పెరుగుతున్న ఆరోగ్య సంరక్షణ ఖర్చులపై సంసిద్ధంగా ఉండడానికి ఆరోగ్య బీమా చాలా కీలకం. ప్రస్తుతం ఆరోగ్య బీమా అవసరం అందరికీ ఉంది. ముఖ్యంగా, ఇది పెద్దలకు మరింత అవసరం.
భారతీయ సంస్కృతిలో పెద్దలకు ఎల్లప్పుడూ ప్రత్యేక స్థానం ఉంటుంది. మానసిక, శారీరక శ్రేయస్సును దృష్టిలో పెట్టుకుని ఆరోగ్య బీమాను కొనుగోలు చేస్తుంటారు. తల్లిదండ్రులకు మాత్రమే కాకుండా అత్తమామలను కూడా కలుపుకుని ఆరోగ్య బీమా తీసుకోవడం వల్ల మొత్తం కుటుంబ ఆరోగ్య/ఆర్థిక భవిష్యత్తు సురక్షితంగా ఉంటుంది. ముఖ్యంగా, కుటుంబ సభ్యుల్లో ఉన్న సీనియర్లను కలుపుకుని బీమా పాలసీ తీసుకునేటప్పుడు ఎలా వ్యవహరించాలి అనేది ఇక్కడ తెలుసుకుందాం.
అందరికీ ఆరోగ్య బీమా
మీతో పాటు మీ జీవిత భాగస్వామి, పిల్లలు, తల్లిదండ్రులు, అత్తమామలతో సహా గరిష్ఠంగా 10 మంది కుటుంబ సభ్యులకు ఆరోగ్య బీమా కొనుగోలు చేయొచ్చు. బీమా ఉండడం వల్ల మొత్తం కుటుంబ సభ్యులు సంపూర్ణ ఆరోగ్య ప్రణాళిక ద్వారా రక్షణ పొందుతారు. పిల్లలు పెరిగే కొద్ది వారికి వైద్య సంరక్షణ అవసరాలు ఎలా అవసరమో, వృద్ధులైన తల్లిదండ్రులు, అత్తమామలకు అంతకన్నా ఎక్కువ అవసరం. వీరు ఇప్పటికే అనేక ఆరోగ్య సమస్యల నుంచి సతమతమవుతుంటారు. కాబట్టి, వారి ఆరోగ్య రక్షణకు ఆరోగ్య బీమా ఎంతగానో ఉపయోగపడుతుంది. మీరు ఎంచుకున్న కవరేజ్ ఆధారంగా సెక్షన్ 80D కింద రూ.50 వేల నుంచి రూ.1 లక్ష వరకు పన్ను మినహాయింపు కూడా పొందొచ్చు.
అనువైన ప్లాన్లు
తల్లిదండ్రులతో పాటు అత్తమామలను కవర్ చేయడానికి అనువైన ప్లాన్ ఏదో తెలుసుకోవడం చాలా అవసరం. భారత్లో కుటుంబాలకు సంబంధించిన విభిన్న అవసరాలను తీర్చడానికి అనేక రకాల ఆరోగ్య బీమా పథకాలు అందుబాటులో ఉన్నాయి. వీరు ఆసుపత్రిలో చేరే సమయంలో వీరి వైద్య ఖర్చులు, డే కేర్ ట్రీట్మెంట్స్, అంబులెన్స్ సేవలు, డయాగ్నొస్టిక్స్ పరీక్షలు మొదలైన వాటిని కవర్ చేయడానికి బీమా పాలసీలు ఉన్నాయి. అందులో కీలకమైన ప్లాన్లు ఏంటో ఇక్కడ తెలుసుకుందాం.
క్రిటికల్ ఇల్నెస్ ఇన్సూరెన్స్ ప్లాన్: ఇది క్యాన్సర్, గుండెపోటు, స్ట్రోక్ వంటి వాటితో సహా ఏవైనా తీవ్రమైన అనారోగ్యాలు ఉన్నట్లు నిర్ధారణ అయినట్లయితే, అసలు వైద్య ఖర్చులతో సంబంధం లేకుండా క్రిటికల్ ఇన్సూరెన్స్ ప్లాన్లు ఏకమొత్తాన్ని చెల్లిస్తాయి.
సీనియర్ సిటిజన్ హెల్త్ ఇన్సూరెన్స్: 60 సంవత్సరాలు, అంతకంటే ఎక్కువ వయసు గల వ్యక్తుల కోసం దీన్ని రూపొందించారు. ఇది వయసు సంబంధిత వ్యాధులు, వైద్య పరిస్థితులను కవర్ చేస్తుంది.
టాప్-అప్ ప్లాన్/సూపర్ టాప్-అప్: టాప్-అప్ హెల్త్ ఇన్సూరెన్స్ ప్లాన్, మీ బీమా పాలసీలో సీనియర్లకు వారి బేస్ మెడిక్లెయిం పాలసీపై అదనపు వైద్య కవరేజీని అందిస్తుంది. వారి బేస్ పాలసీ కవర్ పూర్తిగా వినియోగించుకున్నాక, ఈ పాలసీ ఉపయోగపడుతుంది.
ఫ్యామిలీ ఫ్లోటర్ ప్లాన్
అత్తమామలను కవర్ చేయడానికి ఫ్యామిలీ ఫ్లోటర్ హెల్త్ ఇన్సూరెన్స్ ప్లాన్ సరైన ఎంపిక. ఈ ప్లాన్ మీ జీవిత భాగస్వామి, పిల్లలు, మీపై ఆధారపడిన తల్లిదండ్రులు లేదా అత్తమామలతో సహా మొత్తం కుటుంబాన్ని ఒకే పాలసీ కింద కవర్ చేస్తుంది. ప్రతి కుటుంబ సభ్యుని కోసం వ్యక్తిగత ఆరోగ్య బీమా పాలసీలను కొనుగోలు చేయడం కంటే ఫ్యామిలీ ఫ్లోటర్ ప్లాన్ సరసమైంది అని చెప్పొచ్చు. ఇది హాస్పిటలైజేషన్ ఖర్చులు, హాస్పిటలైజేషన్కు ముందు/తర్వాత ఖర్చులు, డే-కేర్ విధానాలు, మరిన్నింటి కోసం విస్తృతమైన కవరేజీని అందిస్తాయి. ఫ్యామిలి ఫ్లోటర్ బీమాతో మొత్తం కుటుంబాన్ని కవర్ చేసే ఒకే పాలసీతో, బీమా నిర్వహణ మరింత సరళంగా మారుతుంది.
ఆరోగ్య బీమా ఎంత?
మీ తల్లిదండ్రుల, అత్తమామల వైద్య చరిత్ర, వయసు సంబంధిత వ్యాధుల ఖర్చులు అంచనా వేసి బీమా మొత్తాన్ని తీసుకోవాలి. సీనియర్ సిటిజన్లు ఎక్కువ ఆరోగ్య సమస్యలను కలిగి ఉంటారు. అలాగే, కుటుంబ సభ్యలందరి దీర్ఘకాలిక సంరక్షణ అవసరాలపై దృష్టి కేంద్రీకరించాలి. కాబట్టి, ఆరోగ్య బీమా ప్లాన్లో సీనియర్లు ఉన్నప్పుడు రూ.50 లక్షల వరకు వైద్య అవసరాలకు బీమా ఉండడం మేలు.
ప్రీమియం ఎంత?
ప్రీమియం అనేది కుటుంబ సభ్యుల వయసు, వారి ఆరోగ్య పరిస్థితులు, ఎంచుకున్న నిర్దిష్ట ఆరోగ్య బీమా ప్లాన్ వంటి అనేక అంశాలపై ఆధారపడి ఉంటుంది. ఉదాహరణకు మీరు, జీవిత భాగస్వామి, ఇద్దరు పిల్లలతో సహా వృద్ధాప్య తల్లిదండ్రులు/అత్తమామలు ఎనిమిది మంది సభ్యుల కుటుంబానికి కేర్ హెల్త్ ఇన్సూరెన్స్ సంస్థ నుంచి రూ.50 లక్షల ఫ్యామిలీ ఫ్లోటర్ ప్లాన్ తీసుకుంటే, వార్షిక ప్రీమియం సుమారుగా రూ.45-50 వేల వరకు అవుతుంది. అదే మీరు, మీ భార్య, పిల్లల కోసం పైన తెలిపిన బీమా సంస్థ నుంచి ఫ్లోటర్ తీసుకుని పెద్దలకు వ్యక్తిగత పాలసీలు తీసుకున్నట్లైతే సుమారుగా రూ.౮౦-౮౫ వేల వరకు ప్రీమియం చెల్లించాల్సి రావచ్చు. అయితే, ప్రీమియంలు..పాలసీదారుల వయసు, ఎంచుకున్న ప్లాన్లపై ఆధారపడి మారతాయి.
అధిక బీమా కవరేజ్తో ప్రయోజనం
ఎక్కువ బీమా కవరేజ్ ఉండడం వల్ల మీ కుటుంబ సభ్యల ఆరోగ్య అవసరాలను బీమా సంస్థ చూసుకుంటుంది. అధిక మొత్తంతో కూడిన ఫ్యామిలీ ఫ్లోటర్ ప్లాన్ కుటుంబ సభ్యులందరికీ తగినంత కవరేజీని అందిస్తుంది. ఈ ప్లాన్లు గది అద్దె పరిమితులు, అధునాతన చికిత్సల కోసం కవరేజ్, మరిన్ని డేకేర్ విధానాలు వంటి అదనపు ప్రయోజనాలతో వస్తాయి.
తగిన జాగ్రత్తలు
వివిధ బీమా సంస్థల వ్యక్తిగత, ఫ్యామిలీ ఫ్లోటర్ పాలసీలతో పాటు మీ ఉద్యోగ సంస్థ అందించే గ్రూప్ పాలసీలను కూడా సమీక్షించండి. ముందస్తు వ్యాధులపై వర్తించే వెయిటింగ్ పీరియడ్లను తనిఖీ చేయండి. ఎక్కువ వైద్య ఖర్చు మొత్తాన్ని సొంతంగా జేబు నుంచి ముందు భరించి తర్వాత రియింబర్స్ చేసుకోవడం అంటే ఆర్థికంగా చాలా కష్టం అవుతుంది. కాబట్టి, బీమా పాలసీలో సీనియర్లు ఉన్నప్పుడు నగదు రహిత క్లెయింలను అందించే బీమా పాలసీని తీసుకోవడానికి ప్రయత్నించాలి. కొన్ని బీమా సంస్థలు ఎక్కువ నెట్వర్క్ ఆసుపత్రులను కలిగి ఉంటాయి. ఇలాంటి బీమా సంస్థ నుంచి పాలసీని తీసుకోవడం ఉత్తమం. పాలసీదారుడు ఆసుపత్రిలో చేరిన సమయంలో చెల్లింపుల గురించి చింతించకుండా అవసరమైన వైద్య సహాయం పొందడంపై దృష్టి పెట్టేలా ఉండాలి.
