భారత్లో ‘ఫాల్కన్ 2000’ బిజినెస్ ఎగ్జిక్యూటివ్ జెట్ల తయారీ నిమిత్తం ఫ్రాన్స్కు చెందిన దసో ఏవియేషన్తో వ్యూహాత్మక భాగస్వామ్య ఒప్పందాన్ని అనిల్ అంబానీ నేతృత్వంలోని రిలయన్స్ ఇన్ఫ్రాస్ట్రక్చర్ కుదుర్చుకుంది.
అంతర్జాతీయ మార్కెట్లకు ఎగుమతి చేసే నిమిత్తం భారత్లో ఈ జెట్లను తయారు చేస్తారు. పారిస్ ఎయిర్ షోలో దసో ఏవియేషన్, రిలయన్స్ ఇన్ఫ్రాస్ట్రక్చర్ అనుబంధ సంస్థ రిలయన్స్ ఏరోస్ట్రక్చర్ లిమిటెడ్ ఈ విషయాన్ని ప్రకటించాయి. ఇందుకోసం మహారాష్ట్రలోని నాగపూర్లో ఫాల్కన్ 2000 విమానాల అసెంబ్లింగ్ కేంద్రాన్ని ఏర్పాటు చేయనున్నారు. ఈ ప్లాంటు కార్యకలాపాలు మొదలైతే అమెరికా, ఫ్రాన్స్, కెనడా, బ్రెజిల్ తర్వాత బిజినెస్ జెట్స్ తయారు చేస్తున్న దేశాల జాబితాలో భారత్ కూడా చేరుతుంది. ఫాల్కన్ 2000 జెట్స్ను ఫ్రాన్స్ వెలుపల తయారు చేయనుండటమూ ఇదే తొలిసారి.
దసో ఫాల్కన్ 2000 అనేది 2 ఇంజిన్లతో కూడిన విభిన్న బిజినెస్ జెట్. ఇందులో 8-10 మంది ప్రయాణించొచ్చు. ‘దసో ఏవియేషన్తో భాగస్వామ్యం రిలయన్స్ గ్రూపు చరిత్రలోనే కీలక మైలురాయి. అంతర్జాతీయంగా విమానాల తయారీ కేంద్రంగా భారత్ స్థానాన్ని బలోపేతం చేసేందుకు ఈ భాగస్వామ్యం తోడ్పడుతుంది. దేశ సాంకేతికత నైపుణ్యానికి, తయారీ సామర్థ్యానికి గర్వించదగ్గ ప్రతీకగా భారత తయారీ ఫాల్కన్ 2000 నిలుస్తుంద’ని రిలయన్స్ గ్రూపు ఛైర్మన్ అనిల్ అంబానీ తెలిపారు.
