రస్తుత ఏడాది నుంచే ఈ పథకాన్ని అమలు చేయనుంది. దీని కోసం 2024-25 బడ్జెట్‌లో రూ. 6,487 కోట్లు కేటాయించారు.. కాకపోతే ఈ పథకానికి సంబంధించిన విధివిధానాలను ప్రభుత్వం ప్రకటించాల్సి ఉంది.

ఒకటి తరగతి నుంచి ఇంటర్మీడియట్‌ వరకు చదువుతున్న విద్యార్థులకు.. ఏడాదికి రూ. 15 వేల చొప్పున తల్లికి వందన పేరుతో అందించనుంది. ఈ సాయాన్ని విద్యార్థుల తల్లుల బ్యాంక్ అకౌంట్‌లలో జమ చేస్తారు. గత‌ ప్రభుత్వంలో అమ్మఒడి పేరుతో ఈ పథకాన్ని అమలు చేసింది.. కుటుంబంలో ఒక్కరికి మాత్రమే సాయం అందించారు. కానీ కూటమి ప్రభుత్వం మాత్రం ఇంట్లో ఎంతమంది పిల్లలు ఉంటే అంతమందికి తల్లికి వందనం పథకాన్ని అమలు చేస్తామని తెలిపింది. ఈ మేరకు నిధుల కేటాయించింది

తల్లికి వందనం పథకానికి సంబంధించి నిధులను కూటమి ప్రభుత్వం బీసీ, ఈడబ్ల్యూఎస్, మైనారిటీ, ఎస్సీ, ఎస్టీ సంక్షేమ శాఖల వారీగా రూ. 4,213.52 కోట్లు కేటాయించింది. గత ప్రభుత్వం పాఠశాల విద్యకు చేసిన ఖర్చు కంటే రూ. 1,526 కోట్లు ఎక్కువ ఖర్చు చేయనున్నట్లు తెలిపింది. అంతేకాదు రాష్ట్రంలో ఉన్నత విద్యకు సంబంధించి 2023-24 ఆర్థిక సంవత్సరం సవరించిన అంచనాల కంటే రూ. 93 కోట్లు అధికంగా నిధులు ఇవ్వనున్నారు. యువతకు నైపుణ్య శిక్షణ, సాంకేతిక విద్యకు సంబంధించి రూ. 1,215.67 కోట్లు కేటాయించింది ప్రభుత్వం. ఈ బడ్జెట్‌లో ఆర్జీయూకేటీకి రూ.94.73 కోట్లు కేటాయించింది ప్రభుత్వం. అన్ని వర్సిటీలు, సీపీ బ్రౌన్‌ గ్రంథాలయానికి కలిపి 2024-25కు సంబంధించి ప్రస్తుత ప్రభుత్వం రూ.1,235.17 కోట్ల మేర వ్యయం చేయనుంది.

మరోవైపు రాష్ట్ర ప్రభుత్వం బడ్జెట్‌లో మైనారిటీల సంక్షేమానికి కేటాయింపులు చేసింది. 2024-25 ఏడాదికి రూ.4,376 కోట్లు కేటాయించగా.. మైనారిటీ యువత జీవనోపాధి కల్పనకు స్వయం ఉపాధి రుణాలు మంజూరు చేసేందుకు మైనారిటీ ఆర్థిక సహకార సంస్థకు రూ.173 కోట్లు ప్రతిపాదించింది. అంతేకాదు కేంద్ర పథకమైన ప్రధానమంత్రి జన్‌ వికాస్‌ కార్యక్రమం కింద స్కూల్స్, హాస్టల్స్, అంగన్‌వాడీ కేంద్రాలు, ఐటీఐ, పాలిటెక్నిక్‌ కళాశాలలు నిర్మించనున్నారు. ఈ పథకం అమలుకు రూ.208 కోట్లు ప్రతిపాదించారు. ఇమామ్, మౌజమ్‌ల గౌరవ వేతనాలకు రూ.90 కోట్లు.. పాస్టర్ల గౌరవ వేతనాలకు రూ.29.49 కోట్లు.. క్రైస్తవ ఆర్థిక సహకార సంస్థకు రూ.2.42 కోట్లు.. మైనారిటీ ఆర్థిక సంస్థకు రూ.173 కోట్లు.. ఉర్దూ అకాడమీకి రూ.3.66 కోట్లు కేటాయించారు.

ఆంధ్రప్రదేశ్ ప్రభుత్వం వ్వయసాయ బడ్జెట్‌ను 43,402 కోట్లతో ప్రత్యేకంగా ప్రవేశపెట్టిన సంగతి తెలిసిందే. ఈ మేరకు వ్యవసాయశాఖ మంత్రి అచ్చెన్నాయుడు కీలక ప్రకటన చేశారు. రాష్ట్రవ్యాప్తంగా విపత్తుల సమయంలో పంట నష్టానికి ఇచ్చే పెట్టుబడి సాయాన్ని పెంచినట్లు తెలిపారు. గతంలో హెక్టారుకు రూ.17 వేలు సాయం అందించేవారని.. ఇప్పుడు దానిని రూ.25 వేలకు పెంచామని చెప్పారు. ఈ మేరకు ప్రత్యేక ప్యాకేజీ అమలు చేశామని ప్రకటించారు. ఈ ఏడాది జులైలో భారీ వర్షాలు, వరదలతో రైతులు పంట నష్టపోయారని.. 4 జిల్లాల్లో పంట దెబ్బతిన్న 23,259 మంది రైతులకు రూ.25.75 కోట్ల పెట్టుబడి రాయితీని త్వరలో అందిస్తామని తెలిపారు. ఈ-పంట ద్వారా 21 జిల్లాల్లో పంట నష్టపోయిన 1.90 లక్షల మంది రైతులకు రూ.284.56 కోట్లు జమ చేశామని చెప్పారు.

ఈ బడ్జెట్‌లో ప్రభుత్వం రైతులకు కీలకమైన అన్నదాత సుఖీభవ పథకానికి సంబంధించి రూ.4,500 కోట్లు నిధులు కేటాయించింది. రైతులకు పంట రుణాలు, సబ్సిడీ విత్తనాలు, ఎరువులు అందిస్తున్నట్లు తెలిపారు. రాష్ట్రంలో వ్యవసాయ రంగాన్ని మరింత బలోపేతం చేసేందుకు సాగుదారుల హక్కు చట్టం -2024 తీసుకొచ్చామన్నారు మంత్రి. అన్నదాత సుఖీభవ- పీఎం కిసాన్, పంటల బీమా, వడ్డీ లేని పంట రుణాలు, రైతు బృందాలకు డ్రోన్ల సరఫరా, రాయితీపై వ్యక్తిగత యంత్ర పరికరాలు, బంజరు భూముల్ని సాగులోకి తేవడం వంటి కార్యక్రమాలపై కీలక ప్రకటన చేశారు.

2024-25లో 1.74 లక్షల ఎకరాలను వ్యవసాయ పంటల నుంచి ఉద్యాన పంటల కిందకు తీసుకొస్తామని చెప్పారు మంత్రి అచ్చెన్నాయుడు. 11 ఉద్యాన పంటలను క్లస్టర్‌ విధానంలో ప్రోత్సహిస్తున్నామని.. బహుళ అంతస్తుల పంటలు, అంతర పంటలను ప్రోత్సహిస్తామని చెప్పారు. అంతేకాదు భూసార పరీక్షా పత్రాల జారీ, పొలం పిలుస్తోంది, ఫార్మర్స్‌ రిజిస్ట్రీ, డ్రోన్‌ వినియోగంపై శిక్షణ వంటి కార్యక్రమాలు అమలు చేస్తున్నట్లు తెలిపారు. అలాగే రాష్ట్రంలో వరదల కారణంగా సంభవించిన పంట నష్టానికి పెట్టుబడి రాయితీని పెంచడంతో పాటుగా నెల రోజుల్లోనే రైతుల బ్యాంక్ అకౌంట్‌లలో డబ్బుల్ని జమ చేశామని చెప్పారు.

ఆంధ్రప్రదేశ్ ప్రభుత్వం అసెంబ్లీలో బడ్జెట్‌ను ప్రవేశ పెట్టింది. మరో నాలుగు నెలలకు సంబంధించి ఈ బడ్జెట్‌ను తీసుకొచ్చింది. సూపర్ సిక్స్ సహా కీలక పథకాలకు ఈ బడ్జెట్‌‌లో కేటాయింపులు జరిగాయి. మహిళలకు సూపర్‌సిక్స్‌ పథకాల అమల్లో భాగంగా.. మరో కీలక హామీకి సంబంధించి ప్రభుత్వం బడ్జెట్‌లో నిధులు కేటాయించింది. రాష్ట్రవ్యాప్తంగా 19 ఏళ్ల నుంచి 59 ఏళ్ల మధ్య ఉన్న ఎస్సీ, ఎస్టీ, బీసీ, మైనారిటీ, ఆర్థికంగా వెనుకబడిన వర్గాలకు చెందిన మహిళలకు ఆడబిడ్డ నిధి కింద నెలకు రూ.1,500 చొప్పున ఆర్థికసాయం అందిస్తామని ప్రకటించిన సంగతి తెలిసిందే.

కూటమి ప్రభుత్వం ఎన్నికల సమయంలో ఇచ్చిన హామీ మేరకు.. ఈ పథకానికి అప్పట్లో ఆడబిడ్డ నిధి/మహిళాశక్తిగా పేరు పెట్టింది. ఇప్పుడు ప్రభుత్వం 2024-25 బడ్జెట్‌లో ‘మహిళలకు ఆర్థిక సహకారం’ పేరుతో ఆయా వర్గాలకు చెందిన వారికి రూ.3,341.82 కోట్లు కేటాయించింది. బీసీ మహిళలకు రూ.1099.78 కోట్లు, ఎస్సీ మహిళలకు రూ.1198.42 కోట్లు, గిరిజన మహిళలకు రూ.330.10 కోట్లు, ఆర్థికంగా వెనుకబడిన వర్గాలకు రూ.629.37 కోట్లు, మైనారిటీలకు రూ.83.79 కోట్లు ప్రతిపాదించింది. జెండర్‌ బడ్జెట్‌లో ఈ నిధుల్ని ప్రత్యేకంగా చూపించింది ప్రభుత్వం.

మరోవైపు ఎన్డీయే ఎన్నికల మ్యానిఫెస్టో ప్రకారం మహిళలకు ఉచిత బస్సు ప్రయాణం హామీపై మంత్రి కొలుసు పార్థసారథి కీలక ప్రకటన చేశారు. ఈ ఆర్థిక సంవత్సరం నుంచే ఈ పథకాన్ని అమలు చేసేందుకు ప్రయత్నిస్తున్నట్లు తెలిపారు. ఈ బడ్జెట్‌లో తల్లికి వందనం పథకానికి రూ.6,487 కోట్లు, అన్నదాత సుఖీభవకు రూ.వెయ్యి కోట్లు కేటాయించిన విషయాన్ని గుర్తు చేశారు. ఈ బడ్జెట్‌లో ప్రాధాన్య క్రమంలో నిధులు కేటాయించినట్లు పేర్కొన్నారు. రాష్ట్ర ప్రభుత్వానికి ఆర్థికంగా అనేక ఇబ్బందులున్నా ఎన్నికల హామీల అమలుకు కృషి చేస్తున్నట్లు చెప్పారు. తమ ప్రభుత్వం ముందు ఎన్నో సవాళ్లున్నాయని.. ఇలాంటి సమయంలో బడ్జెట్‌ ప్రవేశపెట్టామన్నారు.

ఏపీ ఎన్నికల సమయంలో కూటమి పార్టీలు మహిళలకు ప్రతి నెల డబ్బుల్ని అకౌంట్‌లో జమ చేస్తామని సూపర్ సిక్స్‌లో భాగంగా హాామీ ఇచ్చింది. 18 నుంచి 59 సంవత్సరాల్లోపు వయసున్న ప్రతి మహిళకు నెలకు రూ.1500 ఈ పథకం ద్వారా అందిస్తామని చెప్పింది. ఈ పథకానికి మహాశక్షి, ఆడబిడ్డ నిధి పేర్లు ఖరారు చేసింది. త్వరలోనే ఈ పథకానికి విధివిధానాలు ప్రకటించి.. దరఖాస్తుల్ని ఆహ్వానించాలని భావిస్తోంది. అంతేకాదు మహిళలకు ఇచ్చిన మరో హామీ ఉచిత బస్సు ప్రయాణంపై కూడా ప్రభుత్వం కసరత్తు చేస్తోంది. ఇప్పటికే ఈ పథకం అమలు చేస్తున్న పలు రాష్ట్రాల్లో అధికారులు పర్యటించి.. అమలు తీరుపై ఆరా తీశారు. త్వరలోనే విధివిధానలు ఖరారు చేయనున్నారు.

ఆంధ్రప్రదేశ్ ఎన్నికల్లో వైఎస్సార్‌సీపీకి ఘోర పరాజయం ఎదురైంది. ఫలితాల తర్వాత పార్టీకి ముఖ్య నేతలు గుడ్ బై చెబుతున్నారు.. ఈ క్రమంలో అధినేత వైఎస్ జగన్ పార్టీలో అవసరమైన మార్పులు, చేర్పులు చేస్తున్నారు. ఈ మేరకు జిల్లాల వారీగా కొత్తగా అధ్యక్షులు, పార్టీ అనుబంధ విభాగాల్లో పదవులు కేటాయిస్తున్నారు. అలాగే అవసరమైన చోట్ల నియోజవర్గాలకు కొత్త సమన్వయకర్తల్ని నియమిస్తున్నారు. తాజాగా మాజీ స్పీకర్ తమ్మినేని సీతారాంకు వైఎస్సార్‌సీపీ షాకిచ్చింది.

మాజీ స్పీకర్ తమ్మినేని సీతారాం ప్రాతినిధ్యం వహిస్తున్న ఆముదాలవలస నియోజకవర్గానికి కొత్త సమన్వయకర్తను నియమిస్తూ నిర్ణయం తీసుకున్నారు. ఈ మేరకు వైఎస్సార్‌సీపీ అధినేత వైఎస్ జ‌గ‌న్ మోహ‌న్ రెడ్డి పలువురు నేతలకు పార్టీలో కీలక బాధ్యతలు అప్పగించారు. ఈ మేరకు నియామకాలకు సంబంధించి పార్టీ కేంద్ర కార్యాలయం సోమవారం ఆదేశాలు జారీ చేసింది. ఆముదాలవలస అసెంబ్లీ నియోజకవర్గ సమన్వయకర్తగా చింతాడ రవికుమార్‌ను నియమించారు. ఆయన ప్రస్తుతం వైఎస్సార్‌సీపీ ప్రచార విభాగం జోనల్‌ ఇంఛార్జ్‌గా ఉన్నారు.. అలాగే పార్టీ పరిశీలకుడిగా కూడా పనిచేశారు. తాజాగా నియోజకవర్గ సమన్వయకర్తగా నియమించారు.

అలాగే పార్టీ రాష్ట్ర అధికార ప్రతినిధులుగా ఎమ్మెల్యే తాటిపర్తి చంద్రశేఖర్, మాజీ ఎమ్మెల్యే కోరుముట్ల శ్రీనివాసులును నియమించారు. అయితే ఆముదాలవస నియోజకవర్గ బాధ్యతలు కొత్తవారికి అప్పగించడం ఆసక్తికరంగా మారింది.. మాజీ స్పీకర్ తమ్మినేని సీతారాం పరిస్థితి ఏంటి అనేది క్లారిటీ రావాల్సి ఉంది. మొన్నటి వరకు ఆయనే నియోజకవర్గ బాధ్యతల్ని చూస్తున్నారు. అయితే తమ్మనేనికి వైఎస్సార్‌సీపీ శ్రీకాకుళం పార్లమెంటరీ పార్టీ బాధ్యతలు అప్పగించింది.

మరోవైపు వైఎస్సార్‌సీపీ ఎమ్మెల్యేలు, ఎమ్మెల్సీలతో వైఎస్ జగన్ సమావేశం అ్యారు. శాస‌న మండలిలో ఎమ్మెల్సీలు కూటమి ప్రభుత్వాన్ని ఎండగట్టాల‌ని పిలుపునిచ్చారు. అసెంబ్లీలో ప్రశ్నిస్తామన్న భయంతోనే వైఎస్సార్‌సీపీకి ప్రతిపక్ష హోదా ఇవ్వలేదన్నారు. అయినా సరే మీడియా ద్వారా ప్రభుత్వాన్ని ప్రశ్నిస్తామని.. మండలిలో ఎమ్మెల్సీలు ప్రభుత్వ విధానాలపై నిలదీయాలని సూచించారు. మీడియా వేదికగా ఎమ్మెల్యేలు తమ గళాన్ని ప్రజలకు వినిపిస్తారని.. ప్రతిరోజు ఎమ్మెల్యేలు, సీనియర్‌ నాయకులు మీడియా ద్వారా మాట్లాడతారన్నారు. ప్రజాసమస్యలపైనా, ప్రభుత్వ వైఫల్యాలపైనా ప్రశ్నిస్తారని తెలిపారు.

అసెంబ్లీలో ప్రతిపక్ష హోదా కోరుతూ హైకోర్టును ఆశ్రయించామని..కానీ కౌంటర్‌కు స్పీకర్‌ సమాధానం ఇవ్వలేదన్నారు జగన్. కోర్టు నుంచి వచ్చిన సమన్లు కూడా స్పీకర్‌ తీసుకోలేదని.. అసెంబ్లీలో ఉండే ఏకైక ప్రతిపక్షం వైఎస్సార్‌సీపీ మాత్రమే అన్నారు. కూటమి ప్రభుత్వం వైఎస్సార్‌సీపీని ప్రతిపక్ష పార్టీగా గుర్తించడంలేదని.. ప్రతిపక్ష హోదా ఇవ్వడానికి ముందుకు రావడం లేదన్నారు. అలా గుర్తించినప్పుడే ప్రతిపక్ష నేతకు మాట్లాడటానికి అవకాశాలు వస్తాయన్నారు. ప్రతిపక్ష నేతగా సమయం ఇవ్వాల్సి వస్తుందనే ప్రతిపక్ష హోదా ఇవ్వడం లేదన్నారు. 40 శాతం ఓట్‌ షేర్‌ సాధించిన పార్టీని ప్రతిపక్షపార్టీగా గుర్తించకపోవడం దారఉమన్నారు. శాసనమండలిలో వైఎస్సార్‌సీపీ ఎమ్మెల్సీ ప్రభుత్వాన్ని గట్టిగా నిలదీయాలన్నారు. అసెంబ్లీలో ప్రశ్నలు వేసినట్లుగానే.. మండలిలో కూడా అధికార పక్షాన్ని ప్రశ్నించాలన్నారు. పూర్తి వివరాలు, ఆధారాలు, సాక్ష్యాలతో ప్రభుత్వాన్ని నిలదీస్తామని.. ఈ వివరాలన్నింటినీ కూడా ఎమ్మెల్సీలకు పంపిస్తామన్నారు.

వైఎస్సార్‌సీపీ అధినేత వైఎస్ జగన్ ఆస్తుల కేసులో కీలక పరిణామం జరిగింది. జగన్ బెయిల్ రద్దు చేయాలని, ఈ కేసుల విచారణను హైదరాబాద్ నుంచి మరో కోర్టుకు మార్చాలని టీడీపీ ఎమ్మెల్యే రఘురామకృష్ణరాజు దాఖలు చేసిన పిటిషన్‌పై విచారణ జరిగింది. సీజేఐ జస్టిస్‌ సంజీవ్‌ ఖన్నా ధర్మాసనం విచారణ జరిపి పిటిషన్లపై విచారణ బెంచ్‌ను మార్చింది. డిసెంబర్‌ 2న జస్టిస్‌ అభయ్‌ ఎస్‌ ఓకా నేతృత్వంలోని ధర్మాసనం ముందు విచారణకు పంపాలని సుప్రీం కోర్టు రిజిస్ట్రీని ఆదేశించారు.

వాస్తవానికి రఘురామ దాఖలు చేసిన పిటిషన్ సీజేఐ ధర్మాసనం ముందుకు విచారణకు వెళ్లింది. అయితే ధర్మాసనంలో జస్టిస్‌ సంజయ్‌కుమార్‌ సభ్యుడు కాగా.. విచారణ ప్రారంభం కాగానే.. ఈ పిటిషన్లు ఆంధ్రప్రదేశ్‌కు చెందినవి అని జగన్ తరఫు లాయర్ తెలిపారు. తమకు కౌంటర్‌ దాఖలు చేసేందుకు కొంత సమయం కావాలని సీబీఐ తరఫున లాయర్ కోరారు. అయితే జస్టిస్‌ సంజయ్‌ కుమార్‌ ‘నాట్‌ బిఫోర్‌ మీ’ అన్నారు.. దీంతో ఈ పిటిషన్‌లపై విచారణను మరో ధర్మాసనానికి సీజేఐ బదిలీ చేశారు. గతంలో కూడా జస్టిస్ సంజయ్ కుమార్ తన ముందు ప్రస్తావించవద్దని చెప్పారు.. కానీ పొరపాటున ఇవాళ లిస్ట్ చేసినట్లు సీజే తెలిపారు.

ఈ పిటిషన్లపై సుప్రీం కోర్టు ఆగస్టులో విచారణ జరిపింది.. సీబీఐ మే నెలలో దాఖలు చేసిన అఫిడవిట్‌లోని అంశాలను పరిశీలించింది. ఈ కేసులో డిశ్చార్జ్ పిటిషన్లు, క్వాష్ పిటిషన్ల అంశాన్ని కోర్టుకు వివరించింది సీబీఐ. ఈ కారణంగా విచారణ ముందుకు సాగడం లేదని కోర్టు దృష్టికి తీసుకెళ్లారు. అలాగే వీటిపై తీర్పులు ఇవ్వడానికి ముందే జడ్జిలు కూడా మారిపోతున్నారని.. సీబీఐ కోర్టులో తాజా న్యాయమూర్తి రెండేళ్లు కాకుండానే బదిలీ అయ్యారని కోర్టుకు చెప్పారు. ఈ డిశ్చార్జ్ పిటిషన్ల అంశాన్ని రఘురామ తరఫు లాయర్ కూడా ప్రస్తావించారు.. ఆ తర్వాత జరిగిన విచారణ సంగతి తెలిసిందే.

ఇలాంటి కేసుల విచారణలో సుప్రీంకోర్టు ఇచ్చిన మార్గదర్శకాల ప్రకారం ట్రయల్‌ చేపట్టాలని న్యాయమూర్తి సూచించారు. ఇప్పటికే మార్గదర్శకాలు ఉన్నాయని.. వాటిని అనుసరించాల్సిందేనని.. అవే సీబీఐకి కూడా వర్తిస్తాయని చెప్పారు. అయితే తాజాగా జరిగిన విచారణలో.. సుప్రీం కోర్టు జగన్ ఆస్తుల కేసులో రఘురామ దాఖలు చేసిన పిటిషన్‌పై విచారణకు ధర్మాసనాన్ని మార్చింది.

ఎవడి పిచ్చి వాడికి ఆనందం అంటారు. ఇటీవల కుర్రకారు రేస్‌బైక్‌లతో హారన్ల మోత మోగిస్తున్నారు. తమ వాహన సైలెన్సర్లను మార్చి పెద్ద సౌండ్ వచ్చే వాటిని ఉపయోగిస్తు రోడ్లపై రైయ్.. రైయ్ చక్కర్లు కొడుతున్నారు. ఆ శబ్ధం వల్ల ఇతర ప్రయాణికులు తీవ్ర ఇబ్బందులు పడుతున్నారు. అంతేకాదు శబ్ధకాలుష్యం భారీగా పెరిగిపోతుంది. ఈ తరహా అల్లరి మూకలను కట్టడి చేసేందుకు విశాఖ పట్నం పోలీస్ కమీషనర్ కఠిన చర్యలు తీసుకుంటున్నారు. నగరంలో ఎక్కువ శబ్ధం చేసే వాహనాలను గుర్తించి, వాటి సైలెన్సర్లను తొలగించారు. వాటిని విశాఖ బీచ్ రోడ్ లో వరుసగా పేర్చి రోడ్ రోలర్ తో తొక్కించారు. పూర్తి వివరాల్లోకి వెళితే..

విశాఖ నగరంలో అధిక శబ్ధం చేచే సైలెన్సర్లు ఉపయోగిస్తే జరిమానాతో పాటు జైలు శిక్ష పడుతుందని యువతను హెచ్చరించారు. పెద్ద శబ్ధాలు వచ్చే సైలెన్సర్లను వాడటం భారత మోటర్ వాహన చట్టం 1988 ప్రకారం సెక్షన్ 190 (II) కింద నేరంగా పరిగణించబడుతుంది. ఈ నేరానికి మూడు నెలల జైలు శిక్ష లేదా రూ.10 వేల జరిమానా విధించబడుతుంది. అంతేకాదు, డ్రైవింగ్ లైసెన్స్ మూడు నెలల పాటు సస్పెండ్ చేస్తారు. అదే నేరం రెండోసారి చేసినట్లయితే ఆరు నెలల జైలు శిక్ష, రూ.10 వేల జరిమానా విధించడమే కాకుండా వాహనాన్ని కూడా సీజ్ చేస్తారు. మరోసారి డ్రైవింగ్ లైసెన్స్ మూడు నెలల పాటు రద్దు చేస్తారు. కొంతమంది ఆకతాయిలు అధిక శబ్ధాలు చేస్తూ బైకులు నడుపుతూ ఇరిటేట్ చేస్తున్నట్లు నగరవాసులు ఆందోళన వ్యక్తం చేస్తున్నారు. ఈ భారీ శబ్ధాలకు గుండె జబ్బు ఉన్నవారు, చిన్న పిల్లలు, వృద్దులు తీవ్ర ఇబ్బందులు పడుతున్నారని స్థానికులు అంటున్నారు. ఈ క్రమంలోనే నగర పోలీస్ కమిషనర్ కి వరుస ఫిర్యాదులు వచ్చాయి. ఈ నేపథ్యంలో ఆకతాయి బుద్ది చేప్పే పనిలో పడ్డారు పోలీసులు. మొదట సైలెన్సర్లు అమర్చే మెకానిక్ షాపు యజమానులకు వార్నింగ్ ఇచ్చారు. తర్వాత మోడిఫై చేసిన సెలెన్సర్లను గుర్తించి వాటిని నాశనం చేశారు. భవిష్యత్ లో ఇలాంటి శబ్ధాన్ని సృష్టించే సైలెన్సర్లు వాహనాలకు అమర్చితే కఠిన చర్యలు తప్పవని హెచ్చరించారు పోలీసులు.

ఈ కార్యక్రమం విశాఖపట్నం నగర పోలీసు కమీషనర్, అదనపు జిల్లా మెజిస్ట్రేట్ ఆదేశాల మేరకు శాంతి భద్రతలు మరియు ట్రాఫిక్ పోలీసులు సంయుక్తంగా ప్రత్యేక డ్రైవ్ నిర్వహించి 181 సైలెన్సర్లను ధ్వంసం చేశారు. ఇదిలా ఉంటే.. తెలంగాణలో సైతం ఇలాంటి ఆకతాయిల ఆగడాలు పెరిగిపోతున్నాయి. ముఖ్యంగా హైదరాబాద్ నగరంలో ఆకతాయిలు రెచ్చిపోతున్నారు. సైలెన్సర్లు మార్చుకొని బైక్ రేస్ పెట్టుకుంటూ హల్ చల్ చేస్తున్నారు. ఇలాంటి వారిపై కఠిన చర్యలు తీసుకోవాలని హైదరాబాద్ పోలీసులను కోరుతున్నారు నగరవాసులు. ద్విచక్ర వాహనాలకు ఉండే సైలెన్సర్లను బిగించుకొని ఆకతాయిలు రెచ్చిపోతున్నారు. పట్టణంలోని వివిధ ప్రాంతాల్లో పెద్ద పెద్ద సౌండ్స్ చేస్తూ వాహనాలు నడుపుకుంటూ రావడంతో ప్రజలు భయబ్రాంతులకు గురవుతున్నారు. ప్రధాన కూడళ్ల వద్ద అడ్డా వేస్తూ.. ఒక్కసారిగా బైకులను స్టార్ట్ చేసి రైయ్ రైయ్ అంటూ వేగం పెంచుకుంటూ జనాలను హడలగొడుతున్నారు.కొన్నిసార్లు బైక్ సౌండ్స్ తో హార్ట్ ఎటాక్ వచ్చి చనిపోయిన వారు కూడా ఉన్నారు. కొంత మంది యువకులు కొత్త బైక్ మోజులో తిరుగుతుంటే.. మరికొందరు జులాయిగా తిరుగుతూ కావాలని ఇబ్బందులు పెడుతున్నారు. ఇలాంటి వారిపై ఫిర్యాదులు రావడం, వారిని పట్టుకొని కౌన్సిలింగ్ ఇవ్వడం జరుగుతూనే ఉంది. కానీ ఆకతాయిల్లో మాత్రం మార్పు రావడం లేదు. అందుకే విశాఖ పోలీసులు ఇలాంటి ఆకతాయిలపై కఠిన చర్యలు తీసుకుంటున్నారు.

పిచ్చి కామెంట్లు.. రోత రాతలు.. సోషల్ మీడియా వేదికగా పోస్టులు పెడితూ ఇన్నాళ్లు పైశాచికానందం పొందిన వాళ్ల తాటతీస్తున్నారు ఏపీ పోలీసులు. వర్రా రవీందర్ అండ్ కో అరెస్ట్‌తో.. విస్తుపోయే నిజాలు బయటికొస్తున్నాయి. ఇంతకీ ఆ గ్యాంగ్‌ వెనుక కథ స్క్రీన్‌ ప్లే ఎవరిదన్న కోణంలో పోలీసులు కూపీ లాగుతున్నారు.

సోషల్ మీడియాలో అనుచిత పోస్టులపై ఉక్కుపాదం మోపుతున్న ఏపీ పోలీసులు.. అరెస్ట్‌లతో హీటెక్కిస్తున్నారు. అసభ్యకర పోస్టుల కేసులో వైసీపీ కార్యకర్త వర్రా రవీందర్‌ రెడ్డితో పాటు సుబ్బారెడ్డి, ఉదయ్‌లను మార్కాపురం సమీపంలో ఆదివారం మధ్యాహ్నం పోలీసులు అరెస్ట్ చేశారు. విచారణలో కీలక విషయాలు బయటికొచ్చాయన్నారు కర్నూల్ రేంజ్ డీఐజీ కోయా ప్రవీణ్‌. వర్రా రవీంద్ర 2019 నుంచి వైసీపీ సోషల్ మీడియా కార్తకర్తగా పనిచేస్తున్నాడు. 2020లో ఏపీ డీజిటల్ కార్పొరేషన్‌, సోషల్ మీడియా కార్పొరేషన్‌లో పనిచేశాడు. మొత్తం 130మందితో యాక్టివిటీ నడిపేవాడు రవీంద్ర. కొంతమంది నేతల పీఏలు ఇచ్చే కంటెంట్‌తో పోస్టులు పెట్టేవాడు. తమ అధినేతను విమర్శించిన వాళ్లపై అసభ్యకరమైన పోస్టులు పెట్టి పైశాచికానందం పొందేవాడు నర్రా రవీందర్‌. సీఎం చంద్రబాబు, డీప్యూటీ సీఎం పవన్‌, మంత్రులు లోకేష్‌, అనితతో పాటు ఏపీసీసీ చీఫ్ షర్మిలపైనా అసభ్యకర పోస్టులు పెట్టాడు. న్యాయమూర్తుల విషయంలోనూ తమ పైత్యాన్ని చాటారు. నాయకుల ఫోటోలు మార్ఫింగ్ చేసి అడ్డమైన రాతలు రాశారు. సోషల్ మీడియాలో 40హ్యాండిల్స్‌లో జుగుప్సాకరమైన వ్యాఖ్యలు, వీడియోలు పోస్టులు చేసినట్టు నిందితులు విచారణలో అంగీకరించారన్నారు డీఐజీ కోయా ప్రవీణ్‌. కొన్నిసార్లు ఒవేరేవాళ్ల ఐడీలతోనూ కంటెంట్‌ పెట్టినట్టు గుర్తించామన్నారు.

ముగ్గురు నిందితులు ఇచ్చిన వాంగ్మూలం ఆధారంగా మరింత లోతుగా దర్యాప్తు చేపడతామన్నారు పోలీసులు. వీళ్లు పెట్టిన పోస్టులు చదవడానికి కూడా ఇబ్బందిగా ఉన్నాయని.. ఇదే పని అరబ్ దేశాల్లో చేస్తే బహిరంగ శిక్షలు ఉండేవని గుర్తుచేస్తున్నారు. వర్రాపై రాష్ట్రవ్యాప్తంగా 30 కేసులు నమోదయ్యాయి. ఎన్ని సోషల్ మీడియా ప్లాట్‌ఫామ్‌లలో పోస్టులు పెట్టారు..? ఏయే నేతల ఫోటోలు మార్ఫింగ్ చేశారు..? ఈ మొత్తం వ్యవహారం ఎవరి కనుసన్నల్లో జరిగిందన్న కోణంలో పోలీసులు కూపీ లాగుతున్నారు. విచారణలో వెలుగులోకి వచ్చే వివరాల ఆధారంగా మరిన్ని అరెస్ట్‌లు జరుగుతాయన్న ప్రచారం నడుస్తోంది.

కాలేజీలు, యూనివర్సిటీల్లో ర్యాగింగ్‌ను ఆపాలని.. ఎన్నో ఏళ్లుగా ప్రయత్నాలు జరుగుతూనే ఉన్నాయి. ర్యాగింగ్ భూతాన్ని అంతం చేసేందుకు ప్రభుత్వాలు కఠిన చట్టాలు కూడా తీసుకువచ్చాయి. అయినా ఇప్పటికీ కొన్ని సంఘటనలు వెలుగుచూస్తూనే ఉన్నాయి.

ఉన్నత విద్యాసంస్థల్లో ర్యాగింగ్‌ భూతం మళ్లీ పెచ్చుమీరుతోంది. విద్యాసంస్థల్లో యాంటీ ర్యాగింగ్‌ కమిటీలు, రాత్రి నిఘా పెట్టాల్సిన స్క్వాడ్లు నిస్తేజంగా మారాయి. దీంతో విద్యార్థులు వికృత చేష్టలకు అడ్రస్ అవుతున్నారు. జూనియర్‌ విద్యార్థులపై సీనియర్లు దాడులకు తెగబడుతున్నారు.

తాజాగా కాకినాడ రంగరాయ మెడికల్ కాలేజీ హాస్టల్‌లో ర్యాగింగ్ కలకలం చెలరేగింది. పీకలదాకా మద్యం తాగిన హౌస్‌ సర్జన్‌ జగదీశ్… జూనియర్లను ర్యాగింగ్ చేశాడు. కారిడార్‌లోకి తీసుకొచ్చి వికృత చేష్టలకు పాల్పడ్డాడు. అర్ధరాత్రి ఒంటి గంట నుంచి తెల్లవారుజామున 5 గంటల వరకు నరకం చూపించాడు. ఎదురుతిరిగిన ముగ్గురిని కొట్టాడు. దీంతో పలువురు విద్యార్థుల తల్లిదండ్రులు కళాశాల యాజమాన్యానికి ర్యాగింగ్‌పై ఫిర్యాదు చేశారు. యాంటీ ర్యాగింగ్ కమిటీ ద్వారా విచారణ చేపట్టిన కళాశాల యాజమాన్యం.. జగదీశ్‌ని ఏడాదిపాటు సస్పెండ్‌ చేసింది.

కాలేజీల్లో యాజమాన్యాలు యాంటీ ర్యాగింగ్ గ్రూపులు, స్క్వాడ్‌ను ఏర్పాటు చేసినా.. ఈ ర్యాగింగ్ మాత్రం ఆగడం లేదు. ఇదే ఇప్పుడు కొత్తగా కాలేజీలో చేరిన విద్యార్థులను ఆందోళన కలిగిస్తోంది.

అమరావతిలో నేడు (మంగళవారం) కూటమి శాసనసభాపక్ష సమావేశం జరగనుంది. NDA, LP సమావేవంలో అసెంబ్లీ చర్చల్లో భాగస్వామ్యంపై ప్రధానంగా ఫోకస్‌ చేయనున్నారు.

శాసనసభ సమావేశాలరు హాజరు రాకుండా వైసీపీ నేతలు విమర్శలు చేస్తున్న నేపథ్యంలో.. దానికి ఎలాంటి కౌంటర్‌ ఇవ్వాలనేదానికీ కౌంటర్‌ వ్యూహం రెడీ చేసుకుంటున్నారు కూటమి నేతలు. అలాగే.. ఈ సెషన్‌లో ప్రవేశపెట్టబోతున్న కీలక బిల్లులపై చర్చించనున్నట్లు తెలుస్తోంది. ఆమోదంపైనా శాసనసభాపక్ష భేటీలో ఎమ్మెల్యేలకు సీఎం చంద్రబాబు, డిప్యూటీ సీఎం పవన్ కల్యాణ్ దిశా నిర్దేశం చేయనున్నారు.

ఇదిలా ఉంటే ఎమ్మెల్యేలకు శిక్షణ ఇచ్చేందుకు కూడా కసరత్తు చేస్తున్నారు. ఇందుకు సంబంధించి మంగళవారం శిక్షణ కార్యక్రమం ఏర్పాటు చేయనున్నారు. బడ్జెట్, శాసనసభా వ్యవహారాలపై ట్రెయినింగ్‌ ఇవ్వనున్నారు. తొలిసారి 84 మంది ఎమ్మెల్యేలుగా ఎన్నిక కాగా, రెండోసారి ఎన్నికైన 39 మంది ఎమ్మెల్యేలకు శిక్షణ ఇవ్వనున్నారు. అయ్యన్న నేతృత్వంలో అవగాహన తరగతులను నిర్వహించనున్నారు. అసెంబ్లీ సెషన్స్‌, బడ్జెట్‌పై సమగ్ర శిక్షణ అందించనున్నారు.

ఇక అసెంబ్లీ, కౌన్సిల్‌ చీఫ్‌ విప్‌, విప్‌ల నియామకంపై కసరత్తు మొదలు పెట్టింది ప్రభుత్వం. ఇందులో భాగంగా కూటమి ప్రభుత్వం పలువురి పేర్లను పరిశీలిస్తోంది. అసెంబ్లీ చీఫ్‌ విప్‌లుగా దూళిపాళ్ల, జీవీ ఆంజనేయులు, కూన రవి, బెందాళం అశోక్‌ పేర్లను పరిశీలిస్తోంది. విప్‌లుగా జనసేన నుంచి బొమ్మిడి నాయగర్‌, ఆరవ శ్రీధర్‌, బొలిశెట్టి శ్రీనివాస్‌ పేర్లను పరిశీలిస్తున్నారు. మండలి చీఫ్‌ విప్‌ రేసులో పంచిమర్తి అనురాధ, రాంగోపాల్‌రెడ్డి ఉండనున్నట్లు సమాచారం. ఇక అసెంబ్లీ డిప్యూటీ స్పీకర్ కోసం కాల్వ శ్రీనివాసులు పేరును పరిశీలిస్తున్నారు. మంగళవారం ఇందుకు సంబంధించి అధికారిక ప్రకటన వచ్చే అవకాశాలు ఉన్నాయి. మొత్తం మీద ఈరోజు కూటమి ప్రభుత్వ నాయకులు బిజీబిజీగా గడపనున్నారు.