స్థిరమైన రాబడి పొందాలనుకునే వారికి వెంటనే గుర్తుకు వచ్చేది బ్యాంకు ఫిక్స్‌డ్ డిపాజిట్లు (Fixed Deposits). ఇన్వెస్ట్ చేసేందుకు ఎన్ని అవకాశాలు ఉన్నప్పటికీ ఎలాంటి రిస్క్ లేని రాబడిని అందించే మదుపు మార్గం ఫిక్స్‌డ్ డిపాజిట్లు అని చెప్పవచ్చు. ఇటీవలి కాలంలో డిపాజిట్లను పెంచుకునేందుకు బ్యాంకులు సైతం మంచి వడ్డీ రేట్లు ఆఫర్ చేస్తున్నాయి. సాధారణంగా 60 ఏళ్ల వయసు లోపు ఉండే జనరల్ కస్టమర్లకు బ్యాంకులు తక్కువ వడ్డీ రేట్లు ఇస్తూ.. 60 ఏళ్ల వయసు దాటిన సీనియర్ సిటిజన్లకు ఎక్కువ వడ్డీ ఇస్తుంటాయి. దాదాపు అన్ని బ్యాంకుల్లో ఇదే అనుసరిస్తుంటారు. అయితే, సీనియర్ సిటిజన్లకు అందే మాదిరిగా వడ్డీ రేట్లు పొందేందుకు మంచి అవకాశం స్మాల్ ఫైనాన్స్ బ్యాంకులు అని చెప్పవచ్చు. ఎందుకంటే ఎస్‌బీఐ, హెచ్‌డీఎఫ్‌సీ బ్యాంకుల వంటి పెద్ద పెద్ద బ్యాంకులు ఇవ్వని విధంగా జనరల్ కస్టమర్లకే ఈ బ్యాంకులు 9 శాతం వరకు వడ్డీ ఆఫర్ చేస్తుంటాయి.
అలా జనరల్ కస్టమర్లకు 9 శాతం వరకు వడ్డీ ఆఫర్ చేస్తున్న 5 స్మాల్ ఫైనాన్స్ బ్యాంకుల గురించి ఇప్పుడు తెలుసుకుందాం. అందులో అగ్రస్థానంలో ఉంది నార్త్ ఈస్ట్ స్మాల్ ఫైనాన్స్ బ్యాంక్. మూడేళ్ల మెచ్యూరిటీ పీరియడ్ గల డిపాజిట్లపై ఈ బ్యాంక్ జనరల్ కస్టమర్లకు 9 శాతం వడ్డీ ఆఫర్ చేస్తోంది. ఇందులో రూ.5 లక్షలు జమ చేస్తే మెచ్యూరిటీ తర్వత అసలు, వడ్డీ కలిపి మొత్తం రూ. 6,33,300 వరకు అందుతాయి.
సూర్యోదయ ఎస్ఎఫ్‌బీ..
సూర్యోదయ స్మాల్ ఫైనాన్స్ బ్యాంకులో జనరల్ కస్టమర్లకు ప్రస్తుతం 3 ఏళ్ల ఫిక్స్‌డ్ డిపాజిట్లపై గరిష్ఠంగా 8.6 శాతం వడ్డీ అందిస్తోంది. ఇందులో ఒక సాధారణ పౌరుడు రూ.5 లక్షలు జమ చేసినట్లయితే మెచ్యూరిటీ పీరియడ్ ముగిసిన తర్వాత అసలు వడ్డీ కలిసి చేతికి రూ. 6,27,400 వరకు అందుతాయి.
ఉత్కర్ష్ ఎస్ఎఫ్‌బీ..
ఉత్కర్ష్ స్మాల్ ఫైనాన్స్ బ్యాంక్ సాధారణ కస్టమర్లకు 3 ఏళ్ల టర్మ్ డిపాజిట్లపై గరిష్ఠంగా 8.50 శాతం వడ్డీ అందిస్తోంది. ఇందులో రూ.5 లక్షలు గనక జమ చేస్తే మూడేళ్ల తర్వాత చేతికి మొత్తం రూ. 6,25,950 వరకు లభిస్తాయి.
జన స్మాల్ ఫైనాన్స్ బ్యాంక్..
జన స్మాల్ ఫైనాన్స్ బ్యాంక్ మూడు సంవత్సరాల టెన్యూర్ గల ఫిక్స్‌డ్ డిపాజిట్లపై సాధారణ పౌరులకు గరిష్ఠంగా 8.25 శాతం వడ్డీ అందిస్తోంది. ఇందులో గనక రూ.5 లక్షలు డిపాజిట్ చేసినట్లయితే మూడేళ్ల తర్వాత చేతికి రూ. 6,22,200 వరకు లభిస్తాయి.
యూనిటీ ఎస్ఎఫ్‌బీ..
యూనిటీ స్మాల్ ఫైనాన్స్ బ్యాంకులు 60 ఏళ్లలోపు వయసు గల వారికి మూడేళ్ల పాటు చేసే ఎఫ్‌డీలపై గరిష్ఠంగా 8.15 శాతం వడ్డీ ఆఫర్ చేస్తోంది. ఇందులో రూ.5 లక్షలను జమ చేసినట్లయితే మెచ్యూరిటీ తర్వాత చేతికి రూ. 6,20,750 వరకు లభిస్తాయి.
స్మాల్ ఫైనాన్స్ బ్యాంకుల్లో చేసే డిపాజిట్లపైనా రూ.5 లక్షల వరకు డిపాజిట్ ఇన్సూరెన్స్ క్రెడిట్ గ్యారెంటీ కార్పొరేషన్ రక్షణ ఉంటుంది. మీరు బ్యాంకుల్లో డిపాజిట్ చేసినట్లయితే వడ్డీతో కలిపి రూ.5 లక్షల్లోపు మొత్తం ఉండేలా చూసుకోవాలి. డిపాజిట్ పరిది రూ.5 లక్షలలోపు ఉన్నప్పుడే ఏదైనా జరిగి బ్యాంక్ దివాలా తీయడం, ప్రకృతి వైపరీత్యాలతో నష్టపోవాల్సి వచ్చినప్పుడు ఎలాంటి ఇబ్బందులు ఉండవు. రూ.5 లక్షలు దాటిన మొత్తం కోల్పోవాల్సి వస్తుంది.
