ఎంప్లాయీస్ పెన్షన్ స్కీమ్ ద్వారా పెన్షన్ పొందుతున్న వారందరికీ శుభవార్త అందించింది ఈపీఎఫ్ఓ. ఎలాంటి ఇబ్బందులు లేకుండా ఎక్కడి నుంచైనా పెన్షన్ విత్ డ్రా చేసుకునేందుకు సరికొత్త వ్యవస్థను అభివృద్ధి చేస్తోంది. అదే సెంట్రలైజ్డ్ పెన్షన్ పేమెంట్స్ సిస్టమ్ (CPPS). ఈ కొత్త వ్యవస్థ పైలట్ ప్రాజెక్ట్ సైతం ఇటీవలే విజయవంతంగా పూర్తయింది. పెన్షనర్లు తమ పెన్షన్ పేమెంట్ ఆర్డర్ (PPO) ట్రాన్స్‌ఫర్ చేయకుండానే దేశంలోని ఎక్కడి నుంచైనా ఏ ఇబ్బందులు లేకుండా ఈజీగా పెన్షన్ తీసుకునేందుకు ఈ వ్యవస్థ అవకాశం కల్పిస్తుంది.
ఈ మేరకు కేంద్ర కార్మిక, ఉపాధికల్పన మంత్రిత్వ శాఖ మంత్రి మాన్సుఖ్ మాండవియా గత వారంలోనే కీలక ప్రకటన చేశారు. ఎంప్లాయీస్ పెన్షన్ స్కీమ్ 1995 పరిధిలో తీసుకొస్తున్న సెంట్రలైజ్డ్ పెన్షన్ పేమెంట్స్ సిస్టమ్ సీపీపీఎస్ పైలట్ ప్రాజెక్ట్ విజయవంతంగా పూర్తయినట్లు ప్రకటించారు. అక్టోబర్ 29, అక్టోబర్ 30, 2024 తేదీల్లో ఈ పైలెట్ ప్రాజెక్ట్ చేపట్టామని, ఇందులో భాగంగా అక్టోబర్ 2024 కు సంబంధించి జమ్మూ, శ్రీనగర్, కర్నాల్ ప్రాంతంలోని మొత్తం 49 వేల మంది ఈపీఎస్ పెన్షనర్లకు సుమారు రూ. 11 కోట్ల పెన్షన్ పంపిణీ చేసినట్లు తెలిపారు.
సీపీపీఎస్ వ్యవస్థను ఆమోదించడం ద్వారా ఈపీఎఫ్ఓ ఆధునికీకరణలో మరో కీలక మైలురాయిగా మారుతుందన్నారు మాన్సుఖ్ మాండవియా. దీని ద్వారా పెన్షనర్లు దేశవ్యాప్తంగా ఎక్కడైనా, ఏ బ్యాంకు, బ్రాంచ్ నుంచైనా పెన్షన్ తీసుకోవచ్చన్నారు. పెన్షనర్లకు సంబంధించి దీర్ఘకాలంగా ఉన్న అన్ని సమస్యలకు ఇది పరిష్కారం చూపిస్తుందన్నారు. ఈ కొత్త సీపీపీఎస్ వ్యవస్థను ప్రస్తుతం జరుగుతున్న ఈపీఎఫ్ఓ ఐటీ ఆధునికీకరణ ప్రాజెక్ట్ సెంట్రలైజ్డ్ ఐటీ ఎనేబుల్డ్ సిస్టమ్ (CITES 2.01) లో భాగంగా జనవరి 2025 నాటికి పూర్తి స్థాయిలో అందుబాటులోకి తెస్తామన్నారు. ఈ కొత్త పెన్షన్ పేమెంట్ వ్యవస్థ అందుబాటులోకి వచ్చినట్లయితే 78 లక్షల మంది ఈపీఎస్ పెన్షనర్లకు మేలు జరుగుతుందన్నారు.
ఈపీఎస్ ఫెన్షనర్ల సేవలను మరింత అభివృద్ధి చేసే విధంగా ఈపీఎఫ్ఓ కృషి చేస్తోందని, అందులో భాగంగానే ఈ సీపీపీఎస్ వ్యవస్థను అందుబాటులోకి తీసుకొస్తున్నట్లు కేంద్ర మంత్రి తెలిపారు. మరోవైపు.. అక్టోబర్ 10వ తేదీన సెంట్రల్ బోర్డ్, ఈపీఎఫ్ఓ, ఎగ్జిక్యూటివ్ కమిటీ 109వ సమావేశంలో కేంద్రీకృత పెన్షన్ చెల్లింపును ప్రారంభించడానికి కావాల్సిన చర్యలు, ఐటీ సంబంధిత సాఫ్ట్‌వేర్, హార్డ్‌వేర్ మెరుగుపరచడం వంటి అంశాలపై చర్చించారు. ఐటి వ్యవస్థను పూర్తి స్థాయిలో అందుబాటులోకి తెచ్చేందుకు టైమ్‌లైన్ నిర్దేశించినట్లు సమాచారం.
