Jai Hind: హర్యానా రాష్ట్ర ప్రభుత్వం తాజాగా కీలక ఆదేశాలు జారీ చేసింది. స్కూళ్లలో కొత్త నిబంధనను తీసుకువచ్చింది. పాఠశాలల్లో గుడ్ మార్నింగ్‌కు బదులు జై హింద్ అని వాడాలని హర్యానా పాఠశాల విద్యా శాఖ.. రాష్ట్ర వ్యాప్తంగా ఆదేశాలు జారీ చేసింది. ఆగస్టు 15 వ తేదీన దేశ స్వాతంత్య్ర దినోత్సవం సందర్భంగా హర్యానాలో అధికారంలో ఉన్న నాయబ్ సింగ్ సైనీ నేతృత్వంలోని బీజేపీ సర్కార్ కీలక ఉత్తర్వులు వెలువరించింది. విద్యార్థుల్లో చిన్నతనం నుంచే దేశభక్తి, దేశంపై గౌరవం, దేశ ఐక్యతా భావాలను పెంపొందించాలనే ఆలోచనతో హర్యానాలోని బీజేపీ ప్రభుత్వం ఈ నిర్ణయం తీసుకున్నట్లు పాఠశాల విద్యాశాఖ అధికారులు వెల్లడించారు.
హర్యానాలోని పాఠశాల విద్యా డైరెక్టరేట్ కీలక నిర్ణయం తీసుకుంది. ఆగస్టు 15 వ తేదీన స్వాతంత్ర్య దినోత్సవాన్ని పురస్కరించుకొని.. హర్యానా వ్యాప్తంగా ఉన్న పాఠశాలల్లోని విద్యార్థులు టీచర్లకు, తోటి స్నేహితులకు పలకరింపుగా గుడ్ మార్నింగ్‌కు బదులుగా జై హింద్ అని చెప్పాలని పాఠశాల విద్యా డైరెక్టరేట్ నిర్ణయం తీసుకుంది. ఈ మేరకు రాష్ట్రంలోని అన్ని విద్యాసంస్థలకు, విద్యాశాఖ ఉన్నతాధికారులకు తాజాగా ఆదేశాలు జారీ చేసింది. పాఠశాల స్థాయి నుంచే విద్యార్థుల్లో దేశంపై ప్రేమ, గౌరవం, పెంచాలనే ఆలోచనతోనే ఈ సరికొత్త నిబంధన తీసుకువచ్చినట్లు ప్రభుత్వం పేర్కొంది. స్వాతంత్ర్య దినోత్సవం రోజున జాతీయ జెండాను ఎగురవేసే ముందు నుంచి ఈ కొత్త నిబంధనను అమలు చేయనున్నట్లు వెల్లడించింది.
స్వాతంత్య్రం రాకముందు దేశంలో బ్రిటిష్‌ పరిపాలనను వ్యతిరేకిస్తూ.. పోరాటం చేస్తున్న సమయంలో ప్రజల్లో ఐక్యతను పెంచడానికి నేతాజీ సుభాష్ చంద్రబోస్ ఆజాద్.. హింద్ ఫౌజ్‌ను ఏర్పాటు చేశారు. జై హింద్ అనే నినాదంతో నేతాజీ దేశ ప్రజలను ఒక్కటి చేశారు. ఈ క్రమంలోనే ఐక్యతతో మన నాయకుల అవిశ్రాంత కృషితో దేశానికి చివరికి స్వాతంత్ర్యం సాధించారు. ఆ సమయంలో నాయకులు ఒకరికి ఒకరు జై హింద్ చెప్పుకుంటూ పలకరించుకునేవారు. ఇదే ఆదర్శంగా తీసుకుని ఇప్పుడు.. పాఠశాలల్లో ఈ పలకరింపులను అమలు చేయడం వల్ల విద్యార్థుల్లో దేశభక్తి, ఐక్యత, క్రమశిక్షణ పెంపొందుతుందని హర్యానా విద్యాశాఖ స్పష్టం చేసింది. జై హింద్ చెప్పడం వల్ల దేశం గొప్పతనాన్ని ప్రతిరోజూ వారికి గుర్తు చేస్తుందని విద్యాశాఖ పేర్కొంది.
