విశాఖపట్నంలో రుషికొండ విధ్వంసం, కొండపై ప్యాలెస్‌ నిర్మాణానికి సంబంధించిన ఫైళ్లు ఒక్కొక్కటిగా మాయమవుతున్నాయి.

విశాఖపట్నంలో రుషికొండ విధ్వంసం, కొండపై ప్యాలెస్‌ నిర్మాణానికి సంబంధించిన ఫైళ్లు ఒక్కొక్కటిగా మాయమవుతున్నాయి. ప్యాలెస్‌ నిర్మాణ అనుమతుల ఫైళ్లు, కొన్ని ముఖ్యమైన పేపర్లు ఇప్పటికే కనిపించడంలేదు. ఇప్పుడు కొండపై గతంలో ఉన్న రిసార్టును కూలగొట్టేందుకు తీసుకున్న అనుమతుల ఫైళ్లు కూడా గల్లంతయ్యాయి. ఆ రిసార్టులో 80 గదులతో పాటు ఒక పంక్షన్‌ హాలు, బార్‌ అండ్‌ రెస్టారెంట్‌ ఉండేవి. వాటిల్లో ఉండాల్సిన దాదాపు రూ.50 కోట్ల విలువైన ఏసీలు, ఫ్రిజ్‌లు, ఇతర సామగ్రి ఏమైందో తెలియక ఏపీ టూరిజం డెవల్‌పమెంట్‌ కార్పొరేషన్‌ (ఏపీటీడీసీ) అధికారులు తర్జనభర్జన పడుతున్నారు. ప్యాలెస్‌ నిర్మాణంలో భాగంగా రిసార్టును కూలగొట్టిన సమయంలో అప్పటి అధికారులు ఈ సామగ్రిని ఏంచేశారో వివరించే ఫైల్‌ ఏదీ అందుబాటులో లేదు. ఈ ఫర్నిచర్‌ వివరాలతో కూడిన ఒక ప్రత్యేక ఫైల్‌ ఏపీటీడీసీ వద్ద ఉండేది.

ప్రభుత్వం మారిన తర్వాత అది మాయమైనట్లు తెలుస్తోంది. నిబంధనల ప్రకారం రిసార్ట్‌ను తొలగించే సమయంలో అందులోని సామగ్రిని ఇతర రిసార్ట్‌లకు పంపడం లేదా వాటికి తగిన ధరను నిర్ణయించి, టెండర్‌ ద్వారా బయట మార్కెట్‌లో అమ్మడం చేయాల్సి ఉంటుంది. రుషికొండ విషయంలో టూరిజం అధికారులు ఈ నిబంధనలేవీ పాటించలేదు. ప్యాలెస్‌ నిర్మాణం కోసం ఆగమేఘాల మీద రిసార్ట్స్‌ను ధ్వంసం చేశారు. ఆ సమయంలో రాష్ట్రంలో కొంతమంది డీవీఎంలను పిలిపించి అక్కడున్న ఫర్నిచర్‌లో ఏమేం కావాలో వాటిని వారి డివిజన్లకు తీసుకువెళ్లాలని సూచించారు. వారు తీసుకెళ్లగా ఇంకా మిగిలిన సామగ్రిని ఏపీటీడీసీ అధికారులు ఇష్టారాజ్యంగా అమ్మకాలు చేశారు. డీవీఎంలు ఏమేం తీసుకెళ్లారు, మార్కెట్‌లో ఏం అమ్మారనే సమాచారం కార్పొరేషన్‌ వద్ద లేదు. రుషికొండపై రిసార్ట్స్‌ తొలగించే సమయంలో ఈడీగా ఉన్న మల్‌రెడ్డి, ఈఈ రమణ తూతూమంత్రంగా ఫైల్‌ నడిపించారు. ఇప్పుడు అదీ మాయమైంది. రుషికొండ ధ్వంసం, కొత్త ప్యాలెస్‌ నిర్మాణంలో వీరిద్దరిదే కీలక పాత్ర. ఒక్క ఫైల్‌కు కూడా కార్పొరేషన్‌కు వెళ్లకుండా, సచివాలయం నుంచి చక్రం తిప్పారని ఆరోపణలున్నాయి.

రుషికొండపై మాజీ సీఎం జగన్‌ రూ.500 కోట్ల ప్రజాధనంతో ప్యాలెస్‌ నిర్మాణం చేపట్టారని, ఇప్పుడా ప్యాలె్‌సను ఏం చేయాలో పాలుపోవడం లేదని కూటమి నేతలంతా గగ్గోలు పెడుతున్నారు. కానీ అసలు దాని నిర్మాణానికి సహకరించిన అధికారులపై దృష్టి పెట్టడం లేదు. రుషికొండ ప్యాలెస్‌ నిర్మాణం వెనక కీలకంగా వ్యవహరించిన మల్‌రెడ్డి 2019లో డిప్యుటేషన్‌పై తెలంగాణ నుంచి ఏపీకి వచ్చారు. అప్పట్లో ప్రభుత్వం ప్రత్యేక జీవో జారీ చేసి మరీ ఆయనను రాష్ట్రానికి రప్పించింది. తిరిగి ఆయన తెలంగాణకు వెళ్లే సమయంలో కూడా ఇదే నిబంధనలు పాటించాలి. కానీ ఏపీటీడీసీ అధికారులు మాత్రం టూరిజం సెక్రటరీ అనుమతి లేకుండా, జీవో ఇవ్వకుండానే ఆయన్ను రిలీవ్‌ చేసేశారు. ఇప్పుడు ఆయన తెలంగాణలో రిపోర్టు చేసి రూరల్‌ ఇరిగేషన్‌ కార్పొరేషన్‌లో విధుల్లో చేరిపోయారు. పైగా ఆ కార్పొరేషన్‌ ఎండీ పోస్టు కోసం విశ్వప్రయత్నాలు చేస్తున్నారని సమాచారం.

రుషికొండ ప్యాలెస్‌ నిర్మాణంలో కీలక పాత్ర పోషించిన ఎగ్జిక్యూటివ్‌ ఇంజనీర్‌ రమణ… ఇరిగేషన్‌ నుంచి డిప్యుటేషన్‌పై ఏపీటీడీసీకి వచ్చారు. ప్యాలెస్‌ నిర్మాణాన్ని దగ్గరుండి చూసుకున్నారు. కార్పొరేషన్‌ అధికారులు ఆయన్ను విశాఖ డివిజనల్‌ మేనేజర్‌ పోస్టులో కూర్చోబెట్టడంతో పాటు టూరిజం శాఖ రీజినల్‌ డైరెక్టర్‌గా బాధ్యతలు కూడా అప్పగించారు. రుషికొండకు సంబందించిన ఫైళ్లన్నీ డీవీఎం చేతుల్లోనే ఉంటాయి. జగన్‌ ప్రభుత్వంలో మొత్తం వ్యవహారం నడిపించిన ఈయనకు పదోన్నతులు ఇచ్చి, కీలకమైన పోస్టు కట్టబెట్టడంపై సంస్థ ఉద్యోగులు విస్తుబోతున్నారు. రుషికొండ విషయంలో కూటమి ప్రభుత్వానికి ఏమాత్రం శ్రద్ధ ఉందో ఈ ఒక్క నిర్ణయంతో తేలిపోయిందన్న విమర్శలు వినిపిస్తున్నాయి.

అసెంబ్లీ సమావేశాలకు వెళ్ల నని జగన్‌ అనడం సరికాదని కేంద్ర మాజీమంత్రి పూసపాటి అశోక్‌గజపతిరాజు అన్నారు. ప్రముఖ వ్యాపార సంస్థ జీఆర్‌టీ ఆర్థిక సహకారంతో సింహగిరిపై సుమారు రూ.1.5కోట్లతో ఏర్పాటు చేసిన విద్యుత్‌ దీపాల శంఖు, చక్ర, తిరునామాలను ఆదివారం సాయంత్రం ఆయన ప్రారంభించారు. మాజీ ముఖ్యమంత్రులుగా నందమూరి తారక రామారావు, చంద్రబాబు అసెంబ్లీలో తమకు జరిగిన అన్యాయాలకు మనస్తాపం చెంది సభకు వెళ్లమని ప్రతినబూనారని, జగన్‌కు అసెంబ్లీలో ఎటువంటి అవమానం జరగలేదని, ఎవరూ నిందించే పరిస్థితి కూడా లేదన్నారు. సమావేశాలకు ఎందుకు హాజరుకానంటున్నారో ఆయనకే తెలియాలన్నారు. సింహగిరిపై చేపడుతున్న ‘ప్రసాద్‌’ పనులపై మాట్లాడుతూ.. రాష్ట్రంలో మరో రెండు దేవాలయాల్లో చేపట్టిన పనులు చివరిదశకు చేరాయని, సింహాచలంలో మాత్రం నత్తనడకన సాగుతున్నాయని పేర్కొన్నారు.

ఆంధ్రప్రదేశ్ అసెంబ్లీలో మంత్రి అచ్చెన్నాయుడు వ్యవసాయశాఖ బడ్జెట్‌ను ప్రవేశపెట్టారు.. రూ.43,402 కోట్లతో సభ ముందు బడ్జెట్‌ను ఉంచారు. రాష్ట్రానికి వ్యవసాయం వెన్నెముక.. 62 శాతం జనాభా వ్యవసాయ అనుబంధ రంగాలపై ఆధారపడిందని తెలిపారు. రాష్ట్రంలో భూసార పరీక్షలకు మరింత ప్రాధాన్యం ఇస్తున్నామన్నారు. విత్తనాలు, సూక్ష్మ పోషక ఎరువులు రాయితీపై అందిస్తున్నామని.. ప్రాథమిక పరపతి సంఘాల ద్వారా తక్కువ ధరకే ఎరువుల పంపిణీ చేస్తున్నామని వివరించారు. అలాగే ఈ బడ్జెట్‌లో రైతులకు ప్రతి ఏటా రూ.20వేలు అందించే అన్నదాత సుఖీభవ పథకానికి సంబంధించి కీలక ప్రకటన చేశారు.

ఆంధ్రప్రదేశ్‌లో సంకీర్ణ ప్రభుత్వం ‘సూపర్‌ సిక్స్‌’ కార్యక్రమం కింద రైతులకు ‘అన్నదాత సుఖభీభవ.. పీఎం కిసాన్ పథకం’లో ఏడాదికి రూ. 20 వేల చొప్పున (పీఎం కిసార్ పథకం కింద కేంద్ంరఅందించే రూ. 6000 ప్రయోజనంతో కలిపి)ఆర్థిక సహాయం ప్రకటించిన విషయాన్ని గుర్తు చేశారు. ఈ పథకం అమలుకు రూ.4,500 కోట్లు ప్రతిపాదించామన్నారు రాష్ట్రంలోని భూమిలేని సాగుదారులందరికీ ఆర్థిక సహాయం సంవత్సరానికి రూ.20 వేల చొప్పున ఆంధ్రప్రదేశ్‌ ప్రభుత్వం బడ్జెట్‌ కేటాయింపు నుంచి అందిస్తామన్నారు. ఈ అన్నదాతీ సుఖీభవ పథకం విధివిధానాలు, మార్గదర్శకాలపై ప్రభుత్వ ఆదేశాలు త్వరలో జారీ చేస్తుందని చెప్పారు.

అలాగే 2024-25లో ప్రభుత్వం వ్యవసాయ రుణాల కోసం రూ.2,64,000 కోట్లు (పంట రుణాల కింద రూ. 1లక్ష 66 వేల కోట్లు, వ్యవసాయ అనుబంధ కార్యకలాపాల కింద రూ. 98 వేల కోట్లు) అందించాలని లక్ష్యంగా పెట్టుకుంది అన్నారు. ఇప్పటివరకు పంట రుణాల కింద రూ.1,03,649 కోట్లు, వ్యవసాయ అనుబంధ కార్యకలాపాలతో సహా వ్యవసాయ టర్మ్‌ రుణాల కింద రూ.66148 కోట్లు మొత్తం రూ.1,69,797 కోట్లు పంపిణీ చేశారన్నారు.

కౌలు రైతులకు ఈ ప్రభుత్వం 9.08 లక్షల పంట సాగుదారుల హక్కుల కార్డుల్ని జారీ చేసింది అన్నారు. తద్వారా కౌలు రైతులకు 11 నెలల పాటు పంటపై హక్కులను కల్పించడం, పంట రుణాలు, ప్రభుత్వ సంక్షేమ పథకాలకు అర్హత పొందేందుకు వీలు కల్పించింది అన్నారు. 2024-25లో సం.లో CCRCలు పొందిన కౌలు రైతులకు రూ. 1443 కోట్ల పంట రుణాలు పంపిణీ చేశామన్నారు. అలాగే అన్ని ప్రభుత్వ సంక్షేమ పథకాలను అందించడానికి.. అర్హులైన కౌలు దారులందరికీ కౌలుదారు గుర్తింపు కార్డులను జారీ చేసేందుకు 2024లో కొత్త సాగుదారుల హక్కుల చట్టాన్ని తీసుకురావాలని ప్రభుత్వం నిర్ణయించింది అన్నారు.

రూ.3 లక్షల వరకు పంట రుణాలు పొంది, నిర్ణీత వ్యవధి ( ఒక ఏడాది)లో తిరిగి చెల్లించే అర్హలైన రైతులందరికీ 2024-25 నుంచి వడ్డీ లేని రుణాలు, పావలా వడ్డీ పథకం కింద వడ్డీ రాయితీ అందించాలని ఆంధ్రప్రదేశ్‌ ప్రభుత్వం నిర్ణయించింది అన్నారు. వడ్డీ రాయితీ నేరుగా రైతుల బ్యాంకు ఖాతాల్లో జమ చేస్తామని తెలిపారు. చిన్న సన్నకారు రైతులతో పాటు వాస్తవ సాగుదారులకు ఆర్థిక భారాన్ని తగ్గించడం, రైతులను అప్పుల ఊబిలో పడకుండా కాపాడటం ఈ పథకం ముఖ్య ఉద్దేశ్యం అన్నారు. రూ.3 లక్షల వరకు పంట రుణం తీసుకుని ఏడాదిలోగా చెల్లించిన రైతులకు .. వడ్డీ లేని రుణాలు పథకం కింద రూ.1 లక్ష వరకు పంట రుణం మొత్తంపై 4శాతం వడ్డీ రాయితీ ఇస్తామన్నారు. పావలా వడ్డీ రుణాల పథకం కింద రూ.1 లక్ష నుంచి రూ.3 లక్షల వరకు పంట రుణ మొత్తంపై 1శాతం వడ్డీ రాయితీని అందజేస్తుంది అన్నారు. 2024-25లో వడ్డి లేని రుణాల పథకాన్ని అమలు చేయడానికి బడ్జెట్లో రూ. 628 కోట్లు ప్రతిపాదించినట్లు తెలిపారు.

వ్యవసాయ బడ్జెట్‌ కేటాయింపులిలా..
అన్నదాత సుఖీభవ – రూ.4,500 కోట్లు
రాయితీ విత్తనాలకు – రూ.240 కోట్లు
పంటల బీమా – రూ.1,023 కోట్లు
వ్యవసాయ శాఖ – రూ.8,564.37 కోట్లు
ఉద్యాన శాఖ – రూ. 3469.47 కోట్లు
పట్టు పరిశ్రమ – రూ.108.4429 కోట్లు
వ్యవసాయ మార్కెటింగ్ – రూ.314.80 కోట్లు
ఉచిత వ్యవసాయ విద్యుత్ – రూ.7241.30 కోట్లు
ఉపాధి హామీ అనుసంధానం – రూ.5,150కోట్లు
నీటిపారుదల ప్రాజెక్టుల నిర్వహణ – రూ.14,637.03 కోట్లు
భూసార పరీక్షలకు – రూ.38.88 కోట్లు
విత్తనాల పంపిణీ – రూ.240 కోట్లు
ఎరువుల సరఫరా – రూ.40 కోట్లు
పొలం పిలుస్తోంది – రూ.11.31 కోట్లు.
ప్రకృతి వ్యవసాయం – రూ.422.96 కోట్లు
డిజిటల్‌ వ్యవసాయం – రూ.44.77 కోట్లు
వ్యవసాయ యాంత్రీకరణ – రూ.187.68 కోట్లు
వడ్డీ లేని రుణాలకు – రూ.628 కోట్లు
సహకార శాఖ – రూ.308.26కోట్లు
ఎన్జీ రంగా విశ్వవిద్యాలయం – రూ.507.038 కోట్లు
ఉద్యాన విశ్వవిద్యాలయం – రూ.102.227 కోట్లు
శ్రీ వెంకటేశ్వర పశు విశ్వవిద్యాలయం – రూ.171.72 కోట్లు
మత్స్య విశ్వవిద్యాలయం – రూ.38 కోట్లు
పశుసంవర్ధక శాఖ – రూ.1,095.71 కోట్లు
మత్స్య రంగం అభివృద్ధి – రూ.521.34 కోట్లు
ఎన్టీఆర్ జలసిరి – రూ.50 కోట్లు
రైతు సేవా కేంద్రాలకు – రూ.26.92 కోట్లు
ఇంటిగ్రేటెడ్‌ అగ్రి ల్యాబ్స్‌ – రూ.44.03 కోట్లు

ఆంధ్రప్రదేశ్ బడ్జెట్ రూ.2.94 లక్షలు.. లైవ్ అప్డేట్స్
* ఆంధ్రప్రదేశ్ అసెంబ్లీ బడ్జెట్ సమావేశాలు ప్రారంభం
* సభలో బడ్జెట్ ప్రవేశ పెట్టిన ఆర్థిక మంత్రి పయ్యావుల కేశవ్
* నాలుగు నెలల కాలానికి బడ్జెట్‌ను తీసుకొచ్చిన ప్రభుత్వం
* నీటి పారుదల, సంక్షేమం, విద్య, వైద్య రంగాలకు ప్రాధాన్యత
* రూ.2.94 లక్షల కోట్లతో వార్షిక బడ్జెట్
* రాష్ట్ర ఆర్థిక వ్యవస్థ పతనం అంచున ఉంది
* రాష్ట్రాన్ని అభివృద్ధి పథంలో నడిపించాల్సి ఉంది
* గత ప్రభుత్వ పాలనను ప్రజలు పాతరేశారు
* రెవెన్యూ వ్యయం అంచనా రూ.2.34 లక్షల కోట్లు
* మూలధన వ్యయం అంచనా రూ.32,712 కోట్లు
* రెవెన్యూ లోటు రూ.34,743 కోట్లు
* ద్రవ్య లోటు రూ.68,743 కోట్లు
* జీఎస్‌డీపీలో రెవెన్యూ లోటు అంచనా 4.19 శాతం
* జీఎస్‌డీపీలో ద్రవ్య లోటు అంచనా 2.12 శాతం
* ఎస్సీ సంక్షేమం – రూ.18,497 కోట్లు
* ఎస్టీ సంక్షేమం – రూ.7,557 కోట్లు
* బీసీ సంక్షేమం – రూ.39,007 కోట్లు
* మైనార్టీ సంక్షేమం – రూ.4,376 కోట్లు
* మహిళ, శిశుసంక్షేమం – రూ.4,285 కోట్లు
* ఉన్నత విద్య – రూ.2,326 కోట్లు
* ఆరోగ్యరంగం – రూ.18,421 కోట్లు
* పంచాయతీరాజ్‌, గ్రామీణాభివృద్ధి – రూ.16,739 కోట్లు
* పట్టణాభివృద్ధి – రూ.11,490 కోట్లు
* గృహ నిర్మాణం – రూ.4,012 కోట్లు
* నైపుణ్యాభివృద్ధి శాఖ – రూ.1,215 కోట్లు
* పాఠశాల విద్యాశాఖ – రూ.29,909 కోట్లు
* జలవనరులు – రూ.16,705 కోట్లు
* పరిశ్రమలు, వాణిజ్యం – రూ.3,127 కోట్లు
* ఇంధనరంగం – రూ.8,207 కోట్లు
* రోడ్లు, భవనాలు – రూ.9,554 కోట్లు
* యువజన, పర్యాటక, సాంస్కృతిక శాఖ – రూ.322 కోట్లు
* పోలీసు శాఖ – రూ.8,495 కోట్లు
* పర్యావరణం, అటవీశాఖ – రూ.687 కోట్లు
* 192 నైపుణ్య కేంద్రాలు, కళాశాలల ఏర్పాటు..
* విదేశీ ఉపాధి అవకాశాలు పెంచడమే స్కిల్ ఇంటర్నేషనల్ లక్ష్యం

అంతకముందు ఆంధ్రప్రదేశ్ అసెంబ్లీ బడ్జెట్ సమావేశాలు ప్రారంభం అయ్యాయి. ఆర్థిక మంత్రి పయ్యావుల కేశవ్ సభలో బడ్జెట్‌ను ప్రవేశపెట్టారు. మరోవైపు ప్రత్యేక వ్యవసాయ బడ్జెట్‌ను ఆ శాఖ మంత్రి అచ్చెన్నాయుడు సభ ముందు ఉంచారు. శాసనమండలిలో బడ్జెట్‌ను మంత్రి కొల్లు రవీంద్ర, వ్యవసాయ బడ్జెట్‌ను మంత్రి నారాయణ ప్రవేశపెట్టారు. ప్రస్తుత ఆర్థిక సంవత్సరంలో ఓట్‌ ఆన్‌ ఎకౌంట్‌ బడ్జెట్‌ను రెండుసార్లు ఆమోదింపజేసుకొని నిధులు ఖర్చు చేస్తున్నారు. సుమారు రూ.2.94 లక్షల కోట్లతో బడ్జెట్ ప్రవేశపెట్టారు. అంతకముందు 2024-25 వార్షిక బడ్జెట్‌కు కేబినెట్ ఆమోదం తెలిపింది. బడ్జెట్ హైలైట్స్ ఇలా ఉన్నాయి.

కడప జిల్లా రాజకీయాల్లో ఆసక్తికర పరిణామం జరిగింది. రాజంపేట నియోజకవర్గ టీడీపీ ఇంఛార్జ్ సుగవాసి బాలసుబ్రహ్మణ్యంతో వైఎస్సార్‌సీపీ నేతలు భేటీ అయ్యారు. రాజంపేట ఎమ్మెల్యే ఆకేపాటి అమర్‌నాథ్‌రెడ్డి చిన్నాన్న గోపాల్‌రెడ్డి కుమారులు, వైసీపీ రాష్ట్ర కార్యనిర్వాహక కార్యదర్శి ఆకేపాటి శ్రీనివాసులరెడ్డి, ఆయన సోదరుడు మండల పరిషత ఉపాధ్యక్షుడు ఆకేపాటి రంగారెడ్డి, మండలాధ్యక్షుడు వెంకట నారాయణ భేటీ అయ్యారు.

సుగవాసి బాలసుబ్రహ్మణ్యంను పలువురు ఎంపీటీసీ సభ్యులు, సర్పంచ్‌లు, వారి అనుచరులు సుగవాసిని ఘనంగా సత్కరించారు. ఆకేపాటి బ్రదర్స్ సుగవాసిని కలవడం రాజంపేట నియోజక వర్గంలో పెద్ద చర్చనీయాంశమైంది. ఆకేపాటి సోదరులు త్వరలో వైఎస్సార్‌సీపీని వీడి తెలుగుదేశం పార్టీలో చేరేందుకు సిద్ధమైనట్లు ప్రచారం జరుగుతోంది. వీరితోపాటు పలువురు ఎంపీటీసీ సభ్యులు, సర్పంచలు టీడీపీలో చేరబోతున్నట్లు ప్రచారం జరుగుతోంది.

రాజంపేట మండల అభివృద్ధికి అన్నివిధాలా కృషి చేస్తానని సుగవాసి బాలసుబ్రహ్మణ్యం అన్నారు. దివంగత నాయకుడు ఆకేపాటి గోపాల్‌రెడ్డి, తమ తండ్రి పాలకొండ్రాయుడు ప్రాణ స్నేహితులని చెప్పుకొచ్చారు. ఆయన కుమారుల ఆహ్వానం మేరకు రాజంపేట మండల సమావేశానికి వెళ్లానన్నారు. ఇక్కడి సమస్యలు ముఖ్యమంత్రి నారా చంద్రబాబునాయుడు, డిప్యూటీ సీఎం పవన్ కళ్యాణ్‌ దృష్టికి తీసుకెళ్లి పరిష్కరించేందుకు కృషి చేస్తామన్నారు. మరోవైపు నియోజకవర్గంలో లక్ష మందిని టీడీపీలో సభ్యులుగా చేర్చాలన్నారు సుగవాసి. నందలూరు మండలం సభ్యత్వ నమోదులో ముందుండాలి అన్నారు. ఏపీ సార్వత్రిక ఎన్నికల్లో రాజంపేట నియోజకవర్గం నుంచి టీడీపీ అభ్యర్థిగా సుగవాసి సుబ్రహ్మణ్యం పోటీచేసి.. వైఎస్సార్‌సీపీ అభ్యర్థి ఆకేపాటి అమర్‌నాథ్ రెడ్డి చేతిలో ఓడిపోయిన సంగతి తెలిసిందే.

ఆంధ్రప్రదేశ్ ప్రభుత్వం బీచ్‌లకు సంబంధించి తీసుకోబోతున్న నిర్ణయం ఇప్పుడు హాట్ టాపిక్ అవుతోంది. రాష్ట్రవ్యాప్తంగా ఉన్న బీచ్‌లలో ప్రవేశ రుసుము వసూలు చేయబోతున్నట్లు ప్రభుత్వం సంకేతాలు ఇచ్చింది. ఈ మేరకు ప్రభుత్వం వచ్చే జనవరి నుంచి సూర్యలంక, రామవరం, రుషికొండ, కాకినాడ, మైపాడు బీచ్‌లలో ప్రవేశ రుసుం వసూలు చేయాలనిప్రభుత్వం భావిస్తోంది. జనవరి 1 నుంచి సూర్యలంకలో వసూలు ఎంత వసూలు చేయాలని నిర్ణయానికి వచ్చినట్లు బాపట్ల ఎమ్మెల్యే చెప్పారు. ఇదే విషయాన్ని మీడియా ప్రస్తావించగా పర్యాటకశాఖ మంత్రి కందుల దుర్గేష్ క్లారిటీ ఇచ్చారు.

రాష్ట్రవ్యాప్తంగా బీచ్‌లలో ప్రవేశ రుసుము వసూలు చేయాలని ప్రభుత్వం భావిస్తోందని.. కాకపోతే ఎంత అనేది స్పష్టత లేదన్నారు. రూ.20, రూ.25 అన్నది నిర్ణయించలేదని చెప్పారు. రాష్ట్రంలో బీచ్‌లను పర్యాటక కేంద్రాలుగా తయారు చేసిన తర్వాత వీటి నిర్వహణ కూడా ముఖ్యమని.. వీటిని అభివృద్ధి చేశాం.. వదిలేశామని భావన ఉండకూడదన్నారు. అందుకే ప్రభుత్వం రుసుము వసూలు చేసే దిశగా ఆలోచన చేస్తోంది.. పూర్తిగా స్పష్టత రావాల్సి ఉందన్నారు.

ప్రభుత్వం బీచ్‌లలో ప్రవేశ రుసుముకు సంబంధించి.. ఇప్పటి వరకు పూర్తిగా స్పష్టత రాలేదు. ఇప్పటికే బీచ్‌లో పార్కింగ్, బోటింగ్, గేమ్స్ వంటి వాటికి సందర్శకులు డబ్బులు చెల్లిస్తున్నారు.. బీచ్‌లో ప్రవేశ రుసుము అమలు చేస్తే పర్యాటకుల సంఖ్య తగ్గుతుందనే వాదన వినిపిస్తోంది. అయితే నగరాన్ని సుందరంగా ఉంచేందుకు అభివృద్ధి పనులు చేయకపోతే నగరానికి ఉన్న బ్రాండ్ పోతుంది అంటున్నారు అధికారులు. బీచ్‌లలో అభివృద్ధి పనులు చేసి వదిలేస్తే సరిపోదని.. వాటి నిర్వహణ కూడా చాలా ముఖ్యం అంటోంది ప్రభుత్వం.

బాపట్ల జిల్లా సూర్యలంక బీచ్‌లో ప్రవేశ రుసుముపై స్థానిక ఎమ్మెల్యే నరేంద్ర వర్మ స్పందించారు. బాపట్లలోని మున్సిపల్‌ కార్యాలయంలో వివిధ శాఖల అధికారులతో స్థానిక ఎమ్మెల్యే ఇటీవల సమావేశం నిర్వహించారు. కార్తీక మాసం కావడంతో.. సూర్యలంక బీచ్‌కు వచ్చే పర్యాటకులకు కల్పించాల్సిన ఏర్పాట్లపై సమీక్ష చేశారు. సూర్యలంక బీచ్‌కు వచ్చే పర్యాటకుల నుంచి బీచ్‌ అభివృద్ధి కోసం ఫీజు వసూలు చేయనున్నట్లు చెప్పారు. సూర్యలంక సముద్ర తీరం దగ్గర ఫెన్సింగ్‌ ఏర్పాటు చేసి.. బీచ్‌లోకి ప్రవేశించేందుకు మూడు ప్రవేశ మార్గాల ద్వారా పర్యాటకులను అనుమతిస్తామని చెప్పుకొచ్చారు.

సూర్యలంక బీచ్ ప్రవేశ రుసుము కింద రూ.20 వసూలు చేస్తామన్నారు. జనవరి ఒకటి నుంచి రుసుము విధానాన్ని అమలు చేస్తామన్నారు. సూర్యలంక సముద్ర తీరం అభివృద్ధి కోసం ఆదాయ మార్గాల అన్వేషణలో భాగంగా ఈ నిర్ణయం తీసుకున్నామంటున్నారు. బాపట్ల సూర్యలంక సముద్ర తీరాన్ని విదేశీయులను సైతం ఆకర్షించేలా ప్రముఖ పర్యాటక కేంద్రంగా తీర్చిదిద్దుతామని చెప్పారు. సూర్యలకంతో పాటుగా మిగిలిన ప్రముఖ చీబ్‌లలో ప్రవేశ రుసుము వసూలు చేయాలని భావిస్తున్నారు. మరి ప్రభుత్వం ఈ బీచ్‌లకు సంబంధించిన ప్రవేశ రుసుము వ్యవహారంపై ఎలాంటి నిర్ణయం తీసుకుంటుందన్నది చూడాలి.

సోషల్ మీడియా వేదికగా అనుచిత, అసభ్యకర పోస్టులు, వీడియోలు పెడుతున్న, పెట్టినవారిపై ఏపీ ప్రభుత్వం ఉక్కుపాదం మోపుతున్న సంగతి తెలిసిందే. రాష్ట్రవ్యాప్తంగా పలుచోట్ల అరెస్టులు కూడా జరుగుతున్నాయి. అయితే ప్రశ్నిస్తున్నారనే కారణంతోనే సోషల్ మీడియా యాక్టివిస్టులను ప్రభుత్వం వేధిస్తోందని వైసీపీ ఆరోపిస్తోంది. ప్రభుత్వ వైఫల్యాలను ఎండగడుతున్నారనే అక్రమ కేసులు పెడుతున్నారంటూ వైసీపీ అధినేత వైఎస్ జగన్ మోహన్ రెడ్డి ఆరోపిస్తున్నారు. ఈ క్రమంలోనే పోలీసులకు వైఎస్ జగన్ ఇటీవల వార్నింగ్ ఇచ్చారు. ఎల్లకాలం ఈ ప్రభుత్వమే ఉండదని.. ప్రభుత్వం చేస్తున్న అక్రమాలకు మద్దతు తెలిపే పోలీసులు సప్తసముద్రాల అవతల ఉన్నా సరే వెనక్కి పిలిపించి చర్యలు తీసుకుంటామంటూ జగన్ ఇటీవల హెచ్చరించారు.

ఈ క్రమంలోనే తిరుపతి ఎస్పీ సుబ్బారాయుడు పేరును ప్రస్తావించారు వైఎస్ జగన్. తెలంగాణ నుంచి డిప్యుటేషన్ మీద వచ్చిన సుబ్బారాయుడు.. మళ్లీ తెలంగాణకు వెళ్లిపోతాననే ధైర్యంతో వ్యవహరిస్తున్నారంటూ మండిపడ్డారు. “ఎల్లకాలం మీ ప్రభుత్వమే ఉండదు. జమిలి ఎన్నికలు అంటున్నారు. అధికారం తొందరగా పోతుంది. జమిలి ఎన్నికలు రాకపోయినా ఉండేది నాలుగేళ్లు. ఆ తర్వాత వచ్చేది మా ప్రభుత్వమే. మీరు చేసిన చట్టవ్యతిరేక పనులను దగ్గరుండి బయటకు తీస్తాం. రిటైర్‌మెంట్ అయ్యి వెళ్లిపోతామని అనుకుంటున్నారేమో.. రిటైర్ అయినా వెనక్కి పిలిపిస్తాం. తిరుపతిలో సుబ్బారాయుడు ఉన్నాడు. తెలంగాణ నుంచి డిప్యుటేషన్ మీద చంద్రబాబు నాయుడు తెప్పించుకున్నాడు. డిప్యుటేషన్ పూర్తైన తర్వాత తిరిగి తెలంగాణ వెళ్లిపోతాలే అని అనుకుంటున్నాడేమో. తెలంగాణ నుంచి వెనక్కి పిలిపిస్తాం. సప్తసముద్రాల అవతల ఉన్నా సరే.. పిలిపిస్తాం. అందరూ పోలీసులకు చెప్తున్నా” అంటూ జగన్ హెచ్చరించారు.

అయితే వైఎస్ జగన్ హెచ్చరికలపై తిరుపతి ఎస్పీ సుబ్బారాయుడు స్పందించారు. తన విధులను తాను నిర్వర్తిస్తున్నానన్న సుబ్బారాయుడు.. తనపై నమ్మకంతోనే తిరుపతి జిల్లాకు ఎస్పీగా ప్రభుత్వం నియమించిందన్నారు. మంచి ఆశయంతో పనిచేస్తున్నానని చెప్పుకొచ్చారు. తనదీ రాయలసీమ జిల్లానేనన్న సుబ్బారాయుడు.. అనంతపురం జిల్లాగా చెప్పారు. చట్టపరంగానే పనిచేస్తున్నానన్న తిరుపతి ఎస్పీ సుబ్బారాయుడు.. రాజకీయ విమర్సలను పట్టించుకోవాల్సిన అవసరం లేదని అభిప్రాయపడ్డారు. మరోవైపు వైఎస్ జగన్ వ్యాఖ్యలపై డిప్యూటీ సీఎం పవన్ కళ్యాణ్ కూడా స్పందించిన సంగతి తెలిసిందే. అధికారులను బెదిరిస్తే సుమోటో కేసులు పెడతామంటూ వైఎస్ జగన్ వార్నింగ్ ఇచ్చారు.

అసెంబ్లీ సమావేశాలకు వైసీపీ దూరంగా ఉండటంపై షర్మిల ఘాటుగా స్పందించారు. మరోసారి జగన్‌కు స్ట్రాంగ్ కౌంటర్ ఇచ్చారు. మీ అవివేకానికి, అజ్ఞానానికి ఇదే నిదర్శనం అని ట్వీట్ చేశారు. అటు కూటమి ప్రభుత్వంపైనా షర్మిల విమర్శలు గుప్పించారు. షర్మిల కామెంట్స్ ఇప్పుడు హాట్ టాపిక్‌గా మారాయి.

ఏపీసీసీ చీఫ్ వైఎస్ షర్మిల మరోసారి తన సోదరుడు జగన్‌పై సెటైర్లు వేశారు. వైసీపీ తీరు.. అత్త మీద కోపం దుత్త మీద చూపించినట్లుందని విమర్శించారు. అసెంబ్లీ మీద అలగడానికో.. మైకు ఇస్తేనే పోతానని మారం చేయడానికో కాదు ప్రజలు ఓట్లేసింది.. ఇంట్లో కూర్చొని సొంత మైకుల్లో మాట్లాడేందుకు కాదు మిమ్మల్ని ఎమ్మెల్యేగా గెలిపించింది అని ట్వీట్ చేశారు.

‘మీ స్వయం కృతాపరాధం మిమ్మల్ని ప్రతిపక్ష హోదాకి దూరం చేస్తే… ఆ హోదా ఇస్తేనే అసెంబ్లీలో అడుగు పెడతా అనడం మీ అవివేకానికి, అజ్ఞానానికి నిదర్శనం. అసెంబ్లీ అనేది ప్రజాస్వామ్య దేవాలయం. ప్రజల పట్ల, ప్రజా సమస్యల పట్ల అధికార పక్షాన్ని నిలదీసేందుకు ప్రజలు ఇచ్చే గొప్ప అవకాశం’ అని షర్మిల వ్యాఖ్యానించారు.

‘కూటమి ప్రభుత్వం ఇచ్చిన సూపర్ సిక్స్ హామీలకు దిక్కులేదు. మ్యానిఫెస్టోలో ఇచ్చిన హామీలు అమలుకు నోచుకోలేదు. రాష్ట్రంలో శాంతి భద్రతలకు విఘాతం కలుగుతోంది. మహిళలపై దాడులు ఆగడం లేదు. ఇసుక మాఫియా రాజ్యమేలుతోంది. బెల్టు షాపుల దందాను అరికట్టలేదు. 5 నెలలైనా ఒక్క ఉద్యోగం భర్తీ కాలేదు. రోజు రోజుకు నిరుద్యోగం పెరుగుతోంది’ అని షర్మిల ఆరోపించారు.

‘ప్రభుత్వ వైఫల్యాలపై ప్రజా గొంతుక అయ్యే అవకాశం వైసీపీకి ప్రజలు ఇస్తే… ప్రతిపక్షం ఇస్తేనే వస్తాం అనడం సిగ్గు చేటు. ప్రతిపక్షం లేకుంటే సభలోనే ప్రజాపక్షం అవ్వాలని ఇంగితం కూడా లేకపోవడం బాధాకరం. 1994లో కాంగ్రెస్ పార్టీ 26 సీట్లకే పరిమితం అయినా.. కుంగిపోలేదు. మీ లెక్క హోదా కావాలని మారం చేయలేదు. 26 మంది సభ్యులతో సభలో ప్రజల పక్షంగా నిలబడ్డాం. ఎన్నో సమస్యలపై ఆనాడు టీడీపీ ప్రభుత్వానికి చుక్కలు చూపించింది కాంగ్రెస్ పార్టీ’ అని షర్మిల ట్వీట్ చేశారు.

‘2014లో కేంద్రంలో 44 సీట్లకే పరిమితం అయినా, 2019లో 52 సీట్లే వచ్చినా ప్రతిపక్ష హోదా కావాలని అడగలేదు. హోదా లేకున్నా రాహుల్ గాంధీ, మల్లికార్జున్ ఖర్గే ప్రజా సమస్యలపై తమ గొంతు వినిపించారు. మోదీ నిర్లక్ష్యాన్ని ఎండగట్టారు. దేశ ప్రజల సమస్యలపై కాంగ్రెస్ గొంతుకగా మారింది’ అని వివరించారు.

‘ఇప్పటికైనా మీ పిచ్చితనాన్ని పక్కన పెట్టి అసెంబ్లీకి వెళ్ళండి. కూటమి నిర్లక్ష్యాన్ని ఎండగట్టండి. అసెంబ్లీకి వెళ్ళే దమ్ము ధైర్యం లేకుంటే వైసీపీ శాసనసభా పక్షం మొత్తం రాజీనామాలు చేయండి. అప్పుడు ఇంట్లో కాదు.. ఎక్కడైనా కూర్చుని తాపీగా మాట్లాడుకోండి’ అని ఘాటు వ్యాఖ్యలు చేశారు.

ఆంధ్రప్రదేశ్ ఉప ముఖ్యమంత్రి పవన్ కళ్యాణ్ గత కొన్ని రోజులుగా రాష్ట్ర పోలీసులపై ప్రత్యేక దృష్టి సారించారు. డ్రగ్స్, రోడ్డు భద్రత వంటి అంశాలపై ఆయన వ్యాఖ్యలు, పోలీసుల చర్యలపై ఆయన ప్రతిస్పందనలు చర్చనీయాంశంగా మారాయి. పవన్ కళ్యాణ్ ఈ చర్యల వెనుక ఉద్దేశం ఏంటి..? రాజకీయ వ్యూహమా.. లేక లేదా నిజమైన ఆందోళనా.. ఏమిటనేది ప్రస్తుతం ఏపీ వ్యాప్తంగా హాటటాపిక్ గా మారింది.

ఆడబిడ్డల జోలికొస్తే అంతుచూస్తా.. పిచ్చిపిచ్చి పోస్టులు పెడితే పాతరేస్తా.. మత్తుగాళ్ల తుప్పురేగ్గొడతా. అక్రమాలకు పాల్పడితే అడ్రస్‌ లేకుండా చేస్తా.. ఇలాంటి డైలాగ్స్‌ కామన్‌గా డీజీపీనో లేక హోంమినిస్టర్‌ నోటి నుంచో వింటుంటాం. కానీ ఏపీలో మాత్రం డిప్యూటీ సీఎం పవన్‌ కళ్యాణ్‌ నోట పదేపదే వినిపిస్తున్న డైలాగులివి. గతకొన్ని రోజులుగా పవన్‌.. పోలీస్‌శాఖపైనే ఫుల్‌ ఫోకస్‌ పెట్టినట్లు కనిపిస్తోంది. డ్రగ్స్‌ దగ్గర్నుంచి రోడ్‌ సేఫ్టీ వరకు పోలీస్‌శాఖకు సంబంధించిన ప్రతి అంశంపైనా పవన్‌ మాట్లాడుతున్నారు. తప్పులెత్తి చూపుతున్నారు.. అలాగే ఎవరైనా విమర్శిస్తే సపోర్ట్‌ చేస్తున్నారు. మొత్తంగా.. పవన్‌ మనసంతా పోలీస్‌శాఖపైనే అన్నట్లుగా ఉంది. మరి హోంశాఖలో పవన్‌ ఇన్వాల్వ్‌మెంట్‌ దేనికి..? అసలు పవన్‌ ఆలోచనేంటి.. అనేది ఏపీ రాజకీయాల్లో హాట్ టాపిక్ గా మారింది.

ఆంధ్రప్రదేశ్ డిప్యూటీ సీఎం పవన్‌ కళ్యాణ్ ఫుల్‌ స్వింగ్‌లో ఉన్నారు. డిపార్ట్‌మెంట్ ఏదైనా ఐ డోంట్‌ కేర్… తప్పుంటే ప్రశ్నిస్తా… ఫలితం వచ్చేదాకా పనిపడతా అన్నట్లుగా యమా స్పీడు చూపిస్తున్నారు. పవర్‌ కాదు ముఖ్యం… ప్రజాశ్రేయస్సే లక్ష్యమంటూ దూకుడు చూపిస్తున్నారు. అందులోభాగంగానే గతకొన్ని రోజులుగా హోంశాఖపైనే ఫుల్‌ ఫోకస్డ్‌గా మాట్లాడుతున్నారు. ఇటీవల హోంశాఖ మీద కూడా పవన్ ఏ రేంజ్‌లో ఫైర్‌ అయ్యారో…! అందరికీ తెలిసిందే.. తాను హోంమినిస్ట్రీ తీసుకుంటే సిచ్చేవేషన్‌ మరోలా ఉంటుందన్న రేంజ్‌కి వెళ్లారు. ఇక అప్పట్నుంచి హోంశాఖకు సంబంధించిన ప్రతి అంశంపైనా పవన్‌ స్పెషల్‌ ఇంట్రెస్ట్‌ చూపిస్తున్నారు. పొలిటికల్ కొట్లాటల దగ్గర్నుంచి లేటెస్ట్‌గా డ్రగ్స్‌ ఇష్యూ వరకు… ప్రతిదానిపైనా వెంటనే రియాక్ట్‌ అవ్వడమే కాదు పోలీసుల యాక్షన్‌పైనా ఆరా తీస్తున్నారు.

లేటెస్ట్‌గా డీజీపీ ద్వారకా తిరుమలరావుతో పవన్‌ భేటీ అయ్యారు. రాష్ట్రంలో జరుగుతున్న నేరాలు-ఘోరాలపై గ్రౌండ్‌ లెవల్‌లో చర్చించారు. సోషల్‌ మీడియా పోస్టులు, అరెస్టులపైనా ఆరా తీశారు. ఆడపిల్లలపై జరుగుతున్న అఘాయిత్యాలను అరికట్టేందుకు తీసుకున్న చర్యపైనా చర్చలు జరిపారు. ఇలా ఒక్కటేంటి… రాష్ట్రంలో శాంతిభద్రతలపై క్షుణ్ణంగానే డీజీపీతో మాట్లాడినట్లు తెలుస్తోంది.

ఇటు డ్రగ్స్‌పైనా ఘాటుగానే రియాక్ట్‌ అయ్యారు డిప్యూటీ సీఎం. మత్తుగాళ్ల తుప్పురేగ్గొట్టడమే కాదు.. మత్తుపదార్ధాలను సప్లై చేస్తున్న కంత్రిగాళ్ల అంతుచూస్తానంటున్నారు. గంజాయి సాగు చేస్తే గుంజి కొడతాంటూ మాటల మంటలే కాదు.. ట్వీట్లతోనూ మాదకద్రవ్యాలపై మండిపడుతున్నారు. గతంలో విశాఖ పోర్టులో దొరికిన భారీ కొకైన్‌ను గుర్తుచేస్తూ.. డ్రగ్స్‌ కంట్రోల్‌కి సమగ్ర ప్రణాళిక కావాలన్నారు డిప్యూటీ సీఎం.

అంతకుముందు సోషల్‌ మీడియా పోస్టులపై పవన్‌ ఎలా ఫైర్‌ అయ్యారో… అవుతూనే ఉన్నారో ఇప్పటికీ చూస్తున్నాం. మురికి పోస్టులు పెడితే మడపెడతాం అన్న రేంజ్‌లో పవన్‌ వార్నింగులిస్తున్నారు. పోలీసులు కేర్‌ఫుల్‌గా ఉండాలి.. కన్నింగ్‌గాళ్ల కహానీ తేల్చాలంటూ పదేపదే మాట్లాడుతున్నారాయన. అలాగే అంతకుముందు ఆడవాళ్ల అఘాయిత్యాలపైనా నిప్పులు చెరిగారు. పోలీసులు ఏం చేస్తున్నారంటూ ఆగ్రహావేశాలు వెల్లగక్కారు… ఎవరదేని చూడొద్దు… ఎక్కడినుంచి వచ్చారన్నది పట్టించుకోవద్దు… తప్పు చేస్తే తాటతీయాల్సిందేనన్నారు. ఇటు రోడ్డు ప్రమాదాలపైనా అసంతృప్తి వ్యక్తం చేశారు. రోడ్డు ప్రమాదాలకు సంబంధించిన కేసుల్లో పోలీసులు నిర్లక్ష్యంగా వ్యవహరిస్తున్నారన్న ఆరోపణలో ఆగ్రహం వ్యక్తం చేశారు. పోలీసులు బాధ్యతగా వ్యవహరించాలంటూ స్వీట్‌ వార్నింగ్ ఇచ్చారు. మరోవైపు పోలీసుల తీరుపై మండిపడుతున్న పవన్‌… విపక్షాలు పోలీసులపై విమర్శలు గుప్పిస్తే వాటిని తిప్పికొడుతూ పోలీసులనూ వెనకేసుకొస్తున్నారు కూడా..

మొత్తంగా.. గతకొన్ని రోజులుగా పవన్‌ మాట్లాడుతున్న ప్రతి అంశం హోంశాఖకు సంబంధించిందే. దీంతో పవన్‌ టార్గెట్‌ ఏంటి..? లా అండ్‌ ఆర్డర్‌పై ఎందుకుంతా ఫోకస్డ్‌గా ఉన్నారు..? ఏం చేయాలనుకుంటున్నారు…? అన్న అంశాలు ఆసక్తిగా మారాయి.

రూ. 2.94 లక్షల కోట్ల బడ్జెట్‌ను ఆర్ధిక మంత్రి పయ్యావుల కేశవ్ అసెంబ్లీలో ప్రవేశపెట్టారు. ఈ బడ్జెట్‌కు అంకెలకు మించిన ప్రాధాన్యం ఉందన్నారు. గత ప్రభుత్వ విధానాలతో ఆర్ధిక రంగం కుదేలైందని ఆందోళన వ్యక్తం చేశారు. రాష్ట్రంలో ప్రాజెక్టులన్నీ స్తంభించిపోయాయని, ముఖ్య పధకాలకు చెల్లింపులు జరగలేదని ఆరోపించారు. రాష్ట్రాన్ని పునర్నిర్మాణం చేయాల్సి ఉందని చెప్పారు.

ఈ సెషన్లో సభ ముందుకు కీలక బిల్లులు రానున్నాయి. — ల్యాండ్ గ్రాబింగ్ నిరోధ‌క చ‌ట్టం 2024 తెచ్చే అవకాశం ఉంది. పాత చట్టాన్ని రద్దు చేయనున్నారు. — దేవాలయాల పాలకమండలిలో మరో ఇద్దరికి అవకాశం కల్పిస్తూ సవరణ బిల్లు ప్రవేశపెట్టే అవకాశం — గత ప్రభుత్వ జ్యుడీషియల్‌ కమిషన్‌ రద్దు చేస్తూ బిల్లు — జ్యుడీషియల్‌ అధికారుల రిటైర్మెంట్‌ వయసు 61ఏళ్లకు పెంపు — గత సర్కారు తెచ్చిన ప్రభుత్వ మద్యం దుకాణాలు రద్దు చేస్తూ బిల్లు

కేటాయింపులు ఇలా..
రూ.2,94,427 కోట్లతో ఏపీ వార్షిక బడ్జెట్

రెవెన్యూ వ్యయం అంచనా -రూ.2.35 లక్షల కోట్లు

మూలధన వ్యయం అంచనా -రూ.32,712 కోట్లు

రెవెన్యూ లోటు – రూ.34,743 కోట్లు

ద్రవ్యలోటు -రూ.68,743 కోట్లు

GSDPలో రెవెన్యూ లోటు అంచనా 4.19 శాతం

పరిశ్రమలు, వాణిజ్యం- రూ.3,127 కోట్లు

నీటిపారుదల -రూ.16,705 కోట్లు

గృహనిర్మాణం -రూ.4012 కోట్లు

పురపాలక, పట్టణాభివృద్ధి -రూ.11,490 కోట్లు

పంచాయతీరాజ్‌, గ్రామీణాభివృద్ధి -రూ.16739 కోట్లు

ఆరోగ్యం -రూ.18,421 కోట్లు

ఉన్నత విద్య -రూ.2326 కోట్లు

ఎస్సీ సంక్షేమం -రూ.18,497 కోట్లు

ఎస్టీ సంక్షేమం -రూ.7,557

బీసీ సంక్షేమం -రూ.39,007 కోట్లు

అల్ప సంఖ్యాక వర్గాల సంక్షేమం -రూ.4,376 కోట్లు

వ్యవసాయ, అనుబంధ రంగాలు -రూ.11,855 కోట్లు

మహిళా, శిశు సంక్షేమం -రూ.4285 కోట్లు

స్కిల్‌ డెవలప్‌మెంట్ -రూ.1215 కోట్లు

పాఠశాల విద్య శాఖకు రూ.29,909 కోట్లు

ఇంధన శాఖ -రూ.8,207 కోట్లు