అక్కినేని హీరో నాగ చైతన్య కొత్త ప్రయాణానికి శ్రీకారం చుట్టాడు. కారు రేసింగ్స్, ఫార్ములా వన్ పోటీలంటే ఎంతో అమితంగా ఇష్టపడే అక్కినేని నాగచైతన్య ఇప్పుడు అందులో భాగస్వామిగా మారాడు. ఇండియన్ రేసింగ్ ఫెస్టివల్లో పోటీపడే హైదరాబాద్ బ్లాక్ బర్డ్స్ ఫ్రాంచైజీని సొంతం చేసుకున్నాడు. ఈ జర్నీలో బీసీసీఐ మాజీ అధ్యక్షుడు సౌర‌భ్ గంగూలీతో పోటీ ప‌డ‌బోతున్నాడు! నాగచైతన్య రేసింగ్ టీమ్ ఇండియన్ రేసింగ్ ఫెస్టివల్ లో పోటీ ప‌డ‌నుంది. ఈ ఐఆర్ఎఫ్ ఫార్ములా 4 రేసింగ్‌లు ఆగ‌స్ట్ 24 నుంచి ప్రారంభం కానున్నాయి. నాగ చైత‌న్యకు రేసింగ్‌ల‌ంటే చాలా ఇష్టమన్న సంగతి తెలిసిందే. ఆయన రేసింగ్ బైక్‌లు, కార్లు న‌డుపుతోన్న ఫొటోలు, వీడియోలు చాలా సార్లు వైర‌ల్ అయ్యాయి. తనకు చిన్నప్పటి నుంచి మోటార్ స్పోర్ట్స్ అంటే ఎంతో ఇష్టపడతాననీ ఫార్ములా వన్ అంటే ఇంకా ఇష్టమని చైతు తెలిపాడు. ఈ రేసింగ్లోని హైస్పీడ్ డ్రామా, కార్లు, బైక్స్ తననెంత‌గానో ఆక‌ట్టుకుంటాయనీ ఐఆర్ఎఫ్ అనేది అభిమానులకు మరిచిపోలేని అనుభూతి అని అన్నాడు. ఈ రేస్తో కొత్త ప్రతిభ ప్రపంచానికి పరిచయం అవుతుందని చెప్పాడు.
