దేశంలో అధిక కొలెస్ట్రాల్ అతి పెద్ద సమస్యగా మారింది. బిజీ లైఫ్‌స్టైల్, ఏది పడితే అది తినడం, కాలుష్యం, చెడు అలవాట్ల కారణంగా అధిక కొలెస్ట్రాల్ బారిన పడుతున్నారు.
అధిక కొలెస్ట్రాల్‌ని డైస్లిపిడెమియా అని కూడా అంటారు. కొలెస్ట్రాల్ అనేది శరీరంలోని కొవ్వు. ఇది శరీరంలోని అనేక ముఖ్యమైన విధుల్ని నిర్వహిస్తుంది. హార్మోన్ల ఉత్పత్తి (టెస్టోస్టెరాన్, ఈస్ట్రోజెన్), విటమిన్ డి ఏర్పడటానికి కొవ్వు సహాయపడుతుంది. కొలెస్ట్రాల్ ప్రధానంగా ఆహారం నుంచి ఉత్పత్తి అవుతుంది. కాలేయం కొంత కొలెస్ట్రాల్‌ను ఉత్పత్తి చేస్తుంది. కొలెస్ట్రాల్‌లో ప్రధానంగా రెండు రకాలు ఉన్నాయి. ఎల్డీఎల్ (తక్కువ సాంద్రత కలిగిన లిపోప్రొటీన్), హెచ్డీఎల్ (హై డెన్సిటీ లిపోప్రొటీన్).అధిక సాంద్రత కలిగిన లిపోప్రొటీన్ మనకు చాలా మంచిది. దీనిని మంచి కొలెస్ట్రాల్ అంటారు.
తక్కువ సాంద్రత కలిగిన లిపోప్రొటీన్ (ఎల్డీఎల్) మన ఆరోగ్యానికి మంచిది కాదు. దీనిని చెడు కొలెస్ట్రాల్ అంటారు. ఇది రక్త ధమనుల్లో పేరుకుపోతుంది. అంతేకాకుండా రక్త ప్రవాహాన్ని అడ్డుకుంటుంది. ధమనుల్లో పేరుకుపోయే కొవ్వును ప్లేక్ అంటారు. దీని కారణంగా గుండెపోటు, స్ట్రోక్ ప్రమాదం పెరుగుతుంది. చెడు కొలెస్ట్రాల్ పెరగడానికి అనేక కారణాలు ఉన్నాయి. వీటిలో ప్రధానంగా ఆహారపు అలవాట్లు, ధూమపానం, మద్యపానం, వ్యాయామం చేయకపోవడం వంటి కారణాలు ఉన్నాయి. శరీరంలో మంచి కొలెస్ట్రాల్ తగ్గి.. చెడు కొవ్వు పెరిగితే దానిని హై కొలెస్ట్రాల్ అంటారు. ఈ రోజుల్లో అధిక కొలెస్ట్రాల్ కేసులు వేగంగా పెరుగుతున్నాయి. అయితే, కొన్ని అలవాట్ల కారణంగా అధిక కొలెస్ట్రాల్ వచ్చే ప్రమాదం ఉంది. అందుకే కొన్ని అలవాట్లకు దూరంగా ఉండాలని నిపుణులు సూచిస్తున్నారు.
అధ్యయనాల ప్రకారం ఆహారంలో ఎక్కువ ట్రాన్స్ ఫ్యాట్ లేదా సంతృప్త కొవ్వు ఎక్కువ తీసుకునే వారు అధిక కొలెస్ట్రాల్ ప్రమాదానికి గురవుతున్నారు. ఆహారంలో నూనె, నెయ్యి, వెన్న, జున్ను ఎక్కువగా తీసుకుంటే అధిక కొలెస్ట్రాల్ వచ్చే ప్రమాదం ఉందని నిపుణులు చెబుతున్నారు. అంతేకాకుండా జంక్ ఫుడ్, చక్కెర, కార్బోహైడ్రేట్స్ ఎక్కువగా ఉన్న ఆహారాలు తీసుకుంటే.. అధిక కొలెస్ట్రాల్ వచ్చే ప్రమాదం ఉంది. ఏది పడితే అది తినకుండా సమతుల్య ఆహారంపై ఫోకస్ పెడితే కొలెస్ట్రాల్ స్థాయిలు తగ్గుతాయి. చెడు ఆహారపు అలవాట్లకు చెక్ పెట్టాలని నిపుణులు సూచిస్తున్నారు.
వ్యాయామానికి దూరంగా ఉండటం..
ఈ రోజుల్లో చాలా మంది అసలు వ్యాయామాలే చేయడం లేదు. బిజీ లైఫ్‌స్టైల్‌లో వ్యాయామాలు చేసే తీరిక లేదని కొందరు భావిస్తున్నారు. దీంతో, శారీరీకంగా ఫిట్‌గా ఉండలేకపోతున్నారు. చాలా మంది వ్యాయామం చేయడం అంటేనే చాలా కష్టంగా ఫీలవుతున్నారు. వ్యాయామం చేయడానికి కాస్త టైం కూడా కేటాయించడం లేదు. దీంతో.. ఇలాంటి వారు అధిక కొలెస్ట్రాల్ బారిన పడుతున్నట్టు అధ్యయనాలు చెబుతున్నాయి. వ్యాయామం చేయకపోతే.. అధిక కొలెస్ట్రాల్ మాత్రమే కాకుండా.. గుండె పోటు, స్ట్రోక్ వంటి వ్యాధుల ముప్పు పెరిగే అవకాశం ఉంది.
ధూమపానం..
ధూమపానం ఆరోగ్యానికి హానికరమన్న అన్న విషయం అందరికీ తెలుసు. కానీ, చాలా మంది ఈ చెడు అలవాటుకు బానిసలవుతున్నారు. ఈ చెడు అలవాటు వల్ల అనేక ఆరోగ్య సమస్యలు వస్తున్నాయి. ధూమపానం చేసేవారికి కొలెస్ట్రాల్ స్థాయిలు బాగా పెరిగిపోతాయి. దీంతో.. అధిక కొలెస్ట్రాల్ వచ్చే ప్రమాదం ఉంది. స్మోకింగ్ మంచి కొలెస్ట్రాల్‌ను తగ్గిస్తుంది. దీంతో.. ఈ చెడు అలవాటు ఉన్నవారు అధిక కొలెస్ట్రాల్ బారిన పడుతున్నారు. అధిక కొలెస్ట్రాల్ మాత్రమే కాకుండా.. గుండె సంబంధిత వ్యాధులు, రక్తపోటు వ్యాధులు ఎక్కువగా వచ్చే ప్రమాదముంది.
మద్యపానం..
మద్యపానం కూడా ఆరోగ్యానికి చాలా డేంజర్. ఈ రోజుల్లో మద్యపానానికి చాలా మంది బానిసలయ్యారు. చిన్న, పెద్ద తేడా లేకుండా చాలా మందికి మద్యం తాగే అలవాటు ఉంది. దీంతో.. అనేక వ్యాధుల ముప్పు వీరికి ఉంటుంది. ఆల్కహాల్ తీసుకునే వ్యక్తులకు చెడు కొలెస్ట్రాల్ వచ్చే ప్రమాదం ఎక్కువ. ఆల్కహాల్ మొత్తం కొలెస్ట్రాల్‌ను పెంచుతుంది. ఇది మంచి కొలెస్ట్రాల్ స్థాయిల్ని తగ్గిస్తుంది. దీంతో.. అధిక కొలెస్ట్రాల్ పెరుగుతుంది. ఆల్కహాల్ తీసుకునే వ్యక్తుల్లో అధిక కొలెస్ట్రాల్ మాత్రమే కాకుండా.. గుండె సంబంధిత వ్యాధులు, కాలేయ వైఫల్యం, పక్షవాతం, మానసిక వ్యాధులు వచ్చే ప్రమాదముందని నిపుణులు చెబుతున్నారు.
అధిక కొలెస్ట్రాల్‌కి ఎలా చెక్ పెట్టాలి..
అధిక కొలెస్ట్రాల్‌ను పెంచే ఆహారాలకు దూరంగా ఉండండి. కనీస మొత్తంలో వెన్న, నూనె, నెయ్యి, శుద్ధి చేసిన ఆహారాన్ని తినండి. కొవ్వు పదార్ధాలు తినవద్దు. అలాగే ఆహారంలో ఉప్పును తగ్గించాలి. జంతువుల కొవ్వును అస్సలు తినవద్దు. అంతేకాకుండా బరువు తగ్గేందుకు ప్రయత్నించండి. ధూమపానం, మద్యం మానేయండి. మీ ఆహారంలో ప్రతిరోజూ తృణధాన్యాలు, ఆకు కూరలు, తాజా పండ్లను తీసుకోండి. గింజలు, బాదం, వాల్‌నట్‌లు, పిస్తాలు మొదలైన వాటిని తీసుకుంటే మీ ఆరోగ్యానికి మంచిది. బ్రకోలి, బచ్చలి కూర, బెండకాయ, క్యారెట్ వంటి కూరగాయల్ని ఆహారంలో చేర్చుకోండి. ప్రతిరోజూ 30 నిమిషాలు వ్యాయామం చేసేలా ప్లాన్ చేసుకోండి. కనీసం వాకింగ్, జాగింగ్ వంటి తేలికపాటి వ్యాయామాలైన జీవనశైలిలో భాగం చేసుకోవాలని నిపుణులు సూచిస్తున్నారు.
