పుట్టిన బిడ్డకు పేరు పెట్టడానికి తల్లిదండ్రులు ఎంతో ఆలోచిస్తారు. వినూత్నంగా, ఆకట్టుకునేలా ఉండాలనుకుంటారు. ఆ విధంగానే ఓ తల్లి తన కుమారుడికి పుట్టగానే కలిగిన సంతోషంతో ‘హ్యాపీ’ అని పెట్టేసింది. తన కుమారుడు ఆ పేరుతో జీవితమంతా సంతోషంగా ఉండాలనుకుంది. కానీ, అదే అతడికి శాపంగా మారింది. ఆ పేరు వల్ల ఎన్నో అవహేళనలు ఎదుర్కొన్నాడు. తనకు తగిన ఉద్యోగం దొరకట్లేదు.. ప్రేమ విఫలమైంది. ఇలాంటి ఘటనలతో అతడి జీవితంలో సంతోషమే కరవైంది. జపాన్‌కు చెందిన 27 ఏళ్ల ‘తెరవుచి హ్యపీ’ గాథ ఇది!
ఇంట్లో ఆ పేరు ముద్దుగానే అనిపించినా స్కూల్‌, కాలేజీలో తోటి విద్యార్థులు గేళి చేసేవారు. ‘నిన్ను ఎంత ఎగతాళి చేసినా నువ్వు హ్యాపీగానే ఉంటావ్‌ కదా?’ అనేవారట. ఎవరిదైనా పుట్టిన రోజు వచ్చినా.. ‘హ్యపీ బర్త్‌డే’ చెప్పేముందు ఇతన్నే చూసేవారట. ఈ గేళిని భరించలేక పేరు మార్చుకుందామనుకున్నాడు. కానీ, తల్లి ఎంతో ప్రేమతో పెట్టిన పేరు కదా అని ఆ ఆలోచనను విరమించుకున్నాడు. చదువు పూర్తయ్యాక ఉద్యోగ వేటలో పడ్డ హ్యాపీకి తిరస్కరణలే ఎదురయ్యాయి. చాలా కంపెనీలు రెజ్యూమెలో అతడి పేరు చూసి ఎవరో జోక్‌ చేస్తున్నట్లు ఉన్నారని అప్లికేషన్‌ను రిజెక్ట్‌ చేసేవారు. కొందరు ఇంటర్వ్యూకి పిలిచి తన గుర్తింపు కార్డులను చూసి గానీ నమ్మేవారు కాదట. తన చదువుకు తగ్గ ఉద్యోగాలేవీ రాకపోవడంతో ఎంతో నిరాశకు గురయ్యాడు. చివరికి ఓ కంపెనీలో సేల్స్‌మ్యాన్‌ ఉద్యోగం దొరకడంతో మరో దారిలేక అందులోనే చేరిపోయాడు.
తన పేరు వల్ల ప్రేమ కూడా విఫలమైందని ఓ టీవీ ఇంటర్వ్యూలో ఆవేదన వ్యక్తం చేశాడు. ప్రేమించిన అమ్మాయి కుటుంబసభ్యులను కలవడానికి వెళ్తే తన పేరు తెలుసుకొని మరో మాట మాట్లాడకుండా పెళ్లిని నిరాకరించారని వాపోయాడు. తన పేరుతో చాలా ఇబ్బందులు పడుతున్నానని చెప్పుకొచ్చాడు. ఇటీవల ‘హ్యాపీ’ టాపిక్‌ జపాన్‌ సోషల్‌మీడియాలో తెగ వైరలైంది. చాలా మంది నెటిజన్లు అతడికి మద్దతు తెలుపుతూ పోస్టులు పెడుతున్నారు.
