ఐకాన్ స్టార్ అల్లు అర్జున్కు (Allu Arjun) పోలీసులు షాక్ ఇచ్చారు. పుష్ప 2 (Pushpa 2) ప్రీమియర్ షో నేపథ్యంలో బుధవారం రాత్రి సంధ్య థియేటర్ తొక్కిసలాట ఘటనకు సంబంధించి ఆయనపై కేసు నమోదు చేసినట్లు సెంట్రల్ జోన్ డీసీపీ అక్షాంశ్ యాదవ్ తెలిపారు.
థియేటర్ యాజమాన్యం, సెక్యూరిటీ మేనేజర్పైనా కేసు నమోదు చేసినట్లు చెప్పారు. సెక్షన్ 105, 118 BNS యాక్ట్ ప్రకారం చిక్కడపల్లి పోలీస్ స్టేషన్లో కేసు నమోదు చేశారు. ప్రీమియర్ షో సందర్భంగా అల్లు అర్జున్ థియేటర్కు వస్తోన్న నేపథ్యంలో భద్రత విషయంలో నిర్లక్ష్యంగా వ్యవహరించినందుకు థియేటర్ యాజమాన్యంపై కేసు నమోదు చేసినట్లు తెలుస్తోంది. అల్లు అర్జున్ వస్తున్నారన్న సమాచారాన్ని సరైన సమయంలో చెప్పకుండా బాధ్యతా రాహిత్యంగా వ్యవహరించారని ఆయన టీంపై కూడా కేసు నమోదు చేసినట్లు పోలీసులు తెలిపారు.
హైదరాబాద్ ఆర్టీసీ క్రాస్ రోడ్డులోని సంధ్య థియేటర్లో బుధవారం రాత్రి 9:40 గంటలకు పుష్ప – 2 ప్రీమియర్ షో నేపథ్యంలో అధిక సంఖ్యలో అభిమానులు హాజరయ్యారని డీసీపీ అక్షాంశ్ యాదవ్ తెలిపారు. అభిమానులతో పాటు కీలక నటులు థియేటర్కు వస్తారనే సమాచారం తమకు లేదని.. కనీసం థియేటర్ యాజమాన్యం కూడా తొలుత సమాచారం ఇవ్వలేదని చెప్పారు. దానికి తోడు ఎలాంటి ముందస్తు జాగ్రత్తలు తీసుకోలేదని.. క్రౌడ్ అదుపు చేసేందుకు థియేటర్ ఎంట్రీ, ఎగ్జిట్లో ఎలాంటి ప్రైవేట్ సెక్యూరిటీని ఏర్పాటు చేయలేదన్నారు. రాత్రి 9:40 గంటలకు వ్యక్తిగత భద్రతా సిబ్బందితో అల్లు అర్జున్ థియేటర్ వద్దకు రాగానే.. ఆయన్ను చూసేందుకు అభిమానులు ఒక్కసారిగా ఎగబడడంతో గందరగోళం నెలకొందని పేర్కొన్నారు.
పోలీసులు అభిమానులను అదుపు చేసే క్రమంలో తోపులాట జరిగిందని.. దిల్సుఖ్నగర్కు చెందిన రేవతి కుటుంబం ఈ తొక్కిసలాటలో కింద పడిపోయారని డీసీపీ తెలిపారు. అధిక సంఖ్యలో అభిమానులు ఉండడంతో వారికి ఊపిరాడలేదని.. పోలీస్ సిబ్బంది వారిని గమనించి బయటకు లాగారని చెప్పారు. రేవతితో పాటు కుమారుడు 13 ఏళ్ల శ్రీతేజకు సీపీఆర్ చేసి దుర్గాబాయి దేశ్ ముఖ్ ఆస్పత్రికి తరలించినట్లు పేర్కొన్నారు. అప్పటికే రేవతి మృతి చెందినట్లు వైద్యులు నిర్ధారించి శ్రీతేజను మరో ఆస్పత్రికి తరలించాలని సూచించినట్లు వెల్లడించారు. ఈ ఘటనపై బాధితురాలి కుటుంబ సభ్యుల ఫిర్యాదు మేరకు కేసు నమోదు చేశామని.. పూర్తి స్థాయి దర్యాప్తు అనంతరం బాధ్యులపై కఠిన చర్యలు తీసుకుంటామని స్పష్టం చేశారు.
మైత్రీ మూవీ మేకర్స్ విచారం
ఈ ఘటనపై పుష్ప 2 చిత్ర నిర్మాణ సంస్థ మైత్రీ మూవీ మేకర్స్ తీవ్ర విచారం వ్యక్తం చేసింది. బాధిత కుటుంబానికి అండగా ఉంటామని తెలిపింది. అటు, ఈ ఘటనలో అస్వస్థతకు గురైన బాలుడు శ్రీతేజ ప్రస్తుతం ఆస్పత్రిలో చికిత్స పొందుతుండగా పరిస్థితి విషమంగా ఉన్నట్లు తెలుస్తోంది. తమ బిడ్డ అల్లు అర్జున్కు బిగ్ ఫ్యాన్ అని అతని కోరిక మేరకు ప్రీమియర్ షోకు వెళ్లామని బాలుని తండ్రి కన్నీటిపర్యంతమయ్యారు.
