ఓవైపు యూజర్ల ప్రైవేసీకి పెద్ద పీట వేస్తూనే, మరోవైపు వారి అవసరాలకు అనుగుణంగా కొంగొత్త ఫీచర్లను తీసుకొస్తోంది ప్రముఖ మెసేజింగ్ యాప్‌ వాట్సాప్‌.
ఈ నేపథ్యంలోనే తాజాగా మరో కొత్త ఫీచర్‌ను తీసుకొచ్చింది.
‘కస్టమ్‌ లిస్ట్’ పేరుతో వాట్సాప్‌ కొత్త ఫీచర్‌ను తీసుకొచ్చింది. ఇంతకీ ఈ ఫీచర్‌ ఉపయోగం ఏంటో ఇప్పుడు తెలుుకుందాం. సాధారణంగా వాట్సాప్‌ ఓపెన్‌ చేయగానే గ్రూప్స్, వ్యక్తిగత ఛాట్స్‌ ఇలా రకరకాల కాంటాక్ట్‌ల నుంచి వచ్చిన మెసేజ్‌లు కనిపిస్తాయి.
దీంతో మీకు కావాల్సిన కాంటాక్ట్‌ను వెతకడం కాస్త ఇబ్బందిగా మారుతుంది. సెర్చ్‌ బాక్స్‌లో పేరు టైప్‌ చేసి చూడాల్సి ఉంటుంది. అయితే ఆ సమస్యు చెక్‌ పెట్టేందుకే వాట్సాప్‌ ఈ ‘కస్టమ్‌ లిస్ట్’ ఫీచర్‌ను తీసుకొచ్చింది.
ఈ కొత్త ఫీచర్‌ సహాయంతో కాంటాక్ట్‌లను ఫిల్టర్ చేయొచ్చు. ఫ్యామిలీ, ఆఫీస్‌, ఫ్రెండ్స్‌.. మీకు నచ్చిన లిస్ట్ క్రియేట్‌ చేసుకోవచ్చు. దీంతో మీ కమ్యూనికేషన్‌ అనుభవం మరింత మెరుగువుతుంది. ఇంతకీ ఈ ఆప్షన్‌ ఎలా ఉపయోగించుకోవాలనేగా.
ఇందుకోసం వాట్సాప్‌ ఓపెన్‌ చేయగానే.. ఆల్‌, అన్‌రీడ్‌, ఫేవరెట్స్‌, గ్రూప్స్ ఇలా ఫిల్టర్లు కనిపిస్తాయి. అయితే దీని పక్కనే ‘+’ ఐకాన్‌ అందుబాటులోకి రానుంది. ఈ ఐకాన్‌ను క్లిక్‌ చేసి మీకు నచ్చినట్లు కాంటాట్స్‌కు ఫిల్టర్ చేసుకోవచ్చు. ఆ తర్వాత ఎడిట్‌ కూడా చేసుకోవచ్చు. త్వరలోనే ఈ ఫీచర్‌ అందరికీ అందుబాటులోకి రానుంది.
