ఊపిరితిత్తుల ఇన్ఫెక్షన్లు వైరస్, బ్యాక్టీరియా లేదా శిలీంధ్రాల వల్ల సంభవించవచ్చు. ఇవి శ్వాసనాళాల ద్వారా శరీరంలోకి ప్రవేశిస్తాయి. బలహీనమైన రోగనిరోధక వ్యవస్థ, శరీరానికి సంబంధించిన ఆటో ఇమ్యూన్ వ్యాధులు, కొన్ని రకాల మందుల వాడకం, గాలి కాలుష్యం వంటివి కూడా ఊపిరితిత్తుల ఇన్ఫెక్షన్లకు కారణమవుతాయి. ఇంకా, ధూమపానం, కలుషిత వాతావరణం, దీర్ఘకాలిక దగ్గు లేదా గొంతు సమస్య కూడా ఇన్ఫెక్షన్ ప్రమాదాన్ని పెంచుతుంది. మధుమేహం, గుండె జబ్బులు లేదా ఉబ్బసం వంటి దీర్ఘకాలిక పరిస్థితులతో బాధపడుతున్న కొంతమందిలో ఇన్ఫెక్షన్ మరింత తీవ్రంగా ఉంటుంది. సరైన ఆహారం లేకపోవడం కూడా ప్రమాదాన్ని పెంచుతుంది.
ఊపిరితిత్తుల ఇన్ఫెక్షన్ ప్రారంభ లక్షణాలలో తరచుగా నిరంతర దగ్గు, కఫం, తేలికపాటి జ్వరం, అలసట, శ్వాస ఆడకపోవడం ఉంటాయి. కొన్ని సందర్భాల్లో ఛాతీ నొప్పి, అధిక జ్వరం, ఎముక లేదా కండరాల నొప్పి, తుమ్ములు లేదా గొంతులో మంట కూడా సంభవించవచ్చు. తీవ్రమైన ఇన్ఫెక్షన్లలో శ్వాస తీసుకోవడంలో ఇబ్బంది, వేగంగా శ్వాస తీసుకోవడం, ముఖం నీలిరంగు లేదా పాలిపోవడం, నిరంతర అధిక జ్వరం ఉంటాయి. ఈ లక్షణాలు కనిపిస్తే, వెంటనే వైద్యుడిని సంప్రదించాలి. ఎందుకంటే ఇన్ఫెక్షన్ తీవ్రమైతే ప్రాణాంతకం కావచ్చు.
ఏం చేయాలి?
- కలుషితమైన లేదా రద్దీగా ఉండే ప్రదేశాలకు వెళ్లకుండా ఉండటం మంచిది.
- దగ్గినప్పుడు లేదా తుమ్మినప్పుడు రుమాలు లేదా మోచేయిని అడ్డు పెట్టుకోండి. తర్వాత చేతులు కడుక్కోండి.
- ధూమపానం, సిగరెట్లకు దూరంగా ఉండండి.
- మీ రోగనిరోధక శక్తి బలంగా ఉండటానికి పోషకమైన ఆహారం తీసుకోండి.
- ఫ్లూ లేదా న్యుమోకాకల్ వ్యాక్సిన్ వంటి సమస్యలకు టీకాలు వేయించుకోండి.
- ఇంట్లో వెంటిలేషన్ ఉండేలా జాగ్రత్తలు తీసుకోండి.
- ఊపిరితిత్తుల ఇన్ఫెక్షన్ లక్షణాలు మీకు ఉంటే వైద్యుడిని సంప్రదించి చికిత్స తీసుకోండి
