ప్రధానమంత్రి నరేంద్ర మోదీ 74 ఏళ్ల వయసులో కూడా ఎంతో ఆరోగ్యంగా, ఉల్లాసంగా ఉంటున్నారు. దీనికి గల రహస్యమే ఆయన కఠిన ఉపవాస పద్ధతులు. గత 50-55 ఏళ్లుగా మోదీ అనుసరిస్తున్న ఉపవాస విధానమే ఆయన ఆరోగ్యానికి కారణమని తెలుస్తోంది.
ఈ విషయాన్ని ఆయన ఇటీవల అమెరికా కేంద్రంగా పనిచేసే పోడ్‌కాస్టర్ మరియు AI పరిశోధకుడు లెక్స్ ఫ్రిడ్‌మన్‌తో జరిగిన ఇంటర్వ్యూలో వెల్లడించారు.
నాలుగున్నర నెలలు ఒక్క పూట మాత్రమే భోజనం చేస్తా: మోదీ
ప్రధానమంత్రి మోదీ మాట్లాడుతూ, వివిధ సందర్భాల్లో ఉపవాసాలను పాటిస్తానని తెలిపారు. ఆయన ప్రతి ఏడాది నాలుగున్నర నెలల పాటు రోజుకు ఒక్క భోజనం మాత్రమే చేస్తారు. అలాగే, ప్రతి ఏడాది రెండు కీలకమైన తొమ్మిది రోజుల ఉపవాసాలను అనుసరిస్తారు. ఒక ఉపవాసంలో రోజుకు ఒక్క పండు మాత్రమే తింటారు. మరో ఉపవాసంలో వెచ్చని నీరు మాత్రమే తీసుకుంటారు.
చాతుర్మాసం – నాలుగున్నర నెలల దీర్ఘ ఉపవాసం
ప్రధానమంత్రి మోదీ తన ఉపవాస నియమాలను వివరిస్తూ ఫ్రిడ్‌మన్‌కి కీలక విషయాలు వెల్లడించారు. “భారతదేశంలో ప్రాచీనంగా ‘చాతుర్మాసం’ అనే సంప్రదాయం ఉంది. మాన్సూన్ కాలంలో మన శరీరంలో జీర్ణశక్తి మందగించవచ్చని భావిస్తారు. అందుకే ఈ కాలంలో రోజుకు ఒక్క భోజనం మాత్రమే చేయడం అనేక మంది పాటించే సంప్రదాయం. నా విషయంలో, ఇది జూన్ మధ్య నుంచి ప్రారంభమై దీపావళి వరకూ అంటే సుమారు నవంబర్ వరకు కొనసాగుతుంది. నాలుగున్నర నెలల పాటు రోజుకు ఒక్కసారే భోజనం చేస్తాను.” అని మోదీ అన్నారు.
శరన్నవరాత్రి – తొమ్మిది రోజుల ఉపవాసం
సెప్టెంబర్ లేదా అక్టోబర్‌లో జరిపే శరన్నవరాత్రి సమయంలో దేశవ్యాప్తంగా దుర్గా పూజను జరుపుకుంటారు. ఇది భక్తి, ధైర్యం, ఆధ్యాత్మిక నియంత్రణకు ప్రతీకంగా నిలుస్తుంది. ఈ తొమ్మిది రోజుల పాటు ప్రధాని మోదీ పూర్తిగా అన్నం ముట్టుకోరు. కేవలం వెచ్చని నీరు మాత్రమే తాగుతారు. “అయితే, వెచ్చని నీరు తాగడం నాకు కొత్తకాదు. ఇది నా జీవితంలో సహజంగా అలవాటు అయిపోయింది. అందుకే దీన్ని ఉపవాసంలో కొనసాగించటం అంత సవాలుగా అనిపించదు. మార్చి లేదా ఏప్రిల్‌లో మరో నవరాత్రి సంభవిస్తుంది, దీనిని ‘చైత్ర నవరాత్రి’ అంటారు. ఈ ఏడాది ఈ ఉపవాసం మార్చి 31న ప్రారంభమయ్యే అవకాశం ఉంది. ఈ తొమ్మిది రోజుల పాటు, ఒక నిర్దిష్టమైన పండు మాత్రమే తింటాను. ఉదాహరణకు, నేను పపాయాను ఎంచుకుంటే, ఆ తొమ్మిది రోజుల పాటు మరేదీ తినను. కేవలం ఒక్కసారి మాత్రమే పపాయాను తీసుకుంటాను. ఇదే నా ఉపవాస నియమం.” అని మోదీ వెల్లడించారు.
