మిరియాల సూప్ అనేది దక్షిణ భారతదేశంలో తరతరాలుగా ప్రసిద్ది చెందిన అద్భుత ఔషధాహారం. ఇది కేవలం రుచికరంగానే కాకుండా శరీరాన్ని లోపల నుండి వేడి చేసి, ఇన్ఫెక్షన్లను ఎదుర్కొనే శక్తిని పెంపొందిస్తుంది.
ముఖ్యంగా వర్షాకాలం, శీతాకాలంలో ఈ సూప్ ఆరోగ్య రహస్యంగా మారుతుంది. మిరియాలు, అల్లం, వెల్లుల్లి వంటి సహజ పదార్థాల్లో ఉండే యాంటీ బ్యాక్టీరియల్, యాంటీ వైరల్ గుణాలు శరీర రోగనిరోధక శక్తిని బలపరుస్తాయి.
ఈ మిరియాల సూప్ శరీరాన్ని వేడి చేస్తుంది, గొంతునొప్పి, జలుబు, దగ్గు వంటి సమస్యలతో పోరాడడంలో సహాయపడుతుంది. అల్లం-వెల్లుల్లి జీర్ణక్రియను సులభతరం చేస్తాయి. మిరియాలు శరీరంలోని టాక్సిన్స్ను బయటికి పంపించడంలో సహకరిస్తాయి. అంతే కాకుండా ఈ సూప్ జ్వరం వస్తున్నప్పుడు దాని తీవ్రత తగ్గిస్తుంది. శరీరంలో శ్లేష్మాన్ని కరిగించి.. భోజనం చేయలేని సమయంలో ఆకలి పెంచుతుంది. శరీరంలో రక్త ప్రవాహాన్ని మెరుగుపరుస్తుంది. అందుకే ఇది వైద్యులు కూడా సూచించే ప్రకృతి-ఆరోగ్య పానీయంగా పరిగణించబడుతుంది.
అవసరమైన పదార్థాలు..
మిరియాల సూప్ తయారీకి కావాల్సిన పదార్థాలు ఏవంటే..
- 1 టీస్పూన్ మిరియాలు
- 1 టీస్పూన్ జీలకర్ర
- 4 వెల్లుల్లి రెబ్బలు
- 1 అంగుళం అల్లం ముక్క
- 1 మధ్యస్థ ఉల్లిపాయ
- 1 టమోటా (ఐచ్ఛికం)
- 1 టీస్పూన్ నూనె లేదా నెయ్యి
- 2 కప్పుల నీరు,
- ఉప్పు ( తగినంత )
- కొత్తిమీర ( కొంచెం )
ఈ పదార్థాలు సాధారణంగా ప్రతీ ఇంటిలో దొరికేవే కావడంతో, ఎప్పుడైనా సులభంగా తయారు చేసుకోవచ్చు. అదనంగా కొంతమంది నిమ్మరసం కూడా జోడిస్తారు. ఇది రుచిని పెంచడంతో పాటు విటమిన్-C ని అందిస్తుంది.
మసాలా పేస్ట్..
ముందుగా మిరియాలు, జీలకర్ర, వెల్లుల్లి, అల్లంను కలిపి మెత్తని పేస్ట్గా తయారు చేయాలి. ఈ పేస్ట్ నుంచే సూప్ యొక్క అసలు రుచి మరియు ఔషధ విలువ వస్తాయి. మిరియాలు శరీరంలో వేడి పెంచుతాయి, జీలకర్ర జీర్ణక్రియను మెరుగుపరుస్తుంది, అల్లం-వెల్లుల్లి ఇన్ఫెక్షన్లను అడ్డుకుంటాయి. ఈ మిశ్రమం సూప్కు సహజ యాంటీబయాటిక్లా పనిచేస్తుంది.
సూప్ తయారీ విధానం..
- ఒక పాత్రలో నెయ్యి లేదా నూనె వేడి చేసి, తరిగిన ఉల్లిపాయలను వేయించాలి. అవి బంగారు గోధుమ రంగులోకి మారిన తర్వాత సిద్ధం చేసుకున్న మసాలా పేస్ట్ను వేసి పచ్చి వాసన పోయే వరకు బాగా వేగించాలి.
- తర్వాత, టమోటా వేస్తే సూప్కు తేలికపాటి తీపి-పులుపు రుచి వస్తుంది. ఇవి బాగా మెత్తబడిన తర్వాత 2 కప్పుల నీరు వేసి, తగినంత ఉప్పు కలిపి మధ్యస్థ మంటపై 10-15 నిమిషాలు మరిగించాలి. మిరియాల రుచి నీటిలో కలిసే వరకు ఈ మరిగించడం ముఖ్యము. సూప్ కొంచెం చిక్కబడితే, అది సరిగ్గా సిద్ధమైనట్టు.
- చివరగా కొత్తిమీర చల్లడం ద్వారా సూప్కు అద్భుతమైన సువాసన, తాజాదనం చేరుతుంది. (మాంసాహార ప్రియులు ఈ సూప్లో చిన్న చిన్న చికెన్ ముక్కలు వేసి ‘చికెన్ పెప్పర్ సూప్’గా తయారు చేసుకోవచ్చు. ఇది మరింత ప్రోటీన్ అందించి, అనారోగ్యం సమయంలో శరీరానికి శక్తినిస్తుంది)
గమనిక :
ఈ సూప్ సాంప్రదాయ గృహ నివారణల్లో ఒకటి మాత్రమే. తీవ్రమైన జ్వరం, దగ్గు, శ్వాస సమస్యలు కొనసాగితే తప్పనిసరిగా వైద్యుడిని సంప్రదించాలి.
