మీరు బ్యాంకుల్లో ఫిక్స్‌డ్ డిపాజిట్లు చేస్తున్నారా.. మరి ఎలాంటి బ్యాంకును ఎంచుకుంటున్నారు.. ఏ టెన్యూర్ డిపాజిట్లలో ఇన్వెస్ట్ చేస్తున్నారు. డిపాజిట్ వడ్డీ రేట్లు అన్ని బ్యాంకుల్లో ఒకేలా ఉండవన్న సంగతి తెలిసిందే. ఇది బ్యాంకును బట్టి మారుతుంటుంది. ఇంకా డిపాజిట్‌ను బట్టి.. టెన్యూర్‌ను బట్టి వడ్డీ రేట్లు వేర్వేరుగా ఉంటాయని చెప్పొచ్చు. ఒక్కో బ్యాంకులో వడ్డీ రేట్లు ఒక్కోలా ఉంటాయి. సాధారణ డిపాజిటర్ల కంటే సీనియర్ సిటిజెన్లకు వడ్డీ ఇంకాస్త ఎక్కువగానే ఉంటుంది. చాలా వరకు బ్యాంకుల్లో వీరికి అధికంగా 50 బేసిస్ పాయింట్ల వరకు వడ్డీ అధికంగా వస్తుంది. ఇటీవలి కాలంలో చాలా బ్యాంకులు కూడా స్పెషల్ టెన్యూర్ డిపాజిట్లు తీసుకొచ్చి వడ్డీ ఇంకా ఎక్కువే అందిస్తున్నాయి.
ఏ బ్యాంకులోనైనా స్వల్ప వ్యవధి డిపాజిట్ల కంటే ఎక్కువ వ్యవధి ఫిక్స్‌డ్ డిపాజిట్లపైనే వడ్డీ ఎక్కువగా వస్తుంటుందని చెప్పొచ్చు. ఉదాహరణకు 6 నెలల డిపాజిట్ కంటే రెండేళ్ల, మూడేళ్ల వ్యవధి డిపాజిట్స్‌పై వడ్డీ రేట్లు ఇంకా ఎక్కువగా ఉంటాయి. ప్రైవేట్ రంగ బ్యాంకులు, ప్రభుత్వ రంగ బ్యాంకులు ఇలా రెండింట్లో వడ్డీ రేట్లు సేమ్ ఉండవు. దీర్ఘకాలంలోనే అంటే లాంగ్ టర్మ్ ఫిక్స్‌డ్ డిపాజిట్లలో ఇన్వెస్ట్ చేసి.. మంచి వడ్డీ వస్తుంది. ఎక్కువ వడ్డీ వచ్చే డిపాజిట్‌ను ఎంచుకొని ఇన్వెస్ట్ చేయాలి.
ఇక్కడ ఉదాహరణకు చూస్తే.. మూడేళ్ల డిపాజిట్‌పైన రూ. 5 లక్షలు ఇన్వెస్ట్ చేసినప్పుడు.. ఒక శాతం వడ్డీ రేటు ఎక్కువగా ఉన్నప్పుడు మెచ్యూరిటీకి రూ. 15 వేల మేర అధికంగా డబ్బులు వస్తాయి. ఇదే రూ. 10 లక్షలపై అయితే రూ. 30 వేలు అధికంగా వస్తుంది. అంటే.. ఒక శాతం వడ్డీ ఎక్కువగా ఉంటేనే ఇలా బెనిఫిట్స్ ఉంటే.. ఇంకా ఎక్కువ వడ్డీ ఉంటే ఇంకా ఎక్కువ పొందొచ్చు. ఇప్పుడు మనం మూడేళ్ల టెన్యూర్ డిపాజిట్లపైన వడ్డీ రేట్లు ప్రముఖ బ్యాంకుల్లో ఎలా ఉన్నాయి.. 5 లక్షలు జమ చేస్తే ఎంత వడ్డీ పొందొచ్చో తెలుసుకుందాం.
>> అతిపెద్ద ప్రైవేట్ బ్యాంకు.. హెచ్‌డీఎఫ్‌సీ బ్యాంకులో మూడేళ్ల డిపాజిట్ మీద సాధారణ ప్రజలకు 7 శాతం, సీనియర్ సిటిజెన్లకు 7.5 శాతం వడ్డీ వస్తుంది. ఐసీఐసీఐ బ్యాంకులోనూ అచ్చం ఇలానే వడ్డీ రేట్లు ఉన్నాయి. దీంతో.. ఇక్కడ రెగ్యులర్ సిటిజెన్స్‌కు మూడేళ్లలో 5 లక్షలపై రూ. 1,02,596 వడ్డీ; సీనియర్ సిటిజెన్లకు రూ. 1,09,913 వడ్డీ అందుతుంది. ఫెడరల్ బ్యాంకు, పంజాబ్ నేషనల్ బ్యాంకుల్లోనే వడ్డీ రేట్లు ఇదే మాదిరిగా ఉన్నాయి.
>> కోటక్ మహీంద్రా బ్యాంకులో వరుసగా 7 శాతం, 7.60 శాతం వడ్డీ రేట్లు ఉండగా.. 5 లక్షలపై మూడేళ్లలో వరుసగా రూ. 1,02,596; రూ. 1,11,368 వడ్డీ వస్తుంది.
స్టేట్ బ్యాంక్ ఆఫ్ ఇండియాలో (SBI) సాధారణ ప్రజలకు 6.75 శాతం, సీనియర్ సిటిజెన్లకు 7.25 శాతం వడ్డీ అందుతుండగా.. ఇక్కడ మూడేళ్లలో రూ. 5 లక్షలపై వరుసగా రూ. 98,913; సీనియర్ సిటిజెన్లకు రూ. 1,06,248 వడ్డీ అందుతుంది. యూనియన్ బ్యాంక్ ఆఫ్ ఇండియాలో వరుసగా 6.7 శాతం, 7.20 శాతంగా ఉండగా.. 5 లక్షలపై వరుసగా రూ. 98,180; రూ. 1,05,527 వడ్డీ అందుతుంది.
చివరగా బ్యాంక్ ఆఫ్ బరోడాలో రెగ్యులర్ సిటిజెన్స్‌కు అధికంగా 7.15 శాతం, సీనియర్ సిటిజెన్స్‌కు 7.65 శాతం లభిస్తుంది. ఈ టాప్- 8 బ్యాంకుల్లో చూస్తే ఇందులోనే ఎక్కువ లాభం వస్తుంది. దీంట్లో 5 లక్షలు డిపాజిట్ చేసినట్లయితే 3 సంవత్సరాల్లో.. రూ. 1,04,772 వడ్డీ, 1,12,119 అందుతుంది.
