మనలో చాలా మంది ప్రతిరోజూ 7 నుండి 8 గంటలు నిద్రపోయినప్పటికీ, ఉదయం లేచేటప్పుడు చాలా అలసటగా భావిస్తారు.
ఒక “జాంబీ” మాదిరిగా లేచి, కాఫీ లేదా టీ తాగితే తప్ప మనం చురుకుగా ఉండలేము.
దీనికి కారణం, మనం ఎన్ని గంటలు నిద్రిస్తున్నాము అనే దానికంటే, ఎలా నిద్రిస్తున్నాము అనేది ముఖ్యం.
జపనీయులు తమ నిద్ర నాణ్యతను పెంచడానికి అనేక సాంకేతికతలను ఉపయోగిస్తారు. అందుకే, కొన్నిసార్లు వారు తక్కువ నిద్రించినా, మనలో చాలా మంది కంటే ఎక్కువ శక్తితో కనిపిస్తారు. ఆ 5 జపనీస్ రహస్యాలు ఏమిటో చూద్దాం.
1. రాత్రి వేడి నీటి స్నానం (ఒఫురో – Oforo)
జపనీయులు రాత్రి నిద్రించడానికి ఒకటి లేదా రెండు గంటల ముందు, 10 నిమిషాలు గోరువెచ్చని నీటిలో స్నానం చేస్తారు. దీనిని ‘ఒఫురో’ (Oforo) అంటారు. ఇలా చేయడం వలన, మన శరీరం యొక్క కేంద్ర ఉష్ణోగ్రత కొద్దిగా పెరిగి, స్నానం పూర్తయిన తర్వాత 2 నుండి 3 డిగ్రీలు వేగంగా తగ్గుతుంది. శరీరం ఈ విధంగా చల్లబడటం, మెదడుకు నిద్రను ప్రేరేపించే ఒక సంకేతంలా పనిచేసి, మనల్ని వేగంగా గాఢ నిద్రలోకి తీసుకువెళుతుంది. స్నానం చేయలేకపోతే, ‘అషి-యూ‘ (Ashi-yu) అనే పద్ధతిలో, గోరువెచ్చని నీటిలో 10 నిమిషాలు పాదాలను ఉంచడం కూడా ఇదే ప్రయోజనాన్ని ఇస్తుంది.
2. తక్కువ రాత్రి భోజనం (యూషోకు – Yūshoku)
మంచి నిద్రకు మరియు జీర్ణక్రియకు, రాత్రి భోజనం (‘యూషోకు’ – Yūshoku) చాలా తక్కువగా మరియు తేలికగా ఉండాలి. రాత్రి అధికంగా తినడం లేదా వేయించిన, నూనెలో ముంచిన ఆహారాలు తినడం గుండెల్లో మంటను కలిగించి, నిద్రను చెడగొడుతుంది. జపనీయులు “హరా హచి బూ” (Hara Hachi Bu) అనే ఒక భావనను పాటిస్తారు. అంటే, కడుపు నిండుగా తినకుండా, 80% కడుపు నిండగానే తినడం ఆపివేయాలి.
3. చల్లని గది ఉష్ణోగ్రత
వేసవిలో చెమట పట్టి ఇబ్బంది పడటం కంటే, శీతాకాలంలో మనం నిమ్మళంగా నిద్రపోతాము. కారణం, నిద్రకు కొద్దిగా చల్లని గది ఉష్ణోగ్రత ఉత్తమం. జపనీయుల పడకగది ఉష్ణోగ్రత సగటున 13 నుండి 17 డిగ్రీల సెల్సియస్ వరకు ఉంటుంది. నిద్ర శాస్త్రవేత్త మాథ్యూ వాకర్ చెప్పినట్లుగా, మన మెదడు గాఢ నిద్రలోకి వెళ్లడానికి, అది 2-3 డిగ్రీలు చల్లబడాలి. కాబట్టి, ఏసీ లేదా ఫ్యాన్ను ఉపయోగించి గదిని చల్లగా ఉంచుకోవడం అవసరం.
4. సరైన పరుపు
మనం జీవితంలో మూడింట ఒక వంతు నిద్రలోనే గడుపుతాము. చాలా మంది, దూది వంటి మెత్తని పరుపులే నిద్రకు మంచిదని అనుకుంటారు, కానీ అది తప్పు. మన వెన్నెముకకు ఆధారం (సపోర్ట్) అవసరమే తప్ప, మెత్తదనం అవసరం లేదు. మెత్తని పరుపులు వెన్ను మరియు మెడ నొప్పిని కలిగిస్తాయి. జపనీయులు ‘ఫుటాన్‘ అని పిలువబడే సన్నని పరుపును లేదా ‘తడామీ‘ అని పిలువబడే దృఢమైన చాపలనే ఉపయోగిస్తారు. ఇది వెన్నెముకకు మంచి ఆధారాన్ని ఇస్తుంది.
5. చిన్నపాటి నిద్ర
మధ్యాహ్నం 1 గంట నుండి 3 గంటల వరకు మనకు సహజంగానే కొద్దిగా నిద్ర వస్తుంది. ఈ సమయంలో 5 నుండి 20 నిమిషాల వరకు ఒక చిన్నపాటి నిద్ర (నాప్) వేయడం మిమ్మల్ని మళ్లీ ఉత్తేజపరుస్తుంది. జపాన్లో ఈ పద్ధతిని ‘ఇనెమురి‘ (Inemuri) అంటారు. ఇది పని సమయంలో నిద్రపోవడాన్ని సోమరితనంగా చూడకుండా, కష్టపడి పని చేసినందుకు ఒక బహుమతిగా చూస్తుంది. అయితే, ఈ నిద్ర 20 నిమిషాల కంటే ఎక్కువ ఉండకూడదు, అలా ఉంటే అది మీ రాత్రి నిద్రకు భంగం కలిగిస్తుంది.
