Mobile Number: భారత్‌లో ఎవరి ఫోన్ నంబర్ చూసినా ముందు +91 కోడ్ ఉంటుంది. అయితే ఈ కోడ్ ఎందుకు ఉంటుంది, ఎలా వచ్చింది అని మీరు ఎప్పుడైనా ఆలోచించారా? ఈ విషయం చాలా మందికి తెలియకపోవచ్చు. ఇది మన దేశం కోడ్. అయితే +91 మాత్రమే ఎందుకు? మన దేశానికి ఈ కోడ్ ఎవరు ఇచ్చారు, దానిని ఏ ప్రాతిపదికన నిర్ణయించారు? ఒక దేశానికి కాలింగ్ కోడ్‌లు ఎలా నిర్ణయిస్తారు అనేది ఓసారి మనం తెలుసుకుందాం.
కంట్రీ కాలింగ్ కోడ్‌లు లేదా కంట్రీ డయల్ ఇన్ కోడ్‌లు టెలిఫోన్ నంబర్లకు ప్రిఫిక్స్ లుగా ఉపయోగిస్తారు. దీని సహాయంతోనే ఆ ప్రాంతంలో ఉన్న ఇంటర్నేషనల్ టెలికమ్యూనికేషన్ యూనియన్ (ITU) సభ్యులు లేదా టెలిఫోన్ సబ్‌స్క్రైబర్లకు కనెక్ట్ చేయవచ్చు. భారత దేశం కోసం కోడ్ +91, పాకిస్థాన్ కోసం డయల్ కోడ్ +92 అనేవి అంతర్జాతీయ సబ్‌స్క్రైబర్ డయలింగ్ అని పిలుస్తారు. ఐక్యరాజ్య సమితికి చెందిన ఇంటర్నేషనల్ టెలికమ్యూనికేషన్ యూనిట్ ఐటీయూ అన్ని దేశాలకూ ఇలాంటి కోడ్‌లను కేటాయిస్తుంటుంది.
ఏ దేశానికి చెందిన స్థానిక నంబర్‌కు ఫోన్ చేయాలన్నా ఆ దేశానికి చెందిన కంట్రీ డయల్ కోడ్ ఎంటర్ చేయాల్సి ఉంటుంది. ఐటీయూకు చెందిన కన్సల్టేటివ్ కమిటీ ప్రపంచాన్ని 9 వేరు వేరు జోన్లుగా విభజించింది. ఆ జోన్ల ఆధారంగానే కంట్రీ డయల్ కోడ్‌లను రూపొందించింది. జనాభా, ఆర్థిక వ్యవస్థ, కమ్యూనికేషన్ సంబంధిత ఇతర అంశాలను పరిగణనలోకి తీసుకుని ఈ కోడ్‌లను కేటాయిస్తుంది ఐటీయూ. దక్షిణ, మధ్య, పశ్చిమాసియాతో పాటు మధ్య ప్రాచ్య దేశాలు తొమ్మిదో జోన్ కిందకు వస్తాయి. తొమ్మిదో జోన్ లో ఉన్న అన్ని దేశాల కోడ్ 9తోనే ప్రారంభమవుతుంది. ఇండియాకు +91 ఉండగా.. పాకిస్థాన్‌కు +92, అఫ్గానిస్తాన్ +93, శ్రీలంక +94 కేటాయించారు.
ప్రముఖ, అత్యంత జనాభా కలిగిన దేశాలకు తక్కువ డిజిట్ కలిగిన కోడ్ ఉంటుంది. చిన్న దేశాలకు 3 అంకెల కోడ్ ఉంటుంది. అమెరికా +1, యూఎస్ఎస్ఆర్ +7 మాత్రమే సింగిల్ డిజిట్ కోడ్ లు ఉన్నాయి. అలాగే బంగ్లాదేశ్ +880, ఫిజీ +679, కాంగో వంటి చిన్న దేశాలకు మూడంకెల కోడ్ ఉంటుంది. మరోవైపు.. స్వదేశంలో మరొకరి ఫోన్ చేయాలన్నప్పుడు ఈ కోడ్ ఆటోమేటిక్ గా ఎంటర్ అవుతుంది. అంటే మీరు ప్రత్యేకంగా ఎంటర్ చేయాల్సిన పని లేదు. కానీ, అంతర్జాతీయ కాల్స్ లో మీరు ఈ కోడ్‌ను విడిగా ఎంటర్ చేయాల్సి వస్తుంది.
