శీతాకాలంలో మన శరీరం అనేక మార్పులకు లోనవుతుంది. చలి కారణంగా జీవక్రియ నెమ్మదిస్తుంది, రోగనిరోధక శక్తి తగ్గుతుంది, హార్మోన్ల సమతుల్యతలో మార్పులు వస్తాయి.
ఈ సమయంలో సూర్యరశ్మి తక్కువగా ఉండటం వల్ల విటమిన్-డి లోపం సాధారణం అవుతుంది. అలాగే మధుమేహం, థైరాయిడ్, కొలెస్ట్రాల్ వంటి సమస్యలు కూడా పెరిగే అవకాశం ఉంటుంది. చాలా సందర్భాల్లో ఈ లక్షణాలు స్పష్టంగా కనిపించవు. అందుకే శరీరంలో జరుగుతున్న మార్పులను ముందుగానే గుర్తించడానికి రక్త పరీక్షలు చాలా ఉపయోగపడతాయి. శీతాకాలంలో ఏ పరీక్షలు చేయించుకోవాలో ఇప్పుడు తెలుసుకుందాం..
విటమిన్-డి టెస్ట్
శీతాకాలంలో సూర్యకాంతి తక్కువగా ఉండటం వల్ల విటమిన్-డి లోపం ఏర్పడుతుంది. దీనివల్ల ఎముకలు బలహీనపడటం, త్వరగా అలసిపోవడం, రోగనిరోధక శక్తి తగ్గడం జరుగుతుంది. ఈ లోపాన్ని ముందుగానే గుర్తించడానికి ఈ పరీక్ష చాలా అవసరం.
డయాబెటిస్ టెస్ట్
చలికాలంలో శారీరక చురుకుదనం తగ్గిపోతుంది, ఆహారపు అలవాట్లు మారుతాయి. దీంతో రక్తంలో చక్కెర స్థాయిలు మారే అవకాశం ఉంటుంది. మధుమేహాన్ని గుర్తించడానికి ఈ పరీక్ష అవసరం.
థైరాయిడ్ టెస్ట్
శీతాకాలంలో హార్మోన్ల మార్పులు ఎక్కువగా ఉంటాయి. దీనివల్ల థైరాయిడ్ సమస్యలు పెరిగే అవకాశం ఉంది. బరువు పెరగడం, అలసట, చలి ఎక్కువగా అనిపించడం వంటి లక్షణాలు కనిపిస్తాయి. సకాలంలో పరీక్ష చేయించుకుంటే సమస్యను అదుపులో ఉంచుకోవచ్చు.
కొలెస్ట్రాల్ టెస్ట్
చలికాలంలో వేయించిన పదార్థాలు, కొవ్వు ఎక్కువగా ఉన్న ఆహారం తీసుకోవడం వల్ల కొలెస్ట్రాల్ స్థాయిలు పెరుగుతాయి. ఇది గుండెజబ్బుల ప్రమాదాన్ని పెంచుతుంది. గుండె ఆరోగ్యాన్ని తెలుసుకోవడానికి ఈ పరీక్ష అవసరం.
సీబీసీ
ఈ టెస్ట్ ద్వారా హిమోగ్లోబిన్ స్థాయి, ఇన్ఫెక్షన్ ఉన్నదా లేదా, రోగనిరోధక శక్తి స్థాయి వంటి వివరాలు తెలుస్తాయి. శీతాకాలంలో తరచూ వచ్చే జబ్బులు, బలహీనతకు కారణం తెలుసుకోవడానికి ఇది చాలా ఉపయోగపడుతుంది.
గుర్తుంచుకోవాల్సిన విషయాలు
- కొన్ని పరీక్షలకు ఉపవాసం అవసరం ఉంటుంది. కాబట్టి ముందుగా డాక్టర్ను అడగండి.
- పరీక్షకు ముందు రోజు వేయించిన ఆహారం తినకండి.
- మద్యం, పొగతాగడం మానేయండి. ఇవి ఫలితాలను ప్రభావితం చేస్తాయి.
- మీరు తీసుకుంటున్న మందులు, సప్లిమెంట్ల గురించి డాక్టర్కు చెప్పండి.
- పరీక్ష రోజున పుష్కలంగా నీరు తాగండి.
- రిపోర్టులు వచ్చిన తర్వాత మీరే నిర్ణయాలు తీసుకోకుండా డాక్టర్ సలహాలను పాటించండి.
ఆరోగ్యంగా ఉండాలంటే..
- రోజూ గోరువెచ్చని నీరు తాగండి.
- పోషకమైన, సమతుల్య ఆహారం తీసుకోండి.
- క్రమం తప్పకుండా తేలికపాటి వ్యాయామం లేదా యోగా చేయండి.
- తగినంత నిద్రపోండి.
- ఒత్తిడిని దూరంగా ఉంచడానికి ప్రయత్నించండి.
Note: ఇందులోని సమాచారం ఇంటర్నెట్ ఆధారంగా మీకు అందించడం జరుగుతోంది. ఇది కేవలం మీ అవగాహన కోసమే.
