గుండె పోటు సైలెంట్ కిల్లర్‌గా మారుతోంది.. చిన్నా పెద్దా అనే తేడా లేకుండా.. చాలామంది గుండెపోటుతో ప్రాణాలు కోల్పోతున్నారు.. వాస్తవానికి గుండెపోటు అనేది ప్రాణాంతకమైన వైద్య పరిస్థితి..
ప్రపంచ ఆరోగ్య సంస్థ ప్రకారం.. ప్రతి సంవత్సరం ప్రపంచవ్యాప్తంగా 17.9 మిలియన్ల మంది హృదయ సంబంధ వ్యాధులతో మరణిస్తున్నారు. ప్రతి ఐదుగురిలో 4 మరణాలు గుండెపోటు కారణంగానే సంభవిస్తున్నట్లు అధ్యయనాలు తెలుపుతున్నాయి.. వాస్తవానికి గుండెలోని రక్త నాళాల్లో రక్త ప్రసరణకు అడ్డంకులు ఏర్పడటం, రక్తనాళాలు పూడుకుపోవడం, రక్తాన్ని గుండె సరిగా సరఫరా చేయలేకపోవడం తదితర కారణాల వల్ల గుండె పోటు వచ్చే అవకాశముందని వైద్య నిపుణులు పేర్కొంటున్నారు.
గుండెపోటు అకస్మాత్తుగా, అత్యవసరంగా సంభవిస్తుంది.. అయితే వాస్తవానికి గుండెపోటు సంభవించే ముందు శరీరం కొన్ని సంకేతాలను ఇస్తుంది. వాటిని సకాలంలో గుర్తించడం ద్వారా, మీరు మీ జీవితాన్ని కాపాడుకోవచ్చు.. సకాలంలో చికిత్స పొంది తిరిగి ఆరోగ్యవంతంగా మారవచ్చు..
మీరు ఎటువంటి కారణం లేకుండా ఏదైనా భాగంలో నొప్పి లేదా అసౌకర్యాన్ని అనుభవిస్తే అది గుండెపోటుకు సంకేతమని గుర్తుంచుకోండి. అయితే.. ఈ ప్రదేశాలలో నొప్పి వస్తే.. నివారణ మందులతో అణచివేయడం ప్రాణాంతకంగా మారొచ్చని పేర్కొంటున్నారు వైద్య నిపుణులు..
గుండెపోటుకు ముందు వచ్చే ఐదు శరీర భాగాల్లో కనిపించే నొప్పుల గురించి ఇప్పుడు తెలుసుకోండి..
ఛాతీ నొప్పి లేదా ఒత్తిడి
గుండెపోటు అత్యంత సాధారణ లక్షణం ఛాతీలో నొప్పి లేదా ఒత్తిడి. ఈ నొప్పి అకస్మాత్తుగా మొదలై నిరంతరం కొనసాగవచ్చు. ఈ ఒత్తిడి ఛాతీపై అధిక బరువును మోపినట్లు అనిపిస్తుంది. కొందరిలో ఈ నొప్పి తీవ్రంగా ఉంటుంది.. మరికొందరిలో తేలికపాటి ఒత్తిడి ఉంటుంది.. అయితే, దీనిని ఎప్పటికీ నిర్లక్ష్యం చేయకూడదు.
భుజం, మెడ లేదా వెన్నునొప్పి
భుజాలు, మెడ లేదా వెన్ను నొప్పి కూడా గుండెపోటుకు సంకేతం. ముఖ్యంగా ఈ నొప్పి ఛాతీ నొప్పితో కూడి ఉంటే, దానిని తీవ్రంగా పరిగణించాలి. ఈ నొప్పి ఒక ప్రదేశం నుంచి మరొక ప్రదేశానికి వ్యాపిస్తుంది.. కొన్నిసార్లు ఇది ఒక వైపు లేదా రెండు వైపులా కూడా అనుభూతి చెందుతుంది.
ఎడమ చేయి నొప్పి..
ముఖ్యంగా ఎడమ చేయి నొప్పి గుండెపోటు సాధారణ లక్షణం. ఈ నొప్పి ఆకస్మికంగా మొదలై తీవ్రంగా ఉంటుంది. కొన్నిసార్లు ఈ నొప్పి తేలికపాటి లేదా చికాకు కలిగిస్తుంది.. కానీ ఇది చాలా కాలం పాటు కొనసాగితే దానిని విస్మరించవద్దు.
దవడ లేదా దంతాలలో నొప్పి..
గుండెపోటు లక్షణాలు దవడ లేదా దంతాలలో నొప్పిని కూడా కలిగి ఉండవచ్చు. ఈ నొప్పి దవడలో మాత్రమే కాకుండా చెంపలు, పైభాగం వరకు వ్యాప్తిచెందుతుంది.. కొన్నిసార్లు ఇది ఒక వైపు మాత్రమే తీవ్రంగా వస్తుంది. దీనిని విస్మరించవద్దు.
శ్వాస ఆడకపోవడం – అలసట..
శ్వాస ఆడకపోవడం, విపరీతమైన అలసట కూడా గుండెపోటుకు సంకేతాలే. చాలా మంది వ్యక్తులు ఈ లక్షణాలను సాధారణ అలసటగా పొరబడతారు.. కానీ ఈ లక్షణాలు చాలా కాలం పాటు కొనసాగితే అది ప్రమాద సంకేతం కావచ్చు.
(నోట్‌: ఇందులోని అంశాలు కేవలం అవగాహన కోసం మాత్రమే. పలు వార్తా కథనాలు, నిపుణుల సలహాలు, సూచనల మేరకు అందించడం జరిగింది. ఏవైనా సందేహాలు ఉంటే ఆరోగ్య నిపుణులను సంప్రదించండి.)
