నైరుతి రుతుపవనాలు విదర్భ, ఛత్తీస్‌గఢ్, ఒడిశా, వాయువ్య బంగాళాఖాతం, ఉప-హిమాలయన్ పశ్చిమ బెంగాల్, బీహార్‌లోని కొన్ని ప్రాంతాలకు విస్తరించాయి. రుతుపవనాల ఉత్తర పరిమితి ఇప్పుడు 20.5°N/60°E, 20.5°N/63°E, 20.5°N/70°E, అమరావతి, గోండియా, దుర్గ్, రాంపూర్ (కలహండి), 19.5°N/86.5°E, 23°N/89.5°E, మాల్దా, భాగల్పూర్, రక్సాల్ గుండా కొనసాగుతుంది. రానున్న 3-4 రోజులలో నైరుతి రుతుపవనాలు ఉత్తర అరేబియా సముద్రం, గుజరాత్ రాష్ట్రం, మహారాష్ట్ర, మధ్యప్రదేశ్, ఒడిశా, వాయువ్య బంగాళాఖాతం, గంగానది పశ్చిమ బెంగాల్‌లోని కొన్ని ప్రాంతాలు, ఉప-హిమాలయ పశ్చిమ బెంగాల్‌లోని మిగిలిన ప్రాంతాలలో, జార్ఖండ్‌లోని కొన్ని ప్రాంతాలు, బీహార్‌లోని మరికొన్ని ప్రాంతాలు, తూర్పు ఉత్తరప్రదేశ్‌లోని కొన్ని ప్రాంతాలకు మరింత ముందుకు సాగడానికి పరిస్థితులు అనుకూలంగా ఉన్నాయి.

ఈ క్రమంలో కోస్తా ఆంధ్ర ప్రదేశ్, దానిని ఆనుకుని తెలంగాణ మీద ఉన్న నిన్నటి ఉపరితల ఆవర్తనం ఇపుడు సగటు సముద్ర మట్టానికి 5.8 కి.మీ ఎత్తులో ఆవరించి ఉంది.. దీని ప్రభావంతో రాబోవు మూడు రోజులు తేలికపాటి నుంచి మోస్తరు లేదా భారీ వర్షాలు కురిసే అవకాశం ఉందని వాతావరణ శాఖ తెలిపింది. ఉరుములు, మెరుపులతో వర్షాలు కురిసే అవకాశం ఉందని పేర్కొంది.

ఏపీలో రాబోవు మూడు రోజులకు వాతావరణ సూచనలు :-
ఉత్తర కోస్తా ఆంధ్రప్రదేశ్ & యానాం:-
గురువారం: తేలికపాటి నుండి మోస్తరు వర్షము లేదా ఉరుములతో కూడిన జల్లులు కొన్ని చోట్ల కురిసే అవకాశముంది. ఉరుములతో కూడిన మెరుపులు ఒకటి లేదా రెండు చోట్ల సంభవించే అవకాశముంది. ఈదురు గాలులు గంటకు 40 -50 కి మీ వేగంతో వీచే అవకాశం ఉంది.

శుక్రవారం, శనివారం: తేలికపాటి నుండి మోస్తరు వర్షము లేదా ఉరుములతో కూడిన జల్లులు ఒకటి లేదా రెండు చోట్ల కురిసే అవకాశముంది. ఉరుములతో కూడిన మెరుపులు ఒకటి లేదా రెండు చోట్ల సంభవించే అవకాశముంది. ఈదురు గాలులు గంటకు 40 -50 కిమీ వేగంతో వీచే అవకాశం ఉంది.

దక్షిణ కోస్తా ఆంధ్రప్రదేశ్:
గురువారం: తేలికపాటి నుండి మోస్తరు వర్షము లేదా ఉరుములతో కూడిన జల్లులు కొన్నిచోట్ల కురిసే అవకాశముంది. ఉరుములతో కూడిన మెరుపులు ఒకటి లేదా రెండు చోట్ల సంభవించే అవకాశముంది. ఈదురు గాలులు గంటకు 40 -50 కి మీ వేగంతో వీచే అవకాశం ఉంది.

శుక్రవారం, శనివారం: తేలికపాటి నుంచి మోస్తరు వర్షము లేదా ఉరుములతో కూడిన జల్లులు ఒకటి లేదా రెండు చోట్ల కురిసే అవకాశముంది. ఉరుములతో కూడిన మెరుపులు ఒకటి లేదా రెండు చోట్ల సంభవించే అవకాశముంది. ఈదురు గాలులు గంటకు 40 -50 కి మీ వేగంతో వీచే అవకాశం ఉంది.

రాయలసీమ :-
గురువారం, శుక్రవారం, శనివారం: తేలికపాటి నుండి మోస్తరు వర్షము లేదా ఉరుములతో కూడిన జల్లులు ఒకటి లేదా రెండు చోట్ల కురిసే అవకాశముంది. ఉరుములతో కూడిన మెరుపులు ఒకటి లేదా రెండు చోట్ల సంభవించే అవకాశముంది. ఈదురు గాలులు గంటకు 40 -50 కిమీ వేగంతో వీచే అవకాశం ఉంది.

మద్యం కుంభకోణంలో కీలక పాత్రధారిగా అభియోగాలు ఎదుర్కొంటున్న ఆంధ్రప్రదేశ్‌ స్టేట్‌ బెవరేజెస్‌ కార్పొరేషన్‌ లిమిటెడ్‌ (ఏపీఎస్‌బీసీఎల్‌) మాజీ ఎండీ, ఐఆర్‌టీఎస్‌ అధికారి డి.వాసుదేవరెడ్డి నివాసంలో సీఐడీ సోదాలు నిర్వహించిన సంగతి తెలిసిందే.

మాజీ ముఖ్యమంత్రి జగన్‌, వైసీపీ ముఖ్యనాయకులు సూత్రధారులుగా ఈ కుంభకోణం జరిగిందని, వాసుదేవరెడ్డిని అరెస్ట్ చేస్తే అన్ని విషయాలు బయటకు వస్తాయని తెలుగుదేశం పార్టీ నేతలు ఆరోపిస్తున్నారు. ఈ నెల 7వ తేదీన హైదరాబాద్‌ నానక్‌రాంగూడలోని ఆయన విల్లాలో సీఐడీ ఐదురోజులపాటు సోదాలు నిర్వహించింది. వీటిల్లో కీలకమైన ఆధారాలు లభ్యమైనట్లు తెలుస్తోంది.

తనిఖీలతో వైసీపీ నేతల్లో ఆందోళన

ఐదు సంవత్సరాల పరిపాలనా కాలంలో జగన్ సర్కారు తీసుకున్న నిర్ణయాల్లో అతి ముఖ్యమైంది మద్యం పాలసీ. ప్రభుత్వమే నేరుగా మద్యం దుకాణాలను నిర్వహించడంతోపాటు దాని తయారీ, సరఫరా, అమ్మకాలతో సహా అన్నీ ప్రభుత్వమే చేపట్టింది. ఈ విధానం వల్ల వైసీపీ నేతలకు భారీగా ప్రయోజనం చేకూరినట్లు ఆరోపణలు వచ్చాయి. చంద్రబాబు ప్రభుత్వం బాధ్యతలు తీసుకున్న వెంటనే ఏపీ బేవరేజెస్ చైర్మన్ వాసుదేవ రెడ్డి ఇంట్లో తనిఖీలు జరగడంతో వైసీపీ నేతల్లో

ఆందోళన ప్రారంభమైంది. ప్రస్తుతం వాసుదేవరెడ్డి అప్రూవర్‌గా మారినట్లు సమాచారం.

పెద్దల ఆదేశాల మేరకే

మాజీ సీఎం జగన్ తోపాటు ఇతర ప్రభుత్వ పెద్దల ఆదేశాల మేరకే మద్యం పాలసీని వారికి అనుకూలంగా తయారు చేశామని ఆయన కూడా ఒప్పుకున్నట్లు తెలుస్తోంది. కొన్ని కీలక పత్రాలను వాసుదేవరెడ్డి తన కార్యాలయం నుంచి చోరీ చేస్తుంటే చూశానని శివకృష్ణ అనే వ్యక్తి ఫిర్యాదు చేయడంతో కేసు నమోదైంది. ఇప్పటికే ఈ కేసుకు సంబంధించి ప్రాథమిక నివేదిక కూడా సిద్ధమైంది. రాష్ట్రంలో అధికార మార్పిడి జరుగుతున్న తరుణంలో ఈ కుంభకోణానికి సంబంధించిన కీలక ఆధారాలు, పత్రాలు, హార్డ్‌డిస్క్‌లను వాసుదేవరెడ్డి మాయం చేశారని సీఐడీ గుర్తించింది.

ఏపీలో కొత్త ప్రభుత్వ పాలన మొదలైంది. మంత్రులు బాధ్యతలు స్వీకరించారు. రేపు(శుక్రవారం) కొత్త అసెంబ్లీ కొలువు తీరనుంది. అధికార ప్రక్షాళన మొదలైంది.

నూతన డీజీపీగా ద్వారకా తిరుమల రావు నియమితులయ్యారు. పలువురు ఐఏఎస్ లను బదిలీ చేసారు. ఇక..ప్రభుత్వంలో సలహాదారుల నియామకం పైన కసరత్తు కొనసాగుతోంది. సీనియర్ ఐపీఎస్ ఏబీ వేంకటేశ్వరరావుతో సహా పలువురు సలహాదారుల జాబితాలో ఉన్నారు.

చంద్రబాబు కసరత్తు

ఏపీ ప్రభుత్వం కొత్త సలహాదారుల నియామకంపై కసరత్తు మొదలు పెట్టింది. పాలనా అనుభవంతో పాటుగా నమ్మకస్తులుగా ఉన్న రిటైర్డ్ ఐఏఎస్, ఐపీఎస్ అధికారుల వైపు ప్రభుత్వం ముగ్గు చూపుతుంది. పాలనాపరంగా కీలక నిర్ణయాలు తీసుకుంటున్న చంద్రబాబు సలహాదారుల నియామకం పైన పలువురు పేర్లు పరిశీలిస్తున్నట్లు సమాచారం. గతంలో ఆర్థిక -ప్రణాళిక విభాగంలో పనిచేసిన సీనియర్ అధికారి టక్కర్, అవినీతి నిరోధక శాఖలో పట్టున్న ఆర్పీ ఠాకూర్, చంద్రబాబు హయాంలో నిఘా చీఫ్ గా పనిచేసిన ఏబీ వెంకటేశ్వర రావులను సలహాదారులుగా నియమించే అవకాశాలు కనిపిస్తున్నాయి.

సలహాదారులుగా

ఏపీ వెంకటేశ్వరరావు క్యాట్ ఆదేశించినా.. గత ప్రభుత్వం పోస్టింగ్ ఇవ్వకుండా నిలిపివేసింది. చివరి రోజున పోస్టింగ్ ఇవ్వగా ఆయన అదే రోజున పదవీ విరమణ చేసారు. అదేవిధంగా వైసీపీ పాలనలో అనేక ఇబ్బందులు ఎదుర్కొన్న అధికారులకు ప్రస్తుత ప్రభుత్వంలో కీలక బాధ్యతలు అప్పజెప్పే అవకాశం కనిపిస్తోంది. గతంలో ఇన్వెస్ట్మెంట్ బోర్డ్ చైర్మన్ గా పదవీ విరమణ చేసిన జాస్తి కృష్ణ కిషోర్ ను కూడా ప్రభుత్వ సలహాదారుడిగా నియమించుకునే అవకాశం ఉన్నట్లు తెలుస్తోంది.

అవకాశం దక్కేదెవరికి

ప్రభుత్వ ఏజే శ్రీరామ్ స్థానంలో దమ్మాలపాటి శ్రీనివాస్ ను ప్రభుత్వం నియమించింది. తాజాగా..జలవనరుల శాఖ సలహాదారుడగా వెంకటేశ్వరరావును ప్రభుత్వం ఖరారు చేసింది. అదనపు అడ్వకేట్ జనరల్ పబ్లిక్ ప్రాసిక్యూటర్లు పేర్లను కూడా ప్రభుత్వం పరిశీలిస్తుంది. నామినేటెడ్ పదవులు కంటే ముందుగానే పాలనాపరంగా సలహాదారుల నియామక పూర్తి చేయాలని చంద్రబాబు ఆలోచన చేస్తున్నట్లు సమాచారం. దీంతో..ఒకటి రెండు రోజుల్లోనే ప్రభుత్వం కీలక శాఖలకు సలహాదారుల నియామకం పైన అధికారికంగా ఉత్తర్వులు జారీ అయ్యే అవకాశం కనిపిస్తోంది.

తాను ఇక జనంలోనే ఉండేలా ప్రయత్నిస్తానని వైసీపీ అధినేత జగన్ నేతలతో చెప్పారు. కిందిస్థాయి కార్యకర్తలు ఇబ్బంది పెడితే ఎవరూ చూస్తూ ఊరుకోవద్దని, న్యాయపోరాటం చేసి క్యాడర్‌ను రక్షించుకుందామని ఆయన సమావేశంలో పిలుపునిచ్చారు. ప్రజలు ఇచ్చిన తీర్పు ను గౌరవిస్తూనే తిరిగి పుంజుకునేందుకు ప్రయత్నిద్దామని జగన్ వ్యాఖ్యానించారు.

వైసీపీ నేతల విసృత స్థాయి భేటీలో పార్టీ అధినేత జగన్ కీలక నిర్ణయం తీసుకున్నట్లు తెలుస్తోంది. రాష్ట్రవ్యాప్తంగా రాజకీయ దాడుల్లో గాయపడిన వారిని ఆయన పరామర్శించనున్నట్లు సమాచారం. అలానే.. వైసీపీ ఓటమి బాధతో చనిపోయినవారి కుటుంబాలనూ పరామర్శించి.. ధైర్యం చెప్పనున్నట్లు పార్టీ వర్గాల ద్వారా తెలిసింది. డిసెంబర్‌ లేదా జనవరి నుంచి జగన్‌ ఓదార్పు ఉండే అవకాశం సమాచారం.

ఘోర పరాజయం నుంచి ఇప్పుడిప్పుడే కోలుకుంటున్న వైసీపీ… భవిష్యత్ కార్యాచరణపై ఫోకస్ పెడుతోంది. ఇప్పటివరకు తన ఆఫీసుకు వచ్చిన నేతలతో ఓటమిపై విశ్లేషణ చేసిన జగన్.. తాజాగా ఇటీవలి ఎన్నికల్లో గెలుపొందిన ఎమ్మెల్యేలు, పోటీచేసిన అభ్యర్థులతో కీలక సమావేశం నిర్వహించారు. శుక్రవారం నుంచి అసెంబ్లీ సమావేశాలు ఉండటంతో.. ఆయా అంశాలపై చర్చించారు. అసెంబ్లీ సెషన్స్‌లో ఎలా వ్యవహరించాలి, ప్రజా సమస్యలపై ఎలా పోరాడాలనే దానిపై వైసీపీ నేతలకు జగన్ దిశానిర్దేశం చేశారు.

కాగా వైసీపీ విస్తృతస్థాయి సమావేశానికి పలువురు నేతలు హాజరకాలేకపోయారు. బెంగళూరు-విజయవాడ విమానం రద్దుతో హాజరుకాలేకపోతున్నట్లు పలువురు నేతలు పార్టీ ఆఫీస్‌కు సమాచారం ఇచ్చారు. ఉషశ్రీచరణ్, తోపుదుర్తి ప్రకాష్‌రెడ్డి, మెట్టు గోవిందరెడ్డి, వెంకటేగౌడ్, చెవిరెడ్డి భాస్కరెడ్డి, మోహిత్‌రెడ్డి, బుర్రా మధుసూదన్, విక్రమ్, హిందూపురం ఎమ్మెల్యే అభ్యర్థిగా పోటీ చేసిన దీపిక, ఎంపీ అభ్యర్దిగా పోటీ చేసిన రెడ్డప్ప వంటి నేతలు మీటింగ్‌కు హాజరకాలేకపోయారు.

తిరుమలలో మార్పులకు శ్రీకారం చుట్టారు టీటీడీ ఈవో జే శ్యామలరావు. బాధ్యతలు స్వీకరించిన రోజు నుంచి వరుసగా సమీక్షలు నిర్వహిస్తున్నారు.. ప్రధానంగా భక్తులకు అందుతున్న సేవలపై ఫోకస్ పెట్టారు. తాజాగా భక్తుల అన్నప్రసాదాలపై సమీక్ష నిర్వహించారు.

తిరుమల శ్రీవారి దర్శనార్థం విచ్చేసే భక్తులకు మరింత నాణ్యమైన, రుచికరమైన అన్నప్రసాదాలు అందించాలని టీటీడీ ఈవో శ్రీ జె శ్యామల రావు అధికారులను ఆదేశించారు. టీటీడీ అన్నప్రసాద విభాగం కార్యకలాపాలను బుధవారం ఈవో రివ్యూ చేశారు. టీటీడీలోని ప్రతి విభాగం పని తీరుపై తెలుసుకోవడంలో భాగంగా తిరుమలలోని గోకులం విశ్రాంతి భవనంలోని సమావేశ మందిరంలో జేఈవోలు శ్రీమతి గౌతమి, శ్రీ వీరబ్రహ్మంలతో కలిసి అన్నప్రసాద విభాగాన్ని సంబంధిత అధికారులతో కలసి ఈవో సుదీర్ఘంగా సమీక్షించారు.

తిరుమలలో మాతృశ్రీ తరిగొండ వెంగమాంబ అన్నప్రసాదం కాంప్లెక్స్‌(ఎంటీవీఏసీ), విక్యూసీలోని అక్షయ కిచెన్‌, పీఏసీ 2తో పాటు, ఉద్యోగుల క్యాంటీన్‌, పద్మావతి అతిథి గృహం సహా తిరుమలలో అన్నప్రసాదాలు తయారు చేసే ప్రదేశాలను ఆయన సమీక్షించారు. పెండింగ్‌లో ఉన్న పనులను త్వరగా పూర్తి చేసి, తాత్కాలికంగా నిలిపివేసిన పాంచజన్యం వంటశాలను త్వరగా ప్రారంభించేలా చూడాలని అన్నప్రసాదం, ఇంజినీరింగ్ శాఖ అధికారులను ఆదేశించారు.

తిరుమల, తిరుపతిలతో కలిపి రోజుకు సగటున 1.92 లక్షల మంది అన్నప్రసాదం స్వీకరిస్తున్నారు. వీరిలో తిరుమలలో అన్నం తినేవారి సంఖ్య దాదాపు 1.75లక్షలు కాగా, తిరుపతిలో 17వేలు మందిగా ఉంది. వారాంతాల్లో తిరుమలలో 1.95 లక్షలు, తిరుపతిలో 19 వేలతో కలిపి సుమారు 2.14 లక్షల మందికి అన్నప్రసాదం స్వీకరిస్తున్నారు. కాగా ఒక రోజున అన్నప్రసాదం కోసం అవుతున్న ఖర్చు దాదాపు రూ.38 లక్షలుగా ఉంది.

కాగా భక్తులకు అందజేస్తున్న మజ్జిగలో నాణ్యత పెంచాలని, వంట చేసే స్థలంలో ఆవరణను పరిశుభ్రంగా, పొడిగా ఉంచాలని అధికారులకు ఈఓ సూచించారు. ఆహార పదార్థాలను ఎప్పటికప్పుడు తనిఖీ చేయాలని ఫుడ్ క్వాలిటీ ఇన్‌స్పెక్టర్‌ను ఆదేశించారు.

తిరుమల, తిరుపతిలలో పెరుగుతున్న భక్తుల సంఖ్యకు అనుగుణంగా సిబ్బందిని పెంచడం, పెరుగుతున్న డిమాండ్‌కు అనుగుణంగా దశాబ్దాల నాటి యంత్రాల స్థానంలో కొత్త వాటిని ఏర్పాటు చేయడం, అన్నప్రసాదం నాణ్యతను పెంచేందుకు ఫుడ్‌ కన్సల్టెంట్‌ను నియమించడం వంటి అంశాలకు సంబంధించి వీలైనంత త్వరగా అమలు చేసేందుకు పక్కా కార్యాచరణ ప్రణాళికతో ముందుకు రావాలని సంబంధిత అధికారులను ఈఓ ఆదేశించారు.

అమరావతి: మంత్రి నారా లోకేశ్‌ (Nara Lokesh) నిర్వహిస్తున్న ప్రజా దర్బార్‌కు విశేష స్పందన లభిస్తోంది. ఉండవల్లిలోని నివాసంలో బుధవారం నిర్వహించిన ఈ కార్యక్రమానికి మంగళగిరి నియోజకవర్గంతో పాటు ఇతర ప్రాంతాల నుంచి ప్రజలు తరలివచ్చి సమస్యలను విన్నవించుకున్నారు.

లోకేశ్‌ ఓపికగా వారి వినతులు స్వీకరించారు. మంత్రిని కలిశాక తమ సమస్యను వెంటనే పరిష్కరించారని విశాఖ నగరానికి చెందిన మహిళ తెలిపారు.

విశాఖకు చెందిన అభ్యుదయ గ్రామీణ డ్వాక్రా రాష్ట్ర కమిటీ అధ్యక్షురాలు దేవకీదేవి ఎగ్జిబిషన్ గడువు రెన్యూవల్ కోసం గత కొన్ని రోజులుగా ఉన్నతాధికారుల చుట్టూ తిరిగారు. తాము తయారు చేసుకున్న చేతివృత్తుల ఉత్పత్తుల అమ్మకం కోసం అధికారులను గడువు కోరినా ఫలితం దక్కలేదని ఆవేదన వ్యక్తంచేశారు. బుధవారం మంత్రి లోకేశ్‌ను కలిశాక గంటలో సమస్య తీరిపోయిందంటూ దేవకీదేవి భావోద్వేగానికి గురై కన్నీటిపర్యంతమయ్యారు. పారా మెడికల్, ఆర్ఎంపీ, కేజీబీవీ సంఘాల సమస్యలను విని వాటి పరిష్కారానికి లోకేశ్‌ హామీ ఇచ్చారు. మిగతా జిల్లాల్లోని నేతలు ప్రజాదర్బార్‌ నిర్వహిస్తే దూర ప్రాంతాల నుంచి అమరావతికి వచ్చే సమస్య ఉండదని ప్రజలు అభిప్రాయపడ్డారు.

ఏపీలో కూటమి ప్రభుత్వం ఏర్పాటు కావడంతో కేంద్రంలో ఉన్న ఎన్డీయే సర్కార్ కూడా అన్ని విధాలా సహకరించేందుకు సిద్దమవుతోంది. గతంలో వైసీపీ ప్రభుత్వ హయాంలో విశాఖలో స్టీల్ ప్లాంట్ (రాష్ట్రీయ ఇస్పాత్ నిగమ్ లిమిటెడ్ ) ను వ్యూహాత్మక పెట్టుబడుల ఉపసంహరణ పథకంలో భాగంగా ప్రైవేటీకరించేందుకు దూకుడుగా అడుగులు వేసిన కేంద్రం..

ఇప్పుడు రాష్ట్రంలో తమ ప్రభుత్వమే అధికారంలో ఉండటంతో ఆచితూచి స్పందిస్తోంది. ఇదే క్రమంలో కేంద్రమంత్రి కిషన్ రెడ్డి కీలక ప్రకటన చేశారు.

వైజాగ్ స్టీల్ ప్లాంట్ ప్రైవేటీకరణ ఇప్పట్లో లేదని కేంద్ర బొగ్గు శాఖ మంత్రి కిషన్ రెడ్డి ప్రకటించారు. వైజాగ్ స్టీల్ ప్లాంట్ డాక్యుమెంట్లు ప్రస్తుతానికి పెండింగ్ లో ఉన్నాయని, దీనిపై ప్రస్తుతం ఎలాంటి కదలిక లేదని ఆయన వెల్లడించారు. బొగ్గు శాఖ మంత్రిగా బాధ్యతలు చేపట్టిన ఆయన.. ఈ సందర్భంగా వైజాగ్ స్టీల్ ప్లాంట్ పై అడిగిన ప్రశ్నకు స్పందిస్తూ ఈ విషయం తెలిపారు. వైజాగ్ స్టీల్ ప్లాంట్ ప్రైవేటీకరణపై ఏపీ ప్రజలు ఆందోళన చెందాల్సిన అవసరం లేదన్నారు.

అలాగే వైజాగ్ స్టీల్ ప్లాంట్ ప్రైవేటీకరణ చేయాలని కేంద్రం ఆలోచన చేస్తున్నా దాన్ని కొనే స్దాయిలో సంస్థలు లేవని కిషన్ రెడ్డి వెల్లడించారు. దీంతో విశాఖ ఉక్కు కర్మాగారం యథావిథిగా నిర్వహణకు కేంద్రం సాయం చేయబోతోందని కూడా ఆయన తెలిపారు. తద్వారా ఈ ప్రతిష్టాత్మక కర్మాగారం నిలబెట్టేందుకు తాము ప్రయత్నిస్తామని చెప్పకనే చెప్పారు. వైజాగ్ స్టీల్ ప్లాంట్ కు మైన్స్ కేటాయింపు డిమాండ్ ఎప్పటి నుంచో ఉందని, ఉక్కు శాఖతో మాట్లాడి త్వరలో దీనిపై ఓ నిర్ణయం తీసుకుంటామని కిషన్ రెడ్డి వెల్లడించారు. అసలు వైజాగ్ స్టీల్ ప్లాంట్ కూడా వేలంలో పాల్గొని గనులు దక్కించుకోవచ్చని సలహా ఇచ్చారు.

ఆంధ్రప్రదేశ్‌ ప్రభుత్వం జులై ఒకటి నాటికి రూ.10వేల కోట్లు సమీకరించాలనే ప్రయత్నాల్లో ఉంది. ఎన్నికల్లో హామీ ఇచ్చినట్లుగా ఏప్రిల్‌ నుంచి పెంచిన వృద్ధాప్య పింఛన్లు, జులై నెల పింఛను, దివ్యాంగులకు పెంచిన పింఛన్లు కలిపి జులై ఒకటిన ఇవ్వాల్సి ఉంటుంది.

అన్ని రకాల పింఛన్లకు కలిపి రూ.4,408 కోట్లు
జీతాలు, విశ్రాంత ఉద్యోగుల పింఛన్లకు రూ.5,500 కోట్లు
సమీకరణ ప్రయత్నాల్లో అధికారులు

 
అమరావతి: ఆంధ్రప్రదేశ్‌ ప్రభుత్వం జులై ఒకటి నాటికి రూ.10వేల కోట్లు సమీకరించాలనే ప్రయత్నాల్లో ఉంది. ఎన్నికల్లో హామీ ఇచ్చినట్లుగా ఏప్రిల్‌ నుంచి పెంచిన వృద్ధాప్య పింఛన్లు, జులై నెల పింఛను, దివ్యాంగులకు పెంచిన పింఛన్లు కలిపి జులై ఒకటిన ఇవ్వాల్సి ఉంటుంది. ఏప్రిల్, మే, జూన్‌ నెలలకు సంబంధించి వృద్ధులకు పెంచిన పింఛను నెలకు రూ.1,000 చొప్పున బకాయిలనూ జులై 1న నేరుగా అందిస్తామని ప్రభుత్వం హామీ ఇచ్చింది. ఇవన్నీ కలిపి ఈ జులై నెలకు రూ.4,408.31 కోట్లు అవసరమవుతాయి. మరోవైపు ప్రభుత్వ ఉద్యోగులు సైతం ఒకటో తేదీన జీతం అందుతుందేమో అన్న ఆశతో ఎదురుచూస్తున్నారు. ప్రభుత్వ పింఛనుదారులదీ ఇదే ఆకాంక్ష. ఈ లక్ష్యం చేరాలనే ఉద్దేశంతోనే ప్రభుత్వం ఏర్పాట్లు చేస్తోందని విశ్వసనీయ వర్గాలు పేర్కొన్నాయి. జులై ఒకటి నాటికి అన్నీ కలిపి ఎంత లేదన్నా రూ.10వేల కోట్లు అవసరమవుతాయి. అందుకు తగ్గట్టుగానే జూన్‌లో ప్రస్తుతం ఆర్థిక నిర్వహణ సాగుతోంది. ఇంతకాలం బిల్లుల చెల్లింపుల అధికారం ఆర్థికశాఖ ప్రత్యేక కార్యదర్శి కె.వి.వి.సత్యనారాయణ వద్ద ఉండేది. జగన్‌ ప్రభుత్వ హయాంలో ఆయన ఇష్టారాజ్యంగా బిల్లులు చెల్లించడం వివాదాస్పదమయింది. ప్రస్తుతం ఆయన డిప్యుటేషన్‌ కాలం పూర్తయింది. రైల్వేశాఖ ఆయనను తమ సొంత శాఖకు వచ్చి రిపోర్టు చేయాలని ఉత్తర్వులిచ్చింది. అయినా రాష్ట్రప్రభుత్వం కేంద్రంతో సంప్రదించి ఆయన బదిలీని తాత్కాలికంగా ఆపించింది. ఆయన వద్ద ఉన్న బిల్లుల చెల్లింపు వ్యవహారాలన్నీ మరో ఉన్నతాధికారి సౌరభ్‌గౌర్‌ పర్యవేక్షిస్తున్నారు. ప్రస్తుతం ఆర్థికశాఖ ప్రత్యేక ప్రధాన కార్యదర్శి ఎస్‌ఎస్‌ రావత్‌ సెలవులో ఉన్నారు. ఆర్థికశాఖలో కీలకాధికారులు సెలవులో ఉన్నారనే కారణంతో సత్యనారాయణను మరిన్ని రోజులు రాష్ట్రంలో ఉంచే ఏర్పాట్లు చేసినా.. జగన్‌ హయాంలో జరిగిన ఆర్థిక అవకతవకలను వెలికితీయాలనే ఆయనను ఇక్కడ ఉంచారని విశ్వసనీయ వర్గాల కథనం.

జగన్‌ ప్రభుత్వం ఓట్ల లెక్కింపు రోజు కూడా బహిరంగ మార్కెట్‌ నుంచి రూ.4,000 కోట్ల రుణం తీసుకుంది. దీంతో కలిపి ఏప్రిల్, మే, జూన్‌ 4 వరకు రూ.25 వేల కోట్ల రుణం తీసుకున్నట్లయింది. ఏడాది మొత్తం వినియోగించాల్సిన రుణ వెసులుబాటును ఇష్టారాజ్యంగా వినియోగించి తమ అనుయాయుల అవసరాలు తీర్చుకునేందుకు ప్రయత్నించింది. తెదేపా కూటమి ప్రభుత్వం ఏర్పాటయ్యాక.. జూన్‌ 11న రుణం తీసుకురావడానికి పాత అధికారులు ప్రయత్నించారు. కానీ జులై నెల అవసరాలను దృష్టిలో ఉంచుకుని జూన్‌ 11న ప్రభుత్వం రుణ ప్రయత్నాలను విరమించుకుంది. వచ్చే వారం రుణసమీకరణ చేసి ఆ నిధులను జీతాలు, సామాజిక పింఛన్లు, ఉద్యోగుల పింఛన్లకు వినియోగించాలనే ప్రణాళికతో ఉన్నట్లు సమాచారం.

ఆరు నెలలకు రూ.47 వేల కోట్లకే అనుమతి
కేంద్రం ప్రతి ఆర్థిక సంవత్సరంలోనూ తొలి తొమ్మిది నెలలకు రుణ పరిమితిని నిర్ణయిస్తుంది. ప్రస్తుత ఆర్థిక సంవత్సరంలో తొలి ఆరు నెలలకు రూ.47వేల కోట్ల బహిరంగ మార్కెట్‌ రుణం తీసుకునేందుకు అనుమతులు ఇచ్చింది. అందులో జగన్‌ ప్రభుత్వం రూ.25వేల కోట్లు సమీకరించింది. సెప్టెంబరు వరకు మరో రూ.22వేల కోట్ల బహిరంగ మార్కెట్‌ రుణం తీసుకునే అవకాశం ఉంది. రాబోయే పది రోజుల రాబడులు, కొంత రుణం, వేస్‌ అండ్‌ మీన్స్‌ అడ్వాన్సులను కలిపి జులై 1 నాటి అవసరాలు తీరేలా ఏర్పాట్లు చేస్తున్నారని సమాచారం. ఉద్యోగులకూ జులై 1న జీతాలిచ్చేందుకు ప్రయత్నాలు జరుగుతున్నాయి.

Journalist Rajinikanth : టీవీ9 మేనేజింగ్ ఎడిటర్ రజనీకాంత్ సంపాదన అందనంత రేంజ్ లో ఉందా? ఆయన ఆదాయానికి, సమకూర్చిన ఆస్తులకు, చెల్లిస్తున్న ఆదాయపు పన్నుకు పొంతన లేదా?

అందువల్లే రజనీకాంత్ ఐటీ అధికారులకు చిక్కాడా? ఈ ప్రశ్నలన్నింటికీ అవును అనే సమాధానం వస్తోంది. అదనపు ఆదాయం, సంపాదించిన ఆస్తులపై వివరాలు ఇవ్వాలని రజనీకాంత్ కు ఆదాయపు పన్ను శాఖ తాఖీదులు పంపించినట్లు ప్రచారం జరుగుతోంది.. టీవీ9 లో చర్చలు పెట్టకుండా, సెలవుపై వెళ్లాలని యాజమాన్యం ఆదేశించిన తర్వాత, ఈ వ్యవహారం మీడియా సర్కిళ్లల్లో వెలుగులోకి రావడం సంచలనం సృష్టిస్తోంది.

టీవీ9 ఛానల్ ను ఏర్పాటు చేసింది రవి ప్రకాష్ అయినప్పటికీ.. కొత్త యాజమాన్యం బలవంతంగా ఆయనను బయటికి పంపింది. ఆ తర్వాత ఆయన స్థానంలో రజనీకాంత్ స్థిరపడ్డాడు. అంతకుముందు రజనీకాంత్ టీవీ9 లో ఉన్నప్పటికీ.. తక్కువగా ఫోకస్ అయ్యాడు. ఎప్పుడో ఒకసారి రవి ప్రకాశ్ అనంతరం ప్రైమ్ టైం లో కనిపించేవాడు. కానీ ఎప్పుడైతే రవి ప్రకాష్ బయటకు వెళ్లిపోయాడో.. ఆ స్థానంలో రజనీకాంత్ స్థిరపడ్డాడు. అప్పటి నుంచి రజనీకాంత్ రూపు రేఖలు ఒక్కసారిగా మారిపోయాయని విమర్శలు వినిపిస్తున్నాయి. బెంగళూరులో స్థిరాస్తి వ్యాపారం, హైదరాబాదులో ఔషధ తయారీ సంస్థల్లో వాటాలు, ఏపీలో వైసిపి కి చెందిన కొంతమంది నాయకులతో కలిసి సాగిస్తున్న వ్యాపారాలు ఉన్నాయని గుసగుసలు వినిపిస్తున్నాయి.. ఇవన్నీ కూడా బినామీ పేర్లతో రజనీకాంత్ నిర్వహిస్తున్నారని భోగట్టా.. ఇదే సమయంలో రజినీకాంత్ అత్యంత విలువైన ఆస్తులను తన కుటుంబ సభ్యుల పేరు మీద క్రయం చేసుకున్నారని తెలుస్తోంది.

ఎప్పటినుంచో రజనీకాంత్ వ్యవహార శైలి పై దృష్టి సారించిన ఆదాయపు పన్ను శాఖ నోటీసులు జారీ చేసింది. ఈ వ్యవహారం మీడియా వర్గాల్లో సంచలనానికి దారి తీస్తోంది. ఈ విషయం ఈ నోటా, ఆ నోటా పడి, తెగ చక్కర్లు కొడుతోంది. రజనీకాంత్ వ్యవహార శైలి తెలుసుకున్నవారు..వామ్మో ఆయన ఈ స్థాయిలో ధనవంతుడా అనుకుంటూ ముక్కున వేలేసుకుంటున్నారు. ఇటీవలి ఏపీ ఎన్నికల ఫలితాలలో వైసిపి ఓడిపోవడంతో రజనీకాంత్ తీవ్రంగా ఇబ్బంది పడినట్టు తెలుస్తోంది. దీనిని మర్చిపోకముందే ఐటీ శాఖ రూపంలో నోటీసులు రావడం ఆయనను వేదనకు గురి చేస్తోందని తెలుస్తోంది. మరి ఈ విషయం టీవీ9 యాజమాన్యానికి తెలియడంవల్లే టీవీ స్క్రీన్ మీదకి రావద్దు అన్నట్టుగా ఆదేశాలు వెలువడ్డాయట. ఆయన ఇప్పట్లో స్క్రీన్ మీదకు వచ్చే అవకాశాలు లేవని విమర్శలు వినిపిస్తున్నాయి. మరి వీటిల్లో ఎంత నిజం ఉందో, మరెంత అబద్ధం ఉందో రజనీకాంత్ నోరు విప్పేంతవరకు తెలియదు.

ఆరు నెలలు పొడిగించాలని కేంద్రానికి లేఖ

అమరావతి, జూన్‌ 19 : రాష్ట్ర ప్రభుత్వ ప్రధాన కార్యదర్శి నీరబ్‌ కుమార్‌ ప్రసాద్‌ పదవీకాలాన్ని 6నెలలు పొడిగించాలని సీఎం చంద్రబాబు నిర్ణయించారు.

ఈ మేరకు బుధవారం కేంద్ర ప్రభుత్వానికి లేఖ రాశారు. నీరబ్‌ కుమార్‌ కొద్ది రోజుల కిందటే ఏపీ ప్రధాన కార్యదర్శిగా బాధ్యతలు తీసుకున్నారు. ఈ నెలాఖరులో ఆయన రిటైర్‌ కాబోతున్నారు. కానీ, ప్రభుత్వం ఆయన సేవలు కొనసాగించాలని నిర్ణయించింది.

అందులో భాగం గా కేంద్రానికి లేఖ రాసింది. గత ప్రభుత్వంలోనే ఆయన సీఎస్‌ కావాల్సి ఉంది. కానీ, జగన్‌ ఆయనను పక్కన పెట్టి జూనియర్‌ అయిన జవహర్‌ రెడ్డికి పట్టం కట్టారు. చంద్రబాబు ముఖ్యమంత్రి కాగానే సీనియార్టీకి ప్రయార్టీ ఇచ్చారు.

సీనియారిటీలో ముందున్న నీరబ్‌కుమార్‌ ప్రసాద్‌ను సీఎ్‌సగా ఎంపిక చేశారు. ప్రస్తుతం ఆయనకు 10 రోజుల సర్వీస్‌ మాత్రమే ఉండడంతో మరికొంత కాలం పాటు అవకాశం ఇవ్వాలన్న ఉద్దేశంతో సర్వీస్‌ పొడిగింపు కోరుతూ కేంద్రానికి లేఖ రాశారు. కేంద్రం ఒకే విడతలో ఆరు నెలలు పొడిగింపు ఇస్తుందా.. లేదంటే మూడు నెలల చొప్పున రెండుసార్లు పొడిగిస్తుందా అన్నది వేచి చూడాలి.

Gorantla Butchaiah Chowdary: ముఖ్యమంత్రి చంద్రబాబు నాయుడి సారథ్యంలో ఏపీలో కొత్త ప్రభుత్వం కొలువుదీరింది. మంత్రుల ప్రమాణ స్వీకారం, శాఖల కేటాయింపు చకచకా పూర్తయ్యాయి.

చంద్రబాబు ఇప్పటికే బాధ్యతలను స్వీకరించారు. పాలనను పరుగులెత్తించడంపై దృష్టి సారించారు. ఇందులో భాగంగా అయిదు గ్యారంటీలపై సంతకాలూ చేశారు.

ఇక ఏపీ అసెంబ్లీ సమావేశం కానుంది. ఈ నెల 21, 22వ తేదీల్లో అసెంబ్లీని సమావేశ పర్చాలని ప్రభుత్వం నిర్ణయించుకుంది. మొన్నటి ఎన్నికల్లో విజయం సాధించిన 175 మందీ శాసన సభ్యులుగా ప్రమాణ స్వీకారం చేస్తారు. ప్రొటెం స్పీకర్ వారితో ప్రమాణం చేయిస్తారు. ప్రొటెం స్పీకర్‌గా రాజమండ్రి రూరల్‌కు చెందిన తెలుగుదేశం పార్టీ ఎమ్మెల్యే గోరంట్ల బుచ్చయ్య చౌదరి ఎన్నికయ్యారు.

దీనిపై ఆయన స్పందించారు. ప్రొటెం స్పీకర్ పెద్ద పోస్టేమీ కాదని అన్నారు. ఏదో రెండు రోజుల పాటు కొత్త సభ్యులతో ప్రమాణం స్వీకారం చేయిస్తే అయిపోతుందని వ్యాఖ్యానించారు. అసెంబ్లీలో సీనియర్ సభ్యుడిని కావడం వల్ల ప్రొటెం స్పీకర్‌గా వ్యవహరించాలని చంద్రబాబు నాయుడు తనను కోరారని, దీనికి అంగీకరించానని చెప్పారు.

వైఎస్ఆర్ కాంగ్రెస్ పార్టీ అధినేత వైఎస్ జగన్మోహన్ రెడ్డితో శాసన సభ్యుడిగా ప్రమాణ స్వీకారం చేయడంపై గోరంట్ల బుచ్చయ్య కీలక వ్యాఖ్యలు చేశారు. ప్రజాస్వామ్యంలో ఎవరైనా ఒకటేనని, అందరినీ సమానంగా చూస్తామని అన్నారు. అధికార, ప్రతిపక్ష సభ్యులను సమానంగా గౌరవస్తామని చెప్పారు.

అలా అందరినీ సమానంగా చూడటం, గౌరవంగా వ్యవహరించడం వైఎస్ జగన్ ప్రభుత్వ ప్రభుత్వం వల్ల కాలేదని గోరంట్ల విమర్శించారు. ప్రస్తుత ప్రభుత్వ హయాంలో శాసన సభ సజావుగా సాగుతుందని ఆయన హామీ ఇచ్చారు. ప్రజా సమస్యల పరిష్కారానికి ఓ చక్కటి వేదిక అవుతుందని పేర్కొన్నారు.

గత ప్రభుత్వం.. ప్రతిపక్ష సభ్యులకు మాట్లాడే అవకాశం ఇవ్వలేదని, మైకులు ఇవ్వకుండా ఇబ్బంది పెట్టిందని గోరంట్ల అన్నారు. ప్రస్తుతం బలమైన ప్రతిపక్షం లేదని, ఉన్నవాళ్లయినా సక్రమంగా సభకు వస్తారని ఆశిస్తున్నట్లు చెప్పారు. వైసీపీ సభ్యులు నిర్మాణాత్మక విమర్శలు చేయవచ్చని, వాటిని స్వీకరిస్తామని అన్నారు.