పాలసీహోల్డర్ల అవసరాలకు అనుగుణంగా.. లైఫ్ ఇన్సూరెన్స్ కార్పొరేషన్ ఆఫ్ ఇండియా (LIC) ఇటీవల రెండు పథకాల్ని ప్రారంభించింది.
ఒకటి ఎల్ఐసీ బీమా కవచ్. ఇది లైఫ్ ఇన్సూరెన్స్ ప్లాన్. మరొకటి ఎల్ఐసీ ప్రొటెక్షన్ ప్లస్. ఇదేమో సేవింగ్స్ ప్లాన్ అని చెప్పొచ్చు. అంతకుముందు అక్టోబర్ నెలలోనూ ఎల్ఐసీ బీమా లక్ష్మీ, జన్ సురక్ష యోజన అనే రెండు కొత్త పథకాల్ని తీసుకొచ్చింది. ఇవి వేటికవే ప్రత్యేకతల్ని కలిగి ఉంటాయి. ఇప్పుడు మనం ఎల్ఐసీ బీమా కవచ్ పాలసీ గురించి మాట్లాడుకుందాం.
బీమా కవచ్ విషయానికి వస్తే.. పూర్తిగా నాన్ లింక్డ్, నాన్ పార్టిసిపేటింగ్, ఇండివిడ్యువల్ లైఫ్ ఇన్సూరెన్స్ ప్లాన్. పూర్తిగా రిస్క్ ప్రొటెక్షన్ ప్లాన్ అని చెప్పొచ్చు. అంటే అనుకోనిది ఏమైనా జరిగినప్పుడు ఆదుకుంటుంది. కుటుంబ పెద్ద లేదా ప్రధాన ఆదాయ వనరు ఎవరైనా.. భవిష్యత్తులో వారు లేకపోయినా తమ కుటుంబానికి ఆర్థికంగా రక్షణ కల్పించేందుకు ఈ పాలసీ ఉపయోగపడుతుందని చెప్పొచ్చు.
ఈ ప్లాన్లో సమ్ అష్యూర్డ్ ఫిక్స్డ్గా ఉంచుకోవచ్చు. లేకపోతే ప్రతి ఏటా ఈ మొత్తాన్ని పెంచుకునేందుకు కూడా వీలుంటుంది. ఈ పాలసీ తీసుకోవాలంటే లేదా చేరాలంటే కనీసం 18 సంవత్సరాలు ఉండాలి. గరిష్టంగా 65 ఏళ్ల వరకు కూడా ఇందులో చేరేందుకు అవకాశం ఉంటుంది. మెచ్యూరిటీ వయసు కనిష్ఠంగా 28 ఏళ్లు కాగా.. గరిష్ఠంగా 100 ఏళ్లుగా నిర్ణయించారు. కనీసం రూ. 2 కోట్ల బీమా హామీతో ఈ ప్లాన్ ప్రారంభమవుతుంది. గరిష్ట మొత్తంపైన ఎలాంటి లిమిట్ లేదు. ఈ రూ. 2 కోట్లపైన రూ. 5 లక్షల చొప్పున ఎంతైనా పెంచుకునేందుకు వెసులుబాటు ఉంది.
ప్రీమియం సింగిల్ పేమెంట్ చేయొచ్చు. లేకపోతే 5, 10, 15 సంవత్సరాల ప్రీమియం చెల్లింపు వ్యవధిని ఎంచుకోవచ్చు. లేకపోతే రెగ్యులర్ పేమెంట్ ఆప్షన్ కూడా ఎంచుకునేందుకు వీలుంటుంది. ఇది మీ ఆర్థిక స్థోమతపై ఆధారపడి ఉంటుందని చెప్పొచ్చు. ఇందులో మీరు ఎంచుకున్న దాని ఆధారంగా ప్రీమియం చెల్లించాల్సి వస్తుంది.
ఉదాహరణ చూస్తే 30 ఏళ్ల వ్యక్తి 20 ఏళ్ల కాలానికి (పాలసీ టర్మ్) రూ. 2 కోట్ల బీమా హామీ పాలసీ కింద లెవల్ సమ్ అష్యుర్డ్ (ఆప్షన్-1) ఎంచుకున్నట్లయితే.. వార్షికంగా రూ. 19 వేల చొప్పున ప్రీమియం చెల్లిస్తే సరిపోతుంది. ఇక్కడ 15 ఏళ్ల పాటే ప్రీమియం చెల్లించాలనుకుంటే.. ఏటా రూ. 22 వేలు చెల్లించాల్సి వస్తుంది. ఇలా కాదు పదేళ్లే చెల్లిస్తా అనుకుంటే ఏటా రూ. 28,800 చొప్పున చెల్లించాలి. ఐదేళ్లు కడతా అనుకుంటే ఏటా రూ. 50 వేలు చెల్లించాల్సి వస్తుంది. సింగిల్ ప్రీమియం అయితే రూ. 2.04 లక్షలు (టాక్స్లు మినహాయించి) చెల్లించాలి.
