ఆంధ్రప్రదేశ్‌లో టీడీపీ, జనసేన, బీజేపీ కూటమి బంపర్ మెజారిటీతో అధికారంలోకి రాగా.. వైసీపీ దారుణ పరాజయాన్ని మూటగట్టుకుంది. ఫలితాలు వెలువడిన నాటి నుంచి కొందరు వైసీపీ నేతల ఇళ్లపై టీడీపీ శ్రేణులు దాడులకు తెగబడటంతో ఉద్రిక్త పరిస్ధితులు నెలకొన్నాయి.

కొన్ని చోట్ల వైఎస్సార్ విగ్రహాలను కూల్చేసి వాటి స్థానంలో ఎన్టీఆర్ విగ్రహాలను ప్రతిష్టిస్తున్నారు. తెలుగుదేశం పార్టీ కక్ష సాధింపులకు దిగుతోందంటూ వైసీపీ నేతలు ఆరోపిస్తున్నారు. కూటమి ప్రభుత్వం తమలో కొందరిని అరెస్ట్ చేసి జైలుకు పంపిస్తుందని ఆందోళన వ్యక్తం చేస్తున్నారు.

వైసీపీ ప్రభుత్వంలో కీలక నేతలు అధికారాన్ని అడ్డుపెట్టుకుని అవినీతికి పాల్పడ్డారని కూటమి నేతలు ఎన్నికల ప్రచారం ఆరోపించారు. భూ కబ్జాలు, ఇసుక అక్రమ తవ్వకాలు, మైనింగ్, మద్యం, రేషన్ బియ్యం, డ్రగ్స్ రవాణా ఇలా అన్ని రంగాల్లో వైసీపీ నేతలు కోట్లాది రూపాయలు సంపాదించారని వారు విమర్శించారు. తమ ప్రభుత్వం అధికారంలోకి రాగానే ఖచ్చితంగా చర్యలు తీసుకుంటామని , అవినీతికి పాల్పడిన వారిని వదిలిపెట్టేది లేదని హెచ్చరించారు. హోంమంత్రిగా బాధ్యతలు స్వీకరించిన వంగలపూడి అనిత సైతం ఇదే రకమైన హెచ్చరికలు చేశారు. మాచర్లలో టీడీపీ కార్యకర్త చంద్రయ్య హత్య కేసును రీఓపెన్ చేయిస్తామని తెలిపారు. అలాగే టీడీపీ నేతలపై పెట్టిన అక్రమ కేసులపై సమీక్ష చేస్తామని హోంమంత్రి స్పష్టం చేశారు.

ఏపీలో మారిన పరిస్థితుల నేపథ్యంలో వైసీపీ నేతల గుండెల్లో రైళ్లు పరిగెడుతున్నాయని రాజకీయ వర్గాల్లో చర్చ జరుగుతోంది. ఈ లిస్ట్‌లో ఫస్ట్ పేరు రోజాదేననే టాక్ వినిపిస్తోంది. వైసీపీ ఫైర్ బ్రాండ్‌గా.. సీఎం జగన్‌పై ఈగ వాలనిచ్చేవారు కాదు రోజా. పదునైన మాటలతో ప్రత్యర్ధులు సైతం సైలెంట్ అవ్వాల్సిందే. జగన్ అధికారంలోకి వచ్చాక ఏపీఐఐసీ ఛైర్‌పర్సన్‌గా బాధ్యతలు స్వీకరించిన ఆమె.. తర్వాత మంత్రివర్గ పునర్వ్యస్ధీకరణలో మంత్రి పదవిని కొట్టేశారు. క్రీడా, పర్యాటక, యువజన సర్వీసుల శాఖ మంత్రిగా రోజా ఓ వెలుగు వెలిగారు. వేదికలపై డ్యాన్సులు, పిల్లలతో కలిసి ఆటలు ఆడుతూ నిత్యం వార్తల్లో నిలిచేవారు.

జగన్ కేబినెట్‌లో ఆమె మంత్రిగా ఉన్నప్పుడు ఆడుదాం – ఆంధ్ర, సీఎం కప్‌ల పేరుతో నిర్వహించిన కార్యక్రమంలో పెద్ద ఎత్తున అవినీతి జరిగిందని తెలుగుదేశం నేతలు ఆరోపిస్తున్నారు. దాదాపు రూ.100 కోట్లు స్కాం జరిగిందని.. రోజా, శాప్ మాజీ ఛైర్మన్ బైరెడ్డి సిద్ధార్ధ్ రెడ్డిలు అక్రమాలకు పాల్పడ్డారని విమర్శిస్తున్నారు. ఈ మేరకు సీఐడీకి ఆత్యా – పాత్యా సంఘం, కబడ్డీ అసోసియేషన్, ఇతర క్రీడా సంఘాల నేతలు ప్రెస్ మీట్ పెట్టి మరి సంచలన ఆరోపణలు చేశారు. ఈ స్కాంపై సీఐడీకి సైతం ఫిర్యాదు చేసినట్లు చెప్పారు.

క్రీడా శాఖ మంత్రిగా రోజా ఉన్నప్పుడు.. క్రీడా పరికరాల కొనుగోలులో పెద్దఎత్తున అవకతవకలు జరిగాయని ఆడుదాం ఆంధ్ర పోటీల్లో నాసిరకపు క్రీడా కిట్లను ఎక్కువ ధరలకు కొనుగోలు చేశారంటూ ఆరోపిస్తున్నారు. క్రీడాకారుల కోటా ద్వారా మెడికల్, ఇంజనీరింగ్, ట్రిపుల్ ఐటీ ప్రవేశాలు పొందినవారిపై విచారణ జరపాలని నేతలు చెబుతున్నారు. మరోవైపు ఎన్నికల్లో ఓటమి తర్వాత రోజా స్పందించారు.

మంచి చేసి ఓడిపోయాం.. తలెత్తుకుని తిరుగుదామంటూ రోజా ట్వీట్ చేశారు. ఆడుదాం ఆంధ్ర, సీఎం కప్‌ కార్యక్రమాలకు సంబంధించిన దస్త్రాలన్నీ సీజ్ చేయాలని.. అలాగే జగన్ ప్రభుత్వ హయాంలో శాప్ ఇంజనీరింగ్ విభాగం అధికారులు చేపట్టిన పనుల్లో జరిగిన అవకతవకలను కూడా పరిశీలించాలని క్రీడా సంఘాల ప్రతినిధులు ప్రభుత్వాన్ని డిమాండ్ చేస్తున్నారు. ఈ పరిణామాల నేపథ్యంలో రోజా అరెస్ట్ ఖాయమనే కథనాలు సోషల్ మీడియాలో హల్‌చల్ చేస్తున్నాయి.

కౌంటింగ్ మొదలు నేటి వరకు బయటకు కనిపించని రోజా మచ్చుకైనా కనిపించని నేపథ్యంలో తాజా ఆరోపణలు సంచలనం కలిగిస్తున్నాయి. జగన్ ప్రభుత్వంలో విపక్షనేతలపై నోటి దురుసు ప్రదర్శించిన నేతల్లో రోజా ఒకరు. తాము అధికారంలోకి వస్తే ఆమెను వదిలిపెట్టేది లేదని అప్పట్లోనే పలువురు టీడీపీ నేతలు బహిరంగంగానే హెచ్చరించేవారు. ఇప్పుడు ఆడుదాం ఆంధ్ర స్కాం బయటకు రావడం దీనిలో భాగమనే ఊహగానాలు వినిపిస్తున్నాయి. మరి రోజాను అరెస్ట్ చేస్తారా, లేదా అన్నది తెలియాలంటే కొద్దిరోజులు వెయిట్ చేయాల్సిందే.

Dola Sree Bala Veeranjaneya Swamy: రాష్ట్రంలో అప్పులపై త్వరలో శ్వేత పత్రం విడుదల చేస్తాం

ప్రజలు రాక్షస పాలన నుంచి రాష్ట్రానికి విముక్తి ప్రసాదించారని మంత్రి డోలా బాల వీరాంజనేయ స్వామి అన్నారు. పరిపాలన దక్షుడు చంద్రబాబు క్యాబినెట్ లో మంత్రి పదవి దక్కటం అదృష్టమన్నారు.బాద్యతలు తీసుకున్న వెంటనే సీఎం హామీల అమలు మొదలు పెట్టారన్నారు. ఆదివారం ఆయన మాట్లాడుతూ.. మాది విడతల వారీ ప్రభుత్వం కాదు.. చేతల ప్రభుత్వమన్నారు. ఐదు రోజుల్లో రాష్ట్రంలో శాంతి భద్రతలు అదుపులోకి తెచ్చామని తెలిపారు. తమ ముందు అనేక సవాళ్లు ఉన్నాయని..రాష్ట్రంలో అప్పులపై త్వరలో శ్వేత పత్రం విడుదల చేస్తామన్నారు. త్వరలో అసెంబ్లీలో పలు కీలక బిల్లులు ప్రవేశ పెట్టబోతున్నామని స్పష్టం చేశారు.

ఏపీ నిర్లక్ష్యానికి గురైన సాగునీటి ప్రాజెక్టులు పూర్తి చేస్తామని మంత్రి డోలా బాల వీరాంజనేయ స్వామి హామీ ఇచ్చారు. జిల్లాలో మైనింగ్ కు మంచి రోజులు వచ్చాయన్నారు. ఎస్సీ కాలనీల్లో మూతబడిన పాఠశాలలు తెరిపిస్తామన్నారు. తమకు సచివాలయాలు, వాలంటీర్ల శాఖ ప్రకటించిన సమయం నుంచి నా మెయిల్లు, వాట్సాప్ లు నిండిపోయాయని తెలిపారు. బలవంతంగా మాతో రాజీనామాలు చేయించారని వాలంటీర్లు ఆవేదన వ్యక్తం చేస్తున్నారన్నారు. ప్రస్తుతం ఉన్న వాలంటీర్లను కొనసాగిస్తామని హామీ ఇచ్చారు. పెరిగిన పెన్షన్లను ఒకటవ తేదీ నుంచి పంపిణీ చేస్తామని భరోసా ఇచ్చారు.

కాగా.. ఆంధ్రప్రదేశ్‌లో టీడీపీ నేతృత్వంలో ఎన్డీఏ ప్రభుత్వం ఏర్పాటైంది. ముఖ్యమంత్రిగా బాధ్యతలు స్వీకరించిన నారా చంద్రబాబు నాయుడు.. తన టీమ్‌ను సైతం సిద్ధం చేసుకున్నారు. మంత్రులకు సైతం శాఖలు కేటాయించారు. అయితే మంత్రివర్గ ఏర్పాటు, శాఖల కేటాయింపులో.. వాలంటీర్లకు టీడీపీ ప్రభుత్వం శుభవార్త అందించింది. 24 మందికి శాఖలను కేటాయించిన ముఖ్యమంత్రి చంద్రబాబు నాయుడు.. సచివాలయం, గ్రామ వాలంటీర్ శాఖను ఏర్పాటు చేసి మంత్రి డోలా బాల వీరాంజనేయ స్వామికి అప్పగించారు.

తెదేపా (TDP) రాష్ట్ర అధ్యక్షుడిగా గాజువాక ఎమ్మెల్యే పల్లా శ్రీనివాసరావు (Palla Srinivasarao) నియమితులయ్యారు.

అమరావతి: తెదేపా (TDP) రాష్ట్ర అధ్యక్షుడిగా గాజువాక ఎమ్మెల్యే పల్లా శ్రీనివాసరావు (Palla Srinivasarao) నియమితులయ్యారు. ఈ మేరకు పార్టీ అధినేత చంద్రబాబు ఆదేశాలు జారీ చేశారు. ప్రస్తుతం ఏపీ అధ్యక్షుడిగా ఉన్న కింజరాపు అచ్చెన్నాయుడుకు మంత్రిగా అవకాశం కల్పించారు. ఈ నేపథ్యంలో బీసీ-యాదవ వర్గానికి చెందిన పల్లాకు రాష్ట్ర అధ్యక్ష బాధ్యతలు అప్పగించారు. ఇటీవల జరిగిన ఎన్నికల్లో వైకాపా అభ్యర్థి గుడివాడ అమర్‌నాథ్‌పై భారీ మెజారిటీతో పల్లా శ్రీనివాసరావు గెలుపొందారు. రాష్ట్రంలో అత్యధికంగా 95,235 ఓట్ల తేడాతో ఆయన విజయం సాధించారు.

‘‘విశాఖపట్నం పార్లమెంటు పార్టీ అధ్యక్షుడిగా సమర్థవంతంగా పనిచేసిన పల్లా శ్రీనివాసరావు నూతన బాధ్యతలను విజయవంతంగా నిర్వహిస్తారని ఆశిస్తున్నాను. రాష్ట్ర అధ్యక్షులుగా ఇప్పటి వరకు తెలుగుదేశం పార్టీని నడిపించడంలో అద్భుత పనితీరు కనబర్చిన సీనియర్‌నేత, రాష్ట్రమంత్రి కింజరాపు అచ్చెన్నాయుడుకి అభినందనలు. ప్రతిపక్షంలో అనేక సమస్యలు, సవాళ్లను ఎదుర్కొని పార్టీ బలోపేతానికి అచ్చెన్నాయుడు ఎనలేని కృషి చేశారు’’ అని చంద్రబాబు ఒక ప్రకటనలో తెలిపారు.

మరోసారి ఉత్తరాంధ్ర నేతనే వరించిన అధ్యక్ష పదవి..
ఏపీ పునర్విభజన తర్వాత తెదేపా రాష్ట్ర అధ్యక్ష పదవి ఇప్పటి వరకు రెండుసార్లు ఉత్తరాంధ్ర నేతలకే దక్కగా.. ఇది మూడోసారి కావడం విశేషం. తొలుత కళా వెంకట్రావుకు అప్పగించగా.. గత ఐదేళ్ల నుంచి అచ్చెన్నాయుడు ఆ పదవిలో కొనసాగుతున్నారు. అయితే, అచ్చెన్నాయుడికి మంత్రివర్గంలో చోటు లభించడంతో ఆయన స్థానంలో మరో బీసీ నేత పల్లా శ్రీనివాసరావును నియమించారు. గాజువాక నుంచి పోటీ చేసిన ఆయన రాష్ట్రంలోనే అత్యధిక మెజార్టీ సాధించి రికార్డు సృష్టించారు. గత ఐదేళ్ల వైకాపా పాలనలో పల్లా అనేక ఇబ్బందులకు గురయ్యారు. వైకాపా రాగానే ఆ పార్టీ నేతలు పల్లాను పార్టీ మార్చేందుకు ప్రయత్నించారు.

ఒకానొక దశలో ఏయూలో పనిచేస్తున్న ఆయన సతీమణితో ఇంట్లో ఒత్తిడి తెచ్చారు. విజయసాయిరెడ్డితో అన్నివైపుల నుంచీ పొగపెట్టారు. అయినా పల్లా పార్టీని వీడలేదు. వైకాపాలోకి వెళ్తే తనకు రాజకీయ సమాధేనని, వెళ్లేది లేదని తేల్చి చెప్పారు. దీన్ని సహించలేని విజయసాయి గాజువాక ప్రధాన సెంటర్‌లో ఉన్న పల్లా ఆస్తిపై కన్నేశారు. దాన్ని ఎలాగైనా కొట్టేయాలని జీవీఎంసీని ఆదేశించారు. రాత్రికిరాత్రే అందరినీ గృహనిర్బంధాలు చేసి భవనంలోని కొంత భాగాన్ని కొట్టించేశారు. అంతటితో ఆగకుండా ఆయనపై పలు కేసులు మోపారు. విశాఖ ఉక్కుపై పల్లా ఆమరణ దీక్ష చేస్తుంటే అర్ధరాత్రి శిబిరాన్ని కూల్చేసి ఈడ్చుకుపోయారు. అయినా ఎక్కడా తలొగ్గకుండా ఎదురొడ్డి నిలిచారు. విశాఖ జిల్లా పార్టీ అధ్యక్షుడిగా మొదటి వరుసలో ఉండి పోరాటాలకు నాయకత్వం వహించారు. మంత్రి పదవి వస్తుందని అనుయాయులంతా ఆశగా ఎదురుచూడగా.. ఎప్పుడు ఏది ఇవ్వాలో చంద్రబాబుకు తెలుసు అని చెబుతూ వచ్చారు. ఇప్పడు పల్లాకు అధ్యక్ష పదవి ఖరారు చేయడంతో సరైన గుర్తింపు దక్కిందని సంతోషం వ్యక్తం చేస్తున్నారు.

విడదల రజినీ వైయస్సార్ కాంగ్రెస్ పార్టీలో ఒక ఊపు ఊపింది. మంత్రిగా కూడా పనిచేసింది. అలాంటి విడదల రజినీ తాను రాజకీయ ఓనమాలు నేర్చుకున్నదే టిడిపిపార్టీ ద్వారా అని చెప్పవచ్చు.
సైబరాబాద్ ఐటీ వనంలో చంద్రబాబు నాటిన మొక్క నేను అంటూ ఆంధ్ర ప్రదేశ్ రాజకీయాల్లో ఒక వెలుగు వెలిగింది. అవసరాలను బట్టి తన తన యొక్క పాత్రను మార్చుకోవడం విడదల రజనీకి వెన్నతో పెట్టిన విద్య అని చెప్పవచ్చు. టిడిపిలో రాజకీయ ఓనమాలుని నేర్చుకొని చివరికి చంద్రబాబు నాయుడి కి హ్యాండ్ ఇచ్చి వైసీపీలో చేరింది. చిలకలూరిపేట ఎమ్మెల్యేగా గెలిచి మంత్రి పదవిని కూడా పొందింది. అలాంటి విడదల రజిని మంత్రి గానే కాకుండా సోషల్ మీడియాలో కూడా చాలా పేరు సంపాదించుకుంది.

తన రాజకీయ చతురతతో తానంటే ఏంటో నిరూపించుకుంది విడదల రజిని.అయితే ఆమె మంత్రి పదవిని పేద ప్రజలకు సాయం చేయడంలో ఉపయోగించలేదని చెప్పవచ్చు. తన ఆస్తులు పెంచుకోవడానికి మంత్రి పదవిని అడ్డుగా పెట్టుకొని అనేక ఆస్తులను సంపాదించింది. చివరికి చిలకలూరిపేటలో ఆమె గెలుపు కష్టము అనే స్థాయికి వచ్చింది. దీంతో జగన్మోహన్ రెడ్డి ఆమెను గుంటూరు వెస్ట్ స్థానంలో పోటీ చేయాలని ఆదేశించారు. అక్కడ కూడా ఎన్నో కుయుక్తులు పన్ని గెలవాలని ట్రై చేసింది. అక్కడి ప్రజలు ఈమె ఆలోచన విధానాన్ని నమ్మలేదు. చివరికి పంగనామాలు పెట్టి పిడుగురాళ్ల మాధవిని గెలిపించారు.

రజనీపై మాధవి 49,772 ఓట్ల మెజారిలతో గెలుపు సాధించింది. అలాంటి ఈమె తన ఆస్తులను కాపాడడానికో లేదంటే ఇక వైయస్సార్ కాంగ్రెస్పార్టీ పని అయిపోయిందని అనుకుందో ఏమో తెలియదు కానీ జగన్మోహన్ రెడ్డికి హ్యాండ్ ఇచ్చి మరో పార్టీలోకి వెళ్తున్నట్టు వార్తలు వినిపిస్తున్నాయి. కూటమి భాగస్వామ్యులైనటువంటి జనసేన లేదంటే బీజేపీ తీర్థం పుచ్చుకునేందుకు ఆమె సిద్ధమవుతున్నారని పెద్ద ఎత్తున వార్తలు వినిపిస్తున్నాయి. మరి చూడాలి రజిని పార్టీ మారుతుందా లేదంటే ప్రతిపక్ష నాయకురాలిగా జగన్ కు సపోర్టుగా నిలుస్తుందా అనేది ముందు ముందు తెలుస్తుంది.

వైసీపీ హయాంలో రుషికొండ నిర్మాణాలు వివాదాస్పదంగా మారాయి. ఈ నిర్మాణాల పైన రాజకీయంగానూ విమర్శలు వచ్చాయి. కోర్టుల్లోనూ కేసులు జరిగాయి. ఇప్పుడు కొత్త ప్రభుత్వం కొలువు తీరింది.

టీడీపీ నేత గంటా పార్టీ నేతలతో కలిసి రుషికొండ భవనాలను సందర్శించారు. కళ్లు చెదిరేలా భవనాల లోపల ఇంటీరియర్, ఆధునిక సదుపాయాలు ఉన్నాయి. రూ 500 కోట్ల ఖర్చుతో నిర్మించిన ఈ భవనాలను కూటమి ప్రభుత్వం ఎలా సద్వినియోగం చేస్తుందనేది కీలకంగా మారుతోంది.

రుషికొండ భవనాలు

కొన్నేళ్లుగా సస్పెన్స్ గా మారిన రుషికొండ భవనాల తలుపులు తెరుచుకున్నాయి. మాజీ మంత్రి గంటా తమ పార్టీ నేతలతో కలిసి భవనాలను సందర్శించారు. రుషికొండ చుట్టూ 22 ఎకరాలుండగా అందులో 9.8 ఎకరాల్లో గతంలో హరిత రిసార్టుల పేర హోటళ్లు, రూములు ఉండేవి. 2019 నాటికి ముందు పర్యాటకుల రాకపోకలకు ఎలాంటి ఇబ్బందులూ ఉండేవి కాదు. వైసిపి ప్రభుత్వం అధికారం చేపట్టాక రుషికొండను చుట్టూ తొలచి నిర్మాణాలు చేపట్టింది. జనం రాకపోకలకు నాలుగేళ్లపాటు ఆటంకం కలిగించింది.

వైసీపీ హాయంలో నిర్మాణం

ఎపి టూరిజం డవలప్‌మెంట్‌ కార్పొరేషన్‌ (ఎపిటిడిసి)కు అప్పటి ప్రభుత్వం ఈ నిర్మాణ బాధ్యతలు అప్పగించింది. ప్రభుత్వ ధనంతో జగన్‌ ప్యాలస్ ఇక్కడ నిర్మాణం సాగుతుందంటూ పెద్ద ఎత్తున విమర్శలు వచ్చాయి. విశాఖ సాగర తీరంలోని రుషికొండపై వైసిపి ప్రభుత్వ హయాంలో రూ.500 కోట్లతో నిర్మించిన ఏడు సూపర్‌ స్ట్రక్చర్ల (భవనాలు) నిర్మాణం పూర్తి చేసింది. నేషనల్‌ గ్రీన్‌ ట్రిబ్యునల్‌ సభ్యులు రుషికొండ పర్యటన సందర్భంగా 9.8 ఎకరాలు కాకుండా మరో రెండు ఎకరాల్లోకి వెళ్లి ‘సీ వ్యూను కేప్చర్‌’ చేసేలా ఏడు స్ట్రక్చర్స్‌ ప్రాజెక్టు చేపట్టినట్లు వైసిపి ప్రభుత్వం అప్పట్లో వివరణ ఇచ్చింది. రుషికొండ పైన ప్రభుత్వం నిర్మించింది ప్రభుత్వ భవనాలే అని నాడు అధికారంలో ఉన్న మంత్రులు స్పష్టం చేసారు.

ప్రభుత్వ నిర్ణయం ఏంటి

ఇప్పుడు టీడీపీ నేతలు ఈ భవనం సందర్శించిన సమయంలో అందులోని సదుపాయాలు చూసి ఆశ్చర్య పోయారు. ఎందుకు వీటి నిర్మాణం చేసారనేది స్పష్టత ఇవ్వలేదని గంటా వ్యాఖ్యానించారు. ఇక, ఇప్పుడు టీడీపీ కూటమి ప్రభుత్వం అధికారంలోకి రావటంలో రుషికొండ భవనాలను ఏం చేయబోతుందనేది ఆసక్తి కరంగా మారుతోంది. ఈ నిర్మాణాలను యథాతథంగా వాడుకుంటే జగన్‌ సర్కారుపై చేసిన ఆరోపణలను ఎదుర్కోవాలి. ధ్వంసం చేస్తే రూ.వందల కోట్ల సంపద బూడిదపాలవుతుంది. ఒకవేళ అలా చేసినా విమర్శలు ఎదుర్కోవాలి. అందుకే రుషికొండ అంశంపై తాజాగా కూటమి పార్టీల అగ్రనేతల్లో తర్జనభర్జనలు జరుగుతున్నాయి. ప్రభుత్వం తుది నిర్ణయం ఏంటనేది ఆసక్తి కరంగా మారుతోంది.

పల్నాడు జిల్లా మాచర్ల మాజీ ఎమ్మెల్యే పిన్నెల్లి రామకృష్ణారెడ్డి, ఆయన సోదరుడు పిన్నెల్లి వెంకట్రామిరెడ్డిలపై పోలీసులు రౌడీషీట్‌ తెరిచినట్లు తెలిసింది.

పల్నాడు జిల్లా మాచర్ల మాజీ ఎమ్మెల్యే పిన్నెల్లి రామకృష్ణారెడ్డి, ఆయన సోదరుడు పిన్నెల్లి వెంకట్రామిరెడ్డిలపై పోలీసులు రౌడీషీట్‌ తెరిచినట్లు తెలిసింది. పోలింగ్‌ రోజున రెంటచింతల మండలం పాల్వాయిగేటు గ్రామంలోని కేంద్రంలో పిన్నెల్లి రామకృష్ణారెడ్డి ఈవీఎం పగలగొట్టారు. దీన్ని అడ్డుకున్న తెదేపా కార్యకర్త నంబూరి శేషగిరిరావుపై అనుచరులతో దాడి చేయించారు. పోలింగ్‌ మరుసటి రోజు కారంపూడిలో ఇద్దరు సోదరులూ అనుచరులతో కలిసి దాడులు చేశారు. తెదేపా నాయకులు, కార్యకర్తలపై దాడులకు తెగబడ్డారు. ఈ ఘటనలకు సంబంధించి పిన్నెల్లి సోదరులపై కేసులు నమోదైన విషయం విదితమే. వీరి మీద రౌడీషీట్‌ తెరవడంపై వివరాలు చెప్పేందుకు పోలీసు అధికారులు సుముఖత వ్యక్తం చేయడం లేదు.

ఆంధ్రప్రదేశ్ రాష్ట్ర దేవదాయ శాఖ ప్రత్యేక ప్రధాన కార్యదర్శి కరికాల వలవన్‌ రాజీనామా చేశారు. ఆయనను ఉద్యోగ విరమణ తర్వాత సర్వీసులో కొనసాగిస్తూ గత ప్రభుత్వం ఉత్తర్వులు ఇచ్చింది.
ఈ క్రమంలో మరో నెలన్నర పదవీకాలం ఉండగానే ఆయన రాజీనామా చేశారు. జగన్‌ ప్రభుత్వానికి పూర్తిస్థాయిలో సహకరించారని వలవన్‌పై ఆరోపణలున్నాయి. ఈ నేపథ్యంలో ఆయనను కొత్త ప్రభుత్వం తొలగించే అవకాశం ఉన్నట్టు వార్తలు వస్తున్న నేపథ్యంలో వలవన్ రాజీనామా చేశారు.
ఏపీలో ప్రభుత్వం మారడంతో గత ప్రభుత్వంలో నిబంధనలకు విరుద్ధంగా నియమితులైన అధికారులు ఒక్కొక్కరుగా రాజీనామాలు చేస్తున్నారు. ఇలాంటి వారిలో కరికాల వలవన్ ఒకరు. నిజానికి ఆయన పదవీకాలం గతంలోనే ముగిసింది. కానీ, ఉద్యోగ విరమణ తర్వాత కూడా గత ప్రభుత్వం పలువురు సీనియర్ అధికారులను కొనసాగించింది. ఇందుకోసం ప్రత్యేకంగా ఉత్తర్వులు జారీచేస్తూ వచ్చింది.

అలాంటి వారిలో ఈయన ఒకరు. ఇందుకోసం ప్రత్యేకంగా ఉత్తర్వులు జారీచేసింది. ఈ ఉత్తర్వుల ప్రకారం వలవన్ మరో నెల రోజుల పాటు దేవాదాయ శాఖ ప్రత్యేక ప్రధాన కార్యదర్శిగా కొనసాగే అవకాశం ఉంది. అయినప్పటికీ టీడీపీ అధికారంలోకి రావడంతో వలవన్ రాజీనామా చేశారు. తన పదవీకాలం పొడగించిన జగన్ ప్రభుత్వానికి వలవన్ పూర్తి స్థాయిలో సహకరించారని, జగన్‌కు అనుకూలంగా వ్యవహరించారని పలువురు ఆరోపిస్తున్నారు.